Mga Hapot Hale sa mga Parabasa

Taano ta inagda kan binuhay liwat na si Jesus na duotan sia ni Tomas pero bago kaidto pinogolan nia si Maria Magdalena na gibohon ini?

Nagkapirang haloy nang traduksion kan Biblia an nagtatao kan impresyon na sinabihan ni Jesus si Maria Magdalena na dai sia pagduotan. Halimbawa, an American Revised Version of A.D. 1901 sa Bicol, trinadusir an mga tataramon ni Jesus na: “Dai mo ako pagduotan; huli ta dai pa ako nakakasakat sa Ama.” (Juan 20:17) Minsan siring, an orihinal na berbo sa Griego, na sa parate tinatradusir na “duot,” nangangahulogan man na, “kumugos, kumurapot, kumapot, pogolan, kaptan.” Rasonable na si Jesus dai nagsasayuma sa pagduot sana sa saiya ni Maria Magdalena, mantang dai nahaloy pakatapos kaiyan tinogotan nia an ibang babae na yaon sa lolobngan na ‘kapotan sia sa saiyang mga bitis.’​—Mateo 28:9.

Dakol na bagong traduksion sa modernong lenguahe, na arog baga kan New World Translation of the Holy Scriptures, The New Jerusalem Bible, asin The New English Bible, an matabang sato na masabotan an tunay na kahulogan kan mga tataramon ni Jesus paagi sa pagtradusir kaiyan na: “Dai mo ako pagkugoson.” Taano ta sasabihon iyan ni Jesus ki Maria Magdalena, na sarong dayupot na kaibaiba nia?​—Lucas 8:1-3.

Minalataw na natatakot si Maria Magdalena na si Jesus mahale na asin masakat sa langit. Napahiro kan makosog na pagmawot nia na makaibanan an saiyang Kagurangnan, sia kuminapot nin higot ki Jesus, na dai sia binubutasan. Tanganing aseguraron ini na dai pa sia mahale, pinagbotan ni Jesus si Maria na dai sia pagkugoson kundi imbes pumaduman asin isabi sa saiyang mga disipulo an bareta kan saiyang pagkabuhay liwat.​—Juan 20:17.

Laen man an pag-oolay ni Jesus asin Tomas. Kan magpaheling si Jesus sa nagkapirang disipulo, mayo si Tomas. Paghaloyhaloy, ipinahayag ni Tomas an saiyang pagduwaduwa manongod sa pagkabuhay liwat ni Jesus, na nagsasabing dai sia matubod kun dai nia maheling an mga lugad kan pako asin ikalaog an saiyang kamot sa binudyak na hirog ni Jesus. Pakalihis nin walong aldaw, nagpaheling giraray si Jesus sa saiyang mga disipulo. Sa panahon na ini, presente na si Tomas, asin inagda sia ni Jesus na duotan an saiyang mga lugad.​—Juan 20:24-27.

Sa siring, sa pangyayari ki Maria Magdalena, tinatratar ni Jesus an napasalang pagmawot na pogolan siang humale; sa kamugtakan ni Tomas, tinatabangan ni Jesus an sarong tawo na nagduduwaduwa. Sa duwang pangyayari, si Jesus may marahay na mga dahelan sa iginawe nia.