Ikinokomparar daw Nindo an Saindong Sadiri sa Iba?

SIISAY sa sato an dai pa nakamidbid nin sarong tawo na mas may itsura kisa sato, garo baga mas popular, mas marikas na makasabot, o nakakakua nin mas haralangkaw na marka sa eskuelahan? Tibaad an iba mas marahay an salud o may mas nakakakontentong trabaho, mas asensado, o garo baga mas dakol an katood. Tibaad mas dakol an rogaring ninda, mas dakol an kuarta, mas bago an kotse, o garo baga sinda mas maogma. Sa pagsambit sa siring na mga bagay, ikinokomparar daw niato an satong sadiri sa iba? Dai daw malilikayan an mga pagkokomparar? Taano ta tibaad gusto nin sarong Kristiano na likayan iyan? Asin paano kita puedeng magin kontento na dai ikinokomparar an satong sadiri sa siisay man?

Kun Taano ta Asin Kun Noarin Kita Tibaad Magkomparar

An sarong konsepto kun taano ta an mga tawo tibaad ikinokomparar an sadiri ninda sa iba iyo na nakakatabang ini na mapagdanay o madagdagan an saindang paggalang sa sadiri. Sa parate nakokontento an mga tawo kun maaraman ninda na pareho sinda kaasensado kan saindang mga kairiba. An saro pang ideya iyo na an mga pagkokomparar pagprobar na inaan an kadaihan nin kasegurohan sa satong sadiri, tanganing masabotan kun ano an kaya niatong gibohon asin kun ano an satong mga limitasyon. Naheheling niato kun ano na an nagibo nin iba. Kun kapareho niato sinda sa dakol na bagay asin naabot ninda an nagkapirang obheto, tibaad magsaboot kita na puede man niatong maabot an kaparehong mga pasohan.

An mga pagkokomparar parateng marhay na nangyayari sa pag-oltanan nin mga tawong magkakapareho​—magkasekso, magkaedad, asin magkapareho an kamugtakan sa sosyedad saka magkamiridbid. Posibleng marhay na dai niato ikokomparar an satong sadiri sa saro na iniisip niatong dakulaon an pagkakalaen sa sato. Sa ibang pagtaram, an ordinaryong daragita posibleng marhay na ikomparar an sadiri nia sa saiyang mga kaeskuela imbes na sa sarong sikat na modelo, asin harayo an posibilidad na ikomparar kan modelo an sadiri nia sa daragitang iyan.

Sa anong mga bagay nagkakaigwa nin mga pagkokomparar? An ano man na rogaring o kualidad na ibinibilang na may halaga sa komunidad​—baga man iyan intelihensia, kagayonan, kayamanan, mga gubing​—puedeng magin basehan nin pagkomparar. Minsan siring, may tendensia kitang pagkompararon an mga bagay na pinagkakainteresan niato. Halimbawa, tibaad dai kita maaara sa kadakolan kan koleksion na selyo kan saro sa satong mga kamidbid, apuera sana kun interesado nanggad kita sa pagkolekta nin mga selyo.

 An mga pagkokomparar nakakapukaw nin gabos na laen-laen na reaksion, poon sa pagkakontento sagkod sa makuring kamondoan, poon sa paghanga asin pagmawot na umarog sagkod sa dai pagkapamugtak kan isip o pakikiiwal. Nakakadanyar an nagkapira sa mga emosyon na ini, asin kakontra iyan kan Kristianong mga kualidad.

Mga Pagkokomparar na May Pakipagkompetensia

Nagpapaheling nin espiritu nin pakipagkompetensia an dakol na nagmamaigot na magin “gana” sa mga pagkokomparar. Gusto nindang magin mas matibay sa iba, asin dai sinda nakokontento sagkod na mamatean ninda na sinda mas matibay. Dai nakakaogmang makaiba an arog kaiyan na mga indibiduwal. Nararaot an pakipagkatood sa sainda, nakakatension an relasyon sa sainda. An mga tawong arog kaiyan bako sanang mayo nin kapakumbabaan kundi sa parate dai ninda iinaaplikar an hatol kan Biblia manongod sa pagkamoot sa saindang kapwa, huling an aktitud ninda madaling makapamate sa iba nin pagigin mas hababa asin pagkapasupog.​—Mateo 18:1-5; Juan 13:​34, 35.

