Gurano Kahalaga an Saindong Buhay?

MANTANG dai mabilang na buhay an isinasakripisyo sa Europa durante kan Guerra Mundial I, ginigibo man an makangangalas na paghihingoa tanganing iligtas an mga buhay sa Antartika. An Anglo-Irlandes na eksplorador na si Ernest Shackleton asin an saiyang kairiba nakaeksperyensia nin grabeng kapahamakan kan an saindang barko, an Endurance, suminalpok asin nalunod huli sa tipak nin yelo. Nahimo ni Shackleton na madara an saiyang mga tripulante sa minsan paano ligtas na lugar, sa Elephant Island sa Timog na Oseano Atlantiko. Alagad napapaatubang pa man giraray sinda sa grabeng peligro.

Narealisar ni Shackleton na an solamenteng paglaom ninda na makaligtas iyo an magsugo nin mga tawo na mahagad nin tabang sa sarong estasyon nin mga paradakop nin balyena sa isla nin Timog na Georgia. Iyan 1,100 na kilometros an rayo, asin igwa sana sia nin 7 metros na lantsa-salbabida na nasalbar nia hale sa Endurance. Harayo an posibilidad na sinda makaligtas.

Minsan siring, kan Mayo 10, 1916, pakalihis nin 17 aldaw na nakakapanluya nanggad, si Shackleton asin an sarong sadit na grupo nakaabot sa Timog  na Georgia, alagad huli sa bakong marahay na kamugtakan kan dagat napiritan sindang magduong sa ibong na tampi kan isla. Kaipuhan nindang maglakaw nin 30 kilometros sa dai kabisado asin natatakopan nin niebeng kabukidan tanganing makaabot sa saindang papadumanan. Sa ibong nin mga kasakitan​—na hababa pa sa sero an temperatura asin mayong angay na kasangkapan sa pagtukad​—nakaabot si Shackleton asin an saiyang kairiba sa saindang destinasyon, asin sa kahurihurihi ikinaligtas nia an gabos na nasadsad niang tripulante. Taano ta grabe an pagmamaigot ni Shackleton? “An solamenteng ambisyon nia,” an isinurat kan biograpong si Roland Huntford, iyo an “iligtas na buhay an gabos niang tripulante.”

“Ni Saro sa Sainda Mayong Nawawara”

Ano an nagligtas sa mga tripulante ni Shackleton sa lubos na pagkadesesperar mantang sinda tiripon na naghahalat sa garo sana “sarong makamomondo asin masakit maabot na pidaso nin gapo asin yelo na 30 kilometros an distansia sa man-ibong-ibong na poro”? An saindang kompiansa na ootobon kan saindang lider an saiyang panuga na ililigtas sinda.

An katawohan ngonyan kaparehong marhay kan mga tawong idto na dai makahale asin daing maginibo sa Elephant Island. Dakol an nabubuhay sa grabe kasakit na mga kamugtakan asin naglalapigot na sana tanganing mabuhay. Pero, puede sindang magkaigwa nin bilog na kompiansa na “ililigtas [nin Dios] an nagsasakit nin makuri” sa pan-aapi asin kasakitan. (Job 36:15) Makakasierto kamo na ibinibilang nin Dios na mahalagang marhay an buhay nin lambang tawo. “Apoda ako sa aldaw nin kapurisawan,” an sabi ni Jehova Dios, an Kaglalang, asin “ililigtas taka.”​—Salmo 50:15.

Nadedepisilan daw kamong maniwala na kamo​—saro sanang indibiduwal sa binilyon na tawo sa daga​—ibinibilang kan Kaglalang na personalmenteng mahalagang marhay? Kun siring mangnoha an isinurat kan propetang si Isaias manongod sa bilyones na bitoon sa bilyones na galaksia sa mahiwason na uniberso sa palibot niato. Mababasa niato: “Tingagan an saindong mga mata asin helinga nindo. Siisay an naglalang kan mga bagay na ini? Iyan iyo an Saro na nagpapaluwas kan saindang hukbo nin oyon sa kabilangan, na gabos inaapod nia sa mismong ngaran. Huli sa abundansia nin dinamikong enerhiya, mantang sia man makosog an kapangyarihan, ni saro sa sainda mayong nawawara.”​—Isaias 40:26.

