Mga Milagro na Naheling Nindo!

AN TERMINONG “milagro” igwa nin sekondaryong kahulogan na “labi-labi kapambihira o pambihirang pangyayari, bagay, o nagibo.” Gabos kita nakaheling na kan arog kaining klase nin milagro, na mayo an pag-interbenir nin Dios.

Mantang nadadagdagan an kaaraman sa pisikal na mga ley nin naturalesa, nahimo kan mga tawo na magibo an mga bagay na kaidto ibinibilang na imposible. Halimbawa, kaidtong sanggatos na taon na an nakaagi, an kadaklan na tawo tibaad naghohona na imposible an mga bagay na ordinaryo na sana ngonyan huli sa mga komputer, telebisyon, teknolohiya sa pagbiahe sa espasyo, asin kaagid na mga pag-oswag sa presenteng aldaw.

Rinerekonoser na igwa sana sinda nin parsial na kaaraman sa mga ngangalasan sa siensia na manonompongan sa mga linalang nin Dios, may mga  sientista na nag-aadmitir na dai ninda masabi nin may kasiertohan kun baga may imposible pa. Sinasabi sana ninda na harayong mangyari iyan. Sa siring pinapagdanay nindang bukas an oportunidad para sa “mga milagro” sa ngapit.

Dawa kun ginagamit niato an pangenot na kahulogan kan “milagro,” na sa siring ipinapanongod sa mga bagay na “iinaatribwir sa lihis sa natural na ahensia,” masasabi niato na an lambang saro sa sato nakaheling na nin mga milagro. Halimbawa, naheheling niato an saldang, bulan, asin mga bitoon​—na gabos gibo nin sarong “lihis sa natural na ahensia,” an Kaglalang mismo. Apuera kaiyan, siisay an biyong makakapaliwanag nin detalyado kun paano nagpupunsionar an hawak nin tawo? kun paano nagpupunsionar an hotok? o kun paano nagdadakula an embrion nin tawo? An librong The Body Machine nagsasabi: “An hawak nin tawo, na kinokontrol asin kinokoordinar kan sentral na sistema nerbiosa, sarong komplikadong aparatong panmate, nagsasadiring maghiro na makina, nagsasadiring magreprodusir na komputer​—sarong makangangalas asin sa dakol na paagi misteryoso na linalang.” An Dios na naglalang sa “hawak nin tawo” naggibo nanggad nin sarong milagro, na padagos na pinagngangalasan niato. Igwa man nin iba pang klase nin mga milagro na naheling nindo, minsan ngani tibaad dai nindo narekonoser iyan bilang milagro.

Puede daw na Magin Milagro an Sarong Libro?

Mayo nin ibang libro na nakalakop na marhay arog kan Biblia. Minamansay daw nindo iyan bilang milagro? Puede daw niatong iatribwir an pag-eksister kaiyan sa sarong “lihis sa natural na ahensia”? Totoo, an Biblia sarong libro na isinurat nin mga tawo, alagad sinasabi ninda na an isinurat ninda mga kaisipan nin Dios, bako ninda. (2 Samuel 23:​1, 2; 2 Pedro 1:​20, 21) Isip-isipon nindo. Sinda mga 40 indibiduwal, na nabuhay sa lawig na 1,600 na taon. Laen-laen an pinaghalean ninda arog nin mga pastor, militar, parasira, lingkod kan banwaan, doktor, saserdote, asin hade. Pero, nakapagpahayag sinda nin nagkakasararong mensahe nin paglaom na totoo sagkod eksakto.

