Mag-ingat sa “Tingog nin mga Estranghero”
Mag-ingat sa “Tingog nin mga Estranghero”
“Sa estranghero dai nanggad sinda masunod kundi madulag sa saiya, huli ta dai ninda midbid an tingog nin mga estranghero.”—JUAN 10:5.
1, 2. (a) Ano an nagin reaksion ni Maria kan apodon sia ni Jesus sa ngaran, asin anong sinabi ni Jesus kan enot an malinaw na ipinapaheling kan pangyayaring ini? (b) Ano an nagpapangyari sato na magdanay na harani ki Jesus?
PINAGMAMASDAN kan binuhay liwat na si Jesus an babae na nagtitindog harani sa linobngan sa saiya na daing laog. Midbid nia ining marhay. Sia si Maria Magdalena. Haros duwang taon bago kaiyan, pinarahay nia ini sa sanib nin demonyo. Poon kaidto ini nag-iba sa saiya asin sa saiyang mga apostol, na nag-aasikaso kan saindang pangaroaldaw na mga pangangaipo. (Lucas 8:1-3) Pero ngonyan, si Maria nagtatangis, na grabe an kamondoan huli ta naheling niang nagadan si Jesus, asin ngonyan nawara pati an saiyang bangkay! Kaya hinapot sia ni Jesus: “Babae, taano ta nagtatangis ka? Siisay an hinahanap mo?” Naghohonang sia an hardinero, ini nagsimbag: “Ginoo, kun kinua mo sia, sabihon mo sako kun saen mo sia ibinugtak, asin kukuanon ko sia.” Dangan si Jesus nagsabi: “Maria!” Tolos-tolos, namidbid nia an pamilyar na paagi nin pagtaram nia sa saiya. “Paratokdo!” an magayagaya niang kagsing. Asin kinugos nia sia.—Juan 20:11-18.
2 Malinaw na ipinapaheling kan pagkasaysay na ini sa nakakapahiro sa boot na paagi an sinabi ni Jesus kan enot. Ikinokomparar an saiyang sadiri sa sarong pastor asin an saiyang mga parasunod sa mga karnero, sinabi nia na inaapod kan pastor an saiyang sadiring karnero sa ngaran asin midbid ninda an saiyang tingog. (Juan 10:3, 4, 14, 27, 28) Tunay nanggad, kun paanong namimidbid nin sarong karnero an pastor kaini, namidbid man ni Maria an saiyang Pastor, si Cristo. Totoo man ini sa mga parasunod ni Jesus ngonyan. (Juan 10:16) Kun paanong an mapagrisang talinga nin sarong karnero nagpapangyari sa saiya na magdanay na harani sa saiyang pastor, an sato man na espirituwal na pagigin mapagrisa nagpapangyari sa sato na maingat na maglakaw sa mga lakad kan satong Marahay na Pastor, si Jesu-Cristo.—Juan 13:15; 1 Juan 2:6; 5:20.
3. Ano an nagkapirang hapot na ipinapagirumdom kan ilustrasyon ni Jesus manongod sa toril nin mga karnero?
3 Minsan siring, segun sa ilustrasyon man sanang iyan, an kakayahan nin sarong karnero na mamidbid an tingog nin mga tawo nagpapangyari na mamidbid kaiyan bako sana an katood kaiyan kundi pati an kalaban kaiyan. Mahalagang marhay iyan huli ta igwa nin tusong mga nagkokontra sa sato. Sairisay sinda? Paano sinda naghihiro? Paano niato mapoprotehiran an satong sadiri? Tanganing maaraman, helingon niato kun ano pa an sinabi ni Jesus sa saiyang ilustrasyon manongod sa toril nin mga karnero.
