Nagigirumdoman daw Nindo?

Inapresyar daw nindo an pagbasa kan dai pa sana nahahaloy na mga isyu kan An Torrengbantayan? Bueno, helingon kun masisimbag nindo an minasunod na mga hapot:

• Ano an puedeng gibohon nin sarong Kristiano kun nakakaeksperyensia nin emosyonal asin espirituwal na kapagalan?

Kaipuhan niatong aramon an dahelan kan satong pagkapagal. Puedeng makatabang an pagsiyasat kan satong mga kinahihiligan asin rogaring, na hinahale an dai kinakaipuhan na mga kagabatan. Puede kitang magbugtak nin realistikong mga pasohan segun sa satong mga kamugtakan. An pag-ataman sa satong espirituwal na salud mahalaga asin maninigo na kalabot an regular na pamimibi patin paghorophorop.​—8/15, pahina 23-6.

• Taano ta literal an pagsabot kan Mga Saksi ni Jehova sa kabilangan na 144,000?

Pagkatapos na sabihon ki apostol Juan an manongod sa 144,000, naheling nia an “sarong dakulang kadaklan, na dai nin siisay man na makakabilang.” (Kapahayagan 7:​4, 9) Kun simboliko an kabilangan na 144,000, mawawara an puersa kan pagkakalaen. Si Jesus nagtaram manongod sa mga mamamahala kaiba nia bilang “sadangoton na aripompon.” (Lucas 12:32)​—9/1, pahina 30.

• Taano an sarong Israelita ta puedeng magpabakal nin dai pinadugo na hayop sa taga ibang daga?

An taga ibang daga o an nakikihimanwa na dai nagin proselito bakong sakop kan Ley. Kaya tinotogotan an sarong Israelita na itao o ipabakal sa saiya an siring na mga hayop. (Deuteronomio 14:21) Alagad an proselito sakop kan Ley asin dai makakan kan dai pinadugo na karne nin siring na hayop. (Levitico 17:10)​—9/15, pahina 26.

• Ano an tataramon sa Ingles na biomimetics, asin taano ta tibaad interesante iyan para sa mga Kristiano?

Iyan an langtad nin siensia na naghihingoang arogon an mga disenyo na manonompongan sa naturalesa. Halimbawa, an magtugang na Wright nagdisenyo nin sarong eroplano pakatapos na pag-adalan an paglayog nin darakulang gamgam. Kun siring, an biomimetics makakapahiro sa sarong Kristiano na pamurawayon an Kaglalang.​—10/1, pahina 9.

• Siisay an nasambitan sa 2 Corinto 12:​2-4 na inagaw pasiring sa paraiso?

An kotasyon na iyan kasunod sana kan mga bersikulo na dian idinepensa ni Pablo an saiyang pagkaapostol. Mantang an Biblia daing sinasabi na siisay pa man na tawo na nagkaigwa kan siring na eksperyensia asin mantang si Pablo an nagsasaysay kaiyan sa sato, posibleng marhay na si Pablo an nagkaigwa kan bisyon na ini.​—10/15, pahina 8.

• Ano an nagkapirang karakteristiko ni Jesus na nagkualipikar sa saiya na maglingkod bilang Namomoon na pinili nin Dios?

Pinagdanay ni Jesus an sangkap na integridad, na onesto asin tanos sa saiyang gawe-gawe. Sia biyong dusay sa Dios. Si Jesus may odok na pagmakolog sa mga tawo asin andam na magtrabaho.​—11/1, pahina 6-7.

• Saen mamumugtak an mga demonyo durante kan Milenyo?

Puede kitang magkaigwa nin lohikong konklusyon na durante kan Milenyal na Paghade ni Cristo ihuhulog sinda sa bungaw kaiba ni Satanas. (Kapahayagan 20:​1-3) Ihinula kan Genesis 3:15 an paglugad sa payo kan halas, na nangangahulogan kan paghulog sa saiya durante kan Milenyo. Kaiba sa saiyang banhi an maraot na mga anghel, o mga demonyo. An katunayan na sinda nagpaheling nin pagkatakot sa bungaw nagpaparisa na aram ninda an maabot na pagbilanggo na ini. (Lucas 8:31)​—11/15, pahina 30-1.

• Taano an saro ta maninigo na magmaan manongod sa paggamit nin mga inomon na de alkohol, dawa kun linilikayan nia na uminom sagkod na risa na kan iba na sia burat na?

May mga tawo na daing gayo risa na burat na dawa nakainom na nin dakol. Minsan siring, an saro tibaad luway-luway na magdepende na sa inomon na de alkohol asin magin “oripon nin dakol na arak.” (Tito 2:3) Nagpatanid si Jesus manongod sa pagigin ‘nagagabatan nin sobrang pagkakan asin makosog na pag-inom.’ (Lucas 21:​34, 35) An pag-inom dai kaipuhan na umabot sa pagkaburat bago kaiyan patungkaon asin gibohon na hugakon an sarong tawo​—sa pisikal saka sa espirituwal.​—12/1, pahina 19-​21.