Hinihimuyawot daw Nindo an Sarong Kinaban na Mayo nin Takot?

“Nabubuhay kita sa sarong ‘pabalikbalik na kamugtakan nin orog na pagigin mapagbantay asin . . . pagigin daing maginibo,’ na resulta nin ‘bakong klarong . . . peligro na puedeng umabot na daing patanid ano man na oras asin sa ano man na porma.’”

AN MGA tataramon na ini, na kinotar kan nakaaging taon sa magasin na Newsweek, naghahayag kan mga saboot nin dakol na tawo na nabubuhay sa maribok na kinaban ngonyan. Ipinarisa ni Jesu-Cristo na an siring na mga emosyon magrabe sa harani nang ngapit. Ihinula nia an sarong panahon kun saen magkakaigwa nin labi-labi nanggad na kamondoan sa tahaw nin mga nasyon na dai na ninda aram an luluwasan asin an mga tawo manluluya huli sa takot asin pag-antisipar sa mga bagay na maabot sa daga. Pero, kita dai kaipuhan na makamate nin takot o pagigin daing maginibo, huli ta idinugang ni Jesus: “Kun an mga bagay na ini magpoon nang mangyari, tindog kamo nin tanos asin tingagan an saindong mga payo, huli ta an saindong pagkaligtas naghaharani na.”​—Lucas 21:25-28.

Ilinaladawan an buhay kan saiyang banwaan sa daga pagkatapos kan pagkaligtas na iyan, si Jehova Dios nagsabi: “An sakuyang banwaan kaipuhan na mag-erok sa matoninong na erokan asin sa mga harong na may lubos na kompiansa patin sa trangkilong mga pahingaloan.” (Isaias 32:18) Paagi sa saiyang propeta na si Miqueas, si Jehova nagsabi: “Sinda totoong magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda.”​—Miqueas 4:4.

Kanigoan an kalaenan kaiyan sa buhay ngonyan! Mayo na nin dai aram na peligro na mahuma sa katawohan. Imbes na pabalikbalik na kamugtakan nin pagigin mapagbantay asin pagigin daing maginibo, magkakaigwa nin daing katapusan na katoninongan asin kaogmahan.