Sinanay na Magtao nin Lubos na Pagpatotoo

“Kamo magigin mga saksi ko sa Jerusalem sagkod sa bilog na Judea asin Samaria patin sagkod sa kaporoporohi kan daga.”​—GIBO 1:8.

1, 2. Ano an sugo ki Pedro, asin siisay an nagtao kaiyan sa saiya?

“SI Jesus na taga Nazaret . . . pinagbotan . . . kami na maghulit sa mga tawo asin magtao nin lubos na pagpatotoo na ini iyo an Saro na itinalaga nin Dios na magin hokom kan mga buhay asin gadan.” (Gibo 10:​38, 42) Paagi sa mga tataramon na iyan, ipinaliwanag ni apostol Pedro ki Cornelio asin sa saiyang pamilya an sugo na inako nia na magin sarong ebanghelisador.

² Kasuarin itinao ni Jesus an sugong iyan? Posibleng marhay na nasa isip ni Pedro an sinabi kan binuhay liwat na si Jesus bago sia nagsakat sa langit. Sa okasyon na iyan, sinabihan ni Jesus an saiyang maimbod na mga disipulo: “Kamo magigin mga saksi ko sa Jerusalem sagkod sa bilog na Judea asin Samaria patin sagkod sa kaporoporohi kan daga.” (Gibo 1:8) Minsan siring, sa harohalawig na panahon bago kaiyan, naaraman na ni Pedro na bilang sarong disipulo ni Jesus, kaipuhan niang ipakipag-olay sa iba an manongod sa saiyang pagtubod ki Jesus.

Tolong Taon na Pagsasanay

3. Anong milagro an ginibo ni Jesus, asin anong pangagda an itinao nia ki Pedro asin Andres?

³ Nagkapirang bulan pakabautismohi sa saiya kan 29 C.E., naghulit si Jesus sa pinagtatrabawohan ni Pedro asin kan saiyang tugang na si Andres bilang mga parasira sa Dagat nin Galilea. Magdamlag na sindang naninira alagad daing nadadakop.  Pero, sinabihan sinda ni Jesus: “Magduman ka sa hararom, asin taktakan nindo an saindong mga hikot para sa pagdakop.” Kan gibohon ninda an sinabi ni Jesus, “nakalaom sinda nin dakolon na sira. Sa katunayan, an saindang mga hikot nagpoon na magkagirisi.” Kan maheling an milagro, natakot si Pedro, alagad pinakalma sia ni Jesus, na nagsasabi: “Dai ka na matakot. Poon ngonyan an dadakopon mo mga tawong buhay.”​—Lucas 5:​4-​10.

4. (a) Paano inandam ni Jesus an saiyang mga disipulo na magpatotoo? (b) Paano ikakakomparar an ministeryo kan mga disipulo ni Jesus sa ministeryo nia?

⁴ Tolos-tolos, si Pedro asin si Andres​—saka si Santiago asin Juan, an mga aki ni Zebedeo​—binayaan an saindang mga baroto asin nagsunod ki Jesus. Sa laog nin haros tolong taon, inibanan ninda si Jesus sa saiyang mga biahe sa paghuhulit asin sinanay sinda na magin mga ebanghelisador. (Mateo 10:7; Marcos 1:​16, 18, 20, 38; Lucas 4:​43; 10:9) Sa katapusan kan pagsasanay na iyan, kan Nisan 14, 33 C.E., sinabihan sinda ni Jesus: “An minatubod sa sako, an saro man na iyan magibo kan mga gibo na ginigibo ko; asin magibo sia nin mga gibo na orog pa kaini.” (Juan 14:12) An mga disipulo ni Jesus matao nin lubos na pagpatotoo arog kan ginibo ni Jesus alagad sa mas mahiwas na sokol. Siring kan naaraman ninda dai nahaloy, sinda asin an gabos na magigin disipulo magpapatotoo sa “gabos na nasyon,” sagkod mismo sa “pagtatapos kan sistema nin mga bagay.”​—Mateo 28:​19, 20.

