Pangaptan an Arogan na Itinao ni Jesus
Pangaptan an Arogan na Itinao ni Jesus
“Ako nagtao sa saindo nin arogan, tanganing, kun ano an ginibo ko sa saindo, iyo man an maninigong gibohon nindo.”—JUAN 13:15.
1. Taano si Jesus ta sarong modelo na dapat arogon nin mga Kristiano?
SA BILOG na kasaysayan nin katawohan, solamente sarong tawo an dai nagkasala sa bilog niang buhay. An tawong iyan iyo si Jesus. Apuera ki Jesus, “mayo nin tawo na dai nagkakasala.” (1 Hade 8:46; Roma 3:23) Sa dahelan na iyan, minamansay kan tunay na mga Kristiano si Jesus bilang sarong sangkap na modelo na dapat arogon. Sa katunayan, kan Nisan 14, 33 C.E., dai nahaloy bago kan saiyang kagadanan, sinabihan mismo ni Jesus an saiyang mga parasunod na arogon sia. Sinabi nia: “Ako nagtao sa saindo nin arogan, tanganing, kun ano an ginibo ko sa saindo, iyo man an maninigong gibohon nindo.” (Juan 13:15) Durante kan ultimong bangging iyan, nagsambit si Jesus nin dakol na paagi na an mga Kristiano maninigong magmaigot na magin arog sa saiya. Sa artikulong ini, kokonsideraron niato an nagkapira kaiyan.
An Pangangaipo nin Kapakumbabaan
2, 3. Sa anong mga paagi sangkap na arogan nin kapakumbabaan si Jesus?
2 Kan sadolon ni Jesus an saiyang mga disipulo na sunodon an arogan na itinao nia, espesipiko siang nagtataram dapit sa kapakumbabaan. Bako sanang sarong okasyon na hinatolan nia an saiyang mga parasunod na magin mapakumbaba, asin kan banggi nin Nisan 14, ipinaheling nia an saiya mismong kapakumbabaan paagi sa paghanaw kan mga bitis kan saiyang mga apostol. Dangan si Jesus nagsabi: “Kun ako, minsan Kagurangnan asin Paratokdo, naghanaw kan saindong mga bitis, dapat na hanawan man nindo an bitis kan lambang saro.” (Juan 13:14) Pakatapos kaiyan, sinabihan nia an saiyang mga apostol na sunodon an itinao niang arogan. Asin kanigoan karahay na arogan nin kapakumbabaan idto!
3 Sinasabi sa sato ni apostol Pablo na bago nagdigdi sa daga, si Jesus “kabaing nin Dios.” Minsan siring, sia nagpakadai sa sadiri asin nagin sarong hamak na tawo. Orog pa dian, “sia nagpakumbaba asin nagin makinuyog sagkod sa kagadanan, iyo, kagadanan sa hariging pasakitan.” (Filipos 2:6-8) Isip-isipa iyan. Si Jesus, an ikaduwa sa pinakahalangkaw na persona sa uniberso, nagtogot na magin mas hababa kisa mga anghel, na mamundag na sarong daing maginibong omboy, na magdakula na nagpapasakop sa bakong sangkap na mga magurang, asin sa katapustapusi magadan siring sa dinuduhaging kriminal. (Colosas 1:15, 16; Hebreo 2:6, 7) Pambihirang kapakumbabaan! Posible daw na maarog an “nasa isip na aktitud” na iyan asin mapatalubo an siring na “kababaan nin pag-isip”? (Filipos 2:3-5) Iyo, alagad bakong pasil iyan.
