“An Tabang sa Sako Gikan ki Jehova”

Kun an Pagkagurang Magin “Korona nin Kagayonan”

“AN POSIBLENG pinakamarahay na buhay,” an sabi kan 101 anyos na si Muriel. “Sarong pribilehio nanggad!” an pagkasabi kan 70 anyos na si Theodoros. “Dai ko kutana nagamit an sakong buhay sa mas marahay na paagi,” an sabi ni Maria sa edad na 73. Ginamit ninda gabos an bilog nindang buhay sa paglilingkod ki Jehova Dios.

An siring na mga gurang kapareho man kan dakol na aktibong parasamba ki Jehova sa bilog na kinaban. Sa ibong nin naglalangkaw na edad, mga kahaditan sa salud, asin iba pang bakong paborableng kamugtakan, sinda naglilingkod pa man giraray sa Dios nin bilog na kalag. (Colosas 3:23) Sa Kristianong kongregasyon, an siring na maimbod na mga gurang respetadong mga halimbawa nin diosnon na debosyon. Halangkaw an pagheling ni Jehova sa paglilingkod kan mga may edad na, minsan ngani tibaad nalilimitaran sinda kan saindang mga kamugtakan. *​—2 Corinto 8:12.

An libro nin Salmo may angay na obserbasyon manongod sa kualidad nin buhay na maaasahan kan maimbod na mga gurang. Puede sindang magin arog sa gurang saka halangkaw asin magayon na kahoy na nagdadanay na mabunga. Mapadapit sa maimbod na mga gurang, nag-awit an salmista: “Sinda padagos pang magtatalubo sa panahon nin pagkaubanon, sinda magpapadagos na mataba asin presko.”​—Salmo 92:14.

An nagkapira tibaad natatakot na sinda papabayaan asin dai iintindihon kun an pagkagurang magin dahelan kan pagluya kan bagsik ninda. Si David nakimaherak sa Dios: “Dai mo man logod ako ipagsikwal sa panahon nin pagkagurang; kun an sakuyang kosog nagluluya na, dai mo ako pagpabayaan.” (Salmo 71:9) Ano an kalaenan kan pagluya asin pag-oswag sa pagkagurang? An diosnon na kualidad nin katanosan. “An matanos mamumurak arog kan poon nin palma,” an awit kan salmista.​—Salmo 92:12.

An mga pinano an saindang buhay nin maimbod na paglilingkod sa Dios posibleng marhay na padagos na magbubunga nin marahay sa saindang mga taon nin pagkagurang. An dakol sa mga banhi na itinanom ninda sa saindang sadiring buhay o sa iba garo man sana nagtubo asin nagdakula saka nagkaigwa nin abundang ani. (Galacia 6:​7-​10; Colosas 1:10) Siempre, an mga tawong sinayang an saindang buhay sa paslong mga pinag-aaabot na iniignoro an mga dalan nin Dios sa parate dikit sanang pakinabang an nakukua mantang sinda naggugurang.

An katanosan bilang samno nin pagkagurang idinodoon man sa libro kan Biblia na Talinhaga. Dian satong mababasa: “An pagkaigwa nin uban korona nin kagayonan kun iyan nakukua sa dalan nin katanosan.” (Talinhaga 16:31) Iyo, an katanosan sarong kapahayagan nin panlaog na kagayonan. An pagsunod sa matanos na dalan durante nin halawig na buhay nagbubunga nin paggalang. (Levitico 19:32) Kun an tawong may uban igwa nin kadonongan asin moral na karahayan, iyan nagbubunga nin onra.​—Job 12:12.

Para ki Jehova, magayon an tanos na pamumuhay na ginamit sa paglilingkod sa saiya. Nagsasabi an Kasuratan: “Dawa sagkod sa pagkagurang nin saro ako [si Jehova] an Saro na iyo man sana; asin sagkod sa pagkaubanon nin saro ako mismo padagos na magpapasan. Ako mismo mahiro nanggad, tangani na ako mismo an magdara asin tangani na ako mismo an magpasan saka magtao nin dudulagan.” (Isaias 46:4) Nakakarangang marhay na maaraman na  nanunuga an satong mamomotan na langitnon na Ama na sususteniran asin susuportaran an mga maimbod sa saiya sa saindang pagkagurang!​—Salmo 48:14.