5. Sa anong mga paagi kita makikinabang sa pagsasanay na itinao ni Jesus sa saiyang mga parasunod?

⁵ Nabubuhay na kita sa “pagtatapos kan sistema nin mga bagay.” (Mateo 24:3) Bakong arog kan enot na mga disipulong idto, dai niato puedeng ibanan si Jesus asin obserbaran siang naghuhulit sa mga tawo. Pero, makikinabang kita sa itinao niang pagsasanay paagi sa pagbasa sa Biblia kun paano sia naghulit asin kun anong mga instruksion an itinao nia sa saiyang mga parasunod. (Lucas 10:​1-​11) Minsan siring, totokaron kan artikulong ini an saro pang bagay na mahalagang marhay na ipinaheling ni Jesus sa saiyang mga disipulo​—an tamang aktitud sa gibohon na paghuhulit.

Pagmakolog sa mga Tawo

6, 7. Anong kualidad ni Jesus an nagpangyaring magin epektibo an saiyang ministeryo, asin paano niato sia maaarog sa bagay na ini?

⁶ Taano si Jesus ta nagtao kan siring kaepektibong patotoo? An sarong dahelan iyo an saiyang odok na interes asin pagmakolog sa mga tawo. Ihinula kan salmista na “maheherak [si Jesus] sa hababa asin sa dukha.” (Salmo 72:13) Inotob nanggad nia an hulang iyan. An Biblia nagsasabi manongod sa sarong okasyon: “Kan maheling nia an mga kadaklan naherak sia sa sainda, huli ta sinda naanitan asin nagkakaralagalag siring sa mga karnero na mayong pastor.” (Mateo 9:36) Dawa an hayag na mga parakasala namatean an saiyang pagmakolog asin naakit sa saiya.​—Mateo 9:​9-​13; Lucas 7:​36-​38; 19:​1-​10.

⁷ Magigin epektibo kita ngonyan kun ipapaheling niato an kaparehong pagmakolog sa mga tawo. Bago makikabtang sa ministeryo, taano ta dai nguna horophoropon kun gurano kaimportante sa mga tawo an impormasyon na ipapaabot nindo sa sainda? Isipon an posibleng mga problema ninda na an Kahadean an solamenteng makakaresolber. Magin desidido na mansayon nin positibo an lambang tawo, mantang dai nindo aram kun siisay an mahimate sa mensahe. Tibaad an sunod na tawo na dodolokon nindo haloy nang namimibi na logod may mag-abot na sarong tawo na arog nindo asin tabangan sia!

Minomotibar nin Pagkamoot

8. Bilang pag-arog ki Jesus, ano an nagmomotibar sa saiyang mga parasunod na ihulit an maogmang bareta?

⁸ An maogmang bareta na ipinahayag ni Jesus may labot sa paggibo kan kabotan ni Jehova, sa santipikasyon kan Saiyang ngaran, asin sa bindikasyon kan Saiyang soberaniya​—an pinakamahalagang mga isyu na napapaatubang sa katawohan. (Mateo 6:​9, 10) Huling namomotan nia an saiyang Ama, napahiro si Jesus na papagdanayon an saiyang integridad sagkod sa katapusan asin magtao nin lubos na pagpatotoo manongod sa Kahadean, na iyo an maresolber sa mga isyung iyan. (Juan 14:31) Huling an mga parasunod ni Jesus ngonyan igwa kan kaparehong motibasyon, mahigos sinda mantang nakikikabtang sa ministeryo. Si apostol Juan nagsabi: “Ini iyo an boot sabihon kan pagkamoot sa Dios, na kuyogon niato an saiyang mga togon,” kaiba an togon na ihulit an maogmang bareta asin gumibo nin mga disipulo.​—1 Juan 5:3; Mateo 28:​19, 20.

9, 10. Apuera sa pagkamoot sa Dios, ano pang pagkamoot an nagmomotibar sato na magtao nin lubos na pagpatotoo?

