Pinaglalamag Alagad Maogma

“Maogma kamo kun an mga tawo pinag-oolog-olog kamo asin pinaglalamag kamo patin putik na nagtataram nin lambang klase nin maraot na bagay tumang sa saindo dahel sa sako.”​—MATEO 5:11.

1. Anong asegurasyon mapadapit sa kaogmahan asin paglamag an itinao ni Jesus sa saiyang mga parasunod?

KAN enot na sugoon ni Jesus an saiyang mga apostol na ihulit an Kahadean, pinatanidan nia sinda na mapapaatubang sinda sa pagtumang. Sinabihan nia sinda: “Ikakaongis kamo nin gabos na tawo huli sa ngaran ko.” (Mateo 10:5-18, 22) Minsan siring, mas naenot pa, sa saiyang Sermon sa Bukid, inasegurar nia an saiyang mga apostol asin an iba pa na an siring na pagtumang dai man talaga makakadanyar sa saindang hararom na kaogmahan. Sa katunayan, ikinonektar pa ngani ni Jesus an pagigin maogma sa pag-agi nin paglamag bilang mga Kristiano! Paano magbubunga nin kaogmahan an paglamag?

Pagdusa Huli sa Katanosan

2. Segun ki Jesus asin ki apostol Pedro, anong klaseng pagdusa an nagbubunga nin kaogmahan?

² An ikawalong kaogmahan na sinabi ni Jesus  iyo an: “Maogma idtong mga pinaglamag huli sa katanosan, huli ta an kahadean kan kalangitan sadiri ninda.” (Mateo 5:10) An pagdusa mismo bakong kaomaw-omaw. Si apostol Pedro nagsurat: “Ano an karahayan kun, kun nagkakasala asin tinataplong kamo, tinatagalan nindo iyan? Alagad kun, mantang kamo naggigibo nin marahay kamo nagdudusa, tinatagalan nindo iyan, ini nakakapaogma sa Dios.” Sinabi pa nia: “Minsan siring, mayo logod nin siisay man sa saindo na magdusa bilang paragadan o parahabon o parakasala o parapakilabot sa mga bagay nin iba. Alagad kun sia nagtitios bilang sarong Kristiano, dai sia masupog, kundi padagos niang pamurawayon an Dios sa ngaran na ini.” (1 Pedro 2:20; 4:​15, 16) Segun sa mga tataramon ni Jesus, an pagdusa nagbubunga nin kaogmahan kun iyan tinatagalan huli sa katanosan.

3. (a) Ano an boot sabihon kan pinaglalamag huli sa katanosan? (b) Ano an nagin epekto kan paglamag sa enot na mga Kristiano?

³ An tunay na katanosan nasosokol segun sa pagsunod sa kabotan nin Dios asin sa saiyang mga togon. Kun siring, an pagdusa huli sa katanosan nangangahulogan nin pagdusa huli ta linalabanan nin saro an pangigipit na lapason an mga pamantayan o kahagadan nin Dios. An mga apostol pinaglamag kan mga namomoon na Judio huli sa dai pagpondo sa paghuhulit sa ngaran ni Jesus. (Gibo 4:18-20; 5:27-29, 40) Nawara daw an saindang kagayagayahan o napondo an saindang paghuhulit huli kaini? Dai nanggad! “Sinda . . . naghale sa Sanhedrin, na naggagayagaya huli ta pinapagkanigo sinda na magtios nin kasupganan huli sa saiyang ngaran. Asin aroaldaw sa templo asin sa harong-harong nagpadagos sinda na dai nin ontok sa pagtokdo asin pagpahayag kan maogmang bareta dapit ki Cristo, si Jesus.” (Gibo 5:​41, 42) An paglamag na ini nagtao nin kagayagayahan sa sainda asin nagpakosog giraray sa saindang kaigotan sa paghuhulit. Kan huri, an enot na mga Kristiano pinaglamag kan mga Romano huli sa pagsayumang sumamba sa emperador.

4. Ano an nagkapirang dahelan na pinaglalamag an mga Kristiano?

⁴ Sa presenteng mga panahon, an mga Saksi ni Jehova pinaglalamag huli ta habo nindang pumondo sa paghuhulit kan “maogmang baretang ini kan kahadean.” (Mateo 24:14) Kun ibinabawal an saindang Kristianong mga pagtiripon, andam sindang magdusa kisa pumondong magtorotiripon siring kan ipinagboboot kan Biblia. (Hebreo 10:​24, 25) Sinda pinaglalamag huli sa saindang Kristianong neutralidad o sa saindang pagsayuma sa salang paggamit nin dugo. (Juan 17:14; Gibo 15:​28, 29) Minsan siring, an paninindogan na ini huli sa katanosan nagtatao nin dakulang panlaog na katoninongan asin kaogmahan sa banwaan nin Dios ngonyan.​—1 Pedro 3:14.