Mantang an buhay na ginamit sa maimbod na paglilingkod ki Jehova magayon sa punto de vista nia, bako daw angay na igalang man iyan nin iba? Sa pagpabanaag kan punto de vista nin Dios, pinakamamahal niato an may edad nang mga kapagtubod. (1 Timoteo 5:​1, 2) Kun siring, humanap kita nin praktikal na mga paagi na ikakapaheling an Kristianong pagkamoot sa pag-asikaso kan mga pangangaipo ninda.

Pasiring sa Dalan nin Katanosan sa Huring Kabtang nin Buhay

“Sa dalan nin katanosan yaon an buhay,” an pagsierto sato ni Salomon. (Talinhaga 12:28) An halangkaw nang edad dai nakakaolang sa saro na maglakaw sa dalan na ini sa huring kabtang nin buhay. Halimbawa, sa Moldova, sarong 99 anyos na lalaki an idinusay an saiyang pagkahoben sa pagpalakop nin Komunistang mga pamantayan. Ipinaghambog nia na personal niang nakaolay an bantog na mga namomoon sa Komunista, arog ni V. I. Lenin. Minsan siring, huli sa pagruro asin pagbagsak nin Komunismo, nawaran nin katuyohan asin direksion an buhay kan may edad nang lalaking ini. Alagad kan ipaheling sa saiya kan mga Saksi ni Jehova na an Kahadean nin Dios an solamenteng tunay na solusyon sa mga problema nin katawohan, maogma niang inako an katotoohan sa Biblia asin sia nagin mahigos na estudyante sa Kasuratan. Kagadanan sana an nakaolang sa saiya na magin bautisadong lingkod ni Jehova.

Kan nag-aadal manongod sa mga kahagadan nin Dios dapit sa moral, narealisar nin sarong 81 anyos na babae na taga Hungaria na kaipuhan niang magpakasal sa lalaki na kasaroan nia sa laog nin nagkapira nang taon. Nagtipon an babaeng iyan nin bilog na kosog nin boot asin ipinaliwanag nia sa saiyang kasaroan an saiyang basado sa Bibliang punto de vista. Sa pagkabiglang marhay asin kagayagayahan nia, nag-oyon an lalaki na pakasalan sia. Pagkatapos na gibohon na legal an pag-agoman ninda, sia marikas na nag-oswag sa espirituwal. Sa laog nin walong bulan pagkatapos ponan an pag-adal nia sa Biblia, sia nagin dai pa bautisadong parahayag, asin dai nahaloy pakatapos kaiyan sia nabautismohan. Totoo nanggad na paagi sa katanosan nakokoronahan nin tunay na kagayonan an mga gurang!

Iyo, makakasierto an maimbod na gurang nang mga Kristiano na interesado an Dios sa sainda. Dai papabayaan ni Jehova an mga nagdadanay na maimbod sa saiya. Imbes, nanunuga siang gigiyahan, susuportaran, asin sususteniran sinda dawa sagkod sa pagkagurang. Asin sinda nagpapatotoo sa mga tataramon kan salmista: “An tabang sa sako gikan ki Jehova.”​—Salmo 121:2.

[Nota sa Ibaba]

[Blurb sa pahina 9]

“An pagkaigwa nin uban korona nin kagayonan kun iyan nakukua sa dalan nin katanosan.”​—TALINHAGA 16:31

[Kahon sa pahina 8]

MAY PAGMAKOLOG SI JEHOVA SA SAIYANG GURANG NANG MGA LINGKOD

“Maninigo na tumindog ka sa atubangan nin may uban, asin dapat na magtao ka nin konsiderasyon sa persona nin gurang.”​—Levitico 19:32.

“Dawa sagkod sa pagkagurang nin saro ako an Saro na iyo man sana; asin sagkod sa pagkaubanon nin saro ako mismo padagos na magpapasan.”​—Isaias 46:4.