Puede daw Nindong Kontrolon an Kaaabtan Nindo?

AN SATO daw na pangultimong kaaabtan patienot nang itinalaga? An sato daw na ginigibong mga pagpili sa buhay mayo nin epekto sa satong ngapit?

Ipamugtak ta baga na an tawo iyo an nagkokontrol sa sadiri niang kaaabtan. Sa kamugtakan na ini, puede daw na italaga an siisay man na indibiduwal na gibohon an sarong espesipikong trabaho o magkapot nin sarong katongdan? Asin paano magigibo nin Dios an saiyang kabotan para sa daga kun puedeng kontrolon nin mga tawo an sadiri nindang kaaabtan? An Biblia nagtatao nin nakakakontentong simbag sa mga hapot na ini.

An Pagtalaga Antes Pa Asin an Libreng Kabotan​—Puede daw na Parehong Tama Iyan?

Isipon kun paano kita ginibo ni Jehova Dios. “Sa ladawan nin Dios linalang nia [an tawo]; linalang nia sindang lalaki asin babae,” an sabi kan Biblia. (Genesis 1:27) Huling ginibo na kasugad nin Dios, igwa kita nin kakayahan na ipabanaag an saiyang mga kualidad, arog kan pagkamoot, hustisya, kadonongan, asin kapangyarihan. Itinao man sato nin Dios an balaog na libreng kabotan, o katalingkasan na pumili. Ini an nagpangyari na kita magin daing kapareho sa ibang linalang nia digdi sa daga. Puede kitang pumili kun baga susunodon niato o dai an paggiya nin Dios sa moral. Kaya nasabi kan propetang si Moises: “Kinukua ko an kalangitan asin an daga bilang mga saksi tumang sa saindo ngonyan, na ibinugtak ko an buhay asin kagadanan  sa atubangan mo, an bendisyon asin an maldisyon; asin dapat na pilion mo an buhay tanganing makapagpadagos kang mabuhay, ika asin an saimong aki, paagi sa pagkamoot ki Jehova na saimong Dios, paagi sa paghinanyog sa saiyang tingog asin paagi sa pagdadanay sa saiya.”​—Deuteronomio 30:​19, 20.

Pero, an balaog na katalingkasan na pumili dai nangangahulogan nin absolutong katalingkasan. Dai kita pinapalibre kaiyan sa pisikal asin moral na mga ley na ginibo nin Dios tanganing magkaigwa nin karigonan asin katoninongan sa uniberso. Ibinugtak an mga ley na ini para sa ikakarahay niato, asin ano man na pagbalga sa mga iyan puedeng magbunga nin grabeng mga resulta. Isipon na sana an mangyayari kun pilion niatong dai intindihon an ley nin grabidad asin lumukso sa atop nin sarong halangkaw na edipisyo!​—Galacia 6:7.

An katalingkasan na pumili nagtatao man sato nin limitasyon na mayo sa mga linalang na mayo kan siring na katalingkasan. An parasurat na si Corliss Lamont naghapot: “Paano niato sasabihon na an mga tawo an may etikong paninimbagan, asin kastigohon sinda sa paggibo nin sala, kun inaako niato . . . na an saindang mga pagpili asin gawe-gawe patienot nang itinalaga?” Siempre, dai niato magigibo iyan. An mga hayop na pinapahiro nin naturalesa dai pinapanimbag sa moral huli sa mga ginigibo kaiyan, ni pinapanimbag an mga komputer huli sa mga pagpunsionar na iprinogramang gibohon kaiyan. Kun siring, an katalingkasan na pumili nagtatao sato nin magabat na paninimbagan asin pinapanimbag kita sa satong mga gawe-gawe.

Si Jehova Dios magigin nanggad bakong mamomoton asin bakong makatanosan kun bago pa kita mamundag, patienot na niang itinalaga an aksion na gigibohon niato dangan papanimbagon kita sa satong mga ginibo! Dai nia ginigibo ini, ta “an Dios pagkamoot,” asin “an gabos niang dalan hustisya.” (1 Juan 4:8; Deuteronomio 32:4) Huling tinawan kita nin katalingkasan na pumili, dai nia pareho ‘itinalaga poon sa panahon na daing sagkod kun siisay an ililigtas nia asin kun siisay an kokondenaron nia,’ arog kan iniinsistir kan mga nagtutubod sa pagtalaga antes pa. Inoolang kan pagtalaga antes pa an katalingkasan na pumili.

