Paano Maninigong Girumdomon si Jesu-Cristo?

Si Jesu-Cristo “iyo nanggad an saro sa pinakamaimpluwensiang tawo na nabuhay kasuarin man.”​—“The World Book Encyclopedia.”

NAGIGIRUMDOMAN sa parate an darakulang tawo huli sa ginibo ninda. Kaya taano ta dakol an nakakagirumdom ki Jesus huli sa pagkamundag nia imbes na huli sa mga ginibo nia? Sa bilog na Kakristianohan, puedeng isaysay kan kadaklan na tawo an mga pangyayari may koneksion sa pagkamundag nia. Pira an nakakagirumdom asin nagmamaigot na iaplikar an saiyang daing kabaing na katokdoan na manonompongan sa Sermon sa Bukid?

Totoo, pambihira an pagkamundag ni Jesus, alagad mas pinahalagahan na marhay kan saiyang enot na mga disipulo an saiyang ginibo asin an saiyang itinokdo. Daing duwa-duwa na nungkang intension nin Dios na matahoban kan  pagkamundag ni Cristo an saiyang buhay bilang maygurang na lalaki. Pero, nagibo talaga kan Pasko na tahoban an persona ni Cristo sa magaot na mga osipon asin estorya kan Pagkamundag.

May saro pang nakakapurisaw na hapot an minalataw mapadapit sa kahulogan kan pagselebrar nin Pasko. Kun magbalik si Jesus digdi sa daga ngonyan, ano daw an iisipon nia manongod sa daing pakundangan na komersialismo nin Pasko? Duwang ribong taon na an nakaagi, binisita ni Jesus an templo sa Jerusalem. Pinaanggot sia kan mga pararibay nin kuarta asin paratinda na inaaprobetsaran an relihiosong kapiestahan kan mga Judio tanganing magganansia. “Halea nindo digdi an mga bagay na ini!” an sabi nia. “Dai nindo paggibohon an harong kan sakong Ama na harong nin negosyo!” (Juan 2:13-16) Malinaw nanggad, dai inoyonan ni Jesus na pagsalakon an komersio asin relihion.

Dakol na sinserong Katolikong Kastila an nagpapahayag nin paghadit sa nagtatalubong komersialismo nin Pasko. Pero, an siring na tendensia nin komersialismo dai na gayod malilikayan huli sa ginikanan kan dakol na kaugalean nin Pasko. An peryodistang si Juan Arias nagsabi: “An mga nagkikritikar, sa laog nin Kristianismo, na an Pasko nagin nang ‘sa pagano’ asin mas dedikado sa kaorogmahan asin pamamakal kisa sa relihion, sa pankagabsan daing pakaaram na dawa sa ginikanan kaiyan isinaro na an Pagkamundag . . . sa dakol na kabtang kan paganong kapiestahan [kan saldang] nin mga Romano.”​—El País, Disyembre 24, 2001.

Kan nakaagi pa sanang mga taon, dakol na Kastilang peryodista asin ensiklopedya an nagkomento manongod sa paganong ginikanan kan tradisyonal na mga kaorogmahan sa Pasko, saka sa pagigin komersial kaiyan. Mapadapit sa petsa para sa selebrasyon nin Pasko, an Enciclopedia de la Religión Católica prangkang nagsasabi: “An dahelan kaya nagdesisyon an Iglesia Romana na pilion an petsang ini nin kapiestahan garo baga iyo an tendensia kaiyan na salidahan an paganong mga kapiestahan nin Kristianong mga kapiestahan. . . . Aram niato na sa Roma sa panahon na iyan, kinonsagrar kan mga pagano an Disyembre 25 bilang pagselebrar kan natalis invicti, an pagkamundag kan ‘daing kadaogan na saldang.’”

Siring man an Enciclopedia Hispánica nagkokomento: “An petsa na Disyembre 25 para sa selebrasyon nin Pasko bakong resulta nin estriktong kronolohikong anibersaryo, kundi, imbes, gibohon na sa Kristiano an kapiestahan kan solsticio kun tiglipot na isinelebrar kaidto sa Roma.” Paano isinelebrar kan mga Romano an pagsirang kan saldang sa langit sa tiglipot? Paagi sa bangkete, maribok na pag-ogma, asin pagtinawanan nin mga regalo. Mantang magabat sa boot kan mga autoridad sa iglesia na haleon an siring na popular na kapiestahan, ginibo ninda iyan na “Kristianisado” paagi sa pag-apod dian na pagkamundag ni Jesus imbes na pagkamundag kan saldang.

