Nagkakasararo Huli sa Pagkamoot sa Dios

KAN mabilog an Kristianong kongregasyon kan enot na siglo kan satong Komun na Kapanahonan, an saro sa lataw na karakteristiko kaiyan​—sa ibong nin pagkalaenlaen kan mga miembro kaiyan​—iyo an pagkasararo kaiyan. An mga nagsasambang iyan sa tunay na Dios hale sa mga nasyon sa Asia, Europa, asin Aprika. Irinerepresentar ninda an laen-laen na pinaghalean​—mga padi, soldados, oripon, dulag, artisano, propesyonal, asin negosyante. May mga Judio, asin an iba pa, mga Hentil. Dakol an dating parasambay, homoseksuwal, paraburat, parahabon, o parakikil. Minsan siring, kan sinda magin Kristiano, binayaan ninda an maraot na mga gibo ninda asin nagin dayupot na nagkakasararo sa pagtubod.

Ano an nagpangyaring mapagsararo kan enot na siglong Kristianismo an gabos na tawong ini? Taano ta may pakipagkatoninongan sinda sa lambang saro asin sa mga tawo sa pankagabsan? Taano ta dai sinda nakiayon sa mga rebelyon asin ralaban? Taano ta laen na marhay an enot na Kristianismo sa mayor na mga relihion ngonyan?

Ano an Nagpangyaring Magin Dayupot sa Lambang Saro an mga Miembro kan Kongregasyon?

An pangenot na dahelan kaya nagkakasararo an mga magkapagtubod kan enot na siglo iyo an pagkamoot sa Dios. Minimidbid kan mga Kristianong idto an pangenot na obligasyon ninda na kamotan an tunay na Dios, si Jehova, sa bilog nindang puso, kalag, asin isip. Halimbawa, si apostol Pedro, na sarong Judio, ininstruksionan na magdalaw sa harong  nin sarong taga ibang nasyon, na sa normal na kamugtakan dai sia makikiibaiba nin dayupot. Sa pangenot, an pagkamoot ki Jehova an nagpahiro sa saiya na sumunod. Si Pedro asin an ibang enot na mga Kristiano may dayupot na relasyon sa Dios na nakabasar sa tamang kaaraman manongod sa Saiyang personalidad, mga gusto, asin dai gusto. Pag-abot nin panahon, nasabotan kan gabos na parasamba na kabotan ni Jehova na sinda “magkasararo sa saro sanang pag-isip asin sa saro sanang paghonahona.”​—1 Corinto 1:10; Mateo 22:37; Gibo 10:1-35.

An mga nagturubod orog pang nagkasararo huli sa pagtubod ninda ki Jesu-Cristo. Gusto nindang maingat na sumunod sa mga lakad nia. Pinagbotan nia sinda: “Magkaminorootmootan; siring sa pagkamoot ko sa saindo . . . Paagi kaini an gabos makakaaram na kamo an sakong mga disipulo, kun kamo nagkakaminorootmootan.” (Juan 13:​34, 35) Bako ining sarong emosyon na madaling mawara, kundi sarong mapagsakripisyong pagkamoot. Ano an magigin resulta kaini? Si Jesus namibi may labot sa mga nagturubod sa saiya: “Ako nakikimaherak . . . tanganing sinda gabos magin saro, kun paanong ika, Ama, kasaro ko asin ako kasaro mo, na sinda man magin kasaro niato.”​—Juan 17:​20, 21; 1 Pedro 2:21.

Ibinubo ni Jehova an saiyang banal na espiritu, o puersa aktiba, sa saiyang tunay na mga lingkod. Pinaoswag kan espiritung ini an pagkasararo sa tahaw ninda. Binukasan kaiyan an pakasabot sa mga katokdoan kan Biblia na inako sa gabos na kongregasyon. An mga parasamba ki Jehova naghulit kan iyo man sanang mensahe​—an santipikasyon kan ngaran ni Jehova paagi sa Mesiyanikong Kahadean nin Dios, sarong langitnon na gobyerno na mamamahala sa gabos na katawohan. Nasabotan kan enot na mga Kristiano an saindang obligasyon na magin “bakong kabtang kan kinaban na ini.” Huli kaini, kun may mga kariribokan sibil o ralaban militar, an mga Kristiano nagdadanay na neutral. Nakikipagkatoninongan sinda sa gabos.​—Juan 14:26; 18:36; Mateo 6:​9, 10; Gibo 2:1-4; Roma 12:17-21.

