Si Jehova an Satong Paratabang

“An tabang sa sako gikan ki Jehova, an Kaggibo kan langit asin daga.”​—SALMO 121:2.

1, 2. (a) Taano ta masasabi na kita gabos kun beses nangangaipo nin tabang? (b) Anong klaseng Paratabang si Jehova?

SIISAY sato an dai noarin man nangangaipo nin tabang? An totoo kita gabos kun beses nangangaipo nin tabang​—tanganing maatubang an sarong magabat na problema, tanganing matagalan an makolog na pagkagadan nin mahal sa buhay, tanganing kayanon an sarong masakit na pagbalo. Kun nangangaipo nin tabang, sa parate an mga tawo minadolok sa may pagmakolog na katood. An pagsabi nin problema sa siring na katood tibaad magpangyaring mas pasil na kayanon iyan. Alagad limitado sana an magigibong tabang nin kapwa tawo. Apuera kaiyan, an iba tibaad bako pirmeng nasa kamugtakan na makatabang kun kaipuhan an tabang.

² Minsan siring, igwa nin Paratabang na dai nauubosan nin kapangyarihan asin mga paagi. Dugang pa, inaasegurar nia kita na dai nia kita noarin man babayaan. Sia an Saro na ipinamidbid kan salmista na may lubos na kompiansang nagpahayag: “An tabang sa sako gikan ki Jehova.” (Salmo 121:2) Taano ta kombensido an salmistang ini na tatabangan sia ni Jehova? Tanganing masimbag an hapot na iyan, siyasaton niato an Salmo 121. An paggibo kaiyan mapangyaring maheling niato kun taano ta kita man puedeng umasa ki Jehova na may kompiansa bilang an satong Paratabang.

Sarong Seguradong Gikanan nin Tabang

3. Sa arin na kabukidan tibaad itiningkalag kan salmista an saiyang mga mata, asin taano?

³ Nagpopoon an salmista paagi sa pagtokdo sa pagigin kaglalang ni Jehova bilang basehan nin kompiansa: “Ititingkalag ko an sakong mga mata sa kabukidan. Saen maghahale an tabang sa sako? An tabang sa sako gikan ki Jehova, an Kaggibo kan langit asin daga.” (Salmo 121:​1, 2) Itiningkalag kan salmista an saiyang mga mata bakong sa arin man na bukid. Kan isurat an mga tataramon na ini, an templo ni Jehova nasa Jerusalem. An siudad na iyan, na nasa itaas kan kabukidan nin Juda, iyo an piguratibong erokan ni Jehova kaidto. (Salmo 135:21) Puedeng itiningkalag kan salmista an saiyang mga mata sa kabukidan nin Jerusalem na natotogdokan kan templo ni Jehova, na kompiadong nag-aasa ki Jehova para sa tabang. Taano ta seguradong marhay an salmista na matatabangan sia ni Jehova? Huli ta Sia “an Kaggibo kan langit asin daga.” Garo man sana sinasabi kan salmista, ‘Sierto nanggad na mayo nin makakapogol sa makapangyarihan sa gabos na Kaglalang na tabangan ako!’​—Isaias 40:26.

4. Paano ipinaheling kan salmista na si Jehova pirmeng listo sa mga pangangaipo kan saiyang banwaan, asin taano ta nakakarangang isipon iyan?

⁴ Dangan ipinaliwanag kan salmista na si Jehova pirmeng listo sa mga pangangaipo kan saiyang mga lingkod: “Dai nia nanggad papabayaan na madalinas an saimong bitis. An Saro na nagbabantay  sa saimo dai nanggad magtutungka. Uya! Dai sia magtutungka ni matotorog, sia na nagbabantay sa Israel.” (Salmo 121:​3, 4) Dai mangyayaring pabayaan nin Dios na “madalinas” an mga nagtitiwala sa saiya o mapukan na dai na sinda makakabangon. (Talinhaga 24:16) Taano ta dai? Huli ta si Jehova siring sa sarong pastor na biyong puka na binabantayan an saiyang mga karnero. Bako daw na nakakarangang isipon iyan? Dai nia ipipirong nin dawa madali sana an saiyang mga mata sa mga pangangaipo kan saiyang banwaan. Aldaw asin banggi nagpupuka sia huli sa sainda.

