Aldaw nin Gradwasyon​—Sarong Magayon na Aldaw

“BINENDISYONAN kita nin sarong magayon na aldaw. Maliwanag an sirang kan saldang. An langit asul. An mga doot berde. An mga gamgam naghuhuruni. Igwa kita nin magayon na aldaw, asin dai kita madedesganar. Si Jehova bakong Dios nin pagkadesganar. Sia Dios nin mga bendisyon.”

Paagi sa mga komentong iyan, pinonan ni Tugang na Samuel Herd, sarong miembro kan Namamahalang Grupo kan Mga Saksi ni Jehova, an programa nin gradwasyon kan ika-117 klase kan Paadalan sa Biblia kan Watchtower sa Gilead. Nangyari iyan kan Setyembre 11, 2004. Kaiba sa marahayon na programa an nakakaparigon na hatol na basado sa Biblia saka an mga eksperyensia sa lokal asin mga eksperyensia hale sa langtad nin pagmimisyonero. Iyo, iyan sarong magayon na aldaw para sa gabos na 6,974 nag-atender sa Sentro nin Edukasyon kan Watchtower sa Patterson, Nueva York, asin sa mga pasilidad sa Brooklyn asin Wallkill, na nakakonektar paagi sa telepono asin video.

Nakakaparigon sa Boot na mga Tataramon Para sa mga Estudyante

Si John Kikot, na miembro kan Komite kan Sangang Opisina sa Estados Unidos, nagtao nin nakakaparigon sa boot na mga tataramon sa temang “Papagdanayon an Kagayagayahan Bilang Misyonero.” Idinoon nia na an mga estudyante sa Gilead midbid sa saindang kagayagayahan, na risang-risa sa gradwasyon na ini. An pagtotokdo hale sa Kasuratan durante kan pag-eskuela nagtao nin kagayagayahan sa mga estudyante, asin sinda andam na ngonyan na tumabang sa iba na makaeksperyensia man kan kaparehong kagayagayahan. Paano? Paagi sa pagtao kan saindang panahon asin kosog para sa iba sa saindang ministeryo bilang mga misyonero. Si Jesus nagsabi: “Igwang orog na kaogmahan sa pagtao kisa pag-ako.” (Gibo 20:35) Mantang inaarog ninda si Jehova Dios, an matinao asin “maogmang Dios,” na nagtatao kan katotoohan sa iba, mapapagdanay kan bagong mga misyonero an mismong kagayagayahan ninda.​—1 Timoteo 1:11.

An suminunod sa programa saro pang miembro kan Namamahalang Grupo, si David Splane, na an saiyang tema iyo an “Paano Nindo Papakiibanan an Iba?” Daing duwa-duwa na marahay asin nakakaogma na mag-ontok na sararo, minsan ngani tibaad mangaipo ini nin pagigin “gabos na bagay sa gabos na klase nin tawo.” (1 Corinto 9:22; Salmo 133:1) Nasambitan ni Tugang na Splane na an magradwar na mga estudyante magkakaigwa nin interaksion sa dakol na iba pa sa gibohon na pagmimisyonero​—mga tawo sa teritoryo, mga kapwa misyonero, mga tugang na lalaki asin babae sa bago nindang kongregasyon, asin an mga yaon sa sangang opisina na nagdidirehir sa paghuhulit asin pagtotokdo. Nagtao sia nin praktikal na mga suhestion kun paano gigibohon na nakakaogma sagkod na mapupuede an relasyon kan lambang saro: Aramon an lokal na lenguahe, magin listo asin andam na makibagay sa lokal na mga kostumbre, igalang an pribadong buhay kan mga kapwa misyonero, asin magin makinuyog sa mga nangengenot.​—Hebreo 13:17.