4. Anong mga bagay an minagibong magin mapalangkaw an mga tawo, alagad taano ta peligroso an kapalangkawan?
4 Kapalangkawan an kabaliktaran nin kapakumbabaan. (Talinhaga 6:16-19) Kapalangkawan an nagpabagsak ki Satanas. (1 Timoteo 3:6) Madali iyan na magtalubo sa puso nin tawo, asin kun yaon na iyan dian, masakit na iyan na haleon. Nagigin mapalangkaw an mga tawo huli kan saindang nasyon, saindang rasa, saindang mga rogaring, saindang edukasyon, saindang sekular na mga nahaman, saindang kamugtakan sa sosyedad, saindang itsura, saindang mga abilidad sa karawat, asin dakol pang ibang bagay. Pero, mayo sa mga bagay na iyan an mahalaga ki Jehova. (1 Corinto 4:7) Asin kun ginigibo kita kaiyan na magin mapalangkaw, rinaraot kaiyan an satong relasyon sa saiya. “Si Jehova halangkaw, alagad naheheling nia an mapakumbaba; alagad harayo an pagheling nia sa mapalangkaw.”—Salmo 138:6; Talinhaga 8:13.
Mapakumbaba sa Tahaw kan Satong mga Tugang
5. Taano ta kaipuhan na magin mapakumbaba an kamagurangan?
5 Dawa an satong mga ikinakakontribwir asin mga nagigibo sa paglilingkod ki Jehova dai maninigong gumibo sa sato na magin mapalangkaw; ni an mga responsibilidad sa kongregasyon. (1 Cronica 29:14; 1 Timoteo 6:17, 18) An totoo, mientras na mas magabat an satong mga responsibilidad, kaipuhan man kitang magin mas mapakumbaba. Sinadol ni apostol Pedro an kamagurangan na dai ‘magpakangkagurangnan sa mga mana nin Dios, kundi magin mga halimbawa sa aripompon.’ (1 Pedro 5:3) Ninombrahan an kamagurangan na magin mga lingkod asin halimbawa, bakong mga kagurangnan.—Lucas 22:24-26; 2 Corinto 1:24.
6. Sa anong mga aspekto nin Kristianong pamumuhay kaipuhan niato an kapakumbabaan?
6 Bako sanang kamagurangan an kaipuhan na magpaheling nin kapakumbabaan. Sa mga hoben na lalaki, na tibaad ipinaghahambog an saindang mas listong isip asin mas makosog na mga hawak kun ikokomparar sa mga gurang na, si Pedro nagsurat: “Maghagkos nin kababaan nin pag-isip sa lambang saro, huli ta tinutumang nin Dios an mga maabhaw, alagad ta tinatawan nia nin dai na kutana maninigong kabootan an mga mapakumbaba.” (1 Pedro 5:5) Iyo, an arog-Cristong kapakumbabaan kaipuhan kan gabos. Kaipuhan an kapakumbabaan tanganing ihulit an maogmang bareta, nangorogna kun napapaatubang sa pagkaindiperente o pagtumang. Kaipuhan an kapakumbabaan tanganing akoon an hatol o tanganing gibohon na simple an satong buhay tangani na orog kitang makapakikabtang sa ministeryo. Dugang pa, kaipuhan niato an kapakumbabaan saka mapusong pagtubod kun tinitios an mapagpakaraot na mga publisidad, mga pag-atake paagi sa korte, o madahas na paglamag.—1 Pedro 5:6.
7, 8. Ano an nagkapirang paagi na makukultibar niato an kapakumbabaan?
7 Paano mapapaglabanan nin saro an kapalangkawan asin magawe na may “kababaan nin pag-isip na ibinibilang an iba na mas halangkaw” sa saiya? (Filipos 2:3) Kaipuhan na mansayon nia an saiyang sadiri arog kan pagmansay sa saiya ni Jehova. Ipinaliwanag ni Jesus an tamang aktitud kan sia magsabi: “Kamo man, kun nahaman na nindo an gabos na ipinapagibo sa saindo, magsabi kamo, ‘Kami mga oripon na daing kamanungdanan. An ginibo niamo iyo an dapat niamong gibohon.’” (Lucas 17:10) Girumdomon, mayo kitang magigibo na makakapareho sa ginibo ni Jesus. Pero, mapakumbaba si Jesus.
