Nagbubunga daw an Katotoohan sa mga Tinotokdoan Nindo?

KAN ipaisi kan hoben na si Eric na habo na niang mamidbid bilang saro sa Mga Saksi ni Jehova, an saiyang mga magurang biyong pinanluyahan nin boot. Dai lamang ninda narisa na mangyayari iyan. Kan sia aki pa, si Eric nakikikabtang sa pampamilyang pag-adal sa Biblia, nag-aatender sa Kristianong mga pagtiripon, asin nakikikabtang sa paghuhulit kaiba kan kongregasyon. Garo baga sia yaon man sa katotoohan, sabi ngani. Alagad ngonyan na sia huminale na, narealisar kan saiyang mga magurang na an katotoohan sa Biblia mayo sa saiya. An pakarealisar na iyan nakabigla sagkod nakapadesganar sa sainda.

An iba nakaeksperyensia nin kaparehong pakamate nin pagkawara kun biglang minapondo sa pag-adal an sarong inaadalan sa Biblia. Sa mga panahon na arog kaiyan, parateng ihinahapot kan mga tawo sa sadiri ninda, ‘Taano ta dai ko narisa na mangyayari ini?’ Bueno, posible daw na madeterminaran bago mangyari an espirituwal na kapahamakan kun baga an katotoohan nagbubunga sa mga tinotokdoan niato? An totoo, paano kita makakasierto na an katotoohan naghihiro sa sato siring man sa mga tinotokdoan niato? Sa saiyang pamilyar na parabola kan parasabwag, nagtao si Jesus nin giya tanganing masimbag an mga hapot na ini.

An Katotoohan Kaipuhan na Makataros sa Puso

“An banhi iyo an tataramon nin Dios,” an sabi ni Jesus. “Kun manongod sa mga [isinabwag] sa marahay na daga, sinda an mga, pakadangog kan tataramon na igwa nin marahay asin matanos na puso, nag-iingat kaiyan asin nagbubunga na may pakatagal.” (Lucas 8:​11, 15) Kaya bago magbunga an katotoohan kan Kahadean sa satong mga inaadalan sa Biblia, kaipuhan na makagamot iyan sa saindang piguratibong puso. Inaasegurar kita ni Jesus na kapareho nin marahay na banhi sa marahay na daga, sa oras na an katotoohan nin Dios makatudok sa sarong marahay na puso, tolos na nagkakaigwa iyan nin epekto asin nagbubunga. Ano an maninigong hanapon niato?

Kaipuhan na tawan niato nin atension an mga kualidad nin puso, bako sanang an panluwas na itsura. An pagkaigwa sana nin sarong rutina sa pagsamba dai pirmeng naghahayag kun ano talaga an nasa puso nin saro. (Jeremias 17:​9, 10; Mateo 15:7-9) Kaipuhan na magsiyasat kita nin mas hararom. Maninigong magkaigwa nin depinidong pagbabago sa mga pagmawot, motibo, asin prioridad nin saro. An indibiduwal maninigong nagpapatalubo kan bagong personalidad, na komporme sa kabotan nin Dios. (Efeso 4:20-24) Sa pag-ilustrar: Kan madangog kan mga taga Tesalonica an maogmang bareta, sinabi ni Pablo na tolos nindang inako iyan bilang tataramon nin Dios. Alagad an kasunod na pakatagal, kaimbodan, asin pagkamoot ninda an nagpatunay sa saiya na an katotoohan “naghihiro man sa [sainda].”​—1 Tesalonica 2:​13, 14; 3:6.

Siempre, maabot an panahon na mahahayag sa gawe-gawe nin sarong inaadalan sa Biblia kun ano man an nasa saiyang puso, arog kan iniilustrar kan halimbawa ni Eric. (Marcos 7:​21, 22; Santiago 1:​14, 15) An makamomondo, sa oras na magin biyo nang risang-risa sa hiro-hiro nin saro an sarong maraot na ugale, tibaad huri nang marhay. An angat, kun siring, iyo na pagmaigotan na aramon an espesipikong mga kaluyahan bago iyan magin balakid sa espirituwal. Kaipuhan niato nin sarong paagi na masiyasat an piguratibong puso. Paano niato maggigibo iyan?