‘An Dai Minalaog Paagi sa Tata’
4. Segun sa ilustrasyon manongod sa pastor, siisay an sinusunod kan mga karnero, asin siisay an dai ninda sinusunod?
4 Sinabi ni Jesus: “An minalaog paagi sa tata iyo an pastor kan mga karnero. An sarong ini binubukasan kan bantay sa tata, asin an mga karnero naghihinanyog sa saiyang tingog, asin inaapod nia an saiyang mga karnero sa ngaran asin ginigiyahan sinda paluwas. Kun napaluwas na nia an gabos niang rogaring, sia minaenot sa sainda, asin an mga karnero nagsusunod sa saiya, huli ta midbid ninda an saiyang tingog. Sa estranghero dai nanggad sinda masunod kundi madulag sa saiya, huli ta dai ninda midbid an tingog nin mga estranghero.” (Juan 10:2-5) Mangnohon na tolong beses na ginamit ni Jesus an terminong “tingog.” Duwang beses siang nagtaram manongod sa tingog nin pastor, alagad sa ikatolong beses, nasambitan nia an “tingog nin mga estranghero.” Anong klaseng estranghero an boot sabihon ni Jesus?
5. Taano ta dai kita nagpapaheling nin pagkamapag-istimar sa klase nin estranghero na nasambitan sa Juan kapitulo 10?
5 An sinasabi ni Jesus bakong an klase nin estranghero na gusto niatong pahelingan nin pagkamapag-istimar—sarong termino na sa orihinal na lenguahe kan Biblia nangangahulogan nin “pagkamoot sa mga estranghero.” (Hebreo 13:2) Sa ilustrasyon ni Jesus, an estranghero bakong imbitadong bisita. Sia “dai minalaog sa toril nin mga karnero paagi sa tata kundi minasakat sa ibang lugar.” Sia ‘sarong parahabon asin tulisan.’ (Juan 10:1) Siisay an enot na indibiduwal na nasambitan sa Tataramon nin Dios na nagin parahabon asin tulisan? Si Satanas na Diablo. Manonompongan niato an ebidensia sa libro nin Genesis.
Kan Enot na Madangog an Tingog nin Sarong Estranghero
6, 7. Taano ta tama sanang maaapod na estranghero asin parahabon si Satanas?
6 Ilinaladawan kan Genesis 3:1-5 kun paano nadangog sa daga sa kaenot-enote an tingog nin sarong estranghero. Sinasabi kan pagkasaysay na dinolok ni Satanas an enot na babae, si Eva, paagi sa sarong halas asin nagtaram sa saiya sa mapandayang paagi. Totoo, sa pagkasaysay na ini si Satanas dai literal na inapod na “sarong estranghero.” Minsan siring, an saiyang aksion nagpapaheling na sa dakol na paagi kapareho sia kan estranghero na ilinadawan sa ilustrasyon ni Jesus na nakasurat sa Juan kapitulo 10. Estudyare an nagkapirang pagkakaagid.
7 Sinabi ni Jesus na indirekta an paagi nin pagdolok kan estranghero sa saiyang mga biktima sa toril nin mga karnero. Kaagid kaiyan, nagdolok si Satanas sa saiyang biktima sa indirektang paagi, na naggagamit nin halas. An tusong pamamaaging ini nagbuyagyag kun ano talaga si Satanas—sarong tusong nanlalaog. Dugang pa, an estranghero sa toril nin mga karnero may intension na habonan an lehitimong kagsadiri kan saiyang mga karnero. Sa katunayan, mas maraot pa sia kisa parahabon, huli ta an katuyohan man nia ‘manggadan patin manraot.’ (Juan 10:10) Kaagid kaiyan, si Satanas sarong parahabon. Sa pagdaya ki Eva, hinabon nia an kaimbodan kaini sa Dios. Dugang pa, si Satanas nagdara man nin kagadanan sa mga tawo. Huli kaini, sia sarong paragadan.
8. Paano biniribid ni Satanas an mga tataramon asin motibo ni Jehova?
8 An pandadaya ni Satanas risang-risa sa paagi nin pagbiribid nia kan mga tataramon asin motibo ni Jehova. “Ano totoo na an Dios nagsabi na dai kamo magkakan sa gabos na kahoy?” an hapot nia ki Eva. Si Satanas sagin man ngayang nabigla, na garo baga sinasabi nia: ‘Paanong an Dios magigin grabe kabakong rasonable?’ Idinugang nia: “Naaaraman nin Dios na sa mismong aldaw na kamo kumakan kaiyan mabubuklat an saindong mga mata.” Mangnoha an saiyang mga tataramon: “Naaaraman nin Dios.” Garo man sana sinabi ni Satanas: ‘Aram ko an aram nin Dios. Aram ko an saiyang mga motibo, asin maraot an mga iyan.’ (Genesis 2:16, 17; 3:1, 5) Makamomondo, dai tuminalikod si Adan asin Eva sa tingog kan estrangherong ini. Imbes, hinimate ninda iyan asin nagdara nin grabeng sakit sa saindang sadiri asin saindang mga aki.—Roma 5:12, 14.