Basado sa maingat na pag-adal, tinutubod kan Mga Saksi ni Jehova an Biblia, “bakong siring sa mga tataramon nin tawo, kundi, siring sa iyo man nanggad, siring sa tataramon nin Dios,” arog kan isinurat ni apostol Pablo. (1 Tesalonica 2:13) Sa laog nin dakol na taon ipinaliwanag kan saindang mga publikasyon kun paanong an sinasabi daa na mga kontradiksion sa Biblia ikakaoyon sa kabilogan na mensahe kaiyan. An panlaog na pagkaoroyon na ini mismo saro nang prueba na an Dios an autor kaiyan. *

Mayo nin ibang libro na uminagi nin grabe kabagsik na mga pagprobar na raoton iyan arog kan Biblia. Pero, yaon pa man giraray iyan asin, kisuerra sa sarong kabtang, sa labing 2,000 na lenguahe. An literal na pagkapreserbar kaiyan bilang sarong libro sagkod an pagkapreserbar kaiyan na kompleto nagpaparisa kan pag-interbenir nin Dios. An Biblia totoo nanggad na sarong milagro!

Sarong Milagro na “Buhay Asin Mapuersa”

An mga milagro kan nakaaging mga aldaw​—milagrosong mga pagpaomay asin pagbuhay liwat—​dai na nangyayari. Alagad igwa kita nin dahelan na magkaigwa nin kompiansa na sa nagdadangadang na bagong kinaban nin Dios, an siring na mga milagro mangyayari giraray, na sa panahon na iyan mangyayari na sa bilog na globo. Iyan matao nin permanenteng pakaginhawa asin dai niato kayang saboton sa presente.

An pagigin milagro kan Biblia nakakagibo dawa  ngonyan nin kapareho man na mga milagro paagi sa pagmotibar sa mga tawo na pakarhayon an saindang personalidad. (Helingon an halimbawa sa kahon na “An Puersa kan Tataramon nin Dios,” sa pahina 8.) An Hebreo 4:12 nagsasabi: “An tataramon nin Dios buhay asin mapuersa asin mas matarom kisa arin man na espada na may duwang tarom asin nakakalagbas sagkod sa pagbulag kan kalag asin espiritu, saka kan mga pagsokmolan asin hotok kaiyan, asin nakakamansay kan mga kaisipan asin intension kan puso.” Iyo, an Biblia nagserbing paagi sa pagliwat sa buhay kan labing anom na milyon na tawo na nakaistar sa bilog na globo, na nagtatao nin katuyohan sa buhay ninda asin nag-aalok sa sainda nin makangangalas na paglaom para sa ngapit.

Taano ta dai togotan an Biblia na gumibo nin milagro sa buhay nindo?

[Nota sa Ibaba]

[Kahon/Ritrato sa pahina 7]

GADAN NA O BUHAY PA?

Oyon sa Juan 19:​33, 34, si Jesus gadan na kan “binudyak kan saro sa mga soldados an saiyang hirog, asin tolos na buminolos an dugo asin tubig.” Minsan siring, ipinaparisa kan Mateo 27:​49, 50 na buhay pa si Jesus kan mangyari ini. Taano ta may pagkakalaen?

Ibinabawal kan Ley ni Moises na bayaan an sarong kriminal na magdamlag na nakabitay sa harigi nin paggadan. (Deuteronomio 21:​22, 23) Huli kaini, kan kaaldawan ni Jesus, kun an sarong kriminal na ipinako sa harigi buhay pa sagkod sa hapon nang marhay, pinagkatodan nang bararion an saiyang mga tabay, na sa siring na paagi pinaparikas an pagkagadan. Dai na nia kakayahon na itanos an saiyang sadiri tanganing maghangos nin tama. An bagay na binarari kan mga soldados an mga tabay kan duwang paragibo nin maraot na nakapako sa harigi na kaabay ni Jesus alagad dai binari an mga tabay nia nagpaparisa na an paghona ninda sia gadan na. Posibleng tinusok kan soldados an saiyang hirog tanganing haleon an gabos na pagduda asin haleon an ano man na pakabalik kan animo sa huri na tibaad salang ibareta bilang pagkabuhay liwat.

