Pag-iingat sa Satong Midbidan Bilang Kristiano
Pag-iingat sa Satong Midbidan Bilang Kristiano
“‘Kamo an sakong mga saksi,’ an sabi ni Jehova.”—ISAIAS 43:10.
1. Anong klaseng mga tawo an dinadagka ni Jehova sa saiya?
KUN nasa Kingdom Hall kamo, maingat na masdan an mga nasa palibot nindo. Siisay an naheheling nindo sa lugar na ini nin pagsamba? Tibaad maheling nindo an sinserong mga hoben na atentong ilinalaog sa isip ninda an sono sa Kasuratan na kadonongan. (Salmo 148:12, 13) Posibleng marhay na mamasdan man nindo an mga payo nin pamilya na nagmamaigot na paogmahon an Dios mantang nabubuhay sa sarong kinaban na nagpapababa sa kalidad kan buhay pampamilya. Tibaad maheling nindo an namomotan na mga gurang, na marigon na inootob an saindang pagdusay ki Jehova sa ibong nin mga kamatean huli sa pagkagurang. (Talinhaga 16:31) An gabos namomoot nin odok ki Jehova. Asin pinagmarahay nia na magkaigwa sinda nin relasyon sa saiya. “Dai nin makakadolok sa sako,” an pagpatotoo kan Aki nin Dios, “kun dai sia dagkahon kan Ama na nagsugo sa sako.”—Juan 6:37, 44, 65.
2, 3. Taano ta puedeng magin depisil an pagpapadanay nin malinaw na pakamansay sa satong midbidan bilang Kristiano?
2 Dai daw niato ikinakaogmang marhay na mapabilang sa sarong banwaan na may pag-oyon asin bendisyon ni Jehova? Pero, depisil an pagpapadanay nin malinaw na pakamansay sa satong midbidan bilang mga Kristiano sa “delikadong mga panahon [na ini] na masakit pakibagayan.” (2 Timoteo 3:1) Nangorognang totoo ini sa mga hoben na pinapadakula sa Kristianong mga pamilya. “Dawa ngani nag-aatender ako sa Kristianong mga pagtiripon,” an inadmitir kan saro sa siring na hoben, “mayo ako nin malinaw na espirituwal na mga pasohan asin, an totoo, dai ko napatalubo an personal na kamawotan na maglingkod ki Jehova.”
3 An nagkapira, minsan ngani sinserong nagmamawot na maglingkod ki Jehova, tibaad madisturbo nin makosogon na pangigipit nin kairiba, kinabanon na mga impluwensia, asin makasalan na mga tendensia. Kun ginigipit kita, tibaad luway-luway iyan na magin dahelan na mawara an satong midbidan bilang Kristiano. Halimbawa, an dakol sa kinaban ngonyan minamansay an mga pamantayan sa moralidad kan Biblia bilang lihis na sa uso o bakong realistiko sa satong kinaban sa presenteng panahon. (1 Pedro 4:4) May mga nagsasaboot na bako nang mahalagang marhay na sambahon an Dios sa paaging sinasabi nia. (Juan 4:24) Sa saiyang surat sa mga taga Efeso, nasasambitan ni Pablo na an kinaban igwa nin “espiritu,” o nangingibabaw na aktitud. (Efeso 2:2) Iniimpluwensiahan kan espiritung iyan an mga tawo na sumunod sa kaisipan nin sarong sosyedad na dai nakakamidbid ki Jehova.
