An Pamibi kan Kagurangnan—An Kahulogan Kaiyan Saindo

AN Pamibi kan Kagurangnan, na itinao ni Jesu-Cristo sa Sermon sa Bukid, manonompongan sa Biblia sa Mateo kapitulo 6, bersikulo 9 sagkod 13. Bago itinao an pamibing ini, si Jesus nagsabi: “Kun namimibi, dai pagparaorootrohon an iyo man sanang mga bagay, arog kan ginigibo kan mga tawo kan mga nasyon, huli ta hinohona ninda na dadangogon sinda huli sa paggamit ninda nin kadakol na tataramon.”​—Mateo 6:7.

Kun siring, malinaw nanggad, bakong intension ni Jesus na an Pamibi kan Kagurangnan ipasambit nin termino por termino. Totoo, paghaloyhaloy inotro nia an pamibing ini para sa kapakinabangan kan ibang nagdadangog. (Lucas 11:2-4) Alagad an mga tataramon na ginamit sa pamibi sa pagkasaysay na nasa Ebanghelyo ni Mateo asin Lucas medyo magkalaen. Dugang pa, an mga pamibi ni Jesus asin kan saiyang mga disipulo kan huri dai estriktong naggamit kan espesipikong mga tataramon sa saiyang modelong pamibi.

Taano ta isinurat sa Biblia an Pamibi kan Kagurangnan? Paagi sa modelong ini, itinotokdo sa sato ni Jesus kun paano puedeng magin kawiliwili an satong mga pamibi sa Dios. Sa pamibing ini, manonompongan man niato an mga simbag sa nagkapirang pundamental na hapot sa buhay. Kun siring, estudyaran niato an lambang kabtang kan Pamibi kan Kagurangnan.

Ano an Ngaran nin Dios?

“Ama niamo na nasa langit, santipikaron logod an saimong ngaran.” (Mateo 6:9) An enot na mga tataramon na ini kan modelong pamibi nagtatabang sa sato na maparani sa Dios paagi sa pag-apod saiya na “Ama niamo.” Arog nin sarong aki, na natural nang napapadayupot sa sarong mamomoton asin mapagsabot na magurang, puede kitang dumolok sa satong langitnon na Ama na nagkokompiar na gusto niang dangogon kita. “O Paradangog nin pamibi,” an pag-awit ni Hadeng David “sa saimo an mga tawo nin gabos na laman madorolok.”​—Salmo 65:2.

Tinokdoan kita ni Jesus na mamibi na santipikaron, o itagama bilang banal, an ngaran nin Dios. Alagad ano an ngaran nin Dios? An Biblia minasimbag  sa mga tataramon na ini: “Ika, na an ngaran Jehova, ika sana an Kaharohalangkawe sa bilog na daga.” (Salmo 83:18) Nabasa mo na daw an ngaran na Jehova sa Biblia?

Sa katunayan, an ngaran nin Dios, an Jehova, minalataw nin haros 7,000 na beses sa suanoy na mga manuskrito kan Biblia. Minsan siring, may mga paratradusir na hinale ngani an ngaran na ini sa saindang mga bersion kan Biblia. Kun siring, angay na mamibi kita na santipikaron kan satong Kaglalang an saiyang ngaran, o pakangbanalon iyan. (Ezequiel 36:23) An sarong paagi nin paghiro na kaoyon kan pamibing iyan iyo an paggamit sa ngaran na Jehova kun namimibi kita sa Dios.

An sarong babae na an ngaran Patricia pinadakula na Katoliko asin pamilyar na marhay sia sa Pamibi kan Kagurangnan. Ano an reaksion nia kan ipaheling sa saiya kan saro sa Mga Saksi ni Jehova an ngaran nin Dios sa Biblia? “Dai ako makapaniwala!” an kagsing nia. “Kaya kinua ko an sadiri kong traduksion kan Biblia, asin yaon man iyan dian. Dangan ipinaheling sa sako kan Saksi an Mateo 6:​9, 10 asin ipinaliwanag na an ngaran nin Dios may koneksion sa Pamibi kan Kagurangnan. Talagang ogmahon akong marhay asin hinagad ko saiya na adalan nia ako sa Biblia.”

Gibohon an Boot nin Dios sa Daga

“Dumatong logod an kahadean mo. Gibohon logod an boot mo, kun paano sa langit, siring man sa daga.” (Mateo 6:10) Paano maootob an kabtang na ini kan modelong pamibi ni Jesus? An kadaklan na tawo iniimahinar an langit bilang rona nin katoninongan asin katrangkilohan. An Kasuratan inaapod an langit na “halangkawon na erokan [ni Jehova] na may kabanalan asin kagayonan.” (Isaias 63:15) Bakong makangangalas na namimibi kita na an kabotan nin Dios gibohon logod sa daga “kun paano sa langit”! Alagad mangyayari daw talaga ini?