Malinaw na ipinapaheling kan Biblia na liliwaton kan mga pagpili na ginigibo niato an satong kaaabtan. Halimbawa, nakikiolay an Dios sa mga paragibo nin maraot, na nagsasabi: “Tumalikod tabi an lambang saro sa saiyang maraot na dalan asin sa karatan kan saindong mga gibo . . . tanganing dai ako magpangyari nin kalamidad sa saindo.” (Jeremias 25:​5, 6) An pakiolay na ini magigin daing saysay kun itinalaga na nin Dios an kaaabtan kan lambang indibiduwal. Apuera dian, an Tataramon nin Dios nagsasabi: “Magsorolsol kamo, kun siring, asin magbakle tanganing an saindong mga kasalan mapara, tanganing dumatong an mga panahon nin kaginhawahan hale sa persona ni Jehova.” (Gibo 3:19) Taano ta hahagadon ni Jehova sa mga tawo na magsorolsol asin magbakle kun aram  na nia antes pa na mayo nanggad sindang magigibo tanganing liwaton an saindang kaaabtan?

An Kasuratan nagsasabi manongod sa nagkapira na inimbitaran nin Dios na mamahala bilang mga hade sa langit kaiba ni Jesu-Cristo. (Mateo 22:14; Lucas 12:32) Minsan siring, an Biblia nagsasabi na mawawara sainda an pribilehiong iyan kun dai sinda magtagal sagkod sa katapusan. (Kapahayagan 2:10) Taano ta iimbitaran pa sinda nin Dios kun dinesisyonan na nia na dai sinda pipilion? Isipon man an mga tataramon ni apostol Pablo sa saiyang mga kapagtubod. Sia nagsurat: “Kun maggibo kita nin tuyong pagkakasala pakatapos na maako niato an tamang kaaraman sa katotoohan, mayo na nin ano man na natatadang atang para sa mga kasalan.” (Hebreo 10:26) An siring na patanid magigin daing kamanungdanan kun itinalaga na nin Dios an saindang kaaabtan. Alagad bako daw na itinalaga nin Dios an kisuerra nagkapirang indibiduwal na magin mga namamahala kaiba ni Jesu-Cristo?

Itinalaga​—Mga Indibiduwal o Sarong Grupo?

‘Binendisyonan kita nin Dios nin lambang espirituwal na bendisyon sa langitnon na mga lugar kasaro ni Cristo,’ an isinurat ni apostol Pablo, “kun paano na pinili nia kita na kaiba nia bago pa an pagtugdas kan kinaban . . . Huli ta itinalaga nia kita sa pagpaniakia paagi ki Jesu-Cristo bilang mga aki nia.” (Efeso 1:3-5) Ano an itinalaga nin Dios, asin ano an kahulogan nin pagigin pinili “bago pa an pagtugdas kan kinaban”?

An tekstong ini nagsasabi na nagpili an Dios nin nagkapirang gikan kan enot na tawong si Adan, tanganing mamahala kaiba ni Cristo sa kalangitan. (Roma 8:14-17, 28-30; Kapahayagan 5:​9, 10) Minsan siring, an suposisyon na si Jehova Dios nagtalaga nin espesipikong mga indibiduwal na mag-ako kan pribilehiong ini rinibong taon bago sinda mamundag kasarongat kan bagay na an mga tawo tinawan nin katalingkasan na pumili. An itinalaga nin Dios sarong grupo nin mga tawo, bakong mga indibiduwal.

Sa pag-ilustrar: Halimbawa nagdesisyon an gobyerno na magbugtak nin sarong partikular na ahensia. Patienot nang itinalaga kaiyan an pagpunsionar kan ahensiang iyan, an kapangyarihan kaiyan, asin an kadakulaan kaiyan. Sa katapustapusi nagpunsionar na an ahensiang iyan pakalihis nin pirang panahon pagkatapos na establisaron iyan, asin an mga miembro kaiyan nagpaluwas nin deklarasyon na nagsasabi: “Kaidto pang dakol na taon na an nakaagi dineterminaran na kan gobyerno kun ano an magigin trabaho niato. Poponan ta na ngonyan an trabaho na inasignar sa sato.” Makonklusyon daw kamo na seguradong itinalaga na kan gobyerno nagkapirang taon bago kaiyan kun siisay an magigin indibiduwal na mga miembro kan ahensiang iyan? Seguradong dai. Kaagid kaiyan, patienot nang itinalaga ni Jehova na sia mabugtak nin sarong espesyal na ahensia na maremedyo sa mga epekto kan kasalan ni Adan. Itinalaga nia an grupo nin mga tawo na maglilingkod sa ahensiang iyan​—alagad bakong an mga indibiduwal. Sa huri na sinda pipilion, asin an mga pagpili na gigibohon ninda sa buhay magkakaigwa nin epekto kun baga sa katapustapusi sinda ooyonan o dai.

Ano an kinaban na nasa isip ni apostol Pablo kan sia magsabi: ‘Pinili kita nin Dios na kaiba nia bago pa an pagtugdas kan kinaban’? An kinaban na nasambitan ni Pablo digdi bako an kinaban na pinonan nin Dios kan lalangon nia si Adan asin Eva. An kinaban na iyan “marahayon”​—mayo nanggad nin kasalan asin karatan. (Genesis 1:31) Dai iyan nangangaipo nin “pagkabutas” sa kasalan.​—Efeso 1:7.