Sa kapinonan, kan ikaapat asin ikalimang siglo, an pagkamuya sa pagsamba sa saldang asin mga kostumbre kaiyan dai nagin pasil na haleon. An Katolikong “Santo” na si Agustin (354-​430 C.E.) naobligar na sadolon an mga kapagtubod na dai iselebrar an Disyembre 25 arog kan ginibo kan mga pagano sa pagtaong onra sa saldang. Dawa ngonyan, an suanoy na Romanong mga kaorogmahan garo baga iyo an may pangenot na impluwensia.

An Pinakamarahay na Kapiestahan Para sa Kaorogmahan Asin Pagnegosyo

Sa nag-aging mga siglo, nagkapirang nakakakontribwir na bagay an nagkaigwa nin dai mapapagdudahan na kabtang sa pagmolde kan Pasko na magin an pinakapopular, internasyonal na  selebrasyon para sa kaorogmahan asin pagnegosyo. Siring man, an mga kostumbre kan ibang kapiestahan sa tiglipot, nangorogna an mga isineselebrar sa amihanan na Europa, luway-luway na isinasaro sa inarogan kaiyan na Romanong selebrasyon. * Asin sa ika-20 siglo, an mga ahente asin mga espesyalista sa pagnegosyo entusiastikong sinusuportaran an ano man na kostumbre na puedeng magprodusir nin dakulang ganansia.

Ano an nagin resulta? Nagin pangenot an selebrasyon kan pagkamundag ni Cristo imbes na an kahulogan kaiyan. Sa dakol na pangyayari, dawa an pagsambit ki Cristo haros nawara na sa tradisyonal na Pasko. “An [Pasko] sarong pambilog na kinaban na kapiestahan, na para sa pamilya, asin gabos nagseselebrar kaiyan sa sadiri niang paagi,” an komento kan Kastilang peryodiko na El País.

Ipinapabanaag kan komentong ini an nagtatalubong tendensia sa España asin sa dakol na iba pang nasyon sa bilog na kinaban. Mantang an mga selebrasyon nin Pasko paorog nang paorog na nagigin magarbo, an kaaraman manongod ki Cristo nawawara na. Sa pundamental, an mga kaorogmahan sa Pasko nagbuelta sa pinonan kaiyan sa Romanong kapanahonan​—maribok na pag-ogma, bangkete, asin pagtinawanan nin mga regalo.

Namundag sa Sato an Sarong Aki

Kun an tradisyonal na Pasko mayo nin koneksion ki Cristo, paano maninigong girumdomon kan tunay na mga Kristiano an pagkamundag asin buhay ni Cristo? Pitong siglo bago namundag si Jesus, si Isaias naghula manongod saiya: “Namundag sa sato an sarong aki, may itinao sa sato na sarong aking lalaki; asin an sa prinsipeng pamamahala mamumugtak sa saiyang abaga.” (Isaias 9:6) Taano ta ipinarisa ni Isaias na an pagkamundag ni Jesus asin an magigin papel nia ta magigin mahalagang marhay? Huli ta si Jesus magigin makakamhan na namamahala. Sia aapodon na Prinsipe nin Katoninongan, asin magigin daing kasagkodan an katoninongan o an sa prinsipeng pamamahala nia. Apuera kaini, an pamamahala ni Jesus sususteniran “paagi sa hustisya asin paagi sa katanosan.”​—Isaias 9:7.

 Inotro kan anghel na si Gabriel an proklamasyon ni Isaias kan ianunsiar nia an nagdadangadang na pagkamundag ni Jesus ki Maria. “An sarong ini magigin dakula asin aapodon na Aki kan Kaharohalangkawe,” an ihinula nia. “Asin itatao sa saiya ni Jehova Dios an trono ni David na saiyang ama, asin sia mamamahala bilang hade sa harong ni Jacob sagkod lamang, asin dai magkakaigwa nin katapusan an saiyang kahadean.” (Lucas 1:​32, 33) Malinaw nanggad, an pangenot na kahulogan kan pagkamundag ni Jesus may koneksion sa gibohon na ootobon ni Cristo bilang nombradong Hade kan Kahadean nin Dios. An pamamahala ni Cristo puedeng pakinabangan nin gabos, kaiba kamo asin an saindong mga namomotan. Sa katunayan, isinabi kan mga anghel na an saiyang pagkamundag mabunga nin “katoninongan sa daga para sa mga naoogmahan [nin Dios].”​—Lucas 2:​14, Today’s English Version.

