Aram daw Nindo an Kaogmahan na Minagikan sa Pagtatao?

HAROS 50 taon siang nagin aktibo sa paglilingkod bilang Kristiano. Minsan ngani maluya na an saiyang hawak huli sa pagkagurang, determinado siang magbisita sa bago pa sanang itogdok na Kingdom Hall. Nagkakapot sa takyag nin sarong matinabang na Kristianong tugang na lalaki, luminaog sia sa tiriponan asin luway-luway na naglakaw alagad deretso sa saiyang obheto​—an kahon sa kontribusyon. Ihinulog nia duman an kadikit na kantidad na tinipon nia para sa katuyohan na ini. Minsan ngani dai sia makakatabang sa pagtogdok kan tiriponan, gusto niang tumabang.

An Kristianang ini tibaad ipagirumdom sa saindo an saro pang maimbod na babae​—an “dukhang babaeng balo” na naheling ni Jesus na naghulog nin duwang saradit na sinsilyo sa kaha sa templo. Dai na isinabi sa sato an saiyang kamugtakan, alagad puedeng depisil na marhay an pagbuhay kan babaeng mayong agom kan panahon na idto. Daing duwa-duwa, si Jesus nakamate nin simpatiya sa saiya, huli ta biyong aram ni Jesus an kamugtakan nia. Sa paggamit sa saiya bilang halimbawa sa saiyang mga disipulo, sinabi ni Jesus na an kadikit niang regalo iyo na an “gabos na yaon sa saiya, an saiyang bilog na pagbuhay.”​—Marcos 12:41-44.

Taano ta an sarong daing sukat na babae na arog kan dukhang babaeng balong ini ta magibo nin siring na sakripisyo? Malinaw nanggad, huli iyan sa hararom na debosyon nia ki Jehova Dios, na nakasentro an pagsamba sa templo sa Jerusalem. Maski limitado an magigibo nia, gusto niang suportaran an sagradong paglilingkod. Asin seguradong nakamate sia nin tunay na kagayagayahan sa pagkontribwir kan ano man na kaya niang itao.

Pagtatao Tanganing Suportaran an Gibohon ni Jehova

An pagtao nin materyal asin pinansial na mga kontribusyon kaidto pa saro nang kinakaipuhan na kabtang kan dalisay na pagsamba, asin pirme iyan na ginigikanan nin dakulang kagayagayahan. (1 Cronica 29:9) Sa suanoy na Israel an mga kontribusyon ginagamit bako sanang sa pagpagayon kan templo kundi patin sa danay na pagpunsionar sa aroaldaw kan gabos na aspekto kan pagsamba ki Jehova. Espesipikong sinabi kan Ley na an mga aki ni Israel makontribwir nin ikasampulong kabtang kan saindang inani tanganing suportaran an mga Levita, na nagtatao nin mga serbisyo sa templo. Alagad an mga Levita makontribwir man ki Jehova nin ikasampulong kabtang kan mga produkto na inako ninda.​—Bilang 18:21-29.

Maski an mga Kristiano binutasan na sa mga kahagadan kan tipan nin Ley, an prinsipyo na an mga lingkod nin Dios makontribwir sa materyal na paagi tanganing suportaran an tunay na  pagsamba nagdanay na dai nagbabago. (Galacia 5:1) Dugang pa, ibinilang kan mga Kristiano kan enot na siglo na kagayagayahan an magkontribwir para sa pagtabang sa mga pangangaipo kan mga tugang ninda. (Gibo 2:​45, 46) Ipinagirumdom ni apostol Pablo sa mga Kristiano na kun paanong an Dios buka an palad na nagtao sa sainda nin marahay na mga bagay, maninigo man na magpaheling sinda nin pagigin buka an palad sa iba. Sia nagsurat: “Pagbotan mo an mga mayaman sa presenteng sistema nin mga bagay na dai magin mapalangkaw, asin ibugtak an saindang paglaom, bakong sa kayamanan na bakong segurado, kundi sa Dios, na mayaman na nagtatao sa sato kan gabos na bagay para sa satong pagkaogma; na sinda maggibo nin marahay, magin mayaman sa marahay na mga gibo, magin matinao, andam na manhiras, na nagririmpos para sa sainda man sana nin marahay na pasisikadan para sa ngapit, tangani sindang makapangapot nin marigon sa tunay na buhay.” (1 Timoteo 6:17-19; 2 Corinto 9:11) Tunay nanggad, hale sa personal na eksperyensia, napatunayan ni Pablo na tama an mga tataramon ni Jesus: “Igwang orog na kaogmahan sa pagtao kisa pag-ako.”​—Gibo 20:35.