⁹ Sinabihan ni Jesus an saiyang mga parasunod: “Kun kamo namomoot sa sako, ootobon nindo an  sakong mga togon. An igwa kan sakong mga togon asin minaotob kaiyan, an sarong iyan iyo an namomoot sa sako.” (Juan 14:​15, 21) Sa siring, an pagkamoot ki Jesus maninigong magmotibar sa sato na magpatotoo manongod sa katotoohan asin kuyogon an iba pang bagay na ipinagboot ni Jesus. Sa saro kan mga pagpaheling nia pakatapos na buhayon liwat, sinadol ni Jesus si Pedro: “Pasabsaba an sakong mga kordero. . . . Pastoran mo an saradit kong karnero. . . . Pasabsaba an saradit kong karnero.” Ano an maninigong magpahiro ki Pedro na gibohon iyan? Isinabi ni Jesus an simbag kan paorootro niang hinapot si Pedro: “Namomoot ka sa sako? . . . Namomoot ka sa sako? . . . Igwa ka nin kapadangatan sa sako?” Iyo, an pagkamoot ni Pedro ki Jesus, an saiyang kapadangatan sa saiya, magmomotibar sa saiya na magtao nin lubos na pagpatotoo, hanapon an ‘saradit na karnero’ ni Jesus, asin pakatapos kaiyan magin espirituwal na pastor sa sainda.​—Juan 21:15-​17.

¹⁰ Ngonyan, bako kitang personal na pamilyar ki Jesus arog ki Pedro. Pero, igwa kita nin hararom na pakasabot sa ginibo ni Jesus para sa sato. Napapahiro an satong puso kan dakulang pagkamoot na nagmotibar sa saiya na “magnamit nin kagadanan para sa lambang tawo.” (Hebreo 2:9; Juan 15:13) Namamatean niato an arog kan namatean ni Pablo kan sia magsurat: “Itinutulod kami kan pagkamoot na yaon sa Cristo . . . Sia nagadan para sa gabos tanganing idtong mga nabubuhay dai na mabuhay para sa sainda man sana, kundi para sa saiya.” (2 Corinto 5:​14, 15) Ipinapaheling niato na satong pinapahalagahan na marhay an pagkamoot ni Jesus sa sato asin na namomotan ta man sia paagi sa maigot na pag-otob kan sugo na magtao nin lubos na pagpatotoo. (1 Juan 2:​3-5) Nungka niatong bobooton na magin paramas sana sa paghuhulit, na garo baga ibinibilang na bakong gayong mahalaga an atang ni Jesus.​—Hebreo 10:29.

Pagdadanay na Nakakonsentrar sa Kun Ano an Pinakamahalaga

11, 12. Sa anong katuyohan na napadigdi sa kinaban si Jesus, asin paano nia pinapagdanay na sia nakakonsentrar dian?

¹¹ Kan si Jesus nasa atubangan ni Poncio Pilato, sia nagsabi: “Ako namundag dahel kaini, asin dahel kaini ako napadigdi sa kinaban, na ako magpatotoo sa katotoohan.” (Juan 18:37) Dai tinogotan ni Jesus an ano man na makadisturbo sa saiya sa pagpapatotoo sa katotoohan. Idto an kabotan nin Dios para sa saiya.

¹² Binalo nanggad ni Satanas si Jesus sa bagay na ini. Dai nahaloy pakabautismohi ki Jesus, inalok ni Satanas na gibohon siang sarong prominenteng tawo sa kinaban, na itao sa saiya “an gabos na kahadean kan kinaban asin an kamurawayan kan mga iyan.” (Mateo 4:​8, 9) Sa huri, minawot kan mga Judio na gibohon siang hade. (Juan 6:15) Tibaad isip-isipon nin nagkapira an posibleng mga pakinabang kun inako ni Jesus an siring na mga alok, na tibaad nangangatanosan na bilang sarong tawong hade, dakol kutanang karahayan an nagibo ni Jesus para sa katawohan. Pero sinayumahan ni Jesus an siring kaiyan na klase nin kaisipan. Nakakonsentrar sia sa pagpapatotoo sa katotoohan.

13, 14. (a) Ano an dai nakadisturbo ki Jesus sa konsentrasyon nia sa saiyang pangenot na gibohon? (b) Maski ngani dukha sa materyal si Jesus, ano an nagibo nia?