8 Dugang pa, puede niatong hagadon an tabang ni Jehova na makultibar an tamang pagmansay sa satong sadiri. Arog kan salmista, puede kitang mamibi: “Tokdoan mo ako nin karahayan, marahay na kaisipan asin kaaraman mismo, huli ta sa saimong mga togon ako nagtubod.” (Salmo 119:66) Tatabangan kita ni Jehova na pataluboon an makatanosan asin timbang na pagmansay sa satong sadiri, asin babalosan nia kita huli sa satong mapakumbabang aktitud. (Talinhaga 18:12) Si Jesus nagsabi: “An siisay man na nagpapalangkaw kan saiya man sana ibababa, asin an siisay man na magpakumbaba sa saiya man sana ilalangkaw.”—Mateo 23:12.
Tamang Pagmansay sa Tama Asin Sala
9. Paano minansay ni Jesus an tama asin sala?
9 Sa ibong kan 33 na taon na pamumuhay kaiba kan bakong sangkap na mga tawo, nagdanay si Jesus na “dai nin kasalan.” (Hebreo 4:15) Sa katunayan, kan maghula manongod sa Mesiyas, an salmista nagsabi: “Namoot ka sa katanosan asin naongis ka sa karatan.” (Salmo 45:7; Hebreo 1:9) Sa bagay man na ini nagmamaigot an mga Kristiano na arogon si Jesus. Bako sanang naaaraman ninda an kalaenan kan tama asin sala; ikinakaongis ninda an sala asin namomoot sa tama. (Amos 5:15) Nakakatabang ini sa sainda na labanan an saindang minanang makasalan na mga inklinasyon.—Genesis 8:21; Roma 7:21-25.
10. Kun daing pagsolsol na naggigibo kita nin “marigsok na mga bagay,” anong aktitud an ipinapaheling niato?
10 Si Jesus nagsabi sa Fariseong si Nicodemo: “An nagsasagibo nin marigsok na mga bagay naoongis sa liwanag asin dai minadolok sa liwanag, tanganing an saiyang mga gibo dai masagwe. Alagad an naggigibo nin totoo minadolok sa liwanag, tanganing an saiyang mga gibo mahayag na ginibong kaoyon sa Dios.” (Juan 3:20, 21) Estudyare: Ipinamidbid ni Juan si Jesus bilang an “tunay na liwanag na nagtatao nin liwanag sa lambang klase nin tawo.” (Juan 1:9,10) Minsan siring, sinabi ni Jesus na kun nagsasagibo kita nin “marigsok na mga bagay”—mga bagay na sala asin dai maaako nin Dios—ikinakaongis niato an liwanag. Maiimahinar daw nindo na ikinakaongis si Jesus asin an saiyang mga pamantayan? Pero, iyan an ginigibo kan mga tawo na daing pagsolsol na naggigibo nin kasalan. Tibaad dai ninda iniisip na ikinakaongis ninda si Jesus asin an saiyang mga pamantayan, pero malinaw nanggad, iyan an pagmansay ni Jesus.
Kun Paano Kukultibaron an Pagmansay ni Jesus sa Tama Asin Sala
11. Ano an kaipuhan tanganing makultibar niato an pagmansay ni Jesus sa tama asin sala?
11 Kaipuhan niato an malinaw na pakasabot kun ano an tama asin kun ano an sala basado sa pagmansay ni Jehova. Makukua niato an pakasabot na iyan paagi sana sa pag-adal kan Tataramon nin Dios, an Biblia. Mantang ginigibo niato an siring na pag-adal, kaipuhan niatong mamibi siring kan ipinamibi kan salmista: “Paaraman sa sako an saimong mga dalan, O Jehova; tokdoi ako kan saimong mga dana.” (Salmo 25:4) Minsan siring, girumdomon na mapandaya si Satanas. (2 Corinto 11:14) Puede niang paluwason na an sala magin tama sa pagheling nin dai nagmamaan na Kristiano. Huli kaini, kaipuhan niatong horophoropon na marhay an satong nanonodan asin maingat na himateon an hatol kan “maimbod asin mapagmansay na oripon.” (Mateo 24:45-47) An pag-adal, pamibi, asin paghorophorop sa satong nanonodan makakatabang sa sato na tumalubo sa pagkamaygurang asin magin kabilang sa mga tawo na “huli sa paggamit kan saindang kakayahan nin pagmansay napatuod na mamidbid kun ano an tama sagkod an sala.” (Hebreo 5:14) Sa siring magigin andam kitang ikaongis an sala asin mamotan an tama.