An teksto sa Mateo 27:​49, 50 nagtatao nin laen na pagkasunodsunod kan mga pangyayari. Iyan nagsasabi: “An saro pang tawo nagkua nin budyak asin tinusok an saiyang hirog, asin buminolos an dugo asin tubig. Sa giraray kuminurahaw si Jesus sa makosog na tingog, asin isinuko an saiyang espiritu.” Minsan siring, an nakaitalikong sentence mayo sa gabos na suanoy na manuskrito kan Biblia. Dakol na eksperto an naniniwala na kan huri isinaliot iyan hale sa Ebanghelyo ni Juan alagad sala an nasaliotan. Huli kaini, sa dakol na traduksion an sentence na ini ilinaag sa mga parentesis na de kanto o parentesis sana, nagtao nin paliwanag paagi sa nota sa ibaba, o hinale na sana an bilog na sentence.

An orihinal na teksto ni Westcott asin Hort, na ginamit na marhay na basehan para sa New World Translation, ibinubugtak an sentence na ini sa dobleng parentesis na de kanto. Sinasabi kaiyan na an sentence “ipinapamugtak na marhay na isinaliot kan mga eskriba.”

An makosog na ebidensia kun siring iyo na an Juan 19:​33, 34 totoo asin na si Jesus gadan na kan binudyak sia kan Romanong soldados.

 [Kahon/Ritrato sa pahina 8]

AN PUERSA KAN TATARAMON NIN DIOS

Bilang sarong tinedyer asin biktima nin laglag na pamilya, si Detlef naimbuelto sa pagdodroga, pag-inom nin inomon na de alkohol, asin heavy metal. * Sia nagin saro sa inaapod sa parate na skinhead, asin dahel sa saiyang madahas na gawe-gawe dai nahaloy nagin problema sia kan mga pulis.

Kan 1992, 60 skinhead an naimbuelto sa sarong grabeng pakilabolabo sa mga 35 pangkista sa sarong restawran asin bar sa amihanan-sirangan na Alemania. Saro sa mga pangkista, si Thomas, an nabugbog nin grabe kaya sia nagadan huli sa saiyang sinapar na danyos. Nagkapira sa mga namomoon, kaiba si Detlef, an nasentensiahan na mabilanggo pagkatapos nin sarong pagbista na napabaretang marhay sa media.

Dai nahaloy pakatapos na paluwason si Detlef sa bilanggoan, sarong pulyeto an itinao sa saiya kan mga Saksi ni Jehova. An pulyeto may titulong “Taano ta Pano-Pano nin Problema an Buhay?” Tolos na namidbid ni Detlef an pagigin totoo kan sinabi dian, asin nagpoon siang makipag-adal sa Biblia sa mga Saksi. Ini biyong nakapabago kan saiyang buhay. Poon kan 1996 sia nagin maigot na Saksi ni Jehova.

Si Siegfried, na sarong dating pangkista, dayupot na katood ni Thomas, an hoben na lalaking nagadan; sia nagin Saksi man sa huri asin saro nang magurang sa kongregasyon ngonyan. Kan magdalaw si Siegfried sa kongregasyon ni Detlef tanganing magtao nin pahayag sa Biblia (kulibat palan, an ina ni Thomas nag-aatender man kun minsan sa mga pagtiripon duman), inimbitaran sia ni Detlef sa pangudtohan. Kaidtong mga sampulong taon na an nakaagi, an saindang pagkaongis posibleng depisil makontrol. Ngonyan, heling-heling an saindang sa magtugang na pagkamoot.

Tinatanaw ni Detlef asin Siegfried an maogmang pagsabat ninda ki Thomas sa pagkabuhay liwat sa paraisong daga. An sabi ni Detlef: “Napapaluha ako dawa sa pag-isip-isip sana kaini. Namomondo akong marhay sa ginibo ko.” An pagmawot ninda pareho iyo na tabangan si Thomas sa panahon na iyan, kun paanong tinatabangan ninda an iba ngonyan, na mamidbid si Jehova asin maggayagaya sa paglaom na itinatao kan Biblia.

Iyo, arog kaiyan kamapuersa an Tataramon nin Dios!

[Nota sa Ibaba]

[Ritrato sa pahina 6]

An hawak nin tawo sarong makangangalas na linalang

[Credit Line]

Anatomy Improved and Illustrated, London, 1723, Bernardino Genga