Nasasabotan daw nindo an kahulogan kaiyan? An satong galaksia na Milky Way​—na saro sanang kabtang kaiyan an satong sistema solar​—igwa nin kisuerra 100 bilyones na bitoon. Asin pira pang ibang galaksia an yaon? Mayo nin siisay man na nakakasierto, alagad may mga kalkulo na nagsasabing 125 bilyones. Siertong kanigoan kamakangangalas kan kabilangan nin mga bitoon! Pero, sinasabi sa sato kan Biblia na aram kan Kaglalang kan uniberso an ngaran kan lambang bitoon.

“An Mismong Buhok kan Saindong Payo Bilang Gabos”

‘Alagad,’ tibaad may kumontra, ‘an pakaaram sana kan mga ngaran nin bilyones na bitoon​—o bilyones na tawo​—dai man talaga nangangahulogan nin pagmakolog sa sainda bilang indibiduwal.’ An sarong komputer na igwa nin supisyenteng memorya puedeng irekord an mga ngaran nin binilyon na tawo. Pero, mayo nin maisip na an komputer nagmamakolog sa siisay man sa sainda. Minsan siring, ipinapaheling kan Biblia na si Jehova Dios bako sanang aram an mga ngaran kan binilyon na tawo, kundi sia nagmamakolog man sa sainda bilang mga indibiduwal. ‘Ibugtak an gabos nindong kahaditan sa saiya,’ an isinurat kan apostol na si Pedro, “huli ta sia may pagmakolog sa saindo.”​—1 Pedro 5:7.

Si Jesu-Cristo nagsabi: “Bakong ipinapabakal an duwang dignos nin sarong sentimo na kadikit sana an halaga? Alagad mayo ni saro sa sainda na mahoholog sa daga na dai naaaraman kan saindong Ama. Alagad an mismong buhok kan saindong payo bilang gabos. Kun siring dai kamo matakot: orog kamong mahalaga kisa dakol na dignos.” (Mateo 10:29-31) Mangnohon na dai  nagsabi si Jesus na naaaraman sana nin Dios an nangyari sa mga dignos asin sa mga tawo. Sia nagsabi: “Orog kamong mahalaga kisa dakol na dignos.” Taano ta orog kamong mahalaga? Huli ta ginibo kamo “sa ladawan nin Dios”​—na may potensial na magkultibar asin magpaheling nin moral, intelektuwal, asin espirituwal na mga kualidad na nagpapabanaag kan mismong halangkaw na mga kualidad nin Dios.​—Genesis 1:​26, 27.

“An Gibo nin Intelihenteng Aktibidad”

Dai magpadaya sa mga sinasabi kan mga tawong nagdedehar na igwa nin Kaglalang. Oyon sainda, daing isip asin impersonal na mga puersa nin naturalesa an naggibo sa saindo. Hinihingako ninda na imbes na ginibo “sa ladawan nin Dios,” kamo daing kalaenan sa gabos na iba pang hayop sa planetang ini​—pati na an mga dignos.

Talaga daw na garo rasonable para sa saindo na an buhay luminataw na sana paagi sa pagkanorongod, o daing isip na puersa? Oyon sa molekular na biologong si Michael J. Behe, dahel sa “grabe kakomplikadong mga proseso sa biokimiko” na nagkokontrol sa buhay, an ideyang iyan biyong bakong rasonable. An ebidensia nin biokimika, an sabi nia, minagiya sa dai mapapahimutikan na konklusyon na “an buhay sa daga sa pinakapundamental na kamugtakan kaiyan . . . gibo nin intelihenteng aktibidad.”​—Darwin’s Black Box​—The Biochemical Challenge to Evolution.

Sinasabi sato kan Biblia na an buhay sa daga sa gabos na grado kaiyan gibo nin intelihenteng aktibidad. Asin sinasabi kaiyan sa sato na an Ginikanan kan gabos na intelihenteng aktibidad na ini iyo si Jehova Dios, an Kaglalang kan uniberso.​—Salmo 36:9; Kapahayagan 4:11.

Dai nindo pagtogotan na dahel sa kaipuhan kitang magtios sa sarong kinaban na pano nin kakologan asin pagdusa dai na kamo matubod na igwa nin Kaglalang asin Kagdisenyo kan daga asin kan gabos na buhay na yaon dian. Pirmeng girumdomon an duwang pundamental na katotoohan. An saro iyo na bakong an Dios an nagdisenyo kan pagkabakong sangkap na yaon sa palibot niato. An saro pa iyo na an satong Kaglalang igwa nin marahay na mga dahelan na temporaryong togotan iyan. Arog kan parateng tinotokar kan magasin na ini, tinogotan ni Jehova Dios an karatan sa laog nin limitadong panahon sana tanganing resolberan nin sararoan sana an moral na mga isyu na ibinangon kan enot na haboan nin mga tawo an saiyang soberaniya. *​—Genesis 3:1-7; Deuteronomio 32:​4, 5; Eclesiastes 7:29; 2 Pedro 3:​8, 9.