5. Taano ta sinasabing si Jehova nasa “too”?

⁵ Kompiado na si Jehova an maimbod na Protektor kan saiyang banwaan, an salmista nagsurat: “Binabantayan ka ni Jehova. Si Jehova an saimong limpoy sa saimong too. Kun aldaw dai ka tatamaan kan saldang, ni kan bulan kun banggi.” (Salmo 121:​5, 6) Sa sarong nagbabaklay sa Tahaw na Sirangan, an lugar na nalilimpoyan nagtatao nin proteksion sa mainiton na saldang. Si Jehova siring sa limpoy para sa saiyang banwaan, na nagpoprotehir sa sainda sa nakakapasong init nin kalamidad. Mangnohon na si Jehova sinasabing nasa “too.” Sa suanoy na pakikilaban, an toong kamot kan soldados medyo dai napoprotehiran kan kalasag, na kapot kan walang kamot. An sarong maimbod na katood puedeng magtao nin proteksion paagi sa pagtindog asin pakikilaban sa may too kan soldados. Arog kan siring na katood, si Jehova maimbod na nagtitindog kataed kan mga nagsasamba sa saiya, na pirmeng andam na tabangan sinda.

6, 7. (a) Paano kita inaasegurar kan salmista na nungkang mapondo si Jehova sa pagtabang sa saiyang banwaan? (b) Taano ta puede man kitang magkaigwa nin kompiansa na siring kan sa salmista?

⁶ Mapondo pa daw si Jehova sa pagtabang sa saiyang banwaan? Dai iyan mangyayari noarin man. An salmista nagkonklusyon: “Babantayan ka ni Jehova mismo tumang sa gabos na kalamidad. Babantayan nia an saimong kalag. Babantayan ni Jehova mismo an saimong pagluwas asin an saimong paglaog poon ngonyan asin sa panahon na daing talaan.” (Salmo 121:​7, 8) Mangnohon na ibinalyo kan kagsurat an pagdodoon hale sa presente pasiring sa ngapit. Kasubago, sa bersikulo 5, sinabi kan salmista: “Binabantayan ka ni Jehova.” Alagad sa mga bersikulong ini, an salmista nagsurat: “Babantayan ka ni Jehova mismo.” Sa siring inaasegurar an tunay na mga parasamba na an tabang ni Jehova magpapadagos sagkod sa ngapit. Saen man sinda dumuman, ano man na kalamidad an mapaatubang sa sainda, kaya nia sindang tabangan.​—Talinhaga 12:21.

⁷ Tunay nanggad, an kagsurat kan Salmo 121 kompiado na binabantayan kan makakamhan sa gabos na Kaglalang an saiyang mga lingkod na may mahoyong pagmakolog na siring sa sarong pastor asin may pagpuka na siring sa sarong listong bantay. May dahelan nanggad kita na magkaigwa man nin kompiansa na siring kan sa salmista, huli ta si Jehova dai nagliliwat. (Malaquias 3:6) Nangangahulogan daw ini na pirme kitang maako nin proteksion sa pisikal? Dai, alagad sagkod na kita nag-aasa sa saiya bilang satong Paratabang, poprotehiran nia kita sa gabos na bagay na puedeng makadanyar sa sato sa espirituwal. Natural sanang maghapot, ‘Paano kita tinatabangan ni Jehova?’ Siyasaton niato an apat na paagi nin paggibo nia kaiyan. Sa artikulong ini, totokaron niato kun paano nia tinabangan an saiyang mga lingkod kan mga panahon kan Biblia. Sa sunod na artikulo, totokaron niato kun paano nia tinatabangan an saiyang banwaan ngonyan.

Tabang Hale sa mga Anghel

8. Taano ta bakong makangangalas na an mga anghel igwa nin dakulang interes sa ikakarahay kan daganon na mga lingkod nin Dios?