An pagpamate sa mga tawo na sinda “daog” nakakadanyar sa sainda sa sarong paagi. Oyon sa sarong parasurat, “an satong mga pagkasudya nagigin mas makolog kun garo baga nakukua kan mga tawo na nasa pareho niatong situwasyon an mga rogaring na gusto niato.” Sa siring, an espiritu nin pakipagkompetensia nagpupukaw nin pagkauri, paghinanakit, asin kaanggotan sa sarong tawo huli sa saiyang mga rogaring, prosperidad, posisyon, reputasyon, mga bentaha, asin iba pa. Minasagkod ini sa orog pang kompetensia​—sarong madahas na siklo. Kinokondenar kan Biblia an ‘pagpukaw nin pagdaraogan.’​—Galacia 5:26.

Paagi sa pagmenos sa mga nagibo kan mga karibal, an mga maurihon nagpoprobar na isalbar an sadiri nindang nadanyaran na pagpahalaga sa sadiri. An siring na reaksion tibaad garo baga sadit sanang bagay, alagad kun dai rerekonoseron asin kokontrolon, puede iyan na sumagkod sa maraot an intension na paggibo nin maraot. Isipon nindo an duwang pagkasaysay sa Biblia na an dahelan iyo an pagkauri.

Durante kan saiyang pag-istar sa tahaw nin mga Filisteo, binendisyonan si Isaac nin “mga aripompon nin mga karnero asin mga pugro nin mga baka saka dakulang grupo nin mga surugoon, kaya an mga Filisteo nagpoon na mauri sa saiya.” An reaksion ninda iyo an pagtambon kan mga bubon na kinalot kan ama ni Isaac na si Abraham, asin hinagad kan hade ki Isaac na humale sa lugar na iyan. (Genesis 26:1-3, 12-16) Maraot an intension asin mapanlaglag an saindang pagkauri. Dai na ninda makayang helingon na nag-oogma si Isaac sa kaginhawahan sa tahaw ninda.

Pakalihis nin dakol na siglo, namidbid si David sa lugar nin ralaban. An saiyang mga nagibo isinelebrar kan mga babae sa Israel, na nag-arawit: “Nagadan ni Saul an saiyang mga rinibo, asin ni David an saiyang manampulong ribo.” Minsan ngani nag-ako man sia nin pag-omaw, an pagkokomparar na iyan ibinilang ni Saul na nakakapamenos, asin napukaw an pagkauri sa saiyang puso. Poon kaidto, nagtanom na sia nin karaotan nin boot ki David. Dai nahaloy ginibo na nia an enot sa nagkapirang pagprobar nia na gadanon si David. Kanigoan na karatan an puedeng maggikan sa pagkauri!​—1 Samuel 18:6-11.

Kaya kun an pagkomparar kan satong sadiri sa iba—sa saindang mga nagibo o bentaha—nagpupukaw nin mga saboot na kapareho kan pagkauri o pakipagkompetensia, mag-ingat kamo! Ini negatibong mga emosyon, na kakontra kan kaisipan nin Dios. Alagad bago siyasaton kun paano lalabanan an siring na aktitud, estudyaran niato an saro pang bagay na nagpupukaw nin pagkokomparar.

Pag-ebalwar sa Sadiri Asin Pagkakontento

‘Ako daw matali, nakakaakit, matibay, marahay an salud, may pagkaautoritaryo, madaling kamotan? Asin sagkod saen?’ Bihira kitang minaatubang sa salming na ihinahapot an mga bagay na arog kaini. Pero, oyon sa sarong parasurat, “daing pagduda, an siring na mga hapot parateng minasabong sa satong isip asin an silensiong simbag kaiyan medyo nakakakontento.” An saro na dai nakakasierto kun ano an puede niang magibo tibaad mag-isip-isip manongod sa mga bagay na ini na mayo nin ano man na kamawotan na makikompetensia o mayo ni kadikit na pagkauri. Ineebalwar  sana nia an saiyang sadiri. Mayo man nin sala dian. Minsan siring, an tamang paagi nin paggibo kaini bakong paagi sa pagkomparar kan satong sadiri sa iba.

