Mga Hapot Hale sa mga Parabasa

Kan magsurat si apostol Juan na an “sangkap na pagkamoot minasikwal nin pagkatakot,” ano an boot niang sabihon kan “sangkap na pagkamoot,” asin sa siring anong “pagkatakot” an isinikwal?

“Dai nin takot sa pagkamoot,” an isinurat ni apostol Juan, “kundi an sangkap na pagkamoot minasikwal nin pagkatakot, huli ta an takot minaolang. Sa katotoohan, an natatakot dai nasasangkap sa pagkamoot.”​—1 Juan 4:18.

Ipinapaheling kan konteksto na nagpapaliwanag si Juan dapit sa katalingkasan sa pagtaram​—partikularmente an koneksion kan pagkamoot nin Dios asin kan katalingkasan sa pagtaram sa Saiya. Maheheling ini sa mababasa niato sa bersikulo 17: “Sa siring kaining paagi ginibong sangkap an pagkamoot sa sato, tanganing magkaigwa kita nin katalingkasan sa pagtaram sa aldaw nin paghokom.” Kun sagkod saen an pagkamoot nin sarong Kristiano sa Dios asin an pakamate kun gurano namomoot sa saiya an Dios igwa nin direktang epekto sa saiyang katalingkasan sa pagtaram​—o sa kadaihan kaiyan​—kun sia minadolok sa Dios sa pamibi.

Makahulogan an pananaram na “sangkap na pagkamoot.” Siring kan pagkagamit sa Biblia, an tataramon na “sangkap” dai pirmeng nangangahulogan nin pagkasangkap sa absolutong sentido, an boot sabihon, sagkod sa pinakahalangkaw na sokol, kundi sa parate sa relatibong sentido. Halimbawa, sa saiyang Sermon sa Bukid, si Jesus nagsabi: “Kaya ngani kamo kaipuhan na magin sangkap, kun paanong an saindong langitnon na Ama sangkap.” Sinasabihan ni Jesus an saiyang mga parasunod na kun namomotan sana ninda idtong mga namomoot sa sainda, an saindang pagkamoot magigin bakong kompleto, kulang, may depekto. Kaipuhan na luboson ninda, o ipaheling sa bilog na sokol, an saindang pagkamoot paagi sa pag-iba dawa kan saindang mga kaiwal. Dangan, kaagid kaiyan, kan si Juan magsurat manongod sa “sangkap na pagkamoot,” nagtataram sia manongod sa pagkamoot sa Dios na bilog sa puso, pinatalubo nin lubos, asin nakakaapektar sa gabos na aspekto kan buhay nin saro.​—Mateo 5:​46-​48; 19:​20, 21.

Kun minadolok sa Dios sa pamibi, an sarong Kristiano nakakaaram na gayo na sia makasalan asin bakong sangkap. Minsan siring, kun an saiyang pagkamoot sa Dios asin an saiyang pakamate sa pagkamoot nin Dios sa saiya lubos nang napatalubo, dai sia napopogolan kan pagkatakot na kondenaron o haboan. Imbes, igwa sia nin katalingkasan sa pagtaram sa pagpahayag kan nasa puso nia asin sa paghagad nin kapatawadan basado sa atang na pantubos, na mamomoton na itinao nin Dios paagi ki Jesu-Cristo. Kombensido sia na an saiyang mga kahagadan dadangogon na may pabor nin Dios.

Paano “nasasangkap sa pagkamoot” an saro asin sa siring ‘isinisikwal’ nia an pagkatakot na kondenaron o haboan? “An siisay man na nagkukuyog sa saiyang [nin Dios] tataramon, tunay na sa tawong ini ginibo nang sangkap an pagkamoot sa Dios,” an sinabi ni apostol Juan. (1 Juan 2:5) Estudyare: Kun namomotan kita nin Dios mantang kita mga parakasala pa, bako daw na orog nia kitang mamomotan kun talagang nagsosolsol kita asin maigot na “nagkukuyog sa saiyang tataramon”? (Roma 5:8; 1 Juan 4:10) Sa katunayan, sagkod na nagdadanay kitang maimbod, magkakaigwa kita kan kaparehong garantiya na igwa si apostol Pablo kan sia magtaram manongod sa Dios: “Sia na minsan an saiya mismong Aki dai ilinikay kundi itinao sia dahel sa sato gabos, tadaw ta dai man sia maboot na magtatao sa sato kan gabos na iba pang bagay kaiba nia?”​—Roma 8:32.