12. Anong hatol sa Biblia an nakakatabang sa sato na dai gumibo nin katampalasanan?
12 Kun ikinakaongis niato an sala, dai niato totogotan an pagmawot para sa salang mga bagay na tumalubo sa satong puso. Dakol na taon pagkagadan ni Jesus, si apostol Juan nagsurat: “Dai kamo mamoot sa kinaban o sa mga bagay kan kinaban. Kun an siisay man namomoot sa kinaban, an pagkamoot kan Ama mayo sa saiya; huli ta an gabos na nasa kinaban—an mawot kan laman asin an mawot kan mga mata asin an pagpaabaw-abaw kan kaya sa buhay—bakong gikan sa Ama, kundi gikan sa kinaban.”—1 Juan 2:15, 16.
13, 14. (a) Taano an pagkamoot sa mga bagay kan kinaban ta peligroso sa mga Kristiano? (b) Paano niato malilikayan an pagkultibar nin pagkamoot sa mga bagay na nasa kinaban?
13 Tibaad mangatanosan an iba na bakong gabos na nasa kinaban sala. Dawa siring, an kinaban asin an mga pan-akit kaiyan madaling ikarayo an satong atension sa paglilingkod ki Jehova. Asin mayong iinaalok an kinaban na may katuyohan na orog kitang irani sa Dios. Huli kaini, kun namomotan ta na an mga bagay na nasa kinaban, dawa an mga bagay na tibaad bako man talagang sala, namemeligro kita. (1 Timoteo 6:9, 10) Apuera kaini, an kadaklan na bagay sa kinaban talagang maraot asin puedeng makaraot sa sato. Kun nagdadalan kita nin mga pelikula o mga programa sa telebisyon na nagtatampok nin kadahasan, materyalismo, o seksuwal na inmoralidad, an mga bagay na iyan magigin puede sa sato—dangan magigin sugot sa sato. Kun nakikiasosyar kita sa mga tawo na an pangenot na interes iyo an pagpaasenso sa saindang estilo nin pamumuhay o pagpaoswag sa mga oportunidad sa negosyo, an mga bagay na iyan magigin naman may pangenot na halaga sa sato.—Mateo 6:24; 1 Corinto 15:33.
14 Sa ibong na lado, kun ikinakaogma niatong marhay an Tataramon ni Jehova, “an mawot kan laman asin an mawot kan mga mata asin an pagpaabaw-abaw kan kaya sa buhay” magigin dai nang gayo nakakaakit. Dugang pa, kun nakikiasosyar kita sa mga ineenot an intereses kan Kahadean nin Dios, magigin arog kita sa sainda, namomoot sa namomotan ninda asin nakakalikay sa linilikayan ninda.—Salmo 15:4; Talinhaga 13:20.
15. Arog kan nangyari ki Jesus, paano kita pinapakosog kan pagkamoot sa katanosan asin pagkaongis sa katampalasanan?
15 An pagkaongis sa katampalasanan asin pagkamoot sa katanosan nakatabang ki Jesus na papagdanayon an saiyang mga mata sa “kagayagayahan na ibinugtak sa atubangan nia.” (Hebreo 12:2) Puede man na magin totoo iyan sa sato. Aram niato na “an kinaban maagi sana asin siring man an mawot kaiyan.” Ano man na kasiraman na ikakatao kan kinaban na ini temporaryo sana. Minsan siring, “an naggigibo kan kabotan nin Dios magdadanay sagkod lamang.” (1 Juan 2:17) Huling ginibo ni Jesus an kabotan nin Dios, binukasan nia an dalan para sa katawohan na magkamit nin buhay na daing katapusan. (1 Juan 5:13) Logod na kita gabos arogon sia asin makinabang sa saiyang integridad.