⁸ Si Jehova may sakop na milyon-milyon na anghel. (Daniel 7:​9, 10) Maimbod na inootob kan mga aking espiritu na ini an saiyang kabotan. (Salmo 103:20) Aram nindang marhay na si Jehova igwa nin dakulang pagkamoot sa mga tawong nagsasamba sa saiya asin na gusto nia sindang tabangan. Bakong makangangalas, an mga anghel may dakulang interes sa ikakarahay kan daganon na mga lingkod nin Dios. (Lucas 15:10) Kun siring, sierto nanggad na ikinakaogmang marhay kan mga anghel na gamiton sinda ni Jehova sa pagtabang sa mga tawo. Sa anong mga paagi ginamit ni Jehova an mga anghel tanganing tabangan an saiyang mga lingkod na tawo kan suanoy na mga panahon?

9. Magtao nin halimbawa kun paano tinawan nin Dios nin kapangyarihan an mga anghel tanganing protehiran an maimbod na mga tawo.

⁹ Tinawan nin Dios nin kapangyarihan an mga  anghel tanganing protehiran asin iligtas an maimbod na mga tawo. Tinabangan nin duwang anghel si Lot asin an saiyang mga aking babae na makadulag sa pagkalaglag kan Sodoma asin Gomorra. (Genesis 19:​1, 15-17) Ginadan nin sarong anghel an 185,000 na soldados na Asirio na nanhuma sa Jerusalem. (2 Hade 19:35) Kan si Daniel iapon sa lungib nin mga leon, si Jehova “nagsugo kan saiyang anghel asin tinikom an ngoso kan mga leon.” (Daniel 6:​21, 22) Si apostol Pedro pinaluwas sa bilanggoan nin sarong anghel. (Gibo 12:6-11) Nasasambitan kan Biblia an dakol na iba pang halimbawa nin pagprotehir kan mga anghel, na nagpapatunay sa sinasabi kan Salmo 34:7: “An anghel ni Jehova nagkakampo sa palibot kan mga natatakot sa saiya, asin sinda saiyang iliniligtas.”

10. Paano ginamit ni Jehova an sarong anghel tanganing parigonon an boot ni propeta Daniel?

¹⁰ Kun minsan, ginagamit ni Jehova an mga anghel tanganing parigonon an boot asin pakosogon an maimbod na mga tawo. An sarong nakakapukaw sa boot na halimbawa manonompongan sa Daniel kapitulo 10. Kan panahon na idto, madali na gayod mag-100 anyos si Daniel. Pinanluluyahan na marhay nin boot an propeta, na minalataw na huli sa gabang kamugtakan kan Jerusalem asin sa pagkaatraso kan pagtogdok liwat kan templo. Napurisaw man sia kan maheling an sarong makatatakot na bisyon. (Daniel 10:​2, 3, 8) Mamomoton na nagsugo an Dios nin sarong anghel tanganing parigonon an boot nia. Labi sa sarong beses, ipinagirumdom kan anghel ki Daniel na sia “kawiliwiling gayo” sa pagheling nin Dios. An resulta? Sinabi kan may edad nang propeta sa anghel: “Pinakosog mo ako.”​—Daniel 10:​11, 19.

11. Ano an sarong halimbawa kun paano ginamit an mga anghel tanganing giyahan an paghuhulit kan maogmang bareta?

¹¹ Ginamit man ni Jehova an mga anghel tanganing giyahan an paghuhulit kan maogmang bareta. Giniyahan nin sarong anghel si Felipe na maghulit manongod ki Cristo sa sarong kapon na Etiope, na nabautismohan pagkatapos kaiyan. (Gibo 8:​26, 27, 36, 38) Pakalihis nin halipot na panahon, kabotan nin Dios kaidto na ihulit an maogmang bareta sa bakong turi na mga Hentil. Sa sarong bisyon, nagpaheling an sarong anghel ki Cornelio, sarong matatakton sa Dios na Hentil, asin sinabihan sia na ipaapod si apostol Pedro. Kan si Pedro manompongan kan mga mensahero ni Cornelio, sinabi ninda: “Si Cornelio . . . tinawan nin sarong banal na anghel nin mga instruksion nin Dios na ipaapod ka tanganing magduman sa saiyang harong asin magdangog sa mga bagay na sasabihon mo.” Uminiba si Pedro, asin sa siring nagin kabilang sa Kristianong kongregasyon an kaenot-enoteng bakong turi na Hentil. (Gibo 10:​22, 44-48) Imahinaron kun ano an mamamatean nindo sa pakaaram na tinabangan kamo nin sarong anghel na manompongan an sarong tawo na tama an inklinasyon!

