Igwa Kamo nin Anong Klaseng Mapaghalat na Aktitud?

SA KINABAN ngonyan, pipira sana an naoogmang maghalat sa sarong tawo o sa sarong bagay. Binabalo kaiyan an saindang pasensia. Minsan siring, an Kasuratan nag-eenkaminar sa banwaan nin Dios na kultibaron an “mapaghalat na aktitud.” Napapalaen sa mga tawo na nasa palibot nia, an propetang si Miqueas nagpahayag: “Mapaheling ako nin mapaghalat na aktitud sa Dios nin sakong kaligtasan.”​—Miqueas 7:7; Lamentacion 3:26.

Pero, ano an boot sabihon kan paghalat ki Jehova? Paano maninigong maghalat sa Dios an sarong Kristiano? Igwa daw nin tama asin bakong tamang mga paagi na gibohon ini? An eksperyensia kan propetang si Jonas kan ikasiyam na siglo B.C.E. nagtatao nin sarong leksion sa bagay na ini.

Sarong Kamugtakan nin Paghalat Huli sa Salang Dahelan

Pinagbotan ni Jehova Dios si Jonas na magduman asin maghulit sa mga tawo sa Ninive, an kabisera kan Imperyo nin Asiria. Midbid an Ninive bilang an “siudad nin pagpabolos nin dugo” huli sa hayag na kabangisan asin karingisan kaiyan, sarong katunayan na pinatotoohan na marhay kan mga historyador asin arkeologo. (Nahum 3:1) Prinobaran ni Jonas kan enot na dulagan an asignasyon na ini, alagad sinegurado ni Jehova na sa kahurihurihi makakaabot an propeta sa Ninive.​—Jonas 1:3–​3:2.

“Si Jonas nagpoon na lumaog sa siudad sa distansiang sarong aldaw na lakawon, asin sia padagos na nagbalangibog asin nagsabi: ‘Apat na polong aldaw na sana, asin an Ninive magagaba.’” (Jonas 3:4) An mga paghihingoa ni Jonas nagbunga nin sarong pambihirang reaksion: “An mga tawo sa Ninive nagturubod sa Dios, asin nagbalangibog sinda nin pag-ayuno asin nagsulot nin telang sako, magpoon sa kadarudakulai sa sainda sagkod sa kasaditsaditi sa sainda.” (Jonas 3:5) Huli kaiyan, si Jehova na sarong Dios na ‘dai mawot na an siisay man malaglag kundi mawot na an gabos makapagsolsol,’ dai pinara an siudad.​—2 Pedro 3:9.

Ano an nagin reaksion ni Jonas? An pagkasaysay nagsasabi: “Pero para ki Jonas, idto dai nanggad nia nagustohan, asin sia nag-init sa kaanggotan.” (Jonas 4:1) Taano? Posibleng hinona ni Jonas na an saiyang dai naotob na pagbalangibog nin kalaglagan sa sarong itinalaan na petsa nagpasupog sa saiya bilang sarong propeta. Minalataw na mas inisip nia an sadiri niang reputasyon kisa kan pagkaherak sa asin kaligtasan nin iba.

Siempre, si Jonas dai suminagkod sa punto na tinalikdan nia an pagigin propeta. Minsan siring, naghalat sia na ‘maheling kun ano an mangyayari sa siudad.’ Tunay nanggad, pinatalubo nia an sarong klase nin pagsentir, aktitud na halaton na sana an mangyayari. Narerealisar na dai nangyari an mga bagay siring sa linalaoman nia, naggibo  sia nin payag-payag, nagtukaw sa limpoy, asin mamondong naghalat kun ano an mangyayari. Minsan siring, dai inoyonan ni Jehova an aktitud ni Jonas, kaya mamomoton niang itinanos an kaisipan kan napasala niang propeta.​—Jonas 4:​5, 9-11.

Kun Taano ta Mapasensia si Jehova

Minsan ngani nagsolsol asin dai pinara an Ninive, sa huri nagbalik iyan sa dating maraot na marhay na mga dalan. Paagi sa mga propetang si Nahum asin Sofonias, ihinula ni Jehova an pagkalaglag kaiyan. Nagtataram manongod sa “siudad nin pagpabolos nin dugo,” ipinahayag ni Jehova na lalaglagon nia an Asiria asin gigibohon na mapungaw na kahiwasan an Ninive. (Nahum 3:1; Sofonias 2:13) Kan 632 B.C.E., linaglag an Ninive, na nungka nang makakabangon giraray.