Pag-atubang sa Paglamag
16. Taano ta sinadol ni Jesus an saiyang mga parasunod na magkaminorootmootan?
16 Ipinarisa ni Jesus an saro pang paagi na maaarog sia kan saiyang mga disipulo, na nagsasabi: “Ini an sakong togon, na kamo magkaminorootmootan siring kan pagkamoot ko sa saindo.” (Juan 15:12, 13, 17) Dakol an dahelan kun taano ta namomotan nin mga Kristiano an saindang mga tugang. Sa okasyon na ini, pangenot na nasa isip ni Jesus an aatubangon nindang pagkaongis kan kinaban. Sia nagsabi: “Kun an kinaban naoongis sa saindo, aram na nindo na iyan naongis na nguna sa sako bago iyan naongis sa saindo. . . . An oripon bakong orog sa saiyang kagurangnan. Kun ako pinaglamag ninda, kamo man paglalamagon ninda.” (Juan 15:18, 20) Iyo, dawa sa pag-agi nin paglamag, an mga Kristiano kapareho ni Jesus. Kaipuhan nindang pataluboon an sarong makosog, mamomoton na pagkaborogkos na makakatabang sa sainda na labanan an pagkaongis na iyan.
17. Taano ta ikinakaongis kan kinaban an tunay na mga Kristiano?
17 Taano ta ikinakaongis kan kinaban an mga Kristiano? Huling, arog ni Jesus, sinda “bakong kabtang kan kinaban.” (Juan 17:14, 16) Neutral sinda sa mga bagay na militar asin politikal, asin sinusunod ninda an mga prinsipyo sa Biblia, iginagalang an pagigin sagrado nin buhay asin namumuhay sono sa halangkaw na mga pamantayan sa moral. (Gibo 15:28, 29; 1 Corinto 6:9-11) An saindang pangenot na pasohan espirituwal, bakong materyal. Nabubuhay sinda sa kinaban, alagad siring kan isinurat ni Pablo, dai sinda “naggagamit kaiyan nin lubos.” (1 Corinto 7:31) Totoo, may mga nagpahayag nin paghanga sa halangkaw na mga pamantayan kan Mga Saksi ni Jehova. Alagad an mga Saksi ni Jehova dai nakikipagkompromiso tangani na hangaan o akoon. Bilang resulta, an kadaklan sa kinaban dai sinda nasasabotan, asin dakol an naoongis sa sainda.
18, 19. Sa pagsunod sa arogan ni Jesus, paano inaatubang nin mga Kristiano an pagtumang asin paglamag?
18 Naheling kan mga apostol ni Jesus an grabeng pagkaongis kan kinaban kan arestaron asin gadanon si Jesus, asin naheling ninda kun paano inatubang ni Jesus an pagkaongis na iyan. Sa hardin nin Getsemani, nag-abot an mga kalaban ni Jesus sa relihion tanganing arestaron sia. Prinobaran ni Pedro na protehiran sia paagi sa espada, alagad sinabi ni Jesus ki Pedro: “Sarungan an saimong espada, huli ta an gabos na minabingat nin espada sa espada man magagadan.” (Mateo 26:52; Lucas 22:50, 51) Kan mas naenot na mga panahon, nakipaglaban an mga Israelita paagi sa espada sa saindang mga kaiwal. Pero, laen na ngonyan an situwasyon. An Kahadean nin Dios “bakong kabtang kan kinaban na ini” asin mayo nin nasyonal na mga linderos na pinoprotehiran. (Juan 18:36) Dai na mahahaloy magigin kabtang si Pedro nin sarong espirituwal na nasyon, na an mga miembro magkakaigwa kan saindang pagkasiudadano sa langit. (Galacia 6:16; Filipos 3:20, 21) Kun siring, magpoon kan panahon na idto, aatubangon kan mga parasunod ni Jesus an pagkaongis asin paglamag arog kan ginibo ni Jesus—daing takot alagad sa matoninong na paagi. May kompiansa nindang ipinapabaya sa kamot ni Jehova an kaaabtan kan mga bagay asin nananarig sa saiya para sa kosog tanganing makatagal.—Lucas 22:42.
