Mga Hapot Hale sa mga Parabasa

Saen mamumugtak an mga demonyo durante kan Sangribong Taon na Paghade ni Cristo?

Dai sinisimbag nin malinaw kan Biblia an hapot na ini. Minsan siring, puede kitang magkaigwa nin lohikong konklusyon kun saen mamumugtak an mga demonyo durante kan Milenyal na Paghade ni Cristo.

Kan itinatao an patanaw sa kun ano an mangyayari sa pagpopoon asin sa pagtatapos kan Milenyong ini, si apostol Juan nagsabi: “Naheling ko an sarong anghel na naghihilig hale sa langit na igwa kan liabe kan bungaw asin sarong dakulang kadena sa saiyang kamot. Asin dinakop nia an dragon, an enot na halas, na iyo an Diablo asin Satanas, asin ginapos nia sia sa laog nin sangribong taon. Asin ihinulog nia sia sa bungaw asin pinintoan nia idto patin sinelyohan idto sa ibabaw nia, tanganing dai na nia ikalagalag an mga nasyon sagkod na matapos an sangribong taon. Pakalihis kan mga bagay na ini sia kaipuhan na butasan sa halipot na panahon.” (Kapahayagan 20:1-3) An mga bersikulong ini nagtataram sana manongod sa paghulog sa bungaw ki Satanas asin kan pagbutas sa saiya sa huri sa halipot na panahon. Dawa ngani dai nasasambitan an mga demonyo, garo baga rasonable na kun an anghel na igwa kan liabe kan bungaw​—an pinamuraway na si Jesu-Cristo​—dakopon asin ihulog sa bungaw an Diablo, gigibohon man nia iyan sa mga demonyo.​—Kapahayagan 9:11.

Kan magin Hade sa langit kan 1914, may ginibo si Jesu-Cristo na nagkaigwa nin grabeng epekto ki Satanas saka sa mga demonyo. An Kapahayagan 12:7-9 nagsasabi: “Puminutok an ralaban sa langit: Si Miguel asin an saiyang mga anghel nakipaglaban sa dragon, asin an dragon asin an mga anghel kaiyan [mga demonyo] nakipaglaban alagad ta dai iyan nanggana, ni may nanompongan pa man na lugar para sa sainda sa langit. Kaya ihinulog an dakulang dragon, an enot na halas, an inaapod Diablo asin Satanas, na ilinalagalag an bilog na ineerokan na daga; ihinulog sia sa daga, asin an saiyang mga anghel ihinulog kaiba nia.” Poon kaidto, si Satanas asin an saiyang mga demonyo nalaom na sa palibot kan daga. Rasonable sanang ipamugtak niato na kun orog pang limitaran ni Jesu-Cristo an aktibidad ni Satanas tanganing patalingkason an daga sa maraot na impluwensia kaini, gigibohon man Nia iyan sa mga demonyo.

Estudyare man an pinakaenot na hula kan Biblia. Iyan nagsasabi: “Pag-iiwalon ko [nin Dios] ika [si Satanas] asin an babae [an langitnon na organisasyon ni Jehova] saka an saimong [ni Satanas] banhi asin an saiyang banhi [ni Jesu-Cristo]. Lulugadon ka nia sa payo asin lulugadon mo sia sa bool.” (Genesis 3:15) An paglugad sa payo kan halas nangangahulogan kan paghulog sa bungaw ki Satanas durante kan Sangribong Taon na Paghade ni Cristo. Sinasabi pa kan hula na igwa nin pag-iiwal sa pag-oltanan kan Saro na magibo kan paglugad asin sa banhi ni Satanas. An banhi, o organisasyon na ini, kaiba an dai naheheling na kabtang na kompuesto kan maraot na mga anghel, o mga demonyo. Kaya rasonable sanang ikonklusyon na kun ihulog na ni Jesus sa bungaw si Satanas, igagapos asin ihuhulog man nia sa bungaw an mga demonyo. An katunayan na an maraot na mga espiritu nagpaheling nin dakulang pagkatakot sa bungaw nagpaparisa na aram ninda an maabot na ining pagbilanggo.​—Lucas 8:31.

Pero, posible daw na kaya dai sinasambit kan Kapahayagan 20:1-3 an mga demonyo huling lalaglagon  sinda sa Armagedon kaiba kan naheheling na kabtang kan banhi ni Satanas? Ipinapaheling kan Biblia na bakong posible an bagay na ini. May labot sa pangultimong kaaabtan ni Satanas, iyan nagsasabi: “An Diablo na nanlalagalag sa sainda inapon sa danaw nin kalayo asin asupre, na kinamumugtakan na kan mabangis na hayop asin kan falsong propeta; asin sinda pasasakitan aldaw-banggi sagkod lamang.” (Kapahayagan 20:10) An mabangis na hayop asin an falsong propeta mga politikal na gobyerno asin kabtang kan naheheling na organisasyon ni Satanas. (Kapahayagan 13:​1, 2, 11-​14; 16:​13, 14) Malalaglag sinda sa Armagedon, kun ronoton asin taposon na kan Kahadean nin Dios an gabos na kahadean kan kinaban. (Daniel 2:44) Nasasambitan kan Biblia an “daing katapusan na kalayo na inandam para sa Diablo asin sa saiyang mga anghel.” (Mateo 25:41) Si Satanas asin an saiyang mga demonyo iaapon sa iyo man sanang “danaw nin kalayo asin asupre” siring kan mabangis na hayop asin kan falsong propeta tanganing sinda man laglagon sagkod lamang. Kun linaglag na sa Armagedon an mas makapangyarihan asin dai naheheling na espiritung kabtang kan banhi ni Satanas, segurado na nasambitan kutana an mga demonyo na nasa simbolikong danaw na idto kaiba kan mabangis na hayop asin kan falsong propeta. An dai pagkasambit sa sainda sa Kapahayagan 20:10 nagpaparisa na dai lalaglagon an mga demonyo sa Armagedon.

Mantang dai malinaw na nasambitan na ihinulog sa bungaw an mga demonyo, dai man sinda espesipikong nasasambitan na pinapaluwas hale sa bungaw. Minsan siring, an saindang kaaabtan kapareho kan sa Diablo. Pagkatapos na paluwason kaiba kan Diablo asin makipagtabangan sa saiya durante kan pangultimong pagbalo sa katawohan sa katapusan kan sangribong taon, an mga demonyo ihuhulog man sa danaw nin kalayo asin maeeksperyensiahan kun siring an daing katapusan na pagkalaglag.​—Kapahayagan 20:​7-9.

Huli kaini, dawa ngani si Satanas sana an nasasambitan sa Kapahayagan 20:1-3 na binihag asin ihinulog sa bungaw nin daing maginibo, lohiko kitang makakakonklusyon na an saiya man na mga anghel gagaposon asin ihuhulog sa bungaw. Dai totogotan si Satanas ni an saiyang mga demonyo na olangon an kaotoban kan katuyohan nin Dios na gibohon an daga na magin sarong paraiso asin ibalik an katawohan sa pagkasangkap durante kan Sangribong Taon na Paghade ni Cristo.