Igwa kita nin magkakalaen na mga abilidad, na minadepende sa laen-laen na bagay. Pirmeng igwa nin nagkapira na garo baga mas matibay kisa sato. Huli kaini, imbes na masdan sinda na may pagkauri, maninigong sokolon niato an satong nahaman en koneksion sa matanos na mga pamantayan nin Dios, na nagtatao nin seguradong giya kun ano an tama asin marahay. Si Jehova interesado sa kun ano kita bilang indibiduwal. Dai nia kaipuhan na ikomparar kita sa kiisay man. Sinasadol kita ni apostol Pablo: “Patunayan nin lambang saro an saiyang gibo, dangan may dahelan na siang mag-ogma dapit sa saiya sana, asin bakong sa pagkomparar sa ibang tawo.”​—Galacia 6:4.

Paglaban sa Pagkauri

Huling an gabos na tawo bakong sangkap, tibaad kaipuhan an maigot asin nagpapadagos na mga paghihingoa tanganing malabanan an pagkauri. Madali sana an pag-aram na sinasabi kan Kasuratan sato: “Sa pagtao nin onra sa lambang saro mangenot kamo,” pero mas depisil an paggibo kaiyan. Rinekonoser ni Pablo an sadiri niang inklinasyon na magkasala. Tanganing malabanan iyan, kaipuhan niang ‘lanogon an saiyang hawak asin oriponon iyan.’ (Roma 12:10; 1 Corinto 9:27) Para sa sato, tibaad mangahulogan iyan nin paglaban sa pakikompetensiang mga kaisipan, na sinasalidahan iyan nin positibong mga kaisipan. Kaipuhan na mamibi kita, na hinahagad ki Jehova na tabangan kita “na dai mag-isip dapit sa [satong] sadiri nin orog kisa maninigong isipon.”​—Roma 12:3.

An pag-adal sa Biblia asin paghorophorop nakakatabang man. Halimbawa, isip-isipon nindo an Paraiso sa ngapit na ipinanuga nin Dios. Sa panahon na iyan an gabos magkakaigwa nin katoninongan, marahay na salud, abundang pagkakan, komportableng mga harong, asin nakakakontentong trabaho. (Salmo 46:​8, 9; 72:​7, 8, 16; Isaias 65:21-23) Magmamawot pa daw an siisay man na makikompetensia? Dai nanggad. Mayo na nin dahelan tanganing gibohon iyan. Totoo, dai itinao ni Jehova an gabos na detalye kun paano an buhay sa panahon na iyan, alagad puedeng makatanosan niatong ipamugtak na mahihimo nin gabos an saindang mga pinagkakainteresan asin mga abilidad na gustong gibohon ninda. Tibaad mag-adal an saro nin astronomiya, an saro pa magdisenyo nin magagayon na tela. Taano ta an saro mauuri sa iba? An mga aktibidad kan satong kapwa magigin pan-engganyar, bakong dahelan nin pagkaanggot. An siring na mga saboot magigin mga bagay kan nakaagi.

Kun iyan an buhay na minamawot niato, bako daw na maninigo kitang magmaigot na magpatalubo kan iyo man sanang aktitud ngonyan? Nakakamtan na niato an espirituwal na paraiso, na libre sa dakol na problema kan kinaban sa palibot niato. Mantang mayo na nin espiritu nin pakipagkompetensia sa bagong kinaban nin Dios, talagang may dahelan na likayan iyan ngonyan.

Kun siring, sala daw na ikomparar niato an satong sadiri sa iba? O may mga panahon daw na tibaad angay man iyan?

Angay na mga Pagkokomparar

Dakol na pagkokomparar an suminagkod sa makuri o nakakapanluyang mga reaksion, alagad dai kaipuhan na pirmeng magin arog kaiyan. May koneksion digdi, mangnohon an sadol ni apostol Pablo: “Magin mga paraarog kan mga nagmamana sa mga panuga paagi sa pagtubod asin pasensia.” (Hebreo 6:12) Puedeng magin mabunga an pagmamaigot na kultibaron an mga kualidad na arog kan sa maimbod na mga lingkod ni Jehova kan suanoy na mga panahon. Totoo, tibaad may kalabot iyan na mga pagkokomparar. Pero, makakatabang iyan sa sato na maheling an mga halimbawa na  puede niatong arogon asin an mga kabtang kun saen nangangaipo kitang umoswag.