Tabang Paagi sa Banal na Espiritu

12, 13. (a) Taano an mga apostol ni Jesus ta may marahay na dahelan na magtubod na matatabangan sinda kan banal na espiritu? (b) Sa anong paagi tinawan nin kosog kan banal na espiritu an mga Kristiano kan enot na siglo?

¹² Dai nahaloy bago sia nagadan, inasegurar ni Jesus an saiyang mga apostol na dai sinda papabayaan na mayo nin tabang. Tatawan sinda kan Ama nin “paratabang, an banal na espiritu.” (Juan 14:26) An mga apostol may marahay na dahelan na magtubod na puede sindang tabangan kan banal na espiritu. Total, an ipinasabong na Kasuratan pano nin mga halimbawa kun paano ginamit ni Jehova an banal na espiritu, an pinakamakosog na puersa na makukua, tanganing tabangan an saiyang banwaan.

¹³ Sa dakol na pangyayari, ginamit an banal na espiritu tanganing tawan nin kosog an mga tawo na gibohon an kabotan ni Jehova. An banal na espiritu nagtao nin kosog sa mga Hokom tanganing iligtas an Israel. (Hokom 3:​9, 10; 6:34) An iyo man sanang espiritung iyan an nagtao nin kosog sa mga Kristiano kan enot na siglo na ipadagos an paghuhulit na may pagkapusoan sa ibong kan gabos na klase nin pagtumang. (Gibo 1:8; 4:31) An saindang kapangganahan sa pag-otob kan saindang ministeryo nagtao nin nakakakombensir na ebidensia kan paghiro kan banal na espiritu. May iba pa daw na paliwanag kun paano ikinapalakop kan mga indibiduwal na “daing inadalan asin ordinaryo” an mensahe kan Kahadean sa bilog na kinaban kaidto?​—Gibo 4:13; Colosas 1:23.

14. Paano ginamit ni Jehova an saiyang banal na espiritu tanganing tawan nin orog na pakasabot an saiyang banwaan?

¹⁴ Ginamit man ni Jehova an saiyang banal na  espiritu tanganing tawan nin orog na pakasabot an saiyang banwaan. Sa tabang kan banal na espiritu nin Dios, natawan nin kahulogan ni Jose an makahulang mga pangatorogan ni Faraon. (Genesis 41:​16, 38, 39) Paagi sa saiyang banal na espiritu, pinangyari ni Jehova na mahayag an saiyang mga katuyohan sa mga mapakumbaba alagad ihinilom iyan sa mga mapalangkaw. (Mateo 11:25) Sa siring, mapadapit sa mga bagay na itinatao ni Jehova “para sa mga namomoot sa saiya,” si apostol Pablo nagsabi: “Sa sato na an mga iyan ipinahayag nin Dios paagi sa saiyang espiritu.” (1 Corinto 2:7-10) Sa tabang sana kan banal na espiritu na talagang masasabotan nin sarong tawo an kabotan nin Dios.

Tabang Hale sa Tataramon nin Dios

15, 16. Ano an pinagibo ki Josue tanganing sia makahiro na may kadonongan?

¹⁵ An ipinasabong na Tataramon ni Jehova “kapakipakinabang para sa pagtotokdo,” asin pinapangyari kaiyan na magin “lubos na may kakayahan, biyong nasangkapan para sa gabos na marahay na gibo” an mga lingkod nin Dios. (2 Timoteo 3:​16, 17) An Biblia igwa nin dakol na halimbawa kun paano nakatabang sa banwaan nin Dios kan suanoy na mga panahon an mga kabtang kan saiyang Tataramon na ikinasurat na.

