“Magdanay Kamong Mapagbantay”

KAN suanoy na mga panahon, an mga parabantay sa tata naglilingkod sa mga entrada kan siudad asin templo patin, sa nagkapirang kamugtakan, sa mga pinto nin pribadong mga harong. Apuera sa pagsegurado na an mga tata sirado sa banggi, an mga parabantay sa tata naglilingkod man bilang mga bantay. Magabat na marhay na paninimbagan an asignasyon na ini, huli ta an pagigin ligtas sa peligro kan siudad nakadepende sa pagpatanid ninda sa mga tawo kun igwa nin ano man na nagdadangadang na peligro.

Pamilyar si Jesu-Cristo sa trabaho nin mga parabantay sa tata. Sa sarong pangyayari, iinagid nia an saiyang mga disipulo sa mga parabantay sa tata asin inenkaminar sinda na magdanay na mapagbantay kun manongod sa pagtatapos kan Judiong sistema nin mga bagay. Sia nagsabi: “Magdanay kamong mapagmasid, magpuka kamo, huli ta dai nindo aram kun noarin an itinalaan na panahon. Iyan siring sa sarong tawo na mapaduman sa ibang daga na binayaan an saiyang harong asin . . . pinagbotan an parabantay sa tata na magdanay na mapagbantay. Kun siring magdanay kamong mapagbantay, ta dai nindo aram kun noarin madatong an kagurangnan kan harong.”​—Marcos 13:33-35.

Kaagid kaiyan, sa laog nin labing 125 taon na ngonyan, ipinaabot kan magasin na ini, An Torrengbantayan, an pagparigon sa boot ni Jesus na “magdanay na mapagbantay.” Paano? Arog kan sinasabi sa pahina 2 kan magasin na ini, “Binabantayan kaiyan an mga nangyayari sa kinaban mantang nangaootob kaini an hula sa Biblia. Rinaranga kaiyan an gabos na klase nin tawo paagi sa maogmang bareta na sa dai na mahahaloy lalaglagon kan Kahadean nin Dios an mga nan-aapi sa saindang kapwa asin gigibohon kaiyan na paraiso an daga.” May sirkulasyon sa bilog na kinaban na labing 26,000,000 na kopya sa 150 lenguahe, An Torrengbantayan an may pinakamahiwas an sirkulasyon na relihiosong magasin sa kinaban. Paagi kaiyan, an Mga Saksi ni Jehova, arog kan suanoy na mga parabantay sa tata, sinasadol an mga tawo sa gabos na lugar na “magpuka” sa espirituwal huli ta an Kagurangnan, si Jesu-Cristo, mabuelta na asin hohokoman an sistemang ini nin mga bagay.​—Marcos 13:​26, 37.