An Paghanap nin Orog Pa

“Kun kita dai naiingustohan sa mga gusto niato, talagang dai noarin man magkakaigwa nin igo.”​—Sarong report kan Institusyon nin Pagmasid sa Kinaban.

“ANO an gusto niato? Gabos na bagay. Noarin niato gustong makua iyan? Ngonyan na.” Popular an sarabihon na ini sa mga estudyante sa kolehio durante kan mga taon nin 1960. Ngonyan, tibaad dai na nadadangog an mismong mga tataramon na ini, alagad an pundamental na ideya nagdanay. Sa katunayan, an paghanap nin orog pa nagin garo baga tanda kan satong kapanahonan.

Para sa dakol, nagin nang prioridad an pagkaigwa nin kayamanan asin mga rogaring. An dating Presidente kan E.U. na si Jimmy Carter nagsabi kaidto:  “An midbidan nin sarong tawo bako nang huli sa ginigibo nia kundi kun ano an nasasadirihan nia.” Igwa daw nin mas mahalaga pa kisa mga rogaring? Kun igwa, ano an mga iyan, asin anong mga pakinabang an itatao kan mga iyan?