4. Paano idinoon ni Jesus an pangangaipo na ingatan niato an satong malinaw na midbidan bilang mga Kristiano?
4 Minsan siring, bilang nagdusay na mga lingkod ni Jehova, narerealisar niato na kapahapahamak para sa siisay man sa sato—hoben o gurang—kun mawara an satong midbidan bilang Kristiano. An kapakipakinabang na pakamansay sa satong midbidan bilang Kristiano puede sanang ibasar sa mga pamantayan ni Jehova asin sa mga inaasahan nia sa sato. Total, linalang kita sa saiyang ladawan. (Genesis 1:26; Miqueas 6:8) An satong malinaw na midbidan bilang mga Kristiano iinaagid kan Biblia sa pan-ibabaw na mga gubing, na isinusulot tanganing maheling kan gabos. Mapadapit sa satong kapanahonan, si Jesus nagpatanid: “Uya! Ako madatong siring sa parahabon. Maogma an saro na nagpupuka asin iniingatan an saiyang pan-ibabaw na mga gubing, tanganing dai sia maglakaw na huba asin maheling nin mga tawo an saiyang kasupganan.” * (Kapahayagan 16:15) Habo niato na hubaon an satong Kristianong mga kualidad saka pamantayan nin paggawe asin togotan an kinaban ni Satanas na moldehon kita. Kun mangyayari iyan, mawawara niato an “pan-ibabaw na mga gubing” na ini. Makamomondo asin makasusupog an siring na situwasyon.
5, 6. Taano ta mahalagang marhay an espirituwal na karigonan?
5 An malinaw na pakamansay sa midbidan bilang Kristiano may dakulang epekto sa direksion kan buhay nin saro. Taano man? Kun mawawara nin sarong parasamba ki Jehova an malinaw na pakamansay nia sa saiyang midbidan, tibaad mawara sia sa pokus, mayo nin klarong direksion o mga pasohan. Paorootrong nagpapatanid an Biblia tumang sa siring na kamugtakan nin pagigin dai makadesisyon. “An nagduduwaduwa,” an patanid ni disipulo Santiago, “siring sa alon nin dagat na ipinapadpad nin doros asin iinaapwak minsan saen. Sa katunayan, dai maghona an siring na tawo na sia mag-aako nin ano man hale ki Jehova; sia tawong dai makadesisyon, bakong marigon sa gabos niang dalan.”—Santiago 1:6-8; Efeso 4:14; Hebreo 13:9.
6 Paano niato maiingatan an satong midbidan bilang Kristiano? Ano an makakatabang sa sato na lalong palinawon an satong pakamansay sa dakulang pribilehio niato na magin mga parasamba kan Kaharohalangkawe? Estudyare tabi an minasunod na mga paagi.
Marigon na Patunayan sa Saindong Sadiri an Saindong Midbidan Bilang Kristiano
7. Taano ta kapakipakinabang na makimaherak ki Jehova na siyasaton kita?
7 Padagos na patunayan liwat an saindong relasyon ki Jehova. An pinakamahal na rogaring nin sarong Kristiano iyo an saiyang personal na relasyon sa Dios. (Salmo 25:14; Talinhaga 3:32) Kun minapoon kitang magkaigwa nin mga pagduda manongod sa satong midbidan bilang Kristiano, iyan an panahon na maninigo niatong maingat na siyasaton an kualidad asin rarom kan relasyon na ini. An salmista angay nanggad na nakimaherak: “Siyasata ako, O Jehova, asin baloa ako; dalisaya an sakong mga bato asin an sakong puso.” (Salmo 26:2) Taano ta mahalagang marhay an siring na pagsiyasat? Huli ta kita mismo bakong masasarigan na paraebalwar kan sadiri niatong kairairaroming mga motibo asin kalaoglaoging mga inklinasyon. Solamente si Jehova an makakarorop kan satong panlaog na persona—an satong mga motibo, kaisipan, asin emosyon.—Jeremias 17:9, 10.
8. (a) Paano kita makikinabang sa pagbalo ni Jehova? (b) Paano kamo natabangan na umoswag bilang sarong Kristiano?