Pinag-olog-olog Dahel ki Cristo

5. Huli sa anong pundamental na dahelan pinaglalamag an banwaan ni Jehova ngonyan?

⁵ An ikasiyam na kaogmahan na tinokar ni Jesus sa saiyang Sermon sa Bukid manongod man sa paglamag. Sinabi nia: “Maogma kamo kun an mga tawo pinag-oolog-olog kamo asin pinaglalamag kamo patin putik na nagtataram nin lambang klase nin maraot na bagay tumang sa saindo dahel sa sako.” (Mateo 5:11) An pundamental na dahelan kun taano ta pinaglalamag an banwaan ni Jehova iyo na sinda bakong kabtang kan presenteng maraot na sistema nin mga bagay. Sinabihan ni Jesus an saiyang mga disipulo: “Kun kamo kabtang kan kinaban, mamahalon kan kinaban an sadiri kaiyan. Ngonyan huling kamo bakong kabtang kan kinaban, kundi pinili ko kamo hale sa kinaban, huli kaini an kinaban naoongis sa saindo.” (Juan 15:19) Kaagid kaiyan, sinabi ni apostol Pedro: “Huli ta dai na kamo padagos na nakikiiba sa sainda sa dalan na ini sa kaagid na karigsokan, sinda nagngangaralas asin padagos na nagtataram na may panlilibak manongod sa saindo.”​—1 Pedro 4:4.

6. (a) Taano ta pinag-oolog-olog asin pinaglalamag an mga natatada asin an saindang kairiba? (b) Naiinaan daw kan pag-olog-olog na iyan an satong kaogmahan?

⁶ Naheling na niato na pinaglamag an enot na mga Kristiano huli ta habo nindang pumondo sa paghuhulit sa ngaran ni Jesus. Sinugo ni Cristo an saiyang mga parasunod: “Kamo magigin mga  saksi ko . . . sagkod sa kaporoporohi kan daga.” (Gibo 1:8) An sugo na iyan maigot na sinunod kan maimbod na natatada kan linahidan na mga tugang ni Cristo, na tinatabangan kan saindang maimbod na kairibang “dakulang kadaklan.” (Kapahayagan 7:9) Kun siring, si Satanas nakikipaglaban “sa mga natatada kan saiyang banhi [an banhi kan “babae,” an langitnon na kabtang kan organisasyon nin Dios], na nagkukuyog sa mga togon nin Dios asin igwa kan gibohon na pagpatotoo ki Jesus.” (Kapahayagan 12:​9, 17) Bilang Mga Saksi ni Jehova, nagpapatotoo kita ki Jesus, an natutukaw na ngonyan na Hade kan gobyernong Kahadean, na malaglag kan mga gobyerno nin tawo na nagkokontra sa matanos na bagong kinaban nin Dios. (Daniel 2:44; 2 Pedro 3:13) Huli kaini kita pinag-oolog-olog asin pinaglalamag, alagad kita maogma na magdusa huli sa ngaran ni Cristo.​—1 Pedro 4:14.

7, 8. Ano an putik na mga sinabi kan mga nagkokontra sa enot na mga Kristiano?

⁷ Sinabi ni Jesus na maninigong ibilang kan saiyang mga parasunod na sinda maogma dawa pa kun an mga tawo “putik na nagtataram nin lambang klase nin maraot na bagay” tumang sa sainda dahel sa saiya. (Mateo 5:11) Nangyari nanggad ini sa enot na mga Kristiano. Kan si apostol Pablo detenido sa Roma, kaidtong mga 59-61 C.E., an mga namomoon na Judio duman nagsabi manongod sa mga Kristiano: “An totoo kun dapit sa sektang ini naaaraman mi na sa gabos na lugar iyan pinaglilibak.” (Gibo 28:22) Si Pablo asin Silas sinahotan na “nagpabagsak sa ineerokan na daga,” na minagaweng “tumang sa mga dekreto ni Cesar.”​—Gibo 17:​6, 7.