9. Taano ta maninigo niatong laoman na madadangog ngonyan an tingog nin mga estranghero?
9 Ginagamit ni Satanas an kaagid na mga paagi tanganing dayaon an banwaan nin Dios ngonyan. (Kapahayagan 12:9) Sia “an ama kan kaputikan,” asin an mga arog niang naghihingoa na dayaon an mga lingkod nin Dios iyo an saiyang mga aki. (Juan 8:44) Helingon niato ngonyan an nagkapirang paagi na nadadangog ngonyan an tingog kan mga estrangherong ini.
Kun Paano Nadadangog Ngonyan an Tingog nin mga Estranghero
10. Ano an sarong paagi na nadadangog an tingog nin mga estranghero?
10 Mapandayang mga pangangatanosan. Si apostol Pablo nagsabi: “Dai kamo magpadara sa manlaenlaen asin dai midbid na mga katokdoan.” (Hebreo 13:9) Anong klaseng mga katokdoan? Mantang puede ‘kitang darahon’ kaiyan, malinaw na an boot sabihon ni Pablo iyo an mga katokdoan na nagpapaluya sa satong pagkatimbang sa espirituwal. Sairisay an nagtataram kan siring na dai midbid na mga katokdoan? Sinabihan ni Pablo an sarong grupo nin Kristianong kamagurangan: “Hale mismo dian sa saindo may mga lalaking matindog asin mataram nin biribid na mga bagay tanganing maguyod ninda sa sainda an mga disipulo.” (Gibo 20:30) Tunay nanggad, ngonyan siring kaidtong kaaldawan ni Pablo, may nagkapirang indibiduwal na dating kabtang kan Kristianong kongregasyon na ngonyan nagpoprobar na dayaon an mga karnero paagi sa pagtaram nin “biribid na mga bagay”—mga tataramon na bakong gabos totoo asin biyong kaputikan. Siring kan pagkasabi ni apostol Pedro, naggagamit sinda nin “mga tataramon na palsipikado”—mga tataramon na kapareho kan katotoohan alagad sa katunayan siring sa daing halagang palsipikadong kuarta.—2 Pedro 2:3.
11. Paano ibinubuyagyag kan mga tataramon na yaon sa 2 Pedro 2:1, 3 an paagi asin intension kan mga apostata?
11 Orog pang ibinuyagyag ni Pedro an mga paagi kan mga apostata sa pagsabing an mga ini “hilom na magdadara sa laog nin nakakalaglag na mga sekta.” (2 Pedro 2:1, 3) Kun paanong an parahabon sa ilustrasyon ni Jesus manongod sa toril nin mga karnero dai minalaog “paagi sa tata kundi minasakat sa ibang lugar,” an mga apostata minadolok man sa sato sa tusong mga paagi. (Galacia 2:4; Judas 4) Ano an saindang intension? Idinugang ni Pedro: “Aaprobetsaran ninda kamo.” Tunay nanggad, ano man an sabihon kan mga apostata tanganing ipangatanosan an sadiri, an tunay na intension kan mga nanlalaog iyo an ‘manhabon asin manggadan patin manraot.’ (Juan 10:10) Mag-ingat sa siring na mga estranghero!
12. (a) Paano kita puedeng isapeligro kan satong mga pag-iriba sa tingog nin mga estranghero? (b) Ano an pagkakaagid kan mga taktika ni Satanas asin kan sa mga estranghero ngonyan?
