Mga Hapot Hale sa mga Parabasa

Kan pagbotan ni Jesus an saiyang mga parasunod na “magpautang na mayo nin interes, na dai naglalaom sa ano man na balos,” an boot daw niang sabihon dai na ninda maninigong pabayadan dawa an kapital?

Masasabotan niatong marhay an mga tataramon ni Jesus na nakarekord sa Lucas 6:35 kun gigirumdomon niato an Ley ni Moises. Duman pinagbotan nin Dios an mga Israelita na magpautang na mayo nin interes sa mga kapwa Israelita na nagin dukhang-dukha sa pinansial asin nangangaipo nin tabang. (Exodo 22:25; Levitico 25:35-​37; Mateo 5:42) An mga utang na ini dai gagamiton sa pagnenegosyo. Imbes, an siring na utang na mayo nin interes makakapaginhawa sa kadukhaan o remalaso. Total, magigin bakong mamomoton nanggad an magganansia sa kapierdihan sa pagbuhay nin kapwa. Pero, deretso kan nagpapautang na pabayadan an kapital, asin kun beses may kinukuang kolateral (garantiya sa utang).​—Deuteronomio 15:​7, 8.

Mantang sinusuportaran an Ley, tinawan pa ngani iyan ni Jesus nin mas mahiwas na aplikasyon, na sinasabi na an nagtatabang maninigong dai maglaom “sa ano man na balos.” Arog kan mga Israelita, kun beses an mga Kristiano nakakaeksperyensia nin mga kapierdihan sa pagbuhay o iba pang mga kamugtakan na puedeng magpangyari na sinda magin dukha, mayong-mayo pa ngani. Kun an sarong Kristianong tugang na nasa siring na makuring kamugtakan naghahagad nin tabang sa pinansial, bako daw na kabootan an tumabang? Tunay nanggad, an tunay na pagkamoot magpapahiro sa sarong kapwa Kristiano na tabangan an tugang na huli sa dai nia kontroladong mga dahelan nagkaigwa nin grabeng problema sa pinansial. (Talinhaga 3:27) Tibaad posibleng magtao nin regalo sa nangangaipong tugang na iyan, dawa ngani an kantidad posibleng mas kadikit kisa ikakatao nin saro bilang pautang.​—Salmo 37:21.

Kan enot na siglo C.E., si apostol Pablo asin Bernabe isinugo na darahon an mga donasyon kan mga Kristiano sa Asia Minor sa saindang mga tugang sa Judea huli sa tiggutom. (Gibo 11:28-​30) Siring man ngonyan, kun nagkakaigwa nin kalamidad, an mga Kristiano parateng nagpapadara nin mga regalo sa nangangaipo nindang mga tugang. Sa paggibo kaiyan, nakakatao man sinda nin marahay na patotoo sa iba. (Mateo 5:16) Siempre, an aktitud asin kamugtakan kan naghahagad nin tabang maninigong konsideraron. Taano sia ta nangangaipo? Mahalagang mangnohon an mga tataramon ni Pablo: “Kun an siisay man habong magtrabaho, dai man sia pagpakakanon.”​—2 Tesalonica 3:10.

Kun an tugang na nakikiolay na pautangon dai man nangangaipong marhay kundi gusto sana nin temporaryong tabang tanganing makabawi huli sa nagkapirang kapierdihan sa pinansial, garo angay man na pautangon sia na mayo nin interes. Sa siring na mga kamugtakan, an pagpautang na may intension na pabayadan an bilog na kantidad dai magigin sarongat sa mga tataramon ni Jesus sa Lucas 6:35. Kaipuhan na gumibo nin kasuratan sa napagkaoyonan, asin an nag-utang maninigong gibohon an gabos na paghihingoa na bayadan iyan oyon sa napagkasundoan. Sa katunayan, an Kristianong pagkamoot maninigong magtulod sa nag-utang na magbayad kan inutang kun paanong iyan man an nagpahiro sa nagpautang tanganing pautangon sia.

An saro na nag-iisip na magpautang (o magtao nin regalo) maninigo man na helinghelingon an kamugtakan kan saiya mismong pamilya. Halimbawa, dai daw mamumugtak sa alanganon an saiyang kakayahan na panigoan an mga pangangaipo kan mga miembro kan saiyang pamilya, na sarong sono sa Kasuratan na prioridad? (2 Corinto 8:​12; 1 Timoteo 5:8) Sa ibong kaiyan, an mga Kristiano naghahanap nin mga oportunidad na ipaheling an pagkamoot sa lambang saro, na ipinapahayag an siring na pagkamoot sa praktikal na mga paagi na kaoyon kan mga prinsipyo sa Biblia.​—Santiago 1:​27; 1 Juan 3:​18; 4:​7-​11.