Bareta kan mga Parabalangibog kan Kahadean

Sarong Surat Hale ki Alejandra

AN PAGSURAT haloy nang nagin sarong epektibong paagi nin pagpapatotoo. Dawa ngani kun beses tibaad garo daing kasegurohan an resulta, an mga nagpoprosegir sa paggamit kan paaging ini binabalosan nin igo. Nagigirumdoman ninda an madonong na hatol kan Biblia: “Pagkaaga isabwag mo an saimong banhi asin sagkod sa banggi dai mo pagpahingaloan an saimong kamot; huli ta dai mo aram kun saen ini magigin mapanggana, kun baga digdi o duman, o kun baga sindang duwa pareho magigin marahay.”​—Eclesiastes 11:6.

Si Alejandra, sarong hoben na Saksi na naglilingkod nin haros sampulong taon na sa sangang opisina kan Mga Saksi ni Jehova sa Mejico, nagpapabolong kaidto paagi sa mga kemikal (chemotherapy) para sa kanser. Naggrabe an saiyang kamugtakan, asin nagluya siang marhay kaya dai na nia kayang gibohon an pan-aroaldaw na rutina nia. Minsan siring, huling habo niang mapabayaan an saiyang ministeryo, nagdesisyon si Alejandra na gumibo nin mga surat. Nagsurat sia manongod sa areglo para sa daing bayad na pag-adal sa Biblia asin iiniba an numero nin telepono kan saiyang ina. Dangan itinao nia an mga surat sa saiyang ina tanganing iwalat sa mga harong na daing tawo durante kan ministeryong pagharongharong kaini.

Mientras tanto, si Diojany, sarong daragita na taga Guatemala, nagtrabaho bilang sarong katabang sa harong sa Cancún, Mejico. Mientras na yaon duman, nakaolay nia an mga Saksi ni Jehova asin naogma sa pakikipag-olay sa sainda sa Biblia. Sa huri, nagdesisyon an saiyang mga among na bumalyo sa Siudad nin Mejico asin gusto siang ipag-iba. Nag-alangan na umiba si Diojany huling mangangahulogan iyan na dai na nia makakaolay an mga Saksi.

“Dai ka mahadit,” inasegurar sia kan saiyang mga among, “may mga Saksi sa gabos na lugar. Hahanapon mi sinda pag-abot ta duman.” Huli kan maogmang posibilidad na iyan, nag-oyon si Diojany na umiba sa sainda. Kan yaon na sa Siudad nin Mejico, hinanap kan mga among ni Diojany an mga Saksi. Sa dai maaraman na dahelan, dai ninda sinda nanompongan, minsan ngani igwa nin labing 41,000 na Saksi asin 730 kongregasyon sa siudad na iyan.

Dai nahaloy, nadedesganar na si Diojany huling dai pa nia nanonompongan an mga Saksi tanganing ipagpadagos an saiyang pakikipag-olay sa Biblia. Sarong aldaw, an saiyang among na babae nagdolok sa saiya, na nagsasabi: “May sorpresa ako! Dinangog kan saimong Dios an saimong mga pamibi.” Itinatao an surat sa saiya, nagsabi an among: “Iwinalat kan mga Saksi an surat na ini para sa saimo.” Idto sarong surat hale ki Alejandra.

Nakipaghelingan si Diojany sa ina ni Alejandra asin sa tugang niang babae, si Blanca, asin nag-ako nin pag-adal sa Biblia. Pakalihis nin nagkapirang semana, nakaolay nia si Alejandra asin nagkaigwa nin nakakaogmang pagtagboan. Inenkaminar sia ni Alejandra na padagos na magmaigot sa saiyang pag-adal sa Biblia tanganing magtalubo sia sa espirituwal.

Pakalihis nin pira sanang bulan, kan Hulyo 2003, nagadan si Alejandra, na iwinalat sa saiyang mga kapagtubod an marahay na halimbawa nin pagtubod asin kosog nin boot. Sa lobong, dakol an napahirong marhay kan makaolay ninda si Diojany asin nadangog siang nagsabi: “Nagin marahayon na halimbawa para sa sako si Alejandra asin an saiyang pamilya. Desidido akong paglingkodan si Jehova asin magpabautismo tolos. Hinihimuyawot kong gayo na maheling giraray si Alejandra sa maabot na Paraiso!”

Iyo, an surat tibaad sadit na bagay sana. Alagad puede nanggad iyan na magtao nin marahay asin nagdadanay na mga epekto!