19 Pakalihis nin dakol na taon, si Pedro nagsurat: “Si Cristo nagdusa para sa saindo, na winalatan kamo nin modelo tanganing sunodon nindo nin estrikto an saiyang mga lakad. . . . Kan sia pinagmumuda, dai sia nagbalos na magmuda. Kan sia nagdudusa, dai sia nanhuma, kundi padagos na ipinagkatiwala an saiyang sadiri sa saro na naghohokom nin matanos.” (1 Pedro 2:21-23) Siring kan ipinatanid ni Jesus, an mga Kristiano nakaeksperyensia nin maringis na paglamag sa pag-agi nin panahon. Kan enot na siglo pati sa presenteng panahon niato, sinunod ninda an halimbawa ni Jesus asin nakagibo nin marahayon na rekord nin maimbod na pagtagal, na pinapatunayan na sinda matoninong na mga nagdadanay na may integridad. (Kapahayagan 2:9, 10) Logod na arog man kaiyan an gibohon niato gabos bilang indibiduwal kun mapaatubang sa siring na mga kamugtakan.—2 Timoteo 3:12.
“Isolog Nindo an Kagurangnan na si Jesu-Cristo”
20-22. Sa anong paagi ‘isinosolog nin mga Kristiano an Kagurangnan na si Jesu-Cristo’?
20 Si Pablo nagsurat sa kongregasyon sa Roma: “Isolog nindo an Kagurangnan na si Jesu-Cristo, asin dai kamo magparaplano nin patienot para sa mga mawot kan laman.” (Roma 13:14) Garo man sana isinosolog nin mga Kristiano si Jesus siring sa sarong gubing. Pinagmamaigotan nindang arogon an saiyang mga kualidad asin gawe-gawe sagkod na sinda nagigin ladawan—dawa bakong sangkap—kan saindang Kagurangnan.—1 Tesalonica 1:6.
21 Mapanggana niatong ‘ikakasolog an Kagurangnan na si Jesu-Cristo’ kun magigin pamilyar kita sa buhay kan Kagurangnan asin magmamaigot na mamuhay nin arog sa saiya. Inaarog niato an saiyang kapakumbabaan, an saiyang pagkamoot sa katanosan, an saiyang pagkaongis sa katampalasanan, an saiyang pagkamoot sa saiyang mga tugang, an saiyang pagigin bakong kabtang kan kinaban, asin an saiyang mapasensiang pakatagal sa pagdusa. Dai kita ‘nagpaplano nin patienot para sa mga mawot kan laman’—an boot sabihon, dai niato ginigibong pangenot na katuyohan sa buhay an pag-aabot sa sekular na mga pasohan o an pagpapakontento sa makalaman na mga mawot. Imbes, kun minagibo nin desisyon o rineresolberan an sarong problema, naghahapot kita: ‘Ano an gigibohon ni Jesus sa situwasyon na ini? Ano an boot nia na gibohon ko?’
22 Sa katapustapusi, inaarog niato si Jesus sa pagigin sibot sa ‘paghuhulit kan maogmang bareta.’ (Mateo 4:23; 1 Corinto 15:58) Sa siring man na paagi, sinusunod kan mga Kristiano an arogan na itinao ni Jesus, asin totokaron sa masunod na artikulo kun paano.
Ikakapaliwanag daw Nindo?
• Taano ta kaipuhan na magin mapakumbaba an sarong Kristiano?
• Paano niato makukultibar an tamang pagmansay sa tama asin sala?
• Sa anong paagi inaarog si Jesus nin mga Kristiano sa pag-atubang sa pagtumang asin paglamag?
• Paano posible na ‘ikasolog an Kagurangnan na si Jesu-Cristo’?
[Mga Hapot Para sa Pag-adal]
[Ritrato sa pahina 7]
Itinao ni Jesus an sangkap na arogan nin kapakumbabaan
[Ritrato sa pahina 8]
An lambang aspekto kan buhay nin sarong Kristiano, kaiba an paghuhulit, nangangaipo nin kapakumbabaan
[Ritrato sa pahina 9]
Puedeng gibohon ni Satanas an bakong tamang aling-alingan na magin garo puede sa sarong Kristiano
[Ritrato sa pahina 10]
An pagkamoot kan satong mga tugang magpaparigon sa sato sa atubangan nin pagtumang