Pamurawayon an Dios “Paagi sa Sarong Ngoso”

‘Paagi sa sarong ngoso pamurawayon an Dios asin Ama kan satong Kagurangnan na Jesu-Cristo.’​—ROMA 15:6.

1. Anong leksion manongod sa pagresolber sa magkakalaen na punto de vista an itinao ni Pablo sa mga kapagtubod?

BAKONG gabos na Kristiano parareho an pinipili o gusto. Pero, an gabos na Kristiano dapat na sararong maglakaw sa dalan pasiring sa buhay. Posible daw iyan? Iyo, kun dai niato ginigibong dakulang isyu an saradit na pagkakalaen. Sarong leksion iyan na itinao ni apostol Pablo sa mga kapagtubod kan enot na siglo. Paano nia ipinaliwanag an mahalagang puntong ini? Asin paano niato ikakaaplikar ngonyan an saiyang ipinasabong na konseho?

An Halaga nin Kristianong Pagkasararo

2. Paano idinoon ni Pablo an pangangaipo nin pagkasararo?

² Aram ni Pablo na mahalagang marhay an Kristianong pagkasararo, asin nagtao sia nin marahayon na konseho tanganing tabangan an mga Kristiano na magpatiriostios sa pagkamoot. (Efeso 4:1-3; Colosas 3:12-14) Minsan siring, pakatapos na maestablisar an dakol na kongregasyon asin madalaw an iba pa sa laog nin labing 20 taon, aram nia na puedeng magin angat an pagpapadanay nin pagkasararo. (1 Corinto 1:11-13; Galacia 2:11-14) Sa siring, sinadol nia an mga kapagtubod na nag-eerok sa Roma: “Itogot logod . . . kan Dios na nagtatao nin pakatagal asin karangahan . . . na paagi sa sarong ngoso kamo oroyon na magpamuraway sa Dios asin Ama kan satong Kagurangnan na Jesu-Cristo.” (Roma 15:​5, 6) Ngonyan, dapat man niatong pamurawayon si Jehova Dios “paagi sa sarong ngoso” bilang nagkakasararong grupo kan saiyang banwaan. Kumusta daw kita sa bagay na ini?

3, 4. (a) Ano an laen-laen na pinaghalean kan mga Kristiano na nasa Roma? (b) Paano nahimo kan mga Kristiano sa Roma na paglingkodan si Jehova “paagi sa sarong ngoso”?

³ An dakol na Kristiano sa Roma personal na katood ni Pablo. (Roma 16:3-16) Minsan ngani laen-laen an pinaghalean ninda, inako ni Pablo an gabos niang tugang bilang “mga namomotan na marhay nin Dios.” Isinurat nia: “Ako nagpapasalamat sa sakong Dios paagi ki Jesu-Cristo manongod sa saindo gabos, huli ta an saindong pagtubod nababareta sa bilog na kinaban.” Malinaw nanggad, an mga taga Roma arogan sa dakol na paagi. (Roma 1:​7, 8; 15:14) Kadungan kaiyan, an nagkapirang miembro kan kongregasyon may laen-laen na punto de vista sa nagkapirang bagay. Mantang an mga Kristiano ngonyan may laen-laen na pinaghalean asin kultura, an pag-adal sa ipinasabong na konseho ni Pablo manongod sa kun paano reresolberan an mga pagkakalaen makakatabang sa sainda na magtaram “paagi sa sarong ngoso.”

⁴ Sa Roma igwa nin mga nagtutubod na Judio sagkod Hentil. (Roma 4:1; 11:13) An nagkapirang Judiong Kristiano minalataw na padagos na sinusunod an nagkapirang kostumbre na inootob ninda kaidto sa irarom kan Ley ni Moises, minsan ngani maninigo kutanang aram ninda na an siring na mga kaugalean dai kaipuhan para sa kaligtasan. Sa ibong na lado, inako kan dakol na Judiong Kristiano na pinatalingkas na sinda kan atang ni Cristo sa mga pangangalad na inotob ninda bago nagin mga Kristiano. Bilang resulta, liniwat ninda an nagkapira nindang personal na mga ugale asin kostumbre. (Galacia 4:8-11) Pero, siring kan sinabi ni Pablo, an gabos “namomotan na marhay nin Dios.” An gabos puedeng mag-omaw sa Dios “paagi sa sarong ngoso” kun papagdadanayon ninda an tamang aktitud nin isip dapit sa lambang saro. Kita ngonyan puedeng nagkakalaenlaen man an punto de vista manongod sa nagkapirang bagay, kaya marahay na maingat niatong estudyaran kun paano ipinaliwanag ni Pablo an mahalagang prinsipyo na iyan.​—Roma 15:4.

