Kun Ano an Babasahon​—An Madonong na Sadol ni Salomon

“AN PAGGIBO nin dakol na libro mayo nin katapusan, asin an dakulang debosyon sa mga iyan nakakapagal sa laman.” (Eclesiastes 12:12) Sa pagsurat kan mga tataramon na iyan mga 3,000 na taon na an nakaagi, dai man dinedesganar kan madonong na si Hadeng Salomon nin Israel an pagbasa. Imbes, nagkokomento sia sa pangangaipong magin mapamili. Napapanahon nanggad an pagirumdom na iyan ngonyan, huling binilyon na pahina nin babasahon an iniimprenta sa kinaban taon-taon!

Minalataw na an “dakol na libro” na nasambitan ni Salomon dai nakakapakosog o dai nakakarepresko. Kun siring, an argumento nia iyo na an debosyon sa mga iyan, imbes na magtao nin positibo asin nagdadanay na balos, “nakakapagal sa laman.”

Minsan siring, sinasabi daw ni Salomon na mayo nin mga libro na nagtatao nin marahay, masasarigan na paggiya na mapapakinabangan kan nagbabasa? Dai, huli ta isinurat man nia: “An mga tataramon kan mga madonong garo mga sogkod na panudok sa baka, asin garo man sana pinatadom na mga pako an mga nagtitipon nin mga tataramon; an mga iyan itinao gikan sa sarong pastor.” (Eclesiastes 12:11) Tunay nanggad, igwa nin nasusurat na mga tataramon na “garo mga sogkod na panudok sa baka” puedeng magtao nin positibong motibasyon. Puedeng pahiroon kaiyan an sarong tawo sa tamang dalan. Apuera kaini, “garo pinatadom na mga pako,” puede kaiyan na pakosogon an desisyon nin saro asin igwa iyan nin nakakaparigon na epekto.

Saen niato puedeng makua an siring na madonong na mga tataramon? Labaw sa gabos na siring kaiyan, oyon ki Salomon, an mga gikan sa sarong Pastor, si Jehova. (Salmo 23:1) Kun siring, an pinakamarahay na magigibo nin saro iyo na kumonsulta sa libro na ipinasabong nin Dios​—an Biblia. An regular na pagbasa kan ipinasabong na mga tataramon na iyan puedeng makatabang sa saro na magin “lubos na may kakayahan, biyong nasangkapan para sa gabos na marahay na gibo.”​—2 Timoteo 3:​16, 17.