Makanood ki Jesus

Siempre, kaya ni Jesus na basahon nin daing kasalasala an puso. (Mateo 12:25) Mayo sa sato an kayang gibohon iyan. Pero, ipinaheling nia sa sato na  puede man niatong risahon an mga pagmawot, motibo, asin ipinapaorog nin sarong tawo. Kun paanong an sarong kualipikadong doktor naggagamit nin manlaenlaen na pamamaagi sa diagnosis tanganing maheling kun ano an diperensia kan pisikal na puso nin sarong pasyente, ginamit ni Jesus an Tataramon nin Dios tanganing ‘sakdohon’ asin ihayag an “mga kaisipan asin intension kan puso,” dawa dai pa iyan naririsa kan kadaklan.​—Talinhaga 20:5; Hebreo 4:12.

Halimbawa, sa sarong pangyayari tinabangan ni Jesus si Pedro na maaraman an sarong kaluyahan na sa huri talagang nagin sarong balakid. Aram ni Jesus na namomotan sia ni Pedro. Sa katunayan, ipinagkatiwala pa sana ni Jesus ki Pedro “an mga liabe kan kahadean.” (Mateo 16:13-19) Minsan siring, aram man ni Jesus na pinupunteriya ni Satanas an mga apostol. Sa maarabot na aldaw, mapapairarom sinda sa grabeng pangigipit na magkompromiso. Malinaw na namansayan ni Jesus na an nagkapira sa mga apostol nia may mga kaluyahan sa saindang pagtubod. Kaya dai sia nag-alangan na isabi kun ano an kaipuhan nindang paoswagon. Isipon nindo kun paano nia iyan ipinakipag-olay.

An Mateo 16:21 nagsasabi: “Poon kan panahon na idto pinonan na ipaheling ni Jesu-Cristo sa saiyang mga disipulo na kaipuhan siang . . . magtios . . . asin . . . gadanon.” Mangnohon na ipinaheling sa sainda ni Jesus, bako sanang isinabi sainda, an mangyayari sa saiya. Posibleng marhay nanggad na naggamit sia nin mga bersikulo sa Biblia, arog kan Salmo 22:14-18 o Isaias 53:10-12, na nagsasabi na an Mesiyas kaipuhan na magtios asin magadan. Ano man an nangyari, paagi sa pagbasa o pagkotar nin direkta sa Kasuratan, tinawan ni Jesus si Pedro asin an iba pa nin oportunidad na sumimbag gikan sa saindang puso. Ano kaya an magigin reaksion ninda sa posibilidad na magkakaigwa nin paglamag?

Makangangalas nanggad, huli sa pagkapusoan asin kaigotan ni Pedro, an saiyang ragap na reaksion sa pangyayaring ini naghayag nin seryosong depekto sa saiyang pag-iisip. “Maherak ka sa saimong sadiri, Kagurangnan,” an sabi nia, “dai ini noarin man mangyayari sa saimo.” An pag-iisip ni Pedro malinaw nanggad na napasala, huli ta arog kan idinoon ni Jesus, an iniisip ni Pedro, “bakong an mga kaisipan nin Dios, kundi an sa mga tawo”​—sarong seryosong depekto na puedeng magkaigwa nin grabeng epekto. Kun siring, ano an ginibo ni Jesus? Pagkatapos na sawayon si Pedro, si Jesus suminabi saiya asin sa iba pang disipulo: “Kun an siisay man boot na magsunod sa sako, paindahan nia an saiyang sadiri asin pasanon an saiyang hariging pasakitan patin padagos akong sundan.” Ginagamit an punto de vista na yaon sa Salmo 49:8 asin 62:​12, may kabootan na ipinagirumdom nia sainda na an saindang daing katapusan na esperansa nakadepende, bakong sa mga tawo, na dai makakatao nin kaligtasan, kundi sa Dios.​—Mateo 16:22-28.

Minsan ngani kan huri si Pedro temporaryong nagpadaog sa takot asin dineharan si Jesus nin tolong beses, an pag-oolay na ini asin an iba pa daing duda na nakatabang na andamon sia para sa marikas na pagkaomay sa espirituwal. (Juan 21:15-19) Pakalihis sana nin 50 aldaw, si Pedro pusoan na nagtindog sa atubangan kan kadaklan sa Jerusalem tanganing patotoohan an pagkabuhay liwat ni Jesus. Sa suminunod na mga semana, bulan, asin taon, makosog an boot na inatubang nia an paorootrong pag-arestar, pambubugbog, asin pagkabilanggo, na nagpapaheling nin marahayon na halimbawa nin integridad na daing takot.​—Gibo 2:14-36; 4:18-21; 5:29-32, 40-42; 12:3-5.