8 Paagi sa pakiolay ki Jehova na siyasaton kita, iniimbitaran niato sia na baloon kita.Tibaad togotan niang mangyari an mga situwasyon na maghahayag kan tunay niatong mga motibo asin kamugtakan nin puso. (Hebreo 4:12, 13; Santiago 1:22-25) Maninigo niatong maogmang akoon an siring na mga pagbalo huling nagtatao iyan sa sato nin oportunidad na patunayan an rarom kan satong kaimbodan ki Jehova. Ikakapaheling kaiyan kun baga kita “lubos asin marigon sa gabos na bagay, na dai nagkukulang nin ano man.” (Santiago 1:2-4) Asin sa paggibo kaiyan, matalubo kita sa espirituwal.—Efeso 4:22-24.
9. Opsional daw an pagpapatunay sa satong sadiri na totoo an itinotokdo sa Biblia? Ipaliwanag.
9 Patunayan sa saindong sadiri na totoo an itinotokdo sa Biblia. An pakamansay niato sa satong midbidan bilang mga lingkod ni Jehova puedeng lumuya kun dai iyan marigon na nakabasar sa kaaraman sa Kasuratan. (Filipos 1:9, 10) Kaipuhan na patunayan nin lambang Kristiano—hoben o gurang—sa paaging kontento sia mismo na an saiyang tinutubod iyo nanggad an katotoohan na yaon sa Biblia. Sinadol ni Pablo an mga kapagtubod: “Siertohon an gabos na bagay; pangaptan nin higot an marahay.” (1 Tesalonica 5:21) Kaipuhan na marealisar kan hoben na mga Kristianong kabilang sa mga pamilyang matatakton sa Dios na dai sinda puedeng magdepende sana sa pagtubod kan saindang mga magurang. An mismong ama ni Salomon, si David, pinakasadol sia na “midbida an Dios kan saimong ama asin maglingkod ka sa saiya na may kompletong puso.” (1 Cronica 28:9) Bakong igo para sa hoben na si Salomon na helingon kun paano an saiyang sadiring ama nagpapatalubo nin pagtubod ki Jehova. Kaipuhan na midbidon nia mismo si Jehova, asin ginibo nia iyan. Nakimaherak sia sa Dios: “Tawe ako ngonyan nin kadonongan asin kaaraman tanganing ako makaluwas sa atubangan kan banwaan na ini asin tanganing ako makalaog.”—2 Cronica 1:10.
10. Taano ta bakong sala an pagbangon nin sadiosan na mga hapot na may tamang motibo?
10 An makosog na pagtubod napapasikad sa kaaraman. “An pagtubod minasunod sa bagay na nadangog,” an sinabi ni Pablo. (Roma 10:17) Ano an boot niang sabihon kaiyan? Boot niang sabihon na paagi sa pagkakan sa Tataramon nin Dios, pinapakosog niato an satong pagtubod asin pagsarig ki Jehova, sa saiyang mga panuga, asin sa saiyang organisasyon. An pagbangon nin sadiosan na mga hapot manongod sa Biblia puedeng magtao nin mga simbag na nakakaparigon giraray sa kompiansa. Apuera kaini, sa Roma 12:2, manonompongan niato an sadol ni Pablo: ‘Patunayan nindo sa saindong sadiri kun ano an marahay asin inaako patin sangkap na kabotan nin Dios.’ Paano man nanggad niato magigibo iyan? Paagi sa pagkua kan “tamang kaaraman kan katotoohan.” (Tito 1:1) Makakatabang sa sato an espiritu ni Jehova na masabotan dawa an depisil na mga tema. (1 Corinto 2:11, 12) Maninigo kitang mamibi para sa tabang nin Dios kun nasasakitan kita sa pagsabot sa sarong bagay. (Salmo 119:10, 11, 27) Gusto ni Jehova na masabotan niato an saiyang Tataramon, tubodon iyan, asin kuyogon iyan. Pinapahalagahan nia an sadiosan na mga hapot na may tamang motibo.
Magin Determinado na Paogmahon an Dios
11. (a) Anong natural na pagmawot an puedeng makasiod sa sato? (b) Paano kita magkakaigwa nin kosog nin boot na paglabanan an impluwensia nin kairiba?