 “Akoon Nindo an Lambang Saro”

5, 6. Taano ta nagkaigwa nin mga pagkakalaen sa punto de vista sa kongregasyon sa Roma?

⁵ Sa saiyang surat sa mga taga Roma, si Pablo nagtaram manongod sa sarong situwasyon na may pagkalaenlaen an mga opinyon. Sia nagsurat: “An sarong tawo may pagtubod na kakanon an gabos na bagay, alagad an tawong maluya nagkakakan nin gulay.” Taano ta siring kaiyan? Bueno, sa irarom kan Ley ni Moises, dai puedeng kakanon an karneng orig. (Roma 14:2; Levitico 11:7) Minsan siring, an Ley na iyan bako nang obligatoryo pagkagadan ni Jesus. (Efeso 2:15) Dangan, tolo may kabangang taon pagkagadan ni Jesus, sinabihan nin sarong anghel si apostol Pedro na sa punto de vista nin Dios daing kakanon na maninigong ibilang na maramog. (Gibo 11:7-12) Nasa isip an mga bagay na ini, nagsaboot an nagkapirang Judiong Kristiano na puede sindang kumakan nin karneng orig​—o kumakan nin iba pang kakanon na ibinawal sa irarom kan Ley.

⁶ Minsan siring, an mismong ideya nin pagkakan kan dati maating mga kakanon na idto posibleng ikinabalde kan ibang Judiong mga Kristiano. An mga sensitibong idto tibaad natural nang nakokolgan an boot na maheling an saindang Judiong mga tugang ki Cristo na nagkakakan nin siring na kakanon. Dugang pa, an nagkapirang Kristianong Hentil, na an pinaghalean na relihion posible na nungkang nagkaigwa nin ibinawal na mga kakanon, tibaad nadepisilan na isipon kun taano ta gigibohon na isyu nin siisay man an may labot sa kakanon. Siempre, bakong sala para sa saro an lumikay sa nagkapirang kakanon, basta dai nia iiniinsistir na an siring na paglikay kaipuhan tanganing magkamit nin kaligtasan. Pero, an magkalaen na mga punto de vista puedeng madaling nakapukaw nin kontrobersia sa laog kan kongregasyon. Kinaipuhan kan mga Kristiano sa Roma na mag-ingat na an siring na mga pagkakalaen dai makaolang sa sainda sa pagpamuraway sa Dios “paagi sa sarong ngoso.”

7. Nagkaigwa nin anong magkalaen na mga punto de vista may labot sa pag-otob nin sarong espesyal na aldaw kada semana?

⁷ Si Pablo nagtatao nin ikaduwang halimbawa: “Hinohokoman nin sarong tawo an sarong aldaw bilang nakakalabi sa iba; hinohokoman nin saro pang tawo an sarong aldaw bilang kapareho kan gabos na iba pa.” (Roma 14:5a) Segun sa Ley ni Moises, dai puedeng magtrabaho kun Sabbath. Dawa an pagbiahe estriktong ibinabawal sa aldaw na iyan. (Exodo 20:8-10; Mateo 24:20; Gibo 1:12) Minsan siring, kan inabolisar an Ley, dai na  sinusunod an mga pagbabawal na idto. Pero, an nagkapirang Judiong Kristiano tibaad nag-aalangan na gumibo nin ano man na trabaho o magbiahe nin harayo sa aldaw na dati ibinibilang nindang sagrado. Dawa pakatapos na magin mga Kristiano, tibaad eksklusibong itinagama ninda an ikapitong aldaw para sa espirituwal na mga katuyohan, minsan ngani sa punto de vista nin Dios bako nang balido an Sabbath. Sala daw na gibohon ninda iyan? Dai, basta dai ninda iiniinsistir na hinahagad nin Dios an pag-otob kan Sabbath. Huli kaini, bilang konsiderasyon sa konsensia kan saiyang mga tugang na Kristiano, si Pablo nagsurat: “An lambang tawo magin biyong kombensido sa saiyang sadiring pag-iisip.”​—Roma 14:5b.

8. Dawa ngani puede sindang magpaheling nin konsiderasyon sa konsensia nin iba, ano an dai dapat gibohon kan mga Kristiano sa Roma?