“Ililigtas Nia an Dukha na Naghahagad nin Tabang”

Siempre, dawa sa miserableng mga kamugtakan na dapat tioson nin dakol na tawo ngonyan, an buhay saro pa man giraray na marahayon na balaog. Asin ginigibo niato an gabos niatong makakaya tanganing ingatan iyan. An buhay sa ngapit na ipinapanuga nin Dios bako sanang paglapigot tangani sanang mabuhay sa masakit asin makolog na mga kamugtakan​—arog kan mga tripulante ni Shackleton sa Elephant Island. An katuyohan nin Dios iyo na iligtas kita sa makolog asin daing pakinabang na pag-eksister niato sa presente tangani na kita “makapangapot nin marigon sa tunay na buhay” na katuyohan nin Dios para sa saiyang linalang na tawo sa kapoonpooni.​—1 Timoteo 6:19.

Gigibohon gabos ini nin Dios huli ta an lambang saro sa sato mahalagang marhay sa saiyang mga mata. Inareglo nia na an saiyang Aki, si Jesu-Cristo, an magtao nin atang na pantubos na kaipuhan tanganing mapatalingkas kita sa kasalan, pagkabakong sangkap, asin kagadanan na minana niato sa satong enot na mga magurang, si Adan asin Eva. (Mateo 20:28) “An Dios namoot na gayo  sa kinaban,” an sabi ni Jesu-Cristo, “na itinao nia an saiyang Aking bugtong, tanganing an lambang nagtutubod sa saiya . . . magkaigwa nin buhay na daing katapusan.”​—Juan 3:16.

Ano an gigibohon nin Dios para sa mga nabubuhay ngonyan na nagtitios nin kakologan asin pan-aapi? Mapadapit sa saiyang Aki, an ipinasabong na Tataramon nin Dios nagsasabi sa sato: “Ililigtas nia an dukha na naghahagad nin tabang, siring man an nagsasakit nin makuri asin an siisay man na mayo nin paratabang. Maheherak sia sa hababa asin sa dukha, asin an kalag kan mga dukha saiyang ililigtas. Gikan sa pan-aapi asin sa kadahasan saiyang tutuboson an saindang kalag.” Taano ta gigibohon nia ini? Huli ta “an saindang dugo [o, an saindang buhay] magigin mahalagang marhay sa saiyang mga mata.”​—Salmo 72:12-14.

An katawohan dakol na siglo nang napapagal sa kagabatan nin kasalan asin pagkabakong sangkap, na garo “nag-aaragrangay” sa grabeng kolog asin pagdusa. Tinogotan sana ini nin Dios huli ta aram nia na puede niang remedyohan an ano man na danyos na mangyayari. (Roma 8:18-22) Dai na nanggad mahahaloy ngonyan papangyayarihon nia an “pagbabalik kan gabos na bagay” paagi sa saiyang gobyernong Kahadean sa kamot kan saiyang Aki, si Jesu-Cristo.​—Gibo 3:21; Mateo 6:​9, 10.

Kaiba dian an pagbuhay liwat sa mga tawong nagdusa asin nagadan kan nakaagi. Sinda ligtas sa memorya nin Dios. (Juan 5:​28, 29; Gibo 24:15) Dai na mahahaloy kakamtan ninda an buhay na “abunda”​—buhay na daing katapusan sa pagkasangkap sa paraisong daga na mayo na nin kolog asin pagdusa. (Juan 10:10; Kapahayagan 21:3-5) Gabos na nabubuhay lubos na maoogma sa buhay asin kukultibaron an marahayon na mga kualidad asin abilidad na tanda kan mga ginibo “sa ladawan nin Dios.”

Yaon daw kamo tanganing kamtan an buhay na ipinanuga ni Jehova? Nasa saindo na iyan. Sinasadol mi kamo na aprobetsaran nindo an mga probisyon na ginibo nin Dios tanganing pangyarihon an gabos na bendisyon na ini. An mga kagpublikar kan magasin na ini maoogmang tabangan kamo na gibohon iyan.

[Nota sa Ibaba]

[Ritrato sa pahina 4, 5]

Kompiado an nasadsad na mga tripulante na ootobon ni Shackleton an saiyang panuga na ililigtas sinda

[Credit Line]

© CORBIS

[Ritrato sa pahina 6]

“Orog kamong mahalaga kisa dakol na dignos”