⁸ Sa pagsurat manongod sa mga Kristiano kan panahon kan Imperyo nin Roma, an historyador na si K. S. Latourette nagsabi: “Manlaenlaen an sahot. Huli ta habo nindang magpartisipar sa paganong mga seremonya an mga Kristiano sinahotan na mga ateista. Huling daing gayo sinda nakikikabtang sa mga aktibidad kan komunidad​—an paganong mga kapiestahan, pampublikong mga libangan . . .​—tinuyatuya sinda na sinasabing sinda daa naoongis sa rasa nin tawo. . . . Sinasabing an mga lalaki sagkod babae nagtataragbo daa kun banggi . . . asin nagkakaigwa nin pakikidorog minsan kiisay. . . . An bagay na [an Memorial kan kagadanan ni Cristo] sineselebrar na an mga nagtutubod sana an presente pinonan kan mga huringhuding na an mga Kristiano regular na nag-aatang nin omboy asin iniinom an dugo asin kinakakan an laman kaiyan.” Dugang pa, huling an enot na mga Kristiano habong sumamba sa emperador, sinahotan sinda na mga kaiwal kan Estado.

9. Ano an nagin reaksion kan mga Kristiano kan enot na siglo sa putik na mga sahot tumang sa sainda, asin ano an situwasyon ngonyan?

⁹ An putik na mga sahot na idto dai nakaolang sa enot na mga Kristiano sa pag-otob kan sugo sa sainda na ihulit an maogmang bareta kan Kahadean. Kan 60-61 C.E., nasabi ni Pablo na an “maogmang bareta” “nagbubunga asin nagtatalubo sa bilog na kinaban” asin “ikinahulit sa gabos na linalang sa sirong nin langit.” (Colosas 1:​5, 6, 23) Iyan man an nangyayari ngonyan. An Mga Saksi ni Jehova putik na sinasahotan, kapareho kan ginibo sa mga Kristiano kan enot na siglo. Pero, ngonyan an paghuhulit kan mensahe kan Kahadean nag-ooswag asin nagtatao nin dakulang kaogmahan sa mga nakikikabtang dian.

Maogma na Pinaglalamag Arog kan mga Propeta

10, 11. (a) Paano tinapos ni Jesus an saiyang pagtokar kan ikasiyam na kaogmahan? (b) Taano ta pinaglamag an mga propeta? Magtao nin mga halimbawa.

¹⁰ Tinapos ni Jesus an pagtokar sa ikasiyam na kaogmahan paagi sa pagsabing: “Maggayagaya kamo . . . , huli ta sa paaging iyan pinaglamag ninda an mga propeta na naenot sa saindo.” (Mateo 5:12) An mga propeta na sinugo ni Jehova tanganing patanidan an bakong maimbod na Israel trinatar nin maraot asin sa parate pinaglamag. (Jeremias 7:​25, 26) Pinatunayan ni apostol Pablo an bagay na ini, na nagsurat: “Ano pa an sasabihon ko? Huli ta magkukulang ako nin panahon kun padagos kong isasaysay an manongod . . . [sa] iba pang mga propeta, na huli sa pagtubod . . . inako . . . an pagbalo sa sainda paagi sa mga pag-olog-olog asin paglatigo, sa katotoohan, labi pa kaiyan, paagi sa mga gapos asin mga bilanggoan.”​—Hebreo 11:32-38.

¹¹ Durante kan paghade kan maraot na si  Hadeng Acab asin kan saiyang agom, si Jezabel, dakol na propeta ni Jehova an ginadan paagi sa espada. (1 Hade 18:​4, 13; 19:10) Si propeta Jeremias ilinaag sa pandog asin kan huri ihinulog sa mabaldok na bobon. (Jeremias 20:​1, 2; 38:6) Si propeta Daniel ilinaog sa lungib nin mga leon. (Daniel 6:​16, 17) An gabos na propetang ini bago kan mga Kristiano pinaglamag huli ta sinurog ninda an dalisay na pagsamba ki Jehova. An dakol na propeta pinaglamag kan Judiong mga namomoon sa relihion. Inapod ni Jesus an mga eskriba asin Fariseo na “mga aki kaidtong mga guminadan sa mga propeta.”​—Mateo 23:31.

12. Bilang Mga Saksi ni Jehova, taano ta ibinibilang niato na sarong pribilehio an paglamagon arog kan mga propeta kan suanoy?

¹² Ngonyan, kita bilang Mga Saksi ni Jehova sa parate pinaglalamag huli ta maigot na ihinuhulit niato an maogmang bareta kan Kahadean. An satong mga kaiwal sinasahotan kita nin “agresibong paggibo nin mga proselito,” alagad aram niato na an maimbod na mga nagsasamba ki Jehova na naenot sa sato napaatubang man sa siring na pagkritika. (Jeremias 11:21; 20:​8, 11) Ibinibilang niato na sarong pribilehio an magdusa huli sa iyo man sanang dahelan na tinios kan maimbod na mga propeta kan suanoy. Si disipulo Santiago nagsurat: “Mga tugang, gibohon na arogan sa pagdusa nin karatan asin sa pagpapasensia an mga propeta, na nagtaram sa ngaran ni Jehova. Uya! Inaapod tang maogma idtong mga nakatagal.”​—Santiago 5:​10,11.