Ano an manonodan niato digdi? Naheheling daw nindo kun ano an ginibo ni Jesus tanganing sakdohon asin ihayag an nasa puso ni Pedro? Enot, nagpili sia nin angay na mga teksto tanganing  isentro an atension ni Pedro sa espesipikong bagay na dapat tawan nin atension. Sumunod, tinawan nia si Pedro nin oportunidad na sumimbag gikan sa puso. Sa katapustapusi, nagtao sia nin dugang pang hatol na sono sa Kasuratan tanganing tabangan si Pedro na itanos an saiyang kaisipan asin mga saboot. Tibaad isipon nindo na dai nindo kayang gibohon an arog kaining klase nin pagtotokdo, alagad pag-olayan niato an duwang eksperyensia na nag-iilustrar kun paanong an pag-andam asin pagsarig ki Jehova puedeng makatabang sa siisay man sa sato na arogon an halimbawa ni Jesus.

Pagsakdo sa Kun Ano an Nasa Puso

Kan maaraman nin sarong Kristianong ama na nagkua nin dulse sa lamesa kan maestra an saiyang duwang aking lalaki na nasa enot asin ikaduwang grado, kinaolay nia sinda asin nakipagrasonan sa sainda. Imbes na sabihon na sana na ini bako man maraot na kakarawan nin aki, an ama nagsaysay, “Pinagmaigotan kong enganyaron sindang sabihon an nasa puso ninda kun ano an nagmotibar sa sainda na gumibo kan maraot na ini.”

Ipinagirumdom kan ama sa mga aki kun ano an nangyari ki Acan, na isinaysay sa Josue kapitulo 7. Tolos na nasabotan kan mga aki an punto asin nagtuga. Riniribok na sinda kan saindang konsensia. Kaya ipinabasa sa sainda kan ama an Efeso 4:​28, na nagsasabi: “An parahabon dai na maghabon, kundi marahay pa na sia magpagal . . . tanganing may ikatao sia sa nangangaipo.” An hatol na iyan kan Kasuratan ikinadoon paagi sa pagsabi kan ama sa mga aki na magbayad paagi sa pagbakal nin dulse asin itao iyan sa maestra.

“Pinagmaigotan mi na haleon an ano man na maraot na motibo sa oras na marisa ini,” an sabi kan ama, “asin salidahan iyan nin marahay asin dalisay na motibo paagi sa pakipagrasonan sa mga aki.” Paagi sa pag-arog ki Jesus kun nagtotokdo sa saindang mga aki, an mga magurang na ini nagkaigwa nanggad nin marahay na mga resulta sa pag-agi nin panahon. Pag-abot nin panahon, an duwang aki inimbitaran na magin miembro kan mga tawohan kan opisina prinsipal kan Bethel sa Brooklyn, kun saen an saro naglilingkod pa man giraray pakalihis nin 25 taon.

Isipon nindo kun paano natabangan nin saro pang Kristiana an saiyang inaadalan sa Biblia. An inaadalan sa Biblia nag-aatender sa mga pagtiripon asin nakikikabtang sa ministeryo saka nagpahayag na nin pagmawot na magpabautismo. Minsan siring, garo baga nananarig siang marhay sa sadiri nia imbes na ki Jehova. “Bilang daing agom na babae, dai nia narisa na sia orog na nagin independiente,” an nagigirumdoman kan Saksi. “Naghahadit ako na sia manluluya sa pisikal o mabagsak sa espirituwal.”

Kaya an Saksi naggibo nin inisyatiba na makipagrasonan sa inaadalan sa Biblia na ginagamit an Mateo 6:​33, na ineenkaminar sia na pakarhayon an saiyang mga prioridad, enoton an Kahadean, asin magtiwala ki Jehova na gigibohon an pinakamarahay. Prangka nia ining hinapot: “An pamumuhay daw nin solo kun beses nagpapadepisil saimo na magsarig sa iba, pati ki Jehova?” Inadmitir kan inaadalan sa Biblia na haros dai na sia namimibi. Dangan inenkaminar sia kan parahayag na sunodon an sadol na yaon sa Salmo 55:22 asin itao ki Jehova an pagabat sa saiya huli ta, arog kan inaasegurar sa sato kan 1 Pedro 5:​7, “sia may pagmakolog sa saindo.” Natudok kan mga tataramon na iyan an saiyang puso. An Saksi nagsabi, “Iyan an saro kan pira sanang beses na naheling ko siang naghibi.”