Sa kaagid na paagi, may sala an kinaban ngonyan sa daing pakundangan na pagpabolos nin dugo sa mas dakulang marhay na sokol kisa kan sa suanoy na Ninive. Huli kaini asin sa iba pang dahelan, ipinagboot ni Jehova na an presenteng maraot na sistema nin mga bagay umabot sa katapusan kaiyan sa dai pa nangyari kaidto na “dakulang kahorasaan.”​—Mateo 24:​21, 22.

Sagkod ngonyan, pinopogolan ni Jehova an ipinanugang pagkalaglag tanganing an sinserong mga tawo ngonyan, arog kan nagsorolsol sa Ninive, makapagsolsol asin maligtas. Sinasambit ni apostol Pedro an pasensia nin Dios sa pananaram na ini: “Si Jehova bakong maluway kun dapit sa saiyang panuga, siring sa paghona nin nagkapira sa kaluwayan, kundi sia mapasensia sa saindo huli ta dai nia mawot na an siisay man malaglag kundi mawot nia na an gabos makapagsolsol.”​—2 Pedro 3:​9, 10, 13.

Paghalat sa Tamang Paagi

Si Pedro padagos na nagsabi: “Mantang an gabos na bagay na ini tutunawon nin siring, isipon kun dapat na magin anong klase kamong tawo sa banal na mga gawe asin gibo nin diosnon na debosyon, na hinahalat asin pinapagdadanay na harani sa isip an presensia kan aldaw ni Jehova!” (2 Pedro 3:​11, 12) Mangnoha na mantang hinahalat an aldaw ni Jehova, maninigo na ipinapaheling niato an “banal na mga gawe asin gibo nin diosnon na debosyon”​—angay sana na may ginigibo bakong daing ginigibo.

Iyo, an tamang mapaghalat na aktitud nagpaparisa nin lubos na kompiansa na an aldaw ni Jehova maabot nin eksakto susog sa katuyohan ni Jehova. An siring na pagtubod magbubunga nin banal na mga gawe asin diosnon na mga gibo, asin pangenot sa mga ini iyo an paghuhulit kan maogmang bareta kan Kahadean nin Dios. Si Jesus nagtao nin marahay na halimbawa sa paghuhulit, asin saiyang pinagbotan an linahidan na mga parasunod nia: “Hagkosi nindo an saindong habayan asin papaglaada nindo an saindong mga ilawan, patin mani kamo siring sa mga tawo na naghahalat sa saindang kagurangnan sa saiyang pagpuli hale sa kasal, tanganing kun sia dumatong na asin tumuktok sia bukasan tolos ninda. Maogma idtong mga oripon na sa pagdatong kan kagurangnan maabotan na nagbabantay!”​—Lucas 12:35-​37.

An enot na siglong mga oripon ‘hinahagkosan an habayan’ paagi sa pagbaton sa mga laylayan kan saindang halabang gubing na hinahagkosan iyan tanganing dai makaolang sa magabat na pisikal na aktibidad. Sa siring, an sarong Kristiano kaipuhan na magin mabagsik, maigot sa marahay na mga gibo. Maninigong labanan nia an ano man na tendensia na “maghinugak” sa espirituwal na pagkadaing maginibo, na tibaad  ginagamit an saiyang mga kosog sa mga kasingawan o materyal na mga okupasyon. Imbes, maninigo na magkaigwa sia nin ‘dakol na gigibohon sa gibohon kan Kagurangnan’ mantang hinahalat an dakula asin makangingirhat na aldaw ni Jehova.​—Roma 12:11; 1 Corinto 15:58.

Sibot Mientras na Naghahalat

An Mga Saksi ni Jehova nagdadanay na sibot mientras na naghahalat sa aldaw ni Jehova. Halimbawa, sa 2003 na taon nin paglilingkod, naggamit sinda nin promedyong oras na 3,383,000 kada aldaw sa paghuhulit kan tataramon ni Jehova. Tara, an sarong Saksi kaipuhan na maghulit nin daing pondo sa laog nin 386 na taon tanganing taposon an nagibo sa sarong aldaw!

Minsan siring, marahay na hapoton an satong sadiri, ‘Anong klaseng mapaghalat na aktitud an personalmenteng igwa ako?’ Nagtao si Jesus nin sarong parabola na naglaladawan sa linalaoman na kahigosan sa maimbod na linahidan na mga Kristiano. Nasambitan nia an tolong oripon: “Sa saro [an kagurangnan] nagtao nin limang talento, sa saro nin duwa, sa saro pa nin saro, sa lambang saro segun sa saiyang kakayanan, asin sia nagduman sa ibang daga. Tolos man an saro na nag-ako kan limang talento naghale asin ipinagnegosyo iyan patin nakatubo nin lima pa. Sa siring man na paagi an saro na nag-ako kan duwa nakatubo nin duwa pa. Alagad an saro na nag-ako nin saro sana naghale, asin nagkotkot sa daga patin itinago an pirak kan saiyang kagurangnan. Pakalihis nin haloy na panahon an kagurangnan kan mga oripon na idto nagdatong asin nakipagkuenta sa sainda.”​—Mateo 25:15-​19.