¹⁶ An Kasuratan nakatabang tanganing magtao nin marahay na paggiya para sa mga nagsasamba sa Dios. Kan ipinagkatiwala ki Josue an paninimbagan na pangenotan an Israel, sia sinabihan: “An librong ini kan ley [na isinurat ni Moises] dai dapat sumuhay sa saimong ngoso, asin basahon mo iyan nin pahinghing aldaw asin banggi, tanganing ika makapag-ingat na gumibo segun sa gabos na nasusurat dian; huli ta paagi kaiyan magigin kang mapanggana asin mahiro ka na may kadonongan.” Mangnohon na dai nanuga an Dios ki Josue na ini milagrosong tatawan nia nin kadonongan. Imbes, kun binabasa asin hinohorophorop ni Josue an ‘libro nin ley,’ kun siring sia mahiro na may kadonongan.​—Josue 1:8; Salmo 1:1-3.

17. Paano si Daniel sagkod si Hadeng Josias natabangan kan mga kabtang kan Kasuratan na yaon kan panahon ninda?

¹⁷ An nasusurat na Tataramon nin Dios nakatabang man tanganing ihayag an saiyang kabotan asin katuyohan. Halimbawa, narisa ni Daniel sa mga surat ni Jeremias kun gurano kalawig na magdadanay na gaba an Jerusalem. (Jeremias 25:11; Daniel 9:2) Estudyare man an nangyari durante kan pagreynar ni Hadeng Josias nin Juda. Kan panahon na idto, an nasyon naparayo ki Jehova, asin minalataw na an mga hade dai naggibo nin personal na kopya kan Ley asin dai iyan sinunod. (Deuteronomio 17:18-20) Alagad mientras na hinihirahay an templo, nanompongan “an mismong libro nin ley,” na posibleng si Moises an nagsurat. Tibaad ini an orihinal na teksto, na natapos kaidtong mga 800 na taon na an nakaagi. Pakatapos na madangog an pagbasa kan laog kaiyan, narealisar ni Josias na labi-labi na an paglapas kan nasyon sa kabotan ni Jehova, asin an hade naggibo nin marigon na aksion na gibohon an nakasurat sa libro. (2 Hade 22:8; 23:1-7) Bako daw na maliwanag na an banwaan nin Dios kan suanoy na mga panahon natabangan kan mga kabtang kan Sagradong Kasuratan na yaon kan panahon ninda?

Tabang Paagi sa mga Kapagtubod

18. Taano ta masasabi niato na si Jehova an responsable kun tinatabangan nin sarong tunay na parasamba an kapwa nia parasamba?

¹⁸ An tabang na itinatao ni Jehova sa parate paagi sa mga kapagtubod. Tunay nanggad, an Dios an responsable kun tinatabangan nin sarong tunay na parasamba an kapwa nia parasamba. Taano ta masasabi niato iyan? Huli sa duwang dahelan. Enot, kalabot an banal na espiritu nin Dios. An espiritung iyan nagpapaluwas nin mga bunga, kaiba an pagkamoot asin karahayan, sa mga gustong maimpluwensiahan kaiyan. (Galacia 5:​22, 23) Huli kaini, kun an sarong lingkod nin Dios mapahirong  tabangan an kapwa nia lingkod, nagpapatunay ini na naghihiro an espiritu ni Jehova. Ikaduwa, ginibo kita sa ladawan nin Dios. (Genesis 1:26) Nangangahulogan ini na may kakayahan kitang ipabanaag an saiyang mga kualidad, kaiba an saiyang kabootan asin pagkaherak. Kaya kun an sarong lingkod ni Jehova nagtataong tabang sa kapwa nia lingkod, an tunay na Gikanan kan siring na tabang iyo an saro na kasugad niato.

19. Segun sa rekord kan Biblia, paano si Jehova nagtao nin tabang paagi sa mga kapagtubod?

¹⁹ Kan mga panahon kan Biblia, paano nagtao nin tabang si Jehova paagi sa mga kapagtubod? Sa parate pinapangyari ni Jehova na an saro sa mga lingkod nia magtao nin konseho sa saro pang kapwa lingkod, siring kan si Jeremias magtao nin nagliligtas-buhay na konseho ki Baruc. (Jeremias 45:1-5) May panahon na an tunay na mga parasamba napahiro na magtao nin materyal na tabang sa mga kapagtubod, siring kan an mga Kristiano sa Macedonia asin Acaya magpaheling nin pagigin galaga na tabangan an saindang nangangaipong mga tugang sa Jerusalem. Sinabi ni apostol Pablo na an siring na pagigin buka an palad angay na nagpapaluwas “nin kapahayagan nin pagpasalamat sa Dios.”​—2 Corinto 9:11.

