“Ano an Sekreto Mo?”

IKINABIGLA ni Muriel, ina nin tolong aki, an hapot na ini hale sa may edad nang estranghero sa sarong fast-food na restawran. Si Muriel nagin sibot sa pagpaheling kan saiyang mga aki sa doktor, asin sia huri na sa saiyang iskedyul. Kulang na an oras kun sinda mapuli pa asin mapamanggi bago mag-atender sa saindang Kristianong pagtiripon. Kaya dinara nia an mga aki sa kaharaning restawran tanganing makakakan sinda.

Kan madali na sindang matapos sa pagkakan, sarong lalaki an ruminani ki Muriel asin nagsabi: “Inoobserbaran ko na kamo paglaog pa sana nindo digdi. Asin narisa ko an dakulang kalaenan kan saimong mga aki sa mga aki na nanunuparan ko sa parate. Posibleng naheheling mo kun paano ginagamit kan mga aki an mga lamesa asin tukawan. Ibinubugtak ninda an saindang mga bitis sa lamesa. Itinuturulod an mga tukawan. Alagad an mga aki mo toninong na marhay asin toltol. Ano an sekreto mo?”

Si Muriel nagsimbag: “Kaming mag-agom regular na nag-aadal kan Biblia kaiba an samong mga aki, asin pinagmamaigotan ming iaplikar sa samong buhay an samong nanonodan. Mga Saksi ni Jehova kami.” Sa puntong ini, an lalaki nagsabi: “Ako sarong Judio asin nakaligtas akong buhay sa Holocaust. Nagigirumdoman ko na nakaheling ako nin mga Saksi ni Jehova na pinaglamag sa Alemania. Dawa kaidto lataw na an saindang pagigin laen. Napahanga talaga ako sa gawe-gawe kan saimong mga aki. Kaipuhan na siyasaton ko an saimong relihion.”

An Biblia sarong marahayon na giyang libro sa pagpadakula sa mga aki. An Mga Saksi ni Jehova interesadong marhay sa pagtabang sa iba na makinabang sa paggiya na yaon sa Kasuratan. Mainit niamo kamong iniimbitaran na himateon an minasunod na alok.