An tolong oripon gabos naghalat sa pagbalik kan kagurangnan. An duwa na nagdanay na sibot mantang naghahalat sa saindang kagurangnan sinabihan pag-abot nia: “Marahay na gibo, marahay asin maimbod na oripon!” Minsan siring, an saro na naghalat na daing ginibo nag-ako nin laen na pagtratar. An kagurangnan nagsabi: “Tapokan nindo an oripon na daing kamanungdanan sa kadikloman sa luwas.”​—Mateo 25:20-30.

Maski ngani aplikado an parabolang ini sa linahidan na mga Kristiano, igwa iyan nin leksion para sato gabos ano man an satong paglaom. An Kagurangnan, si Jesu-Cristo, linalaoman an lambang saro sa sato na magtrabaho nin mahigos sa paglilingkod sa saiya mantang hinahalat niato an saiyang pag-abot sa dakulang aldaw ni Jehova. Pinapahalagahan nia an pagpapagal kan kada saro “segun sa saiyang kakayanan” asin mga kamugtakan. Kanigoan na kagayagayahan na madangog sa Kagurangnan an “marahay na gibo” kun sa katapustapusi tapos na an paghalat!

 An Pagpapasensia kan Satong Kagurangnan Nangangahulogan nin Kaligtasan

Ano kun an sistemang ini nin mga bagay naglawig nin mas haloy kisa pinaghona o linaoman niato? Dai iyan nagin siring na mayong dahelan. Si apostol Pedro nagsurat: “Ibilang nindo an pagpapasensia kan satong Kagurangnan na kaligtasan.” (2 Pedro 3:15) An tamang kaaraman sa katuyohan nin Dios asin an mapakumbabang pagrekonoser na bako kitang siring kahalaga kan kaotoban kan katuyohan nin Dios mapangyari sa sato na magin mapasensia sagkod na sa pagheling ni Jehova angay na magpasensia sa daan na sistemang ini.

Tanganing enkaminaron an mga Kristiano na magin mapasensia, an kagsurat kan Biblia na si Santiago nagtao nin sarong ilustrasyon. Sia nagsurat: “Uya! An paraoma padagos na naghahalat kan mahalagang marhay na bunga kan daga, na nagpapasensia dian sagkod na maako nia an amay na oran asin an huring oran. Kamo man magin mapasensia; parigona an saindong puso, huli ta an presensia kan Kagurangnan harani na.”​—Santiago 5:​7, 8.

Habo ni Jehova Dios na mapagal o sumuko kita mantang kita naghahalat. Igwa siang ipinapagibo sa sato asin naoogma kun ginagamit niato an panahon nin paghalat tanganing mahigos na makikabtang sa gibohon na iyan. Gusto nia na mapabilang kita sa mga ilinaladawan ni apostol Pablo sa saiyang surat sa mga Hebreo: “Minamawot niamo na an lambang saro sa saindo magpaheling kan kaparehong kahigosan tanganing magkaigwa kan lubos na kasiertohan kan paglaom sagkod sa katapusan, tanganing dai kamo magin mga hugakon, kundi magin mga paraarog kan mga nagmamana sa mga panuga paagi sa pagtubod asin pasensia.”​—Hebreo 6:​11, 12.

Kaya dai kita mapagal. Imbes, an sato logod na personal na relasyon ki Jehova Dios, an satong pagtubod sa atang na pantubos ni Jesus, asin an satong maogmang paglaom sa bagong sistema nin mga bagay magin nakakapakosog na mga puersa sa satong buhay. Arog kan “marahay asin maimbod” na mga oripon sa parabola ni Jesus, patunayan logod niato na maninigo kita sa komendasyon asin balos paagi sa pagdadanay na sibot sa pag-omaw sa satong Dios, siring kan salmista na nagsabi: “Para sa sako, ako danay na maghahalat, asin dudugangan ko an gabos na pag-omaw sa saimo.”​—Salmo 71:14.

[Ritrato sa pahina 21]

Desganado, hinalat ni Jonas kun ano an mangyayari sa Ninive

[Mga Ritrato sa pahina 22, 23]

Ipaheling niato an diosnon na debosyon mantang hinahalat an aldaw ni Jehova