Sumunod, an instruktor sa Gilead na si Lawrence Bowen naghapot, “Ano an Iniisip  Nindo?” Ipinagirumdom nia sa mga estudyante na an mga ‘naghohokom kaidto sa panluwas na itsura’ dai inako si Jesus bilang Mesiyas. (Juan 7:24) Bilang bakong sangkap na mga tawo, an gabos kaipuhan na magmaan tumang sa ‘pag-isip kan mga kaisipan nin mga tawo’ imbes na “mga kaisipan nin Dios.” (Mateo 16:​22, 23) Dawa an espirituwal na mga tawo dapat na padagos na itanos an saindang kaisipan. Arog nin sarong barko sa dagat, an mga pagtatanos nin kaisipan ngonyan puedeng mangahulogan nin pakaabot sa pasohan o pagsapar nin espirituwal na pagkabagbag. An dagos-dagos na pag-adal kan Biblia paagi sa konteksto kaiyan nakakatabang sa sato na mag-isip kan “mga kaisipan nin Dios.”

Tinapos ni Wallace Liverance, saro pang instruktor sa Paadalan nin Gilead, an kabtang na ini kan programa. Basado sa Isaias 55:​1, an saiyang tema iyo an “Ano an Babakalon Nindo?” Inenkaminar nia an mga estudyante na ‘bakalon’ an kaginhawahan, kagayagayahan, asin kakanon hale sa makahulang mensahe nin Dios para sa satong kaaldawan. An tataramon na ini nin Dios iinagid kan hula ni Isaias sa tubig, arak, asin gatas. Paano iyan mababakal na “mayo nin pirak asin mayo nin bayad”? Ipinaliwanag ni Tugang na Liverance na magigibo iyan kun tatawan nin atension an hula sa Biblia asin hahaleon an bakong espirituwal na mga kaisipan asin paghiro saka riribayan iyan kan mga kaisipan asin paghiro nin Dios. (Isaias 55:​ 2, 3, 6, 7) Paagi sa paggibo kaini, an bagong mga misyonero makakapagpadagos sa saindang mga asignasyon sa ibang nasyon. Sa parate iniisip kan bakong sangkap na mga tawo na an kaogmahan nakadepende sa pagmamaigot na makua an materyal na kaginhawahan. “Dai nindo pagbakalon iyan,” an sadol kan ispiker. “Dai kamo maniwala sa siring na kaisipan. Seguradohon na magtagama nin panahon para sa makahulogan na pag-adal kan makahulang Tataramon nin Dios. Puede iyan na magpaginhawa saindo, magpakosog sa saindo, asin magtao saindo nin kagayagayahan sa asignasyon nindo sa pagmimisyonero.”

Nakakaogmang Gayo na mga Eksperyensia kan Asin Interbio sa mga Estudyante

An mga estudyante igwa nin regular na pakikikabtang sa paghuhulit. Sa pangengenot ni Mark Noumair, saro pang instruktor sa Gilead, iinakto kan nagkapira sa klase an mga eksperyensia na nagtampok kan temang “Dai Ikinakasupog an Maogmang Bareta.” (Roma 1:16) Ikinaogma kan mga nagdadangog na hinanyogon an eksperyensiadong mga ministrong ini kun paano sinda nagpatotoo sa harong-harong, sa tinampo, asin sa mga pamakalan. Naggibo nin inisyatiba an mga estudyante na tatao nin ibang lenguahe na makaolay an mga tawong nagtataram kan mga lenguaheng iyan sa teritoryo kan saindang kongregasyon. Ginamit kan iba sa epektibong paagi an mga publikasyon na basado sa Biblia na ipinublikar kan Mga Saksi ni Jehova, na ginagamit iyan sa mga pagdalaw liwat asin kun nagpopoon nin mga pag-adal sa Biblia. “Dai [ninda] ikinakasupog” na ihulit an maogmang bareta.