Papagdanayon na Naghihiro sa Saindo an Katotoohan

An pakaheling sa mga tinotokdoan niato na naghihimate sa katotoohan sa Biblia nagtatao sa sato nin dakulang kagayagayahan. Pero, tanganing magin mapanggana an satong mga paghihingoa na tabangan an iba, kaipuhan na kita mismo magpaheling nin marahay na halimbawa. (Judas 22, 23) Kita  gabos kaipuhan na “padagos [na] maghingoa na makamtan an [satong] kaligtasan na may takot asin pagtakig.” (Filipos 2:12) Kaiba dian an regular na pagpasirang kan liwanag kan Kasuratan sa sato mismong puso, na sinisiyasat an satong mga aktitud, pagmawot, asin saboot na tibaad nangangaipo nin pagtatanos.​—2 Pedro 1:19.

Halimbawa, an saindo daw na kaigotan sa Kristianong mga aktibidad luminuya kaini pa sanang nakaagi? Kun iyo, taano? An sarong dahelan iyo na tibaad kamo nananarig na marhay sa sadiri nindo. Paano nindo maaaraman kun baga totoo ini? Basahon an Haggeo 1:2-11, asin onestong horophoropon an pangangatanosan ni Jehova sa mga Judio na pinapuli sa sadiring daga. Dangan ihapot sa sadiri: ‘Ako daw labi-labi kainteresado sa pinansial na seguridad asin materyal na kaginhawahan? Ako daw talagang nagtitiwala ki Jehova na iyong maasikaso sa sakong pamilya kun tatawan ko nin prioridad an espirituwal na mga bagay? O nagsasaboot daw ako na kaipuhan kong enoton na asikasohon an sakong sadiri?’ Kun kaipuhan nin pagliliwat sa kaisipan o saboot nindo, dai magduwaduwa na gibohon iyan. An hatol kan Kasuratan, arog kan manonompongan sa Mateo 6:25-33, Lucas 12:13-21, asin 1 Timoteo 6:6-12, nagtatao nin basehan para sa balanseng pagmansay sa materyal na mga pangangaipo asin rogaring, pagmansay na nagsesegurado sa padagos na bendisyon ni Jehova.​—Malaquias 3:10.

An klaseng ini nin prangkang pagsiyasat sa sadiri puedeng nakakapapensar. An pag-admitir sa espesipikong mga kaluyahan kun isinasabi iyan sa sato puedeng magin makolog sa boot. Pero, kun may pagkamoot na magibo kamo nin inisyatiba na tabangan an saindong aki, an saindong inaadalan sa Biblia, o dawa an sadiri nindo​—gurano man tibaad kapersonal o kasensitibo kan bagay na iyan​—puedeng ginigibo na nindo an enot na lakdang tanganing iligtas an buhay nia o nindo.​—Galacia 6:1.

Pero, paano kun an saindong mga paghihingoa garo baga mayo nin marahay na resulta? Dai sumuko tolos. An pagtanos sa bakong sangkap na puso puedeng magin sensitibo, nakakaubos nin oras, asin kun beses nakakapanluya sa boot na paghihingoa. Alagad puede man iyan na magin nakakakontento.

An hoben na si Eric, na nasambitan sa kapinonan, nakapag-isip-isip sa kahurihurihi asin nagpoon giraray na ‘maglakaw sa katotoohan.’ (2 Juan 4) “Nagbalik ako ki Jehova kaidto sanang pagkatapos na marealisar ko kun ano an nawara sa sako,” an sabi nia. Sa tabang kan saiyang mga magurang, si Eric maimbod ngonyan na naglilingkod sa Dios. Minsan ngani ikinakaanggot nia kaidto an paorootrong mga paghihingoa kan saiyang mga magurang na tabangan siang siyasaton an saiyang puso, ngonyan pinapasalamatan niang marhay an ginibo ninda. “Marahayon nanggad an sakong mga magurang,” an sabi nia. “Dai sinda noarin man nagpondo sa pagkamoot sa sako.”

Sarong kapahayagan nin mamomoton na kabootan an pagpasirang kan liwanag kan Tataramon nin Dios sa puso kan mga tinotokdoan niato. (Salmo 141:5) Padagos na siyasaton an puso kan saindong mga aki asin kan saindong mga inaadalan sa Biblia tanganing maheling kun igwa nin ebidensia na an bagong Kristianong personalidad talagang may impluwensia sa sainda. Papagdanayon na naghihiro sa iba asin sa saindo an katotoohan paagi sa ‘paggamit kan tataramon kan katotoohan sa tamang paagi.’​—2 Timoteo 2:15.

[Ritrato sa pahina 29]

Ihinayag kan mga tataramon ni Jesus an sarong kaluyahan ni Pedro

[Ritrato sa pahina 31]

Gamiton an Biblia tanganing sakdohon kun ano an nasa puso