Bako Sanang Sarong Kawat

AN MGA aki gustohon na magkawat. Alagad “bako sana ining daing halaga o daing pakinabang na aktibidad,” an paliwanag kan librong The Developing Child. “Iyan an pinakabasehan nin pagtalubo kan pagmansay nin aki sa nakapalibot sa saiya.” Paagi sa pagkawat, nanonodan kan mga aki na gamiton an saindang mga pakamate, nasasabotan ninda an saindang palibot, asin nagkakaigwa sinda nin interaksion sa iba.

Poon sa edad na apat o lima, an mga aki nagpopoon nang arog-arogon an ginigibo kan mga nasa edad na bilang kabtang kan saindang mga kawat. Si Jesus nagtaram kaidto manongod sa mga aking nagkakarawat. May mga gustong magkawat nin “kasal-kasalan,” an iba gustong magkawat na may “ilolobong” asin, arog kan parateng ginigibo kan mga aki, nagdidiriskutiran sinda huli ta may mga habong magbale. (Mateo 11:​16, 17) An arog kaining klase nin pagkawat puedeng itudok sa isip kan nagtatalubong aki an makahulogan na mga papel na iyan.

An mga aki sa mga retrato inaarog an papel kan sarong nagtotokdo sa Biblia asin estudyante nia. An ginigibo ninda bakong tunay na pag-adal sa Biblia, alagad malinaw sa isip ninda an ideya nin paghiras kan mensahe kan Biblia. Asin importante an leksion na ini, huli ta ipinagboot ni Jesus sa gabos niang parasunod na gumibo nin mga disipulo asin tokdoan an mga tawo na otobon an gabos na bagay na itinokdo nia sa sainda.​—Mateo 28:​19, 20.

An mga magurang na may mga aking gustong magsagin na nagkokondukta nin mga pag-adal sa Biblia, nagtatao nin mga pahayag, o naghuhulit sa harong-harong maninigo sanang magin maogma. Naturalmente, inaarog kan mga aki kun ano an naheheling nindang ginigibo kan mga nasa edad na sa palibot ninda. An mga kawat sa Biblia na ginigibo kan mga aki nagpaparisa na pinapadakula sinda sa “klase nin edukasyon asin hatol na inooyonan nin Kagurangnan.”​—Efeso 6:​4, Charles B. Williams.

Gusto ni Jehova na an mga aki magkaigwa nin kabtang sa tunay na pagsamba. Sinabihan nia si Moises na iiba an “saradit” kan binabasa kaidto an Ley. (Deuteronomio 31:12) Kun namamatean nin mga aki na kalabot sinda, posibleng marhay na maheheling iyan sa mga kawat ninda. Asin an aki na nagkakawat na sia man daa sarong ministro nin Dios naggigibo kan enot na lakdang sa pagigin sarong ministro.