Hararom na mga Dahelan na Magin Maogma

13. (a) Taano ta dai kita nadedesganar sa paglamag? (b) Ano an nagpapangyaring makapanindogan kita nin marigon, asin ano an pinapatunayan kaini?

¹³ Imbes na madesganar sa paglamag, kita nararanga kun iniisip niato na sinusundan niato an mga lakad kan mga propeta, kan enot na mga Kristiano, asin ni Cristo Jesus mismo. (1 Pedro 2:21) Nakakakua kita nin hararom na satispaksion sa Kasuratan, siring kan minasunod na mga tataramon ni apostol Pedro: “Mga namomotan, dai kamo magngalas sa naglalaad dian sa saindo, na nangyayari sa saindo bilang pagbalo, na garo baga pambihirang bagay an nangyayari sa saindo. Kun kamo pinag-oolog-olog huli sa ngaran ni Cristo, maogma kamo, huli ta an espiritu nin kamurawayan, minsan an espiritu nin Dios, nag-oontok dian sa saindo.” (1 Pedro 4:​12, 14) Aram niato base sa eksperyensia na kaya niatong manindogan nin marigon sa irarom nin paglamag solamente huli ta an espiritu ni Jehova nag-oontok sa sato asin pinapakosog kita. An pagsuportar kan banal na espiritu sarong patunay na yaon sa sato an bendisyon ni Jehova, asin nagtatao ini sa sato nin dakulang kaogmahan.​—Salmo 5:12; Filipos 1:27-29.

14. Ano an mga dahelan niato na maggayagaya kun pinaglalamag kita huli sa katanosan?

¹⁴ An saro pang dahelan kun taano ta an pagkontra asin paglamag huli sa katanosan nagpapangyari sa sato na magin maogma iyo na iyan nagpapatunay na kita namumuhay bilang tunay na mga Kristiano na may diosnon na debosyon. Si apostol Pablo nagsurat: “An gabos na nagmamawot  na mamuhay na may diosnon na debosyon kaibahan ni Cristo Jesus paglalamagon man.” (2 Timoteo 3:12) Kita naoogma nin labi-labi kun iniisip niato na an satong pagdadanay na may integridad sa ibong nin paglamag nagtatao nin dugang pang simbag sa angat ni Satanas na an gabos na linalang ni Jehova naglilingkod sa Saiya huli sa paslong interes. (Job 1:9-11; 2:​3, 4) Naggagayagaya kita na kita igwa nin kabtang, baga man iyan saditon, sa pagbindikar kan matanos na soberaniya ni Jehova.​—Talinhaga 27:11.

Lumukso sa Kagayagayahan Huli sa Balos

15, 16. (a) Anong dahelan an itinao sato ni Jesus tanganing kita ‘maggayagaya asin lumukso huli sa kagayagayahan’? (b) Anong balos an nakatagama sa kalangitan para sa linahidan na mga Kristiano, asin paano man babalosan an saindang kairiba na “ibang karnero”?

¹⁵ Si Jesus nagtao nin dagdag na dahelan na maggayagaya kun pinapakaraot asin pinaglalamag arog kan mga propeta kan suanoy. Sa poro kan ikasiyam na kaogmahan, sinabi nia: “Maggayagaya kamo asin lumukso kamo huli sa kagayagayahan, huli ta dakula an saindong balos sa kalangitan.” (Mateo 5:12) Si apostol Pablo nagsurat: “An ibinabayad nin kasalan kagadanan, alagad an regalo na itinatao nin Dios buhay na daing katapusan paagi ki Cristo Jesus na satong Kagurangnan.” (Roma 6:23) Iyo, an ‘dakulang balos’ iyo an buhay, asin bako iyan na bayad na puede niatong ganaron. Iyan daing bayad na regalo. Sinabi ni Jesus na an balos nasa “kalangitan” huli ta iyan hale ki Jehova.