⁸ Minsan siring, dawa ngani maboot na ineenkaminar an saiyang mga tugang na magin mapasensia sa mga nasasakitan pa sa mga bagay na may labot sa konsensia, marigon na kinondenar ni Pablo an mga naghihingoang piriton an mga kapagtubod na sumunod sa Ley ni Moises bilang sarong kahagadan para sa pagkamit nin kaligtasan. Halimbawa, kan mga 61 C.E., isinurat ni Pablo an libro nin Hebreo, sarong mapuersang surat sa Judiong mga Kristiano na ipinapaliwanag nin malinaw na marhay na an pagsunod sa Ley ni Moises mayo na nin halaga huli ta an mga Kristiano igwa nin nakakalabing paglaom basado sa atang na pantubos ni Jesus.​—Galacia 5:1-12; Tito 1:​10, 11; Hebreo 10:1-17.

9, 10. Ano an maninigong dai paggibohon kan mga Kristiano? Ipaliwanag.

⁹ Siring kan naheling niato, ipinapangatanosan ni Pablo na an magkalaen na mga pagpili dai kaipuhan na magsapeligro sa pagkasararo sagkod na mayo man nin malinaw na nababalgang Kristianong mga prinsipyo. Huli kaini, hinapot ni Pablo an mga Kristiano na mas maluya an konsensia: “Tadaw ta hinohokoman mo an saimong tugang?” Asin hinapot nia an mga mas makosog an konsensia (idto gayod na tinotogotan kan saindang konsensia na magkakan nin nagkapirang kakanon na ibinawal kaidto sa irarom kan Ley o magtrabaho kun Sabbath): “Tadaw man ta minemenos mo an saimong tugang?” (Roma 14:10) Segun ki Pablo, an mga Kristiano na mas maluya an konsensia dapat na likayan an pagkondenar sa saindang mga tugang na may mas mahiwas na punto de vista. Kadungan kaiyan, an mga Kristiano na makosog an konsensia dai dapat na menoson idtong an konsensia maluya pa sa nagkapirang bagay. Maninigong igalang kan gabos an tamang motibo nin iba asin dai “mag-isip dapit sa [saindang] sadiri nin orog kisa maninigong isipon.”​—Roma 12:​3, 18.

¹⁰ Ipinaliwanag ni Pablo an timbang na punto de vista sa paaging ini: “Dai pagmenoson kan nagkakakan an dai nagkakakan, asin dai hokoman kan dai nagkakakan an nagkakakan, huli ta inaako nin Dios an sarong iyan.” Dugang pa, sinabi nia: “Inako man kita kan Cristo, para sa kamurawayan nin Dios.” Mantang an mga makosog asin maluya an konsensia pareho inaako nin Dios asin ni Cristo, kita maninigo na magkaigwa man nin  siring kaiyan na aktitud asin ‘akoon an lambang saro.’ (Roma 14:3; 15:7) Siisay an tamang makontra kaiyan?

An sa Magturugang na Pagkamoot Nagbubunga nin Pagkasararo Ngonyan

11. Anong daing kaagid na situwasyon an nangyari kan kaaldawan ni Pablo?

¹¹ Sa saiyang surat sa mga taga Roma, si Pablo nagtataram manongod sa sarong daing kaagid na situwasyon. Inabolisar pa sana ni Jehova kaidto an sarong tipan asin inestablisar an sarong bagong tipan. An nagkapira nasasakitan na mag-adaptar. Dai nangyayari ngonyan an mismong situwasyon na iyan, alagad kun beses tibaad may lumataw na kaagid na mga isyu.

12, 13. Ano an nagkapirang situwasyon na an mga Kristiano ngonyan makakapaheling nin konsiderasyon sa konsensia kan saindang mga tugang?

¹² Halimbawa, an sarong Kristiana tibaad dating miembro nin sarong relihion na nagdodoon nin simpleng paggubing asin itsura. Kan akoon nia an katotoohan, tibaad masakitan siang mag-adaptar sa ideya na dai man ibinabawal an paggubing nin mabini, makolor na gubing sa angay na mga okasyon o paggamit nin tama sanang makeup. Huling mayo nin prinsipyo sa Biblia na napapalabot, bakong tama para sa siisay man na hingoahon na kombensiron an Kristianang iyan na balgahon an saiyang konsensia. Kadungan kaiyan, narerealisar nia na dai nia maninigong tatsaran an mga Kristiana na an konsensia nagtotogot sa sainda na gumamit kan siring na mga bagay.