Ininterbio ni Tugang na William Nonkes, na nakaasignar sa Departamento sa Paglilingkod, an eksperyensiadong mga misyonero hale sa Burkina Faso, Latvia, asin Rusya. Nagtao sinda nin praktikal na sadol na nakasentro sa temang “May Pagkamoot na Binabalosan ni Jehova an mga Maimbod.” Inenkaminar kan saro sa mga tugang na ininterbio an mga estudyante na girumdomon an hukbo ni Gedeon na may 300 na soldados. An lambang soldados may asignasyon na nakatabang sa kapangganahan kan kampanya ni Gedeon. (Hokom 7:19-21) Kaagid kaiyan, binabalosan man an mga misyonero na nagdadanay sa saindang mga destino.

“Magin Gabos na Bagay sa Gabos na Klase nin Tawo” an tema na itinampok sa mga interbio na sunod na pinamayohan ni Samuel Roberson, na instruktor sa Patterson. Ininterbio nia an apat na miembro nin Komite kan Sangang Opisina, na hale sa Senegal, Guam, Liberia, asin Madagascar. May total na 170 misyonero an naglilingkod sa mga nasyon na ini. Sa mga komento ninda, naaraman kan magradwar na mga estudyante kun paano tinatabangan kan mga Komite kan Sangang Opisina an mga misyonero na makaadaptar sa saindang mga destino. Sa parate nangangahulogan iyan nin pag-aram sa mga kostumbre na tibaad garo baga pambihira kun sa mga pamantayan sa Solnopan. Halimbawa, sa nagkapirang kadagaan ordinaryo na sanang marhay na makaheling nin mga lalaki, pati mga nasa Kristianong kongregasyon, na magkakapotan nin kamot bilang magkatood mantang magkaibanan na naglalakaw. Sa nagkapirang lugar na sakop kan sangang opisina sa Guam, nagseserbi nin pambihirang mga kakanon. Alagad an iba nakaadaptar, asin kaya man iyan kan bagong mga misyonero.

Ipinaliwanag ni Guy Pierce, na miembro kan Namamahalang Grupo, an temang “Magdanay na Maimbod sa ‘Kahadean kan Satong Kagurangnan.’” Ipinagirumdom nia sa mga nagdadangog: “Si Jehova naglalang na may katuyohan. May katuyohan sia para sa saiyang mga linalang. An katuyohan nia para sa globong ini dai nagbago. Iyan dai mapopogolan pasiring sa pagkaotob kaiyan. Mayong makakaliwat kaiyan.” (Genesis 1:28) Inenkaminar ni Tugang na Pierce an gabos na may kaimbodan na magpasakop sa soberaniya nin Dios sa ibong nin mga kadepisilan na luminataw huli sa kasalan kan enot na tawo, si Adan. “Nabubuhay kita sa oras nin paghokom. Kadikit na sana an natatada niatong panahon na makaolay an mga sadiosan an puso tanganing tabangan sindang maaraman an katotoohan. Gamiton an panahon sa epektibong paagi tanganing ipaabot sa iba an maogmang bareta kan Kahadean,” an sadol ni Tugang na Pierce. An mga may kaimbodan na nagsusuportar sa Kahadean nin Dios makakaasa sa saiyang pagsuportar.​—Salmo 18:25.

Sa pantapos na kabtang, binasa kan tsirman an mga pataratara asin mga kapahayagan nin marahay na kamawotan hale sa mga sangang opisina sa bilog na globo. Dangan ipinanao nia an mga diploma sa naggradwar na mga estudyante, na an saro binasa an surat hale sa klase, na nagpapahayag nin odok sa pusong pag-apresyar sa pagsasanay na inako ninda. Angay iyan na pantapos sa magayonon na aldaw na haloy na magigirumdoman kan gabos na nag-atender.

[Kahon sa pahina 23]

ESTADISTIKA KAN KLASE

Bilang nin mga nasyon na irinepresentar: 11

Bilang nin mga nasyon na inasignaran: 22

Bilang nin mga estudyante: 48

Promedyong edad: 34.8

Promedyong taon sa katotoohan: 18.3

Promedyong taon sa bilog na panahon na ministeryo: 13.4

[Ritrato sa pahina 24]

Ika-117 Naggradwar na Klase kan Paadalan sa Biblia kan Watchtower sa Gilead

Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.

(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.