Mga Hapot Hale sa mga Parabasa

Paano minamansay kan Kristianong kongregasyon an pagpagutid?

Kinokondenar kan Tataramon nin Dios an pagbuburat sagkod an pagpagutid bilang gawe-gawe na dai puede sa mga naglilingkod sa Dios. Kun siring, pareho an pagmansay kan Kristianong kongregasyon sa sarong midbid na parapagutid asin sa sarong paraburat. An paraburat ni an parapagutid dai puedeng magin kabtang kan Kristianong kongregasyon.

An Talinhaga 23:​20, 21 nagsasabi: “Dai ka makiiba sa mga makosog na parainom nin arak, sa mga parapagutid na parakakan nin karne. Huli ta an paraburat asin parapagutid magigin dukha, asin an pagtungka magubing sa saro nin mga trapo.” Sa Deuteronomio 21:​20, mababasa niato an manongod sa “sutil asin rebelde” na indibiduwal, na maninigo sa kagadanan sa irarom kan Ley ni Moises. Oyon sa bersikulong ini, an duwang karakteristiko kan rebelde asin habong magsolsol na indibiduwal na iyan iyo na sia sarong “parapagutid asin paraburat.” Maliwanag nanggad, sa suanoy na Israel, an pagpagutid minamansay bilang dai maaakong gibo para sa mga nagmamawot na maglingkod sa Dios.

Pero, ano an parapagutid, asin ano an sinasabi kan Kristianong Griegong Kasuratan manongod sa topikong ini? An parapagutid tinatawan nin kahulogan bilang “saro na ginigibong ugale an pagigin mahanab asin dai naiinggustohan sa pagkakan asin pag-inom.” Sa siring, an sarong dahelan iyo na, an pagpagutid sarong porma nin kahanaban, asin sinasabi sato kan Tataramon nin Dios na an “mga tawong mahanab” iyo an klase nin mga tawo  na dai magmamana kan Kahadean nin Dios. (1 Corinto 6:​9, 10; Filipos 3:​18, 19; 1 Pedro 4:3) Dugang pa, kan patanidan ni apostol Pablo an mga Kristiano tumang sa paggibo nin “mga gibo kan laman,” nasambitan nia an “mga pagburat, mariribok na pag-ogma, asin an mga bagay na kapareho kaini.” (Galacia 5:19-21) An sobrang pagkakan parateng kadungan nin mga pagburat asin mariribok na pag-ogma. Dugang pa, an pagpagutid siertong kaiba nanggad sa pananaram ni Pablo na “asin an mga bagay na kapareho kaini.” Siring kan iba pang “mga gibo kan laman,” an sarong Kristiano na midbid na marhay sa saiyang pirmeng pagpagutid asin may katagasan na nagsasayuma na bagohon an saiyang mahanab na gawe-gawe dapat na haleon sa kongregasyon.​—1 Corinto 5:​11, 13. *

Dawa ngani an Tataramon nin Dios ipinapareho an paraburat sa sarong parapagutid, mas pasil na mamidbid an paraburat kisa sa parapagutid. An mga tanda sa pagbuburat sa parate madaling marisa. Minsan siring, mas depisil na determinaran kun baga an saro midbid na parapagutid huling dai sana iyan nadedeterminaran paagi sa panluwas na itsura. Kun siring, an pag-asikaso sa arog kaining mga kamugtakan nangangaipo nin dakulang pag-iingat asin pagigin mapagrisa sa kabtang kan kamagurangan sa kongregasyon.

Halimbawa, an sobrang taba puedeng sarong tanda nin pagpagutid, alagad bakong arog kaiyan pirme an kamugtakan. An pagkaigwa nin sobrang timbang nin saro tibaad huli sa kamatean. An erensia puedeng makakontribwir man sa pagigin sobrang taba. Maninigo man niatong tandaan na an sobrang taba sarong pisikal na kamugtakan, mantang an pagpagutid sarong mental na aktitud. An sobrang taba tinatawan nin kahulogan bilang “sarong kamugtakan na midbid sa sobrang taba kan hawak,” mantang an pagpagutid “mahanab o labi-labing pagpangana.” Sa siring, an pagpagutid dai nadedeterminaran paagi sa sokol kan hawak nin saro kundi paagi sa saiyang aktitud sa pagkakan. An sarong tawo tibaad bako man na mataba o tibaad maniwang pa ngani alagad ta sarong parapagutid. Apuera kaini, sa kada lugar dakula an pagkakalaenlaen sa pagmansay kun ano an tamang-tamang timbang o korte kan hawak.

Ano an mga tanda nin pagpagutid? An sarong parapagutid parateng ipinapaheling an kadaihan nin pagpopogol, nagpapakabasog na marhay sagkod sa punto na dai na mapamugtak o nagkakahelang na. Ipinaparisa kan kadaihan nia nin pagpopogol sa sadiri na dai nanggad sia nahahadit sa katuyawan na itinatao nia ki Jehova asin sa marahay na reputasyon kan Saiyang banwaan. (1 Corinto 10:31) Sa ibong na lado, an tawo na kun minsan napapasobra nin kakan dai tolos puedeng mansayon bilang sarong “paslong tawo.” (Efeso 5:5) Minsan siring, segun sa prinsipyo kan Galacia 6:​1, an siring na Kristiano tibaad nangangaipo nin tabang. Si Pablo nagsabi: “Mga tugang, minsan kun an sarong tawo gumibo nin sala bago nia iyan maaraman, kamo na igwang espirituwal na mga kualipikasyon pagmaigotan nindo na pakarhayon giraray an tawong iyan sa espiritu nin kahoyoan.”

Taano an hatol kan Biblia na lumikay sa sobrang pagkakan ta nangorognang mahalaga ngonyan? Huling nagpatanid si Jesus, partikularmente mapadapit sa satong aldaw: “Atenderan an saindong sadiri na an saindong mga puso dai noarin man mapagabatan nin sobrang pagkakan asin makosog na pag-inom patin mga kahaditan sa buhay, asin sa panale an aldaw na iyan mag-abot sa saindo na siring sa siod.” (Lucas 21:​34, 35) An paglikay sa pagpalabilabi sa pagkakan sarong mahalagang paagi tanganing rayoan an estilo nin pamumuhay na nakakaraot sa espirituwal.

An pagigin tama sana sarong marahay na ugale nin Kristiano. (1 Timoteo 3:​2, 11) Kun siring, seguradong tatabangan ni Jehova an gabos na nagmamaigot na iaplikar an hatol kan Biblia mapadapit sa ugale nin tama sanang pagkakan asin pag-inom.​—Hebreo 4:16.

[Nota sa Ibaba]