¹³ Dugang pa, dai si Jesus nadisturbo sa paghanap nin mga kayamanan. Bilang resulta, dai sia namuhay sa kaginhawahan nin kayamanan. Dai ngani sia nagkaigwa nin sadiri niang harong. Sa sarong okasyon, sia nagsabi: “An mga amid igwa nin mga lungib asin an mga gamgam nin langit igwa nin mga hapunan, alagad an Aki nin tawo mayo man lamang nin mahihigdaan.” (Mateo 8:20) Kan si Jesus magadan, an solamenteng sinasabi kan rekord na mahalaga niang rogaring iyo an gubing na pinagpabunotan kan mga soldados na Romano. (Juan 19:​23, 24) Kun siring, may pagkukulang daw sa buhay ni Jesus? Dai nanggad!

¹⁴ Nakakalabing marhay an nagibo ni Jesus kisa magigibo noarin man kan pinakamayaman na pilantropo. Si Pablo nagsabi: “Aram nindo an dai na kutana maninigong kabootan kan satong Kagurangnan na Jesu-Cristo, na minsan ngani sia mayaman sia nagin dukha huli sa saindo, tangani na kamo magin mayaman paagi sa saiyang kadaihon.” (2 Corinto 8:9; Filipos 2:​5-8) Maski ngani dukha sa materyal, ginibong posible ni Jesus para sa mapakumbabang  mga indibiduwal na magkamit nin buhay na daing katapusan sa pagkasangkap. Nagpapasalamat nanggad kitang marhay sa saiya! Asin naggagayagaya nanggad kitang marhay sa balos na inako nia huling pinapagdanay nia na sia nakakonsentrar sa paggibo kan kabotan nin Dios!​—Salmo 40:8; Gibo 2:​32, 33, 36.

15. Ano an orog na mahalaga kisa kayamanan?

¹⁵ An mga Kristiano na nagmamaigot ngonyan na arogon si Jesus habo man na madisturbo nin paghanap nin kayamanan. (1 Timoteo 6:​9, 10) Rinerekonoser ninda na an kayamanan puedeng gibohon na komportable an buhay, alagad aram ninda na an saindang daing katapusan na ngapit dai nakadepende sa kayamanan. Kun magadan an sarong Kristiano, mayo na nin halaga sa saiya an saiyang materyal na kayamanan kapareho kan gubing ni Jesus na mayo na nin halaga sa saiya kan sia magadan. (Eclesiastes 2:​10, 11, 17-​19; 7:12) Kun magadan an sarong Kristiano, an solamenteng bagay na may tunay na halaga na yaon sa saiya iyo an saiyang relasyon ki Jehova asin ki Jesu-Cristo.​—Mateo 6:​19-​21; Lucas 16:9.

Dai Nadesganar sa Pagtumang

16. Paano inatubang ni Jesus an pagtumang?

¹⁶ An pagtumang dai nagin dahelan na mawara ni Jesus an saiyang konsentrasyon sa pagpapatotoo sa katotoohan. Dai sia nadesganar dawa aram nia na an saiyang ministeryo sa daga maresulta sa saiyang kagadanan bilang atang. Manongod ki Jesus, si Pablo nagsabi: “Huli kan kagayagayahan na ibinugtak sa atubangan nia tinagalan nia an hariging pasakitan, na hinamak an kasupganan, asin nagtukaw sa too kan trono nin Dios.” (Hebreo 12:2) Mangnoha na “hinamak [ni Jesus] an kasupganan.” Dai sia nahadit sa kun ano an iisipon saiya kan saiyang mga kalaban. Nakakonsentrar sia sa paggibo kan kabotan nin Dios.

17. Ano an manonodan niato sa pakatagal ni Jesus?

¹⁷ Sa pag-aplikar kan leksion sa pakatagal ni Jesus, ineenkaminar ni Pablo an mga Kristiano: “Horophoropa nindo nin marhay an saro na nagtios nin siring na panlilibak nin mga parakasala tumang sa saindang sadiring ikakarahay, tanganing dai kamo mapagal asin manluya an saindong kalag.” (Hebreo 12:3) Totoo, puedeng nakakapanluya an dayaday na pag-atubang sa pagtumang o pag-olog-olog. Puedeng nakakapagal an padagos na pagsayuma sa mga pan-akit kan kinaban, na tibaad nagbubunga nin mga pagkritika hale sa mga paryente na nagdadagka sa sato na “gumibo nin pambihirang bagay” sa satong buhay. Minsan siring, arog ni Jesus nag-aasa kita ki Jehova para sa tabang mantang determinado niatong ineenot sa satong buhay an Kahadean.​—Mateo 6:​33; Roma 15:13; 1 Corinto 2:4.

