Makakamtan Pa daw Niato an Tunay na Katiwasayan?

MAOGMANG nakikikawat an mga aki sa saindang mamomoton na mga magurang​—siisay an dai maoogmang dalanon an siring na eksena? An mga aki sa siring na kamugtakan nakakamate na biyong tiwasay sa presensia kan may pagmakolog na mga magurang. Pero, para sa dakol na hoben, an siring na mga panahon nin kaogmahan bihirang mangyari. Imbes, may mga aki na pinoproblema aroaldaw kun saen sinda makakahanap nin matotorogan kun banggi. May paglaom pa daw para sa daing maistaran na mga aking iyan asin sa iba na nabubuhay na mayo nin katiwasayan?

Dawa ngani an ngapit garo baga dai nang paglaom, an Tataramon nin Dios nagtatao nin paglaom. Ihinula ni propeta Isaias na maabot an aldaw na an gabos mabubuhay sa lubos na katiwasayan. Sia nagsurat: “Sinda siertong matogdok nin mga harong asin maontok sinda dian; asin siertong matanom sinda nin mga ubasan asin kakakanon ninda an bunga kaiyan. Dai sinda matogdok asin iba an maontok; dai sinda matanom asin iba an makakan.”​—Isaias 65:​21, 22.

Alagad an paglaom daw na ini masarig an basehan? Kun sa bagay, an tataramon na “paglaom” dai pirmeng nagpaparisa nin kasiertohan. Halimbawa, sa Brazil, parateng nadadangog nin saro an pananaram na: “A esperança é a última que morre.” Literal iyan na nangangahulogan na, “An paglaom iyo an ultimong bagay na nagagadan.” Ipinaparisa kaini na dakol na tawo an nagdadanay na pano nin paglaom dawa mayo nin tunay na basehan para sa paglaom. Minsan siring, napapalaen an paglaom na itinatao sato kan buhay na Dios. Si apostol Pablo nagsurat: “Mayo nin nagtutubod sa [Dios] na masusudya.” (Roma 10:11) An mga hula sa Biblia na nagkaorotob na nagtatao sa sato nin kompiansa na an gabos na iba pang panuga na itinao ni Jehova Dios magkakatotoo man. Kun an mga panugang iyan magkatotoo na, an mga kamugtakan na nagtutulod sa mga aki na mamuhay sa kalye magigin bagay na nakalihis na.

Makakatabang dawa ngonyan an praktikal na hatol na manonompongan sa Biblia sa mga mayo nin paglaom tanganing paoswagon an saindang pamumuhay asin makanompong nin tunay na katiwasayan. Paano iyan posible? An mga Saksi ni Jehova sa saindong komunidad maoogmang tabangan kamo na masumpongan an simbag sa hapot na ini.