An propeta ni Jehova na si Daniel naghula: “An Dios nin kalangitan mapatindog nin sarong kahadean na dai noarin man malalaglag. Asin an kahadean mismo dai itatao sa arin man na ibang banwaan. Iyan an maronot asin matapos kan gabos na ining kahadean [sa daga], asin iyan mismo magdadanay sagkod sa mga panahon na daing talaan.” (Daniel 2:44) An langitnon na Kahadean na ini, o gobyerno, madali nang humiro tanganing pangyarihon an lakop sa globong katoninongan sa irarom kan matanos na pamamahala.​—2 Pedro 3:13.

An pagpamibi na dumatong logod an Kahadean nin Dios asin gibohon an boot nia sa daga sarong kapahayagan nin pagtubod na dai magbubunga nin pagkadesganar. An Kristianong apostol na si Juan nagsurat: “Nakadangog ako nin makosog na tingog hale sa trono na nagsabi: ‘Uya! An tolda nin Dios nasa mga tawo, asin sia mag-eerok sa kaibanan ninda, asin sinda magigin saiyang mga banwaan. Asin an Dios mismo masasakaibanan ninda.  Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.’” Dangan idinugang ni Juan: “Asin an Saro na nagtutukaw sa trono nagsabi: . . . ‘Isurat mo, huli ta an mga tataramon na ini maimbod asin totoo.’”​—Kapahayagan 21:3-5.

An Pamibi Asin an Satong Pisikal na mga Pangangaipo

Paagi sa sinabi nia sa modelong pamibi, ipinaheling ni Jesus na an pangenot sa sato kun namimibi maninigong konektado sa ngaran asin kabotan nin Dios. Pero, an modelong pamibi nagpapadagos na may personal na mga kahagadan na angay na ipinapaabot ki Jehova.

An primero sa mga ini: “Itao mo samo ngonyan an samong tinapay para sa aldaw na ini.” (Mateo 6:11) Bako ining paghagad nin materyal na kayamanan. Ineenkaminar kita ni Jesus na mamibi para sa ‘satong tinapay para sa aldaw na ini segun sa kaipuhan sa aldaw na ini.’ (Lucas 11:3) Kaoyon kan Pamibi kan Kagurangnan, puede kitang mamibi na may pagtubod na itatao nin Dios an satong pan-aroaldaw na mga pangangaipo kun namomotan asin sinusunod niato sia.

An sobrang paghadit sa mga problema sa pagbuhay puedeng magpangyari na mapabayaan niato an satong espirituwal na pangangaipo asin sa siring dai niato magibo an linalaoman nin Dios sa sato. Alagad kun ineenot niato sa buhay an pagsamba sa Dios, makakasierto kita na an satong mga kahagadan para sa materyal na mga pangangaipo, arog kan kakanon asin gubing, may pag-oyon na dadangogon. Si Jesus nagsabi: “Padagos na hanapon nguna an kahadean asin an . . . katanosan [nin Dios], asin ini gabos na ibang bagay idadagdag na sana sa saindo.” (Mateo 6:26-33) An paghanap sa katanosan nin Dios sarong angat, huli ta gabos kita makasalan asin nangangaipo nin kapatawadan. (Roma 5:12) Tinatratar man iyan sa Pamibi kan Kagurangnan.

An Satong mga Pamibi Asin an Kapatawadan

“Ipatawad mo samo an samong mga utang, siring na kami man nagpatawad sa mga may utang sa samo.” (Mateo 6:12) Sa rekord ni Lucas kan Pamibi kan Kagurangnan, an “mga utang” na ini nanonongod sa “mga kasalan.” (Lucas 11:4) Talaga daw na papatawadon ni Jehova Dios an satong mga kasalan?

Minsan ngani si Hadeng David kan suanoy na Israel nakakomiter nin magabat na mga kasalan, sia nagsolsol asin kompiadong namibi: “Ika, O Jehova, marahay asin andam na magpatawad; asin nagsosopay an mamomoton na kabootan sa gabos na nag-aapod sa saimo.” (Salmo 86:5) Kanigoan kanakakarangang isip-isipon iyan! An satong langitnon na Ama “andam na magpatawad” kan mga kasalan kan mga nagsosolsol na nag-aapod sa saiya. Kun paanong an utang puede nanggad na lubos na kanselaron, puede man na biyong ipatawad ni Jehova Dios an satong mga kasalan.

Minsan siring, sinambit ni Jesus an sarong kondisyon: Tanganing patawadon kita nin Dios, kaipuhan na patawadon man niato an iba. (Mateo 6:​14, 15) Maski bakong marahay an pagtrato kan tolong katood nia sa matanos na tawong si Job, sia mapagpatawad asin ipinamibi pa ngani sinda. (Job 42:10) Kun kita nagpapatawad sa mga nagkakasala tumang sa sato, mapapaogma niato an Dios asin angay kita na makinabang sa saiyang pagkaherak.