12 Nakakadanyar na kaibaiba. An tingog nin mga estranghero puede man na madangog paagi sa mga kaibaiba niato. An nakakadanyar na pag-iriba nangorognang nagtataong peligro sa mga hoben. (1 Corinto 15:33) Girumdomon, an pinunteriya ni Satanas si Eva—an mas hoben asin kulang nin kabatidan sa enot na mag-agom na tawo. Kinombensir nia si Eva na labi-labi an pamomogol ni Jehova sa katalingkasan nia, mantang sa katunayan an kabaliktaran an totoo. Namotan ni Jehova an saiyang linalang na tawo asin nagmakolog sa saindang ikakarahay. (Isaias 48:17) Kaagid kaiyan ngonyan, hinihingoa kan mga estranghero na kombensiron kamong mga hoben na labi-labi an pamomogol kan saindong Kristianong mga magurang sa saindong katalingkasan. Paano kamo puedeng maapektaran kan siring na mga estranghero? Inadmitir nin sarong Kristianang daragita: “Sa kadikit na panahon an sakong pagtubod medyo napaluya kan sakong mga kaklase. Pirme nindang sinasabi na mapamogol asin bakong rasonable an sakong relihion.” Pero, an totoo iyo na namomotan kamo kan saindong mga magurang. Kaya kun maghingoa an saindong mga kaeskuela na kombensiron kamo na magdeskompiar sa saindong mga magurang, dai madaya siring kan nangyari ki Eva.
13. Ano an madonong na ginibo ni David, asin ano an sarong paagi na maaarog niato sia?
13 Mapadapit sa nakakadanyar na pag-iriba, an salmistang si David nagsabi: “Dai ako nagtukaw sa kaibanan nin mga tawong putikon; asin dai man ako naglaog sa kaibanan kan mga nagtatago kan saindang tunay na pagkatawo.” (Salmo 26:4) Sa giraray, naririsa daw nindo an karakteristiko na parateng maheheling sa mga estranghero? Itinatago ninda an saindang tunay na pagkatawo—kun paanong itinago ni Satanas an saiyang midbidan paagi sa paggamit nin sarong halas. Ngonyan, itinatago nin nagkapirang inmoral na tawo an saindang midbidan asin tunay na mga intension paagi sa paggamit kan Internet. Sa mga chat room, an maraot na mga nasa edad na tibaad magpamidbid pa ngani na mga hoben tanganing akiton kamo sa sarong silo. Mga hoben, tabi na magmaan nanggad kamong marhay ta tibaad madanyaran kamo sa espirituwal.—Salmo 119:101; Talinhaga 22:3.
14. Paano ipinupublikar kan media, kun beses, an tingog nin mga estranghero?
14 Putik na mga sahot. Minsan ngani daing kinakampihan an nagkapirang bareta manongod sa Mga Saksi ni Jehova, kun beses an media nagpapagamit sa pagbrodkast nin may kinakampihan na tingog nin mga estranghero. Halimbawa, sa sarong nasyon an sarong bareta putik na nagsabi na sinuportaran kan mga Saksi an rehimen ni Hitler durante kan Guerra Mundial II. Sa saro pa, may sarong report na sinahotan an mga Saksi na nanraraot nin mga simbahan. Sa nagkapirang nasyon an mga Saksi sinasahotan kan media nin pagsayumang ipabolong an saindang mga aki asin siring man nin tuyong pagkonsinte sa magabat na mga kasalan na nakomiter nin mga kapagtubod. (Mateo 10:22) Dawa siring, an sinserong mga tawo na personalmenteng nakakamidbid sa sato nakakaaram na putik an mga sahot na iyan.
15. Taano ta bakong madonong na paniwalaan an gabos na ipinepresentar sa media?
15 Ano an maninigo niatong gibohon kun kita napapaatubang sa mga sahot na pinapalakop kan tingog nin siring na mga estranghero? Marahay na isapuso niato an konseho sa Talinhaga 14:15: “An siisay man na daing kabatidan nagtutubod sa lambang tataramon, alagad an alisto an isip ineestudyaran an saiyang mga lakad.” Bakong madonong na paniwalaan an gabos na ipinepresentar bilang katotoohan sa media. Minsan ngani bako nanggad kitang deskompiado sa gabos na sekular na impormasyon, minimidbid niato na “an bilog na kinaban namumugtak sa kapangyarihan kan maraot.”—1 Juan 5:19.
“Baloon an Ipinasabong na mga Tataramon”
16. (a) Paano iiniilustrar kan paghiro nin literal na mga karnero an pagigin totoo kan mga tataramon ni Jesus na yaon sa Juan 10:4? (b) Dinadagka kita kan Biblia na gibohon an ano?
