‘Naoogma Huli sa Pagsasanay sa Sako’

NABIGLA an hoben na si Kazuna kan isuherir kan saiyang maestro na umayon sia sa kompetisyon sa pagtaram sa Ingles. An kompetisyon bukas sa gabos na haiskul sa dakulang amihanan na isla nin Hokkaido sa Hapon, alagad ta an saiyang eskuelahan dai pa kasuarin man nakapaayon nin estudyante para sa kompetisyon na ini. Kan aldaw kan kompetisyon, ninenerbios si Kazuna huling kaipuhan niang makikompetensia sa mga 50 iba pang estudyante. Orog siang ninerbios kan mariparo nia an duwang hurado na Ingles an sadiring lenguahe.

Inanunsiar an mga nanggana, poon sa nanggana sa pinakahababang premyo. Kan sa katapustapusi apodon an ngaran ni Kazuna, dai sia makataram. Sia asin an saiyang maestro, na nakatukaw sa kataed nia, nagkahelingan huli sa pagngalas. Dai pa giraray makapaniwala, nagsakat si Kazuna sa entablado asin rinesibi an saiyang tropeo​—para sa primer premyo!

“Nagin posible sana ini huli sa itinataong pagsasanay kan organisasyon ni Jehova paagi sa Teokratikong Paadalan sa Pagmiministro,” an maogmang paliwanag ni Kazuna. “Naoogma akong marhay ta inako ko an pagsasanay na ini.” An paadalan na iyan, na pinalistahan ni Kazuna poon kan sia aki pa, saro sa mga pagtiripon kan kongregasyon kan Mga Saksi ni Jehova. Bilang pag-andam para sa kompetisyon, tinawan nin espesyal na atension ni Kazuna an paggamit nin mikropono, pagtaram na may init asin entusiasmo, paggamit nin mustra, kontak sa mga nagdadangog, asin iba pang leksion na itinotokdo sa Teokratikong Paadalan sa Pagmiministro.

Tabi na akoon an samuyang imbitasyon na mag-atender asin obserbaran an paadalan na ini, na serosemanang ginigibo sa lokal na Kingdom Hall kan Mga Saksi ni Jehova. Helingon nindo mismo kun paano nakikinabang an mga hoben sagkod gurang. An pagtiripon bukas para sa publiko. Para sa dugang na impormasyon sa paadalan na pinakaharani sa saindong harong, kontakon tabi an mga Saksi ni Jehova sa saindong lugar.