An pagigin andam nin Dios na dangogon an satong mga kahagadan maninigong magpahiro sa sato na maghingoang kamtan an saiyang pag-oyon. Asin puede niatong gibohon iyan dawa ngani kita bakong sangkap. (Mateo 26:41) Puede man kitang tabangan ni Jehova sa bagay na ini, arog kan ipinaheling ni Jesus sa pagtapos kan modelong pamibi paagi sa mahalagang marhay na kahagadan.

Tabang sa Pagsunod sa Matanos na Dalan

“Dai mo kami darahon sa sugot, kundi iligtas mo kami sa maraot.” (Mateo 6:13) Dai kita pinapabayaan ni Jehova sa sugot o na magkasala. An saiyang Tataramon nagsasabi: “Paagi sa maraot na mga bagay an Dios dai puedeng baloon ni binabalo man nia an siisay man.” (Santiago 1:13) Itinotogot nin Dios na sugotan kita, alagad puede nia kitang iligtas sa Dakulang Parasugot​—an “maraot” na midbid bilang Satanas na Diablo.

Sinasadol ni apostol Pedro an mga kapwa Kristiano: “Magmata kamo, magpuka kamo. An saindong kaiwal, an Diablo, naglalakaw na siring sa nagngangarob na leon, na naghahanap nin masisiba.” (1 Pedro 5:8) Sa katunayan, sinugotan ngani ni Satanas an sangkap na tawong si Jesu-Cristo! Ano an pasohan kan Diablo? Tanganing irayo si Jesus sa dalisay  na pagsamba ki Jehova Dios. (Mateo 4:1-11) Kun naghihingoa kamong maglingkod sa Dios, an pasohan ni Satanas iyo na sibaon man kamo!

Paagi sa kinaban na nasa irarom kan kontrol nia, tibaad sugotan kita kan Diablo na magpartisipar sa mga gibohon na dai inooyonan nin Dios. (1 Juan 5:19) Kaya mahalagang marhay na regular kitang dumolok sa Dios para sa tabang, nangorogna kun napapaatubang kita sa nagpapadagos na sugot. Asin kun sinasamba niato si Jehova oyon sa saiyang ipinasabong na Tataramon, an Biblia, ililigtas nia kita paagi sa pagtabang sa sato na malabanan an Diablo. “Maimbod an Dios,” an sabi sato kan Biblia, “asin dai nia itotogot na kamo masugotan nin labi sa saindong makakaya.”​—1 Corinto 10:13.

Mahalagang Marhay an Pagtubod sa Dios

Nakakaogma nanggad na maaraman na an satong langitnon na Ama interesado sa lambang saro sa sato! Pinangyari pa ngani nia na tokdoan kita kan saiyang Aki, si Jesu-Cristo, kun paano mamibi. Daing duwa-duwa na huli kaini gusto niatong paogmahon si Jehova Dios. Paano niato magigibo iyan?

An Biblia nagsasabi: “Kun dai nin pagtubod imposible na mapanigoan [an Dios] nin lubos, huli ta an minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.” (Hebreo 11:6) Paano magkakaigwa nin siring na pagtubod? “An pagtubod minasunod sa bagay na nadangog,” an sabi kan Biblia. (Roma 10:17) An Mga Saksi ni Jehova naoogmang marhay na ipakipag-olay an manongod sa mga bagay na sono sa Kasuratan sa gabos na naghihimuyawot na maglingkod sa Dios na may tunay na pagtubod.

Linalaoman na an pagtokar na ini kan Pamibi kan Kagurangnan nagpararom kan saindong pag-apresyar sa kahulogan kaiyan. Paagi sa pagkua nin dugang pang kaaraman manongod ki Jehova asin sa mga balos nia para sa “mga maigot na naghahanap sa saiya,” mapapakosog nindo an saindong pagtubod sa Dios. Logod na manodan nindo nin orog pa an manongod sa saiya asin sa saiyang mga katuyohan tanganing makamtan nindo an sarong dayupot na relasyon sa saindong langitnon na Ama sagkod lamang.​—Juan 17:3.

[Blurb sa pahina 5]

“Ama niamo na nasa langit, santipikaron logod an saimong ngaran. Dumatong logod an kahadean mo. Gibohon logod an boot mo, kun paano sa langit, siring man sa daga. Itao mo samo ngonyan an samong tinapay para sa aldaw na ini; asin ipatawad mo samo an samong mga utang, siring na kami man nagpatawad sa mga may utang sa samo. Asin dai mo kami darahon sa sugot, kundi iligtas mo kami sa maraot.”​—Mateo 6:9-13

[Ritrato sa pahina 7]

Si Jehova nagtatao kan mga pangangaipo kan mga namomoot sa saiya

[Ritrato sa pahina 7]

Tinatabangan man kita nin Dios na labanan an Diablo

[Ritrato sa pahina 7]

Kun kita, arog ni Job, nagpapatawad sa mga nagkakasala tumang sato, puede kitang makinabang sa pagkaherak nin Dios