Isipon nindo si Jonatan. Sa sarong parte, may rason siang mauri. Bilang pinakamatuang aking lalaki ni Hadeng Saul nin Israel, tibaad kaidto nag-aasa si Jonatan na magin hade, alagad pinili ni Jehova an sarong tawo na mas hoben sa saiya nin mga 30 taon, an hoben na si David. Imbes na magtanom nin raot nin boot, namidbid si Jonatan sa saiyang bakong maimot na pakikikatood asin suporta ki David bilang designadong hade ni Jehova. Si Jonatan talagang espirituwal na tawo. (1 Samuel 19:1-4) Bakong arog kan saiyang ama, na ibinilang si David na sarong karibal, minidbid ni Jonatan na si Jehova an nagdidirehir kan mga bagay-bagay asin nagpasakop sia sa Saiyang kabotan; dai nia ikinomparar an sadiri nia ki David, na naghahapot, “Taano ta si David asin bakong ako?”

Sa tahaw kan mga kapwa Kristiano, maninigo na nungka kitang mahadit, na garo baga nagmamaigot an iba na labawan kita o agawon an satong puesto. Bakong maninigo an pagriribal. An maygurang na mga Kristiano namimidbid paagi sa kooperasyon, pagkasararo, asin pagkamoot, bakong sa pakikompetensia. “An pagkamoot iyo an dakulang kaiwal nin pagkauri,” an sabi kan sosyologong si Francesco Alberoni. “Kun namomotan niato an sarong tawo, gusto niato kun ano an marahay para sa saiya, asin naoogma kita kun sia mapanggana asin maogma.” Kaya kun may siisay man sa Kristianong kongregasyon na napili para sa sarong pribilehio, an mamomoton na gibohon magin kontento sa bagay na iyan. Arog kaiyan si Jonatan. Arog sa saiya, bebendisyonan kita kun susuportaran niato an mga maimbod na naglilingkod sa responsableng mga katongdan sa organisasyon ni Jehova.

An marahayon na halimbawa na ipinapaheling kan mga kapwa Kristiano puedeng tama na hangaan. An balanseng pagkokomparar sa sainda puedeng makapahiro sa sato na arogon nin tama an saindang pagtubod. (Hebreo 13:7) Alagad kun dai kita magmaan, an pag-arog puedeng magin pakipagkompetensia. Kun kita magsaboot na nalalabawan na kita nin saro na hinahangaan niato asin magmamaigot na kitang menoson o tatsaran sia, bako nang pag-arog iyan kundi pagkauri.

Mayo nin bakong sangkap na tawo na puedeng magin sangkap na modelo. Huli kaini, an Kasuratan nagsasabi: “Magin kamong mga paraarog sa Dios, bilang mga aki na namomotan na marhay.” Siring man, “si Cristo nagdusa para sa saindo, na winalatan kamo nin modelo tanganing sunodon nindo nin estrikto an saiyang mga lakad.” (Efeso 5:​1, 2; 1 Pedro 2:21) An mga kualidad ni Jehova asin ni Jesus​—an saindang pagkamoot, mainit na pakikiiba, pakikidamay, asin kapakumbabaan​—iyo an maninigo na pagmaigotan niatong arogon. Maninigo na magtao kita nin panahon na ikomparar an satong sadiri sa mga kualidad, katuyohan, asin paagi nin paghiro ninda. An siring na pagkokomparar puedeng paoswagon an kualidad kan satong buhay, na matao nin seguradong giya, karigonan, asin katiwasayan, saka puedeng makatabang sa sato na maabot an sokol nin pagdakula kan maygurang na Kristianong mga lalaki asin babae. (Efeso 4:13) Kun makonsentrar kita sa paggibo kan pinakamakakaya niato tanganing arogon an sangkap na halimbawa ninda, siertong mas dikit an tendensia niatong ikomparar an satong sadiri sa satong kapwa.

[Ritrato sa pahina 28, 29]

Si Hadeng Saul nauri ki David

[Ritrato sa pahina 31]

Nungkang ibinilang ni Jonatan na karibal an mas hoben na si David