¹⁶ An mga linahidan nag-aako kan “korona nin buhay,” an boot sabihon, sa kamugtakan ninda, inmortal na buhay kaiba ni Cristo sa langit. (Santiago 1:​12, 17) An mga may daganon na paglaom, an “ibang karnero,” naglalaom na magmana nin buhay na daing katapusan sa sarong daganon na paraiso. (Juan 10:16; Kapahayagan 21:3-5) Para sa duwang grupong iyan, an “balos” dai inako bilang bayad. An mga linahidan sagkod an “ibang karnero” mag-aako kan saindang balos huli sa “nakakalabing marhay na dai na kutana maninigong kabootan” ni Jehova, na nagpahiro ki apostol Pablo na magsabi: “Salamat sa Dios sa saiyang dai ikaladawan na daing bayad na balaog.”​—2 Corinto 9:​14, 15.

17. Taano ta puede kitang magin maogma kun pinaglalamag asin ‘lumukso sa kagayagayahan’ sa piguratibong paagi?

 ¹⁷ Sa mga Kristiano, na an nagkapira sa sainda madali na kaidtong paglamagon na may karingisan ni Emperador Nero, si apostol Pablo nagsurat: “Mag-ogma kita mantang nasa mga kahorasaan, mantang aram niato na an kahorasaan nagbubunga nin pakatagal; dangan, an pakatagal, nin pagkainooyonan; dangan, an pagkainooyonan, nin paglaom, asin an paglaom dai nagbubunga nin pagkadesganar.” Sinabi nia man: “Maggayagaya kamo sa paglaom. Magtagal kamo sa kasakitan.” (Roma 5:3-5; 12:12) Baga man an satong paglaom langitnon o daganon, an balos sa sato huli sa kaimbodan sa irarom nin pagbalo dakulaon nanggad kisa ano man na maninigo sa sato. Daing sagkod an satong kagayagayahan huli sa oportunidad na mabuhay sagkod lamang tanganing paglingkodan asin omawon an satong mamomoton na Ama, si Jehova, sa irarom kan satong Hadeng si Jesu-Cristo. Sa piguratibong paagi, kita ‘naglulukso sa kagayagayahan.’

18. Ano an malalaoman sa mga nasyon mantang nagdadangadang an katapusan, asin ano an gigibohon ni Jehova?

¹⁸ Sa nagkapirang kadagaan, an mga Saksi ni Jehova pinaglamag asin pinaglalamag pa. Sa saiyang hula manongod sa pagtatapos kan sistema nin mga bagay, pinatanidan ni Jesus an tunay na mga Kristiano: “Ikakaongis kamo kan gabos na nasyon huli sa ngaran ko.” (Mateo 24:9) Mientras na naghaharani na kita sa katapusan, mamaniobrahon ni Satanas an mga nasyon na ipaheling an saindang pagkaongis sa banwaan ni Jehova. (Ezequiel 38:10-12, 14-16) Ini an magigin senyal na panahon nang humiro si Jehova. “Papadakulaon ko nanggad an sakong sadiri asin papakangbanalon ko an sakong sadiri patin ipapamidbid ko an sakong sadiri sa mga mata nin dakol na nasyon; asin kaipuhan na makaaram sinda na ako si Jehova.” (Ezequiel 38:23) Sa siring, papakangbanalon ni Jehova an saiyang dakulang ngaran asin ililigtas an saiyang banwaan sa paglamag. Kun siring, “maogma an tawo na padagos na nagtatagal.”​—Santiago 1:12.

19. Mantang hinahalat an dakulang “aldaw ni Jehova,” ano an maninigo niatong gibohon?

¹⁹ Mantang parani nang parani an “aldaw ni Jehova,” maggayagaya kita huli ta “pinapagkanigo [kita] na magtios nin kasupganan” huli sa ngaran ni Jesus. (2 Pedro 3:10-13; Gibo 5:41) Arog kan enot na mga Kristiano, magpadagos logod kita na “dai nin ontok sa pagtokdo asin pagpahayag kan maogmang bareta dapit ki Cristo” asin sa saiyang gobyernong Kahadean mientras na naghahalat sa satong balos sa matanos na bagong kinaban ni Jehova.​—Gibo 5:42; Santiago 5:11.

Bilang Repaso

• Ano an boot sabihon kan pagdusa huli sa katanosan?

• Ano an nagin epekto kan paglamag sa enot na mga Kristiano?

• Taano ta masasabing an Mga Saksi ni Jehova pinaglalamag arog kan mga propeta kan suanoy?

• Taano ta kita ‘makakapaggayagaya asin makakalukso huli sa kagayagayahan’ kun pinaglalamag?

[Mga Hapot Para sa Pag-adal]

[Mga Ritrato sa pahina 16, 17]

“Maogma kamo kun an mga tawo pinag-oolog-olog kamo asin pinaglalamag kamo”

[Credit Line]

Grupo sa presohan: Chicago Herald-American