Inako kan gabos na nagturubod an saindang paninimbagan na paoswagon an pagkasararo. Paano? Paagi sa pagsegurado na an saindang gawe-gawe kaoyon kan Biblia. Huli kaini, si apostol Pablo nagsurat sa mga Kristiano: “Haleon an daan na personalidad na komporme sa dati nindong paggawe,” asin “magsolog kan bagong personalidad.”​—Efeso 4:22-32.

Pinapagdanay an Pagkasararo

Siempre, an mga nagturubod kan enot na siglo bakong sangkap, asin nagkaigwa nin mga situwasyon na buminalo sa pagkasararo ninda. Halimbawa, an Gibo 6:1-6 nagsasaysay na nagkaigwa nin dai pagkairintindihan sa tahaw nin mga Kristianong Judio na nagtataram nin Griego asin sa mga nagtataram nin Hebreo. Nagsaboot an mga nagtataram nin Griego na tinatratar sinda na may diskriminasyon. Minsan siring, kan inimpormaran an mga apostol manongod sa bagay na ini, tolos asin daing pagpaorog na inasikaso iyan. Kan huri, an hapot manongod sa sarong doktrina nagbunga nin kontrobersia mapadapit sa mga obligasyon kan mga bakong Judio sa Kristianong kongregasyon. Ginibo an sarong desisyon na basado sa mga prinsipyo sa Biblia, asin an desisyon na ini inako kan gabos.​—Gibo 15:1-29.

Ipinapaheling kan mga halimbawang ini na an mga dai pagkaoroyon dai nagbunga nin etnikong pagkabaranga o kawaran nin pagkasararo huli sa matagas na pagkuyog sa nagkapirang doktrina sa laog kan Kristianong kongregasyon kan enot na siglo. Taano ta dai? Huli ta an nakakapasararong mga bagay​—an pagkamoot ki Jehova, pagtubod ki Jesu-Cristo, mapagsakripisyong pagkamoot sa lambang saro, pag-ako kan paggiya kan banal na espiritu, sarong pakasabot sa mga katokdoan kan Biblia, asin pagigin andam nin saro na bagohon an saiyang gawe-gawe​—igo na an puersa tanganing  papagdanayon na nagkakasararo asin may pakipagkatoninongan an enot na kongregasyon.

Nagkakasararo sa Pagsamba sa Presenteng mga Panahon

Puede daw na makamtan an pagkasararo sa kaparehong paagi ngonyan? Puede pa man daw giraray na pagsararoon kan iyo man sanang mga bagay na ini an mga miembro nin sarong pagtubod asin magpangyari sa sainda na magkaigwa nin matoninong na relasyon sa gabos na rasa sa bilog na parte kan kinaban? Iyo, puede nanggad! An Mga Saksi ni Jehova nagkakasararo sa pambilog na kinaban na kasararoan nin magturugang na lakop sa labing 230 kadagaan, isla, asin teritoryo. Asin sinda nagkakasararo huli sa iyo man sanang mga bagay na nagpangyaring magkasararo an mga Kristiano kan enot na siglo.