An Kristianong Pagtatao Ngonyan

Ngonyan, an mga lingkod ni Jehova padagos na ginagamit an saindang materyal na mga kayamanan sa pagtabang sa lambang saro asin pagsuportar sa gibohon nin Dios. Dawa an mga daing sukat nagkokontribwir kan kaya nindang itao. Nakakamate nin paninimbagan ki Jehova “an maimbod asin mapagmansay na oripon” na gamiton an gabos na ikinontribwir na pondong ini sa pinakamarahay na paaging posible. (Mateo 24:45) Ginagamit an mga pondo sa pagpadalagan nin mga sangang opisina, pagtradusir asin pagprodusir nin mga Biblia asin literatura sa Biblia, pag-areglo nin darakulang Kristianong pagtiripon, pagsanay asin pagpadara nin nagbibiaheng mga paraataman asin misyonero, pagtao nin ayuda sa kalamidad, saka para sa dakol na iba pang mahalagang marhay na katuyohan. Magkonsentrar kita sa saro sa siring na katuyohan​—pagtabang sa pagtao nin mga lugar nin pagsamba.

An Mga Saksi ni Jehova nagtitiripon nin nagkapirang beses kada semana sa saindang mga Kingdom Hall tanganing makinabang sa espirituwal na edukasyon asin nakakapakosog na pakikiasosyar. Minsan siring, sa dakol na nasyon, huli sa kamugtakan sa pagbuhay dai kaya kan lokal na mga Saksi na gastosan an pagtogdok nin mga Kingdom Hall na mayo nin pinansial na tabang. Kun siring, kan 1999, pinonan kan Mga Saksi ni Jehova an sarong programa sa paggamit kan mga pondo hale sa mas mayayaman na nasyon sa pagtabang na magtogdok nin mga Kingdom Hall sa mas dukhang mga nasyon. Dugang pa, rinibong boluntaryo  na an nagtao kan saindang panahon asin abilidad, sa parate nagtatrabaho sa hararayong parte kan mga nasyon na ini. Durante nin pagtogdok, nakakanood an lokal na mga Saksi nin mga abilidad sa pagtogdok asin pagmantenir, asin pinapagin posible kan Pondo sa Kingdom Hall na makabakal nin kinakaipuhan na mga kasangkapan asin materyales. An mga Saksing naggagamit na ngonyan kan bagong mga tiriponan na ini nagpapasalamat na marhay sa saindang mga kapagtubod na nagtao nin panahon asin kuarta. Nagkokontribwir man an lokal na mga Saksi kada bulan sa pagmantener kan bagong Kingdom Hall asin pagtabang na mabayadan an ginastos sa pagtogdok, sa siring, nakakatabang sa pagtogdok nin mas dakol pang Kingdom Hall.

Itinogdok an mga Kingdom Hall na naggagamit nin lokal na mga paagi asin materyales. Minsan ngani an mga tiriponan na ini bakong maadorno, an mga iyan magayon, praktikal, asin komportable. Kan magpoon an programa nin pagtogdok kan 1999, mga 40 nasyon na may limitadong rekursos an iiniba. Poon kaidto, pinahiwas na an programa sa pagtogdok tanganing ikaiba an 116 na siring na mga nasyon, na kalabot an labi sa kabanga kan mga kongregasyon nin Mga Saksi ni Jehova sa kinaban. Sa nakaaging limang taon, labing 9,000 na Kingdom Hall an ikinatogdok sa irarom kan arog kaining areglo, na may promedyong labing 5 bagong tiriponan kada aldaw! Pero, sa 116 na nasyon na ini, igwa pa man giraray nin pangangaipo para sa 14,500 na bagong Kingdom Hall. Sa tabang ni Jehova asin paagi sa pagigin andam patin pagigin buka an palad kan mga Saksi sa bilog na kinaban, linalaoman na magkakaigwa nin igong pondo tanganing mapanigoan an pangangaipong ini.​—Salmo 127:1.

Sinusuportaran kan mga Kingdom Hall an Pag-oswag

Ano an epekto kan pambihirang paghihingoang ini sa lokal na mga Saksi asin sa paghuhulit kan Kahadean? Sa dakol na rehion, nagkaigwa nin pambihirang pag-oswag sa mga nag-aatender sa pagtiripon pagkatapos na itogdok an sarong bagong Kingdom Hall. An sarong tipikong halimbawa yaon sa report na ini hale sa Burundi: “Kan matapos an Kingdom Hall, tolos na napano iyan. Halimbawa, itinogdok an sarong Kingdom Hall para sa kongregasyon na may promedyong mga 100 na nag-aatender sa saindang mga pagtiripon. Komportableng makakatukaw sa saindang bagong Kingdom Hall an 150. Kan matapos iyan, 250 na an nag-aatender sa mga pagtiripon.”