An partikular na kinaban na boot sabihon ni Pablo iyo an nag-eksister pagkatapos na magrebelde si Adan asin Eva sa Eden​—sarong kinaban na laen na marhay sa kinaban na katuyohan nin Dios sa kapoonpooni. Iyan an kinaban na nagpoon sa mga aki ni Adan asin Eva. An kinaban na iyan kompuesto nin mga tawo na siblag sa Dios asin oripon nin kasalan asin kalapaan. Iyan kinaban nin mga tawo na, bakong arog kan tuyong mga parakasala na si Adan asin Eva, puedeng balukaton.​—Roma 5:12; 8:18-21.

Tolos na naresolberan ni Jehova Dios an situwasyon na ibinunga kan pagrebelde sa Eden. Kan lumataw an pangangaipo, itinalaga nia an sarong espesyal na ahensia​—an Mesiyanikong Kahadean sa kamot ni Jesu-Cristo​—na gagamiton nia may koneksion sa pagbalukat kan katawohan sa Adanikong kasalan. (Mateo 6:10) Ginibo ini nin Dios “bago pa an pagtugdas kan kinaban” nin mababalukat na katawohan, an boot sabihon, bago magkaaki an rebeldeng si Adan asin Eva.

An mga tawo sa parate nangangaipo nin sarong plano kan gigibohon ninda tanganing mahaman an gusto nindang gibohon. An pagtalaga antes pa konektado sa ideya na an Dios seguradong igwa  nin detalyadong plano para sa uniberso kun saen an gabos na bagay patienot nang itinalaga. “Garo baga para sa dakol na pilosopo,” an isinurat ni Roy Weatherford, “na an ano man na bagay na mayo nin kompletong detalye kan kada pangyayari magigin sarongat sa Kamahalan nin Dios.” Kaipuhan daw talaga na patienot na idetalye nin Dios an kada pangyayari?

Huling may daing katapusan na kapangyarihan asin daing kaagid na kadonongan, kayang atubangon ni Jehova an ano man na emerhensia o ano man na tibaad mangyari mantang ginagamit kan saiyang mga linalang an saindang libreng kabotan. (Isaias 40:​25, 26; Roma 11:33) Puede niang gibohon ini tolos-tolos asin mayo nin pagplano antes pa. Bakong arog nin mga tawo na puedeng masala huli sa limitado nindang mga abilidad, dai kaipuhan kan Makakamhan sa Gabos na Dios an detalyado asin haman nang plano na nagsasabi antes pa kan kaaabtan nin lambang indibiduwal sa daga. (Talinhaga 19:21) Sa dakol na traduksion nin Biblia, an Efeso 3:11 nagsasabi na an Dios igwa nin “daing sagkod na katuyohan” imbes na sarong itinalaan nang plano.

Kun Paano Nindo Maaapektaran an Saindong Ngapit

An Dios igwa nin katuyohan para sa daga, asin an katuyohan na iyan nakatalaga na. An Kapahayagan 21:​3, 4 nagsasabi: “Uya! An tolda nin Dios nasa mga tawo, asin sia mag-eerok sa kaibanan ninda, asin sinda magigin saiyang mga banwaan. Asin an Dios mismo masasakaibanan ninda. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” Iyo, an dagang ini magigin paraiso, arog kan orihinal na katuyohan ni Jehova. (Genesis 1:​27, 28) An hapot, Yaon daw kamo duman? Madepende iyan sa mga pagpili na ginigibo nindo ngonyan. Dai itinalaga ni Jehova an saindong kaaabtan.

An atang na pantubos kan Aki nin Dios, si Jesu-Cristo, pinapagin posible para sa siisay man na nagtutubod sa saiya na mag-ako nin buhay na daing katapusan. (Juan 3:​16, 17; Gibo 10:​34, 35) “An nagtutubod sa Aki igwa nin buhay na daing katapusan,” an sabi kan Biblia. “An nakikisuway sa Aki dai makakaheling nin buhay.” (Juan 3:36) Puede nindong pilion an buhay paagi sa pag-adal manongod sa Dios, sa saiyang Aki, asin sa Saiyang kabotan sa mga pahina kan Biblia asin paagi sa pag-aplikar kan nanonodan nindo. An tawong naghihiro kaoyon kan tunay na kadonongan na nakasurat sa Tataramon nin Dios inaasegurar na “sia mag-eerok na may katiwasayan asin dai mariribok nin takot sa kalamidad.”​—Talinhaga 1:​20, 33.

[Mga Ritrato sa pahina 5]

Bakong arog nin mga hayop, an mga tawo may moral na responsibilidad sa mga ginigibo ninda

[Credit Line]

Agila: Foto: Cortesía de GREFA