11 Maghingoang paogmahon an Dios, bakong an tawo. Natural sanang determinaran minsan paano an satong midbidan paagi sa pag-ayon sa sarong grupo. An gabos nangangaipo nin mga katood, asin naoogma kita kun kita inaako. Durante nin pagkahoben—saka sa maabot na kabtang nin buhay—an impluwensia nin kairiba puedeng magin makosog, na nagbubunga nin grabeng pagmawot na arogon o paogmahon an iba. Alagad an mga katood asin kairiba dai pirmeng interesado sa pinakaikakarahay niato. Kun beses gusto sana ninda na may makaiba sa paggibo nin sala. (Talinhaga 1:11-19) Kun an sarong Kristiano nagpapadaog sa bakong marahay na impluwensia nin kairiba, sa parate pinagmamaigotan niang itago kun ano sia. (Salmo 26:4) “Dai nindo pag-arogon an paggawe kan kinaban sa palibot nindo,” an patanid ni apostol Pablo. (Roma 12:2, The Jerusalem Bible) Itinatao ni Jehova an panlaog na kosog na kaipuhan niato tanganing malabanan an ano man pangigipit na umarog.—Hebreo 13:6.
12. Anong prinsipyo asin anong halimbawa an makakapakosog sa sato na manindogan kun napapalabot an satong pagtitiwala sa Dios?
12 Kun namemeligrong raoton nin pangigipit an pakamansay niato sa satong midbidan bilang Kristiano, maninigo niatong girumdomon na an satong kaimbodan sa Dios mas mahalagang marhay kisa opinyon kan publiko o sa tendensia kan mayoriya. An mga tataramon sa Exodo 23:2 nagseserbing sarong masasarigan na prinsipyo: “Dai ka sumunod sa kadaklan para sa karatan.” Kan an mayoriya kan mga kapwa Israelita magduda sa kakayahan ni Jehova na otobon an Saiyang mga panuga, marigon na nagsayuma si Caleb na umiba sa mayoriya. Nakakasierto sia na an mga panuga nin Dios mapagtitiwalaan, asin mayaman siang binendisyonan sa saiyang paninindogan. (Bilang 13:30; Josue 14:6-11) Andam man daw kamong labanan an pangigipit kan popular na opinyon tanganing ingatan an saindong relasyon sa Dios?
13. Taano ta madonong na magpamidbid kita na kita mga Kristiano?
13 Magpamidbid kamo na kamo sarong Kristiano. Totoo an kasabihan na an pinakamarahay na depensa iyo an marahay na opensa mantang pinapanindogan ta an satong midbidan bilang Kristiano. Kan mapaatubang sa pagtumang sa saindang paghihingoa na gibohon an kabotan ni Jehova kan kaaldawan ni Esdras, an maimbod na mga Israelita nagsabi: “Kami an mga lingkod kan Dios kan kalangitan asin kan daga.” (Esdras 5:11) Kun magpapaapekto kita sa mga reaksion asin pagkritika kan antipatikong mga tawo, mapaparalisar kita sa takot. Kun pirme niatong pagmamaigotan na paogmahon an gabos, papaluyahon kaiyan an pagigin epektibo niato. Kaya dai kamo matakot. Pirmeng marahay na malinaw na ipamidbid sa iba na saro kamo sa Mga Saksi ni Jehova. Sa magalang alagad marigon na paagi, puede nindong ipaliwanag sa iba an saindong mga prinsipyo sa buhay, an saindong mga paniniwala, asin an saindong paninindogan bilang sarong Kristiano. Ipaaram sa iba na determinado kamong papagdanayon an halangkaw na mga pamantayan ni Jehova sa mga isyu nin moralidad. Linawon nindo na an saindong Kristianong integridad dai puedeng ikompromiso. Ipaheling na ipinag-oorgolyo nindo an saindong moral na mga pamantayan. (Salmo 64:10) An pagigin napapalaen bilang sarong marigon na Kristiano puedeng magparigon sa