¹³ Estudyare an saro pang halimbawa. An sarong Kristianong lalaki tibaad pinadakula sa sarong lugar na an pag-inom nin inomon na de alkohol dai inooyonan. Kan makaaram kan katotoohan, nanodan nia an punto de vista kan Biblia na an arak sarong balaog hale sa Dios asin puedeng gamiton nin tama sana. (Salmo 104:15) Inako nia an punto de vistang iyan. Pero, huli sa saiyang pinaghalean, mas gusto nia na biyong likayan an mga inomon na de alkohol, alagad dai nia kinikritikar an mga nag-iinom kaiyan nin tama sana. Sa siring iinaaplikar nia an mga tataramon ni Pablo: “Sunodon niato an mga bagay na nagpapatoninong asin an mga bagay na nagpapakosog sa lambang saro.”​—Roma 14:19.

14. Sa anong mga situwasyon ikakaaplikar kan mga Kristiano an tunay na kahulogan kan konseho ni Pablo sa mga taga Roma?

¹⁴ May minalataw na iba pang situwasyon na naghahagad na iaplikar an tunay na kahulogan kan konseho ni Pablo sa mga taga Roma. An Kristianong kongregasyon kompuesto nin dakol na indibiduwal, asin laen-laen an saindang gusto. Huli kaini, tibaad magkakalaen an mga gusto ninda​—halimbawa, sa paggubing asin pag-alinyar. Siempre, an Biblia nagtatao nin klarong mga prinsipyo na sinusunod kan gabos na sinserong Kristiano. Mayo sa sato nin maninigong magsulot nin gubing o mag-ayos nin buhok na palaen o bakong mabini o na ikakaasosyar kita sa hinahaboan na mga elemento sa kinaban. (1 Juan 2:15-17) Ginigirumdom kan mga Kristiano na sa gabos na panahon, dawa kun sinda nagpapahorohayahay, sinda mga ministro na nagrerepresentar sa Unibersal na Soberano. (Isaias 43:10; Juan 17:16; 1 Timoteo 2:​9, 10) Minsan siring, sa dakol na bagay kadakol kan puedeng mapagpipilian an mga Kristiano. *

Likayan na Makasingkog sa Iba

15. Sa kapakinabangan kan saiyang mga tugang, noarin tibaad pogolan nin sarong Kristiano an paggamit kan saiyang mga deretso?

¹⁵ May saro pang mahalagang prinsipyo na dinara ni Pablo sa satong atension sa saiyang konseho sa mga Kristiano sa Roma. Kun beses, an sarong Kristiano na an konsensia napatuod nin marhay tibaad magdesisyon na dai na gibohon an puede man kutana. Taano? Huli ta narerealisar nia na tibaad makadanyar sa iba an sarong bagay na gigibohon nia. Sa siring na kamugtakan, ano an maninigo niatong gibohon? Si Pablo nagsasabi: “Marahay na dai magkakan nin karne o mag-inom nin arak o maggibo nin ano man na bagay na ikinakasingkog kan saimong tugang.” (Roma 14:​14, 20, 21) Sa siring, “kitang mga makosog kaipuhan na magpasan kan mga kaluyahan kaidtong mga bakong makosog, asin bakong magpanigo sa sato man sana. An lambang saro sa sato magpanigo sa saiyang kapwa sa marahay para sa pagpakosog sa saiya.” (Roma 15:​1, 2) Kun an konsensia nin  sarong kapwa Kristiano puedeng makolgan huli sa satong ginigibo, an pagkamoot sa tugang mapahiro sa sato na magin makonsiderasyon asin pogolan an satong mga gusto. An sarong halimbawa kaini tibaad iyo an paggamit nin mga inomon na de alkohol. An sarong Kristiano tinotogotan na mag-inom nin arak nin tama sana. Alagad kun an paggibo kaiyan tibaad makasingkog sa saiyang kaiba, dai nia iiinsistir an saiyang mga deretso.

16. Paano kita makakapaheling nin konsiderasyon sa mga nasa teritoryo niato?

¹⁶ An prinsipyong ini puede man na iaplikar sa satong mga pakipagtratar sa luwas kan Kristianong kongregasyon. Halimbawa, tibaad nag-eerok kita sa sarong lugar na an relihion kan kadaklan nagtotokdo sa mga parasunod kaiyan na ibilang an sarong aldaw kan semana na aldaw nin pahingalo. Sa dahelan na iyan, tanganing dai masingkog an satong mga kataed asin dai magbunga nin kaolangan sa paghuhulit, lilikayan niato sagkod sa mapupuede na maggibo nin ano man sa aldaw na iyan na ikakaanggot kan satong mga kataed. Sa saro pang situwasyon, an sarong mayaman na Kristiano tibaad bumalyo tanganing maglingkod kun saen mas dakula an pangangaipo sa lugar na pobre an mga tawo. Tibaad booton niang magpaheling nin konsiderasyon sa saiyang bagong mga kataed paagi sa paggubing nin simpleng marhay o paagi sa pamumuhay nin mas simple kisa kaya nia.