20, 21. Sa anong mga kamugtakan napakosog si apostol Pablo kan mga tugang hale sa Roma?

²⁰ Nangorognang nakakapukaw sa boot an mga pagkasaysay kun paano naghingoa an mga lingkod ni Jehova na magpakinorosogkosogan asin magparinigonan nin boot. Estudyare an halimbawa may labot ki apostol Pablo. Kan pasiring sa Roma bilang sarong bilanggo, si Pablo nag-agi sa Romanong tinampo na inaapod na Dalan nin Apio. An ultimong kabtang kan biahe partikularmenteng bakong magayon, huli ta an mga nagbibiahe maagi sa sarong may tangyan asin hababang lugar. * Aram kan mga tugang sa kongregasyon sa Roma na maabot si Pablo. Ano an gigibohon ninda? Mahalat na sana daw sinda sa saindang harong sa siudad sagkod na dumatong si Pablo dangan taratarahon sia?

²¹ An kagsurat sa Biblia na si Lucas, na nag-iba ki Pablo sa pagbiahe, nagsasabi sa sato kun ano an nangyari: “Hale duman [sa Roma] an mga tugang,  kan madangog ninda an bareta manongod sa samo, nagdatong sa pagsabat sa samo sagkod sa Sadan nin Apio asin Tolong Taberna.” Naiimahinar daw nindo an eksena? Huling aram na maabot si Pablo, sarong grupo nin mga tugang an nagbiahe hale sa Roma tanganing sabaton sia. An sarong kabtang kan grupo naghahalat kaidto sa Sadan nin Apio, an midbid na marhay na pondohan nin mga nagbibiahe na mga 74 kilometros sa luwas kan Roma. An iba pang mga tugang naghahalat sa Tolong Taberna, sarong pahingaloan nin mga nagbibiahe na mga 58 kilometros sa luwas kan siudad. Ano an nagin reaksion ni Pablo? Si Lucas nagbabareta: “Kan maheling sinda, si Pablo nagpasalamat sa Dios asin nagkosog an boot.” (Gibo 28:15) Isip-isipa na sana iyan​—an pakaheling sana sa mga tugang na idto na naghingoang magbiahe nagin gikanan nin kosog asin karangahan para ki Pablo! Asin siisay an pinasalamatan ni Pablo huli sa tabang na ini? Pinasalamatan nia an saro na iyo an responsable, si Jehova Dios.

22. Ano an satong teksto kan taon para sa 2005, asin ano an totokaron sa sunod na artikulo?

²² Malinaw nanggad, nagtatao nin patotoo an mismong ipinasabong na rekord kan mga ginibo nin Dios. Sia an Paratabang na daing kapareho. Tamang-tama, an magigin teksto kan taon para sa 2005 kan Mga Saksi ni Jehova iyo an mga tataramon sa Salmo 121:2: “An tabang sa sako gikan ki Jehova.” Alagad paano kita tinatabangan ni Jehova ngonyan? Totokaron ini sa sunod na artikulo.

[Nota sa Ibaba]

Nagigirumdoman daw Nindo?

Paano nagtabang si Jehova​—

• paagi sa mga anghel?

• paagi sa saiyang banal na espiritu?

• paagi sa saiyang ipinasabong na Tataramon?

• paagi sa mga kapagtubod?

[Mga Hapot Para sa Pag-adal]

[Blurb sa pahina 15]

An teksto kan taon para sa 2005 iyo an: “An tabang sa sako gikan ki Jehova.”​—Salmo 121:2.

[Ritrato sa pahina 16]

Pinasalamatan ni Pablo an Dios huli sa tabang na inako nia hale sa mga tugang sa Roma