Siisay an dai naghihimuyawot na mamuhay sa sarong kinaban na may katoninongan asin hustisya? Alagad tanganing kamtan an katoninongan na itatao kan pamamahala ni Cristo, kaipuhan niatong paogmahon an Dios asin magkaigwa nin marahay na relasyon sa saiya. Sinabi ni Jesus na an enot na lakdang tanganing magkaigwa kan siring na relasyon iyo an makanood manongod sa Dios asin ki Cristo. “Ini nangangahulogan nin buhay na daing katapusan,” sabi ni Jesus, “an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.”​—Juan 17:3.

Oras na mamidbid niatong marhay si Jesus, dai na kita mag-iisip-isip kun sa anong paagi gusto niang girumdomon niato sia. Iyan daw paagi sa pagkakan, pag-inom, asin pagtinawanan nin mga regalo sa kaparehong petsa kan suanoy na paganong kapiestahan? Garo baga harayo an posibilidad na iyan. Kan banggi bago sia magadan, isinabi ni Jesus sa saiyang mga disipulo kun ano an gusto nia. “An igwa kan sakong mga togon asin minaotob kaiyan, an sarong iyan iyo an namomoot sa sako. An namomoot man sa sako mamomotan kan sakong Ama, asin ako mamomoot sa saiya.”​—Juan 14:21.

An Mga Saksi ni Jehova naggibo nin detalyadong pag-adal kan Banal na Kasuratan, na nakatabang sa sainda na masabotan kun ano an mga pagboot nin Dios asin ni Jesus. Maoogma sindang tabangan kamo na makua an pakarorop sa mahalagang marhay na mga pagboot na iyan tanganing magirumdoman nindo si Jesus kun paano sia maninigong girumdomon.

[Nota sa Ibaba]

[Kahon/Mga Ritrato sa pahina 6, 7]

Dinedesganar daw kan Biblia an Bangkete Asin Pagtao nin mga Regalo?

An Pagtao nin mga Regalo

Inooyonan kan Biblia an pagtao nin mga regalo, ta si Jehova mismo inaapod na Paratao nin “lambang marahay na balaog asin lambang sangkap na regalo.” (Santiago 1:17) Sinabi ni Jesus na an marahay na mga magurang nagtatao nin mga regalo sa saindang mga aki. (Lucas 11:11-13) An mga katood asin miembro kan pamilya ni Job nagtao ki Job nin mga regalo kan sia maomayan. (Job 42:11) Minsan siring, mayo sa mga pagtataong iyan an nangaipo nin espesipikong mga aldaw nin kapiestahan. Iyan hale sa puso.​—2 Corinto 9:7.

Pagtiripontipon kan Pamilya

An pagtiripontipon kan pamilya dakula an magigibo tanganing magkasararo an mga miembro kan pamilya, nangorogna kun sinda dai na nakaistar sa sarong harong. Si Jesus asin an saiyang mga disipulo nag-atender sa sarong punsion sa kasal sa Cana, na daing duwa-duwa na sarong dakulang pagtiripontipon nin pamilya asin mga katood. (Juan 2:1-10) Asin sa ilustrasyon ni Jesus kan gastador na aki, isinelebrar kan ama an pagbuelta kan saiyang aki paagi sa sarong pampamilyang bangkete, na may musika asin baraylehan.​—Lucas 15:21-25.

Nag-oogma sa Masiram na Kakanon

An Biblia parateng nagtataram manongod sa mga lingkod nin Dios na nag-oogma sa masiram na kakanon kaiba an pamilya, mga katood, o mga kapwa parasamba. Kan magbisita an tolong anghel ki Abraham, sia nag-andam nin sarong bangkete para sainda na may karne nin baka, gatas, mantikilya, asin mga tinapay na matambilog. (Genesis 18:6-8) Ilinadawan ni Salomon an ‘pagkakan, pag-inom, asin paggayagaya’ bilang regalo hale sa Dios.​—Eclesiastes 3:13; 8:15.

Malinaw nanggad, gusto nin Dios na ikaogma niato an masiram na kakanon kaiba kan satong mga katood asin pamilya, asin inooyonan nia an pagtao nin mga regalo. Igwa kita nin dakol na oportunidad na gibohon iyan ano man na oras sa bilog na taon.