17. Taano ta rasonableng konsideraron an iba kun ginigibo niato an mga gusto niato?

¹⁷ Rasonable daw na laoman na an mga “makosog” magibo nin siring na mga pagliliwat? Bueno, isip-isipon an ilustrasyon na ini: Mantang nagmamaneho sa sarong tinampo, naheling niato sa enotan an nagkapirang aki na peligrosong nagraralakaw harani sa tinampo. Dagos-dagos daw kitang nagmamaneho sa pinakangrikas na itinotogot huli sana ta igwa kita kan legal na deretso na gibohon iyan? Dai, kita maluwayluway tanganing malikayan an posibleng peligro sa mga aki. Kun minsan, kinakaipuhan an kaparehong pagigin andam na magluwayluway, o magpahunod, sa satong relasyon sa satong mga kapagtubod o iba pa. Tibaad ginigibo niato an sarong bagay na igwa kita nin lubos na deretsong gibohon. Mayo nin mga prinsipyo sa Biblia na nababalga. Minsan siring, kun makokolgan niato an boot kan iba o madadanyaran an mga mas maluya an konsensia, an Kristianong pagkamoot mapahiro sa sato na magmaan. (Roma 14:​13, 15) An pagpapadanay nin pagkasararo asin pagsuportar sa intereses kan Kahadean mas mahalaga kisa paggamit kan satong personal na mga deretso.

18, 19. (a) Sa pagpaheling nin konsiderasyon sa iba, paano niato sinusunod an halimbawa ni Jesus? (b) Sa anong bagay kita gabos minahiro na may lubos na pagkaoroyon, asin ano an totokaron sa sunod na artikulo?

 ¹⁸ Kun kita minagawe sa siring kaining paagi, inaarog niato an mismong pinakamarahay na halimbawa. Si Pablo nagsasabi: “Dawa si Cristo dai nagpanigo sa saiya man sana; kundi siring sa nasusurat: ‘An mga pag-olog-olog kan mga nag-oolog-olog sa saimo napapasakuya.’” Si Jesus andam na isakripisyo an saiyang buhay para sa sato. Sierto nanggad na andam kitang isakripisyo an nagkapira niatong deretso kun iyan an mapangyari sa “mga bakong makosog” na kasaro niatong pamurawayon an Dios. Tunay nanggad, an pagigin makonsiderasyon asin matinao sa mga Kristiano na mas maluya an konsensia​—o boluntad na pagpogol sa satong mga gusto asin dai pag-insistir kan satong mga deretso​—nagpapaheling “kan kaparehong nasa isip na aktitud na yaon ki Cristo Jesus.”​—Roma 15:1-5.

¹⁹ Minsan ngani tibaad medyo magkakalaen an satong mga punto de vista sa mga bagay na mayong napapalabot na mga prinsipyo sa Kasuratan, kun dapit sa mga bagay na may labot sa pagsamba, kita minahiro na may lubos na pagkaoroyon. (1 Corinto 1:10) Risang-risa an siring na pagkasararo, halimbawa, sa satong reaksion sa mga nagkokontra sa tunay na pagsamba. Inaapod kan Tataramon nin Dios an siring na mga nagkokontra na mga estranghero asin pinapatanidan kita na mag-ingat sa “tingog nin mga estranghero.” (Juan 10:5) Paano niato mamimidbid an siring na mga estranghero? Ano an maninigo na magin reaksion niato sa sainda? An mga hapot na ini totokaron sa sunod na artikulo.

[Nota sa Ibaba]

Ano an Isisimbag Nindo?

• Taano an pagkaigwa nin laen-laen na punto de vista sa personal na mga bagay ta bakong peligro sa pagkasararo?

• Taano ta bilang mga Kristiano maninigo kitang magpaheling nin mamomoton na konsiderasyon sa lambang saro?

• Ano an nagkapirang paagi na ikakaaplikar niato ngonyan an konseho ni Pablo manongod sa pagkasararo, asin ano an mamotibar sa sato na gibohon iyan?

[Mga Hapot Para sa Pag-adal]

[Ritrato sa pahina 9]

An konseho ni Pablo manongod sa pagkasararo mahalagang marhay para sa kongregasyon

[Ritrato sa pahina 10]

Nagkakasararo an mga Kristiano sa ibong kan saindang laen-laen na pinaghalean

[Ritrato sa pahina 12]

Ano an maninigong gibohon ngonyan kan drayber na ini?