Mga Hapot Hale sa mga Parabasa

Taano ta sinasabot kan Mga Saksi ni Jehova na literal asin bakong simboliko an kabilangan na 144,000 na nasambitan sa libro nin Kapahayagan?

Si apostol Juan nagsurat: “Nadangog ko an kabilangan kan mga tinatakan, sanggatos may apat na polo may apat na ribo.” (Kapahayagan 7:4) Sa Biblia, an fraseng “kan mga tinatakan” nanonongod sa grupo nin mga indibiduwal na pinili hale sa katawohan tanganing mamahala kaiba ni Cristo sa langit sa maabot na Paraisong daga. (2 Corinto 1:​21, 22; Kapahayagan 5:​9, 10; 20:6) Sinasabot na literal an saindang kabilangan na 144,000 huli sa nagkapirang dahelan. An sarong dahelan makukua sa pinakaharaning konteksto kan Kapahayagan 7:4.

Pagkatapos na sabihon ki apostol Juan paagi sa bisyon an manongod sa grupong ini nin 144,000 na indibiduwal, ipinaheling sa saiya an saro pang grupo. Ilinaladawan ni Juan an ikaduwang grupong ini bilang “sarong dakulang kadaklan, na dai nin siisay man na makakabilang, hale sa gabos na nasyon asin tribo asin banwaan patin tataramon.” An dakulang kadaklan na ini nanonongod sa mga makakaligtas sa nagdadangadang na “dakulang kahorasaan,” na matapos kan presenteng maraot na kinaban.​—Kapahayagan 7:​9, 14.

Minsan siring, mangnoha an ipinaparisa ni Juan na pagkakalaen kan bersikulo 4 asin 9 kan Kapahayagan kapitulo 7. Sinasabi nia na an enot na grupo, ‘an mga tinatakan,’ igwa nin talaan na kabilangan. Minsan siring, an ikaduwang grupo, “an sarong dakulang kadaklan,” mayo nin talaan na kabilangan. Huli kaiyan, lohiko sanang saboton na literal an kabilangan na 144,000. Kun simboliko an kabilangan na 144,000 asin nanonongod sa sarong grupo na talagang mayo nin kabilangan, mawawara an puersa kan pagkakalaen kan duwang bersikulong iyan. Sa siring, marigon na ipinaparisa kan konteksto na kaipuhan na saboton na literal an kabilangan na 144,000.

An manlaenlaen na intelektuwal sa Biblia, kan nakaagi asin sa presente, pareho an nagin konklusyon​—an boot sabihon, literal an kabilangan. Halimbawa, nagkokomento manongod sa Kapahayagan 7:​4, 9, nagsabi an Britanong leksikograpo na si Dr. Ethelbert W. Bullinger mga 100 na taon na an nakaagi: “Simpleng deklarasyon iyan nin katotoohan: sarong may talaan na kabilangan na kabaliktaran nin daing talaan na kabilangan sa mismong kapitulong ini.” (The Apocalypse or “The Day of the Lord,” pahina 282) Mas bago pa sana, si Robert L. Thomas, Jr., propesor sa Bagong Tipan sa The Master’s Seminary sa Estados Unidos, nagsurat: “An pagpamugtak sa simbolismo mayo nin marigon na basehan.” Idinugang nia: “Sarong may talaan na kabilangan iyan [an 7:4] na kabaliktaran kan daing talaan na kabilangan kan 7:9. Kun sasaboton na simboliko iyan, mayo nang kabilangan sa libro an puedeng saboton na literal.”​—Revelation: An Exegetical Commentary, Tomo 1, pahina 474.

An iba nangangatanosan na mantang simbolikong marhay an pananaram sa Kapahayagan, an gabos na kabilangan na manonompongan sa librong ini, kaiba na an kabilangan na 144,000, kaipuhan na simboliko. (Kapahayagan 1:​1, 4; 2:10) Pero, malinaw nanggad na sala an konklusyon na iyan. Totoo, an Kapahayagan igwa nin dakol na  simbolikong kabilangan, alagad igwa man iyan nin literal na mga kabilangan. Halimbawa, nagtataram si Juan manongod sa “kagduwang ngaran kan kagduwang apostol kan Kordero.” (Kapahayagan 21:14) Malinaw nanggad, literal an kabilangan na 12 na nasambit sa bersikulong ini, bakong simboliko. Dugang pa, si apostol Juan nagsurat manongod sa “sangribong taon” kan paghade ni Cristo. An kabilangan na iyan kaipuhan man na saboton na literal siring kan ipinapaheling kan maingat na pag-estudyar sa Biblia. * (Kapahayagan 20:​3, 5-7) Huli kaini, kun baga sasaboton na literal o simboliko an sarong kabilangan sa Kapahayagan depende sa kamugtakan asin konteksto kan bersikulo na igwa kan kabilangan na iyan.

An konklusyon na literal an kabilangan na 144,000 asin nanonongod sa sarong limitadong kabilangan nin mga indibiduwal, na medyo sadit na grupo kun ikokomparar sa “dakulang kadaklan,” minaoyon man sa iba pang teksto sa Biblia. Halimbawa, sa huring parte kan bisyon na inako ni apostol Juan, ilinadawan an 144,000 na “binakal hale sa katawohan bilang enot na mga bunga.” (Kapahayagan 14:​1, 4) An pananaram na “enot na mga bunga” nanonongod sa pagpili nin sarong sadit na parte. Siring man, kan si Jesus yaon pa digdi sa daga, nagtaram sia manongod sa mga mamamahala kaiba nia sa saiyang langitnon na Kahadean asin inapod sinda na “sadangoton na aripompon.” (Lucas 12:32; 22:29) Tunay nanggad, pipira sana an hale sa katawohan na mamamahala sa langit kun ikokomparar sa gikan sa katawohan na mag-eerok sa maabot na Paraisong daga.

Huli kaini, pinapatunayan kan konteksto kan Kapahayagan 7:4 asin konektadong mga tataramon na manonompongan sa iba pang kabtang kan Biblia na an kabilangan na 144,000 maninigong saboton na literal. Nanonongod iyan sa mga mamamahala sa langit kaiba ni Cristo sa sarong paraisong daga, na mapapano nin dakula asin daing talaan na kabilangan nin maogmang mga tawo na nagsasamba ki Jehova Dios.​—Salmo 37:29.

[Nota sa Ibaba]

[Blurb sa pahina 31]

Limitado sa 144,000 an kabilangan nin langitnon na mga paramana

[Ritrato sa pahina 31]

An “dakulang kadaklan” dai mabilang

[Picture Credit Line sa pahina 31]

Mga bitoon: Sa karahayan nin boot kan Anglo-Australian Observatory, rinetrato ni David Malin