Taano ta nangyayari an siring na pag-oswag? Sarong bagay, an mga grupo nin mga parahayag kan Kahadean na mayo nin pormal na lugar nin pagtitiriponan alagad kaipuhan na magtiripon sa irarom nin poon nin kahoy o sa oma kun beses  pinagsususpetsahan. Sa sarong nasyon, an etnikong kadahasan iinaasosyar sa arog kaiyan na saradit na grupo nin relihion, asin hinahagad kan ley na an gabos na relihiosong pagtiripon gibohon sa laog nin harong nin pagsamba.

An pagkaigwa kan sadiri nindang mga tiriponan nakatabang man sa mga Saksi ni Jehova na ipaheling sa komunidad na sinda bakong mga disipulo nin sarong indibiduwal na pastor. An sangang opisina kan Mga Saksi ni Jehova sa Zimbabwe nagsurat: “Kan nakaagi, an mga tugang sa lugar na ini pirmeng nagtitiripon sa pribadong mga harong, asin iinaasosyar kan lokal na mga tawo an kongregasyon sa kagsadiri kan harong na pinagtitiriponan ninda. Inaapod ninda an mga tugang na kabilang sa iglesia ni Mr. Polano. Nagbabago na ini gabos ngonyan mantang naheheling kan mga tawo an mga karatula na malinaw na ipinapamidbid an kada tiriponan bilang ‘Kingdom Hall of Jehovah’s Witnesses.’ ”

Magayagayang mga Paratao

“An Dios namomoot sa maogmang paratao,” an isinurat ni apostol Pablo. (2 Corinto 9:7) Siempre, an darakulang donasyon nakakatabang na marhay. Alagad an mas dakulang kabtang kan pondo na ikinontribwir sa gibohon kan Mga Saksi ni Jehova hale sa mga kahon sa kontribusyon sa  Kingdom Hall. Dakula o sadit, an gabos na kontribusyon importante asin dai linilingawan. Girumdomon na si Jesus puminuesto mismo kun saen naheheling nia an dukhang babaeng balo na nagkokontribwir kan saiyang duwang sadit na sinsilyo. Naheling man sia kan mga anghel asin ni Jehova. Dai ngani niato aram an ngaran kan babaeng balo, alagad sinierto ni Jehova na an saiyang daing kaimotan na gibo ikasurat sa Biblia sa gabos na panahon.

Apuera sa pagtogdok nin Kingdom Hall, sinusuportaran kan satong mga kontribusyon an gabos na iba pang kabtang kan mahalagang marhay na gibohon na pan-Kahadean. An pagkooperar sa paaging ini nagtatao sa sato nin dahelan na maggayagaya asin magin “mayaman sa dakol na pagpahayag nin pasalamat sa Dios.” (2 Corinto 9:12) An satong Kristianong mga tugang sa Benin nagbabareta: “Kada aldaw dakol na pamibi nin pagpasalamat an ipinapaabot ki Jehova huli sa inakong pinansial na tabang hale sa internasyonal na kasararoan nin magturugang.” Kadungan kaiyan, gabos kita na nakikabtang sa pagsuportar sa gibohon na pan-Kahadean sa pinansial na paagi nakakaeksperyensia nin kaogmahan na minagikan sa Kristianong pagtatao!

[Kahon/Ritrato sa pahina 22, 23]

Mga Paaging Pinipili nin Iba sa Pagtao

MGA KONTRIBUSYON SA PAMBILOG NA KINABAN NA GIBOHON

An dakol nagtatagama, o nagbabadyet, nin kantidad na ibinubugtak ninda sa mga kahon nin kontribusyon na may nakasurat na “Contributions for the Worldwide Work​—Matthew 24:14.”

Kada bulan, ipinapadara kan mga kongregasyon an kantidad na ini sa opisina kan Mga Saksi ni Jehova na naglilingkod sa saindang nasyon. An boluntad na mga donasyon na kuarta puede man na direktang ipadara sa Watch Tower Bible and Tract Society of the Philippines, Inc., P.O. Box 2044, 1060 Manila, o sa sangang opisina na naglilingkod sa saindong nasyon. An mga tseke maninigong bayadan sa “Watch Tower.” An mga alahas o iba pang mahalagang bagay puede man na idonar. An sarong halipot na surat na nagsasabing iyan sarong direktang regalo maninigong iiba sa mga kontribusyon na ini.