16 Pero, paano niato masesegurado kun baga katood o kalaban an kaatubang niato? Bueno, sinabi ni Jesus na an mga karnero nagsusunod sa pastor “huli ta midbid ninda an saiyang tingog.” (Juan 10:4) Bakong an literal na itsura kan pastor an nagpapahiro sa mga karnero na sumunod sa saiya; kundi an saiyang tingog. Isinasaysay sa sarong libro manongod sa mga kadagaan sa Biblia na hiningako kaidto nin sarong bisita duman na namimidbid kan mga karnero an saindang pastor paagi sa saiyang gubing, bakong sa tingog. Nagsimbag an sarong pastor na an tingog an namimidbid ninda. Tanganing patunayan ini, nakiribay sia nin gubing sa estranghero. Sulot an gubing kan pastor, inapod kan estranghero an mga karnero, alagad dai sinda naghiro. Dai ninda midbid an saiyang tingog. Pero, kan apodon sinda kan pastor, minsan ngani iba an sulot niang gubing, nagdorolok tolos an mga karnero. Sa siring, tibaad may saro na garo pastor an itsura, alagad para sa mga karnero, dai iyan nagpapatunay na sia pastor talaga. Garo man sana binabalo kan mga karnero an tingog kan nag-aapod, na ikinokomparar iyan sa tingog kan pastor. Iyan man an ipinapagibo sa sato kan Tataramon nin Dios—“baloon an ipinasabong na mga tataramon kun baga iyan gikan sa Dios.” (1 Juan 4:1; 2 Timoteo 1:13) Ano an makakatabang sa sato na gibohon iyan?
17. (a) Paano kita nagigin pamilyar sa tingog ni Jehova? (b) An kaaraman dapit ki Jehova nagpapangyari sa sato na gibohon an ano?
17 Siempre, mientras na mas midbid niato an tingog o mensahe ni Jehova, mas pasil man niatong maririsa an tingog nin sarong estranghero. Itinotokdo kan Biblia kun paano ta mapapatalubo an siring na kaaraman. Iyan nagsasabi: “An saimong mga talinga makakadangog nin tataramon sa likod mo na nagsasabi: ‘Iyo ini an dalan. Maglakaw kamo dian.’” (Isaias 30:21) An “tataramon” na iyan sa likod ta gikan sa Tataramon nin Dios. Sa kada pagbasa niato kan Tataramon nin Dios, garo man sana nadadangog ta an tingog kan satong Dakulang Pastor, si Jehova. (Salmo 23:1) Huli kaini, mientras na orog niatong pinag-aadalan an Biblia, orog man kitang nagigin pamilyar sa tingog nin Dios. An lubos na kaaraman na iyan nagpapangyari man sa sato na marisa tolos-tolos an tingog nin mga estranghero.—Galacia 1:8.
18. (a) Ano an kalabot sa pakamidbid sa tingog ni Jehova? (b) Segun sa Mateo 17:5, taano ta maninigo niatong kuyogon an tingog ni Jesus?
18 Ano pa an kalabot sa pakamidbid sa tingog ni Jehova? Apuera sa pagdangog, kalabot man dian an pagkuyog. Mangnoha giraray an Isaias 30:21. An Tataramon nin Dios nagsasabi: “Iyo ini an dalan.” Iyo, paagi sa pag-adal sa Biblia, nadadangog niato an paggiya ni Jehova. Sunod, sia nagboboot: “Maglakaw kamo dian.” Gusto ni Jehova na kita humiro sono sa satong nadadangog. Sa siring, paagi sa pag-aplikar kan satong nanonodan, ipinapaheling niato na bako sanang nadangog niato an tingog ni Jehova kundi hinihimate man niato iyan. (Deuteronomio 28:1) An pagkuyog sa tingog ni Jehova nangangahulogan man nin pagkuyog sa tingog ni Jesus, huli ta sinabi mismo ni Jehova na gibohon ta iyan. (Mateo 17:5) Ano an sinasabi ni Jesus, an Marahay na Pastor, na dapat gibohon ta? Tinotokdoan nia kita na gumibo nin mga disipulo asin magtiwala sa “maimbod asin mapagmansay na oripon.” (Mateo 24:45; 28:18-20) An pagkuyog sa saiyang tingog nangangahulogan kan satong buhay na daing sagkod.—Gibo 3:23.