18. Anong marahay na leksion an manonodan niato sa mga tataramon ni Jesus ki Pedro?

¹⁸ Naheling an pagsayuma ni Jesus na madisturbo kan ponan niang isabi sa saiyang mga disipulo an manongod sa maabot niang kagadanan. Inenkaminar ni Pedro si Jesus na “maherak” sa saiyang sadiri asin inasegurar sia na “dai ini mangyayari” sa saiya. Nagsayuma si Jesus na magdangog sa ano man na puedeng makapaluya sa saiyang desisyon na gibohon an kabotan ni Jehova. Nagsalingoy sia ki Pedro asin nagsabi: “Padian ka sa hudian ko,  Satanas! Ika sarong singkogan sa sako, huli ta iniisip mo, bakong an mga kaisipan nin Dios, kundi an sa mga tawo.” (Mateo 16:21-​23) Logod na pirme man kitang determinado na sayumahan an kaisipan nin mga tawo. Imbes, pirme kitang magpagiya sa kaisipan nin Dios.

Pagtao nin Tunay na mga Pakinabang

19. Maski ngani naggibo sia nin dakol na milagro, ano an pinakamahalagang kabtang kan ministeryo ni Jesus?

¹⁹ Naggibo si Jesus nin dakol na milagro tanganing patunayan na sia an Mesiyas. Binuhay pa ngani nia an mga gadan. An mga gibong idto nakaakit sa mga kadaklan, alagad dai nagdigdi sa daga si Jesus tangani sanang gumibo nin serbisyo sosyal. Nagdigdi sia tanganing magpatotoo sa katotoohan. Aram nia na temporaryo sana an ano man na materyal na mga pakinabang na itinao nia. Dawa an mga binuhay liwat ni Jesus magagadan giraray. Solamente paagi sa pagpapatotoo sa katotoohan na makakatabang sia sa nagkapira na magkamit nin buhay na daing katapusan.​—Lucas 18:28-​30.

20, 21. Paano nagdadanay na timbang an tunay na mga Kristiano kun dapit sa marahay na mga gibo?

²⁰ Ngonyan, an nagkapirang indibiduwal nagmamaigot na arogon an marahay na mga gibo ni Jesus paagi sa pagpatogdok nin mga ospital o paggibo nin iba pang serbisyo sosyal sa mga dukha kan kinaban. Sa nagkapirang kamugtakan, ginigibo ninda ini na may dakulang personal na pagsasakripisyo, asin kaomaw-omaw an saindang sinseridad; alagad temporaryo sana an ano man na pakaginhawa na itinatao ninda. Solamente an Kahadean an magtatao nin permanenteng pakaginhawa. Huli kaini, an mga Saksi ni Jehova nagkokonsentrar, arog kan ginibo ni Jesus, sa pagpapatotoo sa katotoohan manongod sa Kahadean na iyan.

²¹ Siempre, an tunay na mga Kristiano talagang naggigibo nin marahay na mga gibo. Si Pablo nagsurat: “Mantang igwa kita nin marahayrahay na panahon para kaiyan, gumibo kita kan marahay sa gabos, alagad orog na sa mga may relasyon sa sato sa pagtubod.” (Galacia 6:10) Sa mga panahon nin krisis o kun may nangangaipo nin tabang, dai kita nagduduwaduwa na ‘gumibo kan marahay’ sa satong kapwa o sa satong Kristianong mga tugang. Minsan siring, pinapagdadanay niato na kita nakakonsentrar sa kun ano an pinakamahalaga​—an pagpapatotoo sa katotoohan.