AREGLO SA IPINAGKATIWALANG KUARTA NA KONDISYONAL NA DONASYON

Puedeng ipagkatiwala an kuarta sa Watch Tower. Minsan siring, puedeng ibalik an donasyon kun hagadon kan nagdonar. Para sa dugang na impormasyon, makikomunikar tabi sa Treasurer’s Office sa adres na sinabi sa enotan.

PAGPLANO PARA SA PAG-ABULOY

Apuera sa direktang mga regalong kuarta, igwa nin iba pang mga paagi nin pagtao para sa kapakinabangan kan paglilingkod sa Kahadean sa bilog na kinaban. Kabale digdi an:

Seguro: An Watch Tower puedeng gibohon na benepisyaryo nin polisa sa seguro sa buhay o nin plano sa pagretiro/pension.

Mga Deposito sa Bangko: An mga deposito sa bangko, sertipiko nin deposito, o indibiduwal na deposito sa pagretiro puedeng ipagkatiwala sa o bayadan sa Watch Tower pagkagadan kan nagdeposito, kaoyon sa lokal na mga kahagadan sa bangko.

Aksiones Asin mga Bono: An aksiones asin mga bono puedeng idonar sa Watch Tower bilang direktang regalo.

Daga Asin Harong: An ikakapabakal na daga asin harong puedeng idonar magsalang paagi sa direktang pagregalo o sa kaso nin residensial na rogaring, paagi sa pagreserba sa nagdonar nin propiedad sagkod na nabubuhay, na puedeng magpadagos na mag-istar dian sagkod na sia nabubuhay. Paaramon an sangang opisina sa saindong nasyon bago ibalyo an ano man na daga asin harong.

Gift Annuity: An gift annuity sarong areglo kun saen ibinabalyo nin saro an kuarta o garantiya sa korporasyon nin Watchtower. Karibay kaiyan, an nagdonar, o saro na dinesignaran kan nagdonar, maresibi nin espesipikong annuity payment kada taon sagkod na nabubuhay. An nagdonar binabawasan sa buhis sa ginaganar sa taon na naestablisar an gift annuity.

Mga Testamento Asin Kabuhayan na Ipinagkatiwala: An propiedad o kuarta puedeng ipamana sa Watch Tower paagi sa sarong testamento na ginibo sa legal na paagi, o an Watch Tower puedeng gibohon na benepisyaryo nin sarong kontrata sa kabuhayan na ipinagkatiwala. An kabuhayan na ipinagkatiwala na an nakikinabang sarong relihiosong organisasyon puedeng magtao nin nagkapirang bentaha sa pagbuhis.

Siring sa ipinaparisa kan terminong “pagplano para sa pag-abuloy,” an klaseng ini nin mga donasyon natural sanang nagkakaipo nin pagplano kan nagdonar. Tanganing tabangan an mga indibiduwal na gustong pakinabangon an pambilog na kinaban na gibohon kan Mga Saksi ni Jehova paagi sa sarong klase nin pagplano para sa pag-abuloy, sarong brosyur an inandam sa Ingles asin Kastila na may titulong Charitable Planning to Benefit Kingdom Service Worldwide. Isinurat an brosyur tanganing magtao nin impormasyon dapit sa laen-laen na paagi nin pagtao nin regalo magsalang ngonyan o paagi sa pamana pagnagadan. Pakatapos na mabasa an brosyur asin maghapot sa sadiri nindang kinokonsulta dapit sa ley o buwis, dakol an nakatabang sa pagsuportar sa gibohon kan Mga Saksi ni Jehova sa bilog na kinaban asin ginamit sa pinakalubos na paagi an mga benepisyo ninda sa buhis mantang ginigibo iyan. Puedeng makakua kan brosyur na ini paagi sa direktang paghagad nin kopya sa Charitable Planning Office.

Para sa dugang pang impormasyon, puede kamong makikomunikar sa Charitable Planning Office, magsalang paagi sa pagsurat o telepono, sa adres na nakalista sa ibaba o sa opisina kan Mga Saksi ni Jehova na naglilingkod sa saindong nasyon.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue

San Francisco Del Monte

1105 Quezon City

Telepono: (02) 411-6090

[Mga Ritrato sa pahina 20, 21]

Luma asin bagong mga lugar nin tiriponan kan Mga Saksi ni Jehova

Zambia

Republika nin Aprika Sentral