An saindang debosyon ki Jehova Dios an pangenot na nagkokontribwir sa pagkasararo na naeeksperyensiahan kan Mga Saksi ni Jehova. Nangangahulogan ini na nagmamaigot sindang magin maimbod sa saiya sa irarom nin gabos na kamugtakan. An mga Saksi ni Jehova nagtutubod man ki Jesu-Cristo asin sa saiyang mga katokdoan. An mga Kristianong ini nagpapaheling nin mapagsakripisyong pagkamoot sa mga kapagtubod asin naghuhulit kan iyo man sanang maogmang bareta kan Kahadean nin Dios sa gabos na kadagaan na sinda aktibo. Naoogma sindang ipakipag-olay an manongod sa Kahadean na ini sa mga tawo ano man an saindang relihion, rasa, nasyonalidad, asin grupo sosyal. An Mga Saksi ni Jehova nagdadanay man na neutral sa gibo-gibo sa kinaban, na nakakatabang sainda na paglabanan an mga pangigipit sa politika, kultura, sosyal, asin komersial na nakakabangang marhay sa katawohan. Inaako kan gabos na Saksi an obligasyon ninda na paoswagon an pagkasararo paagi sa paggawe na kaoyon kan mga pamantayan sa Biblia.

An Pagkasararo Nakakaakit sa Iba

Sa parate nakakapukaw sa interes kan mga indibiduwal na bakong Saksi an pagkasararong ini. Halimbawa, si Ilse * saro kaidtong madreng Katoliko sa sarong kombento sa Alemania. Ano an nakaakit sa saiya sa mga Saksi ni Jehova? Si Ilse nagsabi: “Sinda an pinakamarahay na mga tawo na namidbid ko kasuarin man. Dai sinda nakikiguerra; dai sinda naggigibo nin ano man na makakadanyar sa siisay man. Gusto nindang tabangan an mga tawo na mabuhay nin maogma sa sarong paraisong daga sa irarom kan Kahadean nin Dios.”

Yaon man si Günther, sarong soldados na Aleman na nakadestino sa Pransia durante kan ikaduwang guerra mundial. Sarong aldaw may ginibong serbisyo relihioso para sa mga soldados sa grupo ni Günther. An padi namibi para sa bendisyon, proteksion, asin kapangganahan. Pagkatapos kan serbisyo, puminuesto na si Günther bilang bantay. Paagi sa saiyang teleskopyo, naheling nia an kaiwal na mga tropa sa ibong na lado kan posisyon para sa ralaban na nag-aatender man sa serbisyo relihioso na pinapamayohan nin sarong padi. Sa huri nagsabi si Günther: “Posibleng marhay na an pading iyan namimibi man para sa bendisyon, proteksion, asin kapangganahan. Iniisip-isip ko kun paano nangyari na an mga iglesiang Kristiano yaon sa magkakontrang lado kan iyo man sanang guerra.” An mga impresyon na ini nagtadom sa isip ni Günther. Kan sa huri makamidbid nia an mga Saksi ni Jehova, na dai nakikikabtang sa guerra, si Günther nagin kabtang kan saindang pambilog na kinaban na kasararoan nin magturugang.

Si Ashok asin Feema dating miembro nin sarong relihion sa Sirangan. Sa saindang harong, igwa sinda nin altar para sa sarong dios. Kan magkaigwa nin grabeng helang an saindang pamilya, siniyasat giraray ninda an saindang relihion. Sa pakikipag-olay sa mga Saksi ni Jehova, napahanga si Ashok asin Feema sa mga katokdoan kan Biblia patin sa pagkamoot na yaon sa tahaw kan mga Saksi. Sinda ngonyan maigot na mga parahayag na kan maogmang bareta kan Kahadean ni Jehova.

Si Ilse, Günther, Ashok, asin Feema nagkakasararo kaiba kan minilyon na Saksi ni Jehova sa lakop sa globong kasararoan nin magturugang. Nagtutubod sinda na an iyo man sanang mga bagay na ipinanuga kan Biblia na nakapagpasararo sa sainda sa pagsamba ngonyan makakapagpasararo sa gabos na makinuyog na katawohan sa dai na mahahaloy. Dangan, mayo na nin dugang pang karatan, kawaran nin pagkasararo, asin pagkabaranga sa ngaran nin relihion. An bilog na kinaban magkakasararo sa pagsamba sa tunay na Dios, si Jehova.​—Kapahayagan 21:​4, 5.

[Nota sa Ibaba]

[Mga Ritrato sa pahina 4, 5]

Sa ibong nin laen-laen na pinaghalean, an enot na mga Kristiano nagkakasararo