Makanood sa Halimbawa ni Jesus

22. Taano ta naghuhulit an mga Kristiano sa saindang kapwa?

²² Si Pablo nagsurat: “Sa katotoohan, herak man sa sako kun dai ako magpahayag kan maogmang bareta!” (1 Corinto 9:16) Bako siang indiperente manongod sa maogmang bareta huling an paghuhulit kaiyan nangangahulogan nin buhay para sa saiya mismo asin sa mga nagdadangog sa saiya. (1 Timoteo 4:16) Arog man kaiyan an pagmansay niato sa satong ministeryo. Gusto niatong tabangan an satong kapwa. Gusto niatong ipaheling an  satong pagkamoot ki Jehova. Gusto niatong patunayan an satong pagkamoot ki Jesus asin an satong pag-apresyar sa saiyang dakulang pagkamoot sa sato. Huli kaini, ihinuhulit niato an maogmang bareta asin sa siring na paagi namumuhay “bako nang huli sa mga mawot nin tawo, kundi huli sa kabotan nin Dios.”​—1 Pedro 4:​1, 2.

23, 24. (a) Anong leksion an manonodan niato sa milagro dapit sa mga sira? (b) Sairisay ngonyan an nagtatao nin lubos na pagpatotoo?

²³ Arog ni Jesus, dai niato hinahale an satong konsentrasyon sa pangenot niatong gibohon kun an iba inoolog-olog kita o may kaanggotan na sinasayumahan an satong mensahe. Nakanood kita nin leksion sa ginibong milagro ni Jesus kan agdahon nia si Pedro asin Andres na sumunod sa saiya. Nasasabotan niato na kun kukuyogon niato si Jesus asin, sa piguratibong pagtaram, itataktak an satong mga hikot dawa sa katubigan na garo baga mayong nadadakop na sira, an satong paninira tibaad magbunga nin marahay. Dakol na Kristianong parasira an nagkaigwa nin dakol na dakop pakalihis nin mga taon nin paninira sa katubigan na garo baga mayong nadadakop na sira. An iba nahimong magbalyo kun saen mas dakol an madadakop na sira asin nagkaigwa nin dakol na dakop duman. Ano man an ginigibo niato, dai kita maontok sa pagtaktak kan satong mga hikot. Aram niato na dai pa ipinapahayag ni Jesus na tapos na an paghuhulit sa arin man na parte kan daga.​—Mateo 24:14.

²⁴ Labing anom na milyon na Saksi ni Jehova an sibot ngonyan sa labing 230 kadagaan. Mababasa sa isyu kan An Torrengbantayan na Pebrero 1, 2005 an taonan na pambilog na kinaban na report kan saindang aktibidad durante kan 2004 taon nin paglilingkod. An report na iyan magpapatunay sa mayaman na bendisyon ni Jehova sa gibohon na paghuhulit. Sa natatadang panahon kan sistemang ini nin mga bagay, padagos logod niatong isapuso an nakakapukaw sa boot na mga tataramon ni Pablo: “Ihulit mo an tataramon, gibohon iyan na may pagkasibot.” (2 Timoteo 4:2) Magpadagos logod kita na magtao nin lubos na pagpatotoo sagkod na sabihon ni Jehova na tapos na an gibohon.

Poon sa taon na ini, an Report kan Taon nin Paglilingkod kan Mga Saksi ni Jehova sa Bilog na Kinaban dai na iluluwas sa isyu kan An Torrengbantayan na Enero 1. Imbes, ipupublikar iyan sa isyu na Pebrero 1.

Masisimbag daw Nindo?

• Paano kita makikinabang sa pagsasanay na itinao ni Jesus sa saiyang mga disipulo?

• Ano an aktitud ni Jesus sa mga tawo na saiyang hinulitan?

• Ano an nagmomotibar sa sato na magtao nin lubos na pagpatotoo?

• Sa anong mga paagi niato mapapagdanay an satong konsentrasyon sa paggibo kan kabotan nin Dios, arog kan ginibo ni Jesus?

[Mga Hapot Para sa Pag-adal]

[Ritrato sa pahina 15]

Magigin epektibo kita sa satong ministeryo kun ipapaheling niato an kaparehong pagmakolog sa mga tawo na ipinaheling ni Jesus

[Ritrato sa pahina 16, 17]

Sa pangenot nagdigdi si Jesus sa daga tanganing magpatotoo sa katotoohan

[Mga Ritrato sa pahina 17]

An Mga Saksi ni Jehova nagkokonsentrar sa pagtao nin lubos na pagpatotoo