‘Madulag Sinda sa Saiya’
19. Ano an maninigo na magin reaksion niato sa tingog nin mga estranghero?
19 Kun siring, ano an maninigong magin reaksion niato sa tingog nin mga estranghero? Siring kan ginigibo nin mga karnero. Si Jesus nagsasabi: “Sa estranghero dai nanggad sinda masunod kundi madulag sa saiya.” (Juan 10:5) Duwa an satong reaksion. Enot, “dai nanggad [kita] masunod” sa sarong estranghero. Iyo, desidido niatong sasayumahan an sarong estranghero. Sa katunayan, sa Biblikong Griego, an mga tataramon na “dai nanggad” nangangahulogan kan pinakamapuersang paagi nin pagsabi nin pagsayuma sa lenguaheng iyan. (Mateo 24:35; Hebreo 13:5) Ikaduwa, kita “madulag sa saiya,” o marayo sa saiya. Iyan sana an tamang reaksion sa mga an katokdoan bakong sono sa tingog kan Marahay na Pastor.
20. Ano an magigin reaksion niato kun kita mapaatubang sa (a) mapandayang mga apostata, (b) nakakadanyar na mga kaibaiba, (c) may kinakampihan na mga report sa media?
20 Kun siring, kun napapaatubang sa mga nagpapahayag nin mga ideya nin apostata, gusto niatong gibohon an sinasabi kan Tataramon nin Dios: “Bantayan nindo an mga ginigikanan nin pagkabaranga asin nin mga pagkasingkog tumang sa katokdoan na nanodan nindo, asin likayan nindo sinda.” (Roma 16:17; Tito 3:10) Kaagid kaiyan, gustong iaplikar kan Kristianong mga hoben na napapaatubang sa mga peligro nin nakakadanyar na mga kaibaiba an konseho ni Pablo na itinao sa hoben na si Timoteo: “Dumulag ka sa mga mawot na konektado sa pagkahoben.” Asin kun mapaatubang sa putik na mga sahot sa media, gigirumdomon niato an dugang pang sadol ni Pablo ki Timoteo: “Sinda [an mga naghihinanyog sa tingog nin mga estranghero] makiling sa falsong mga estorya. Pero ika, papagdanayon mo an toltol na pag-iisip sa gabos na bagay.” (2 Timoteo 2:22; 4:3-5) Dawa gurano pa garo baga kamapanuyo an tingog nin mga estranghero, dudulagan niato an gabos na makakaraot sa satong pagtubod.—Salmo 26:5; Talinhaga 7:5, 21; Kapahayagan 18:2, 4.
21. Anong balos an naghahalat sa mga nagsisikwal sa tingog nin mga estranghero?
21 Paagi sa pagsikwal sa tingog nin mga estranghero, hinihimate kan mga Kristianong linahidan nin espiritu an mga tataramon kan Marahay na Pastor na manonompongan sa Lucas 12:32. Dian sinasabi ni Jesus sa sainda: “Dai kamo matakot, sadangoton na aripompon, huli ta an saindong Ama nag-oyon na itao sa saindo an kahadean.” Siring man, an “ibang karnero” galagang inaantisipar na madangog an mga tataramon ni Jesus: “Madia, kamong mga binendisyonan kan sakong Ama, manaha nindo an kahadean na inandam para sa saindo poon pa kan pagtugdas kan kinaban.” (Juan 10:16; Mateo 25:34) Kanigoan kanakakaogmang balos an naghahalat sa sato kun sasayumahan niato an “tingog nin mga estranghero”!
Nagigirumdoman daw Nindo?
• Taano ta angay ki Satanas an paglaladawan sa estranghero na nasambitan sa ilustrasyon ni Jesus manongod sa toril nin mga karnero?
• Paano nadadangog ngonyan an tingog nin mga estranghero?
• Paano niato mamimidbid an tingog nin mga estranghero?
• Ano an maninigo na magin reaksion niato sa tingog nin mga estranghero?
[Mga Hapot Para sa Pag-adal]
[Ritrato sa pahina 15]
Namidbid ni Maria si Cristo
[Ritrato sa pahina 16]
Bakong direkta an pagrani kan estranghero sa mga karnero
[Ritrato sa pahina 18]
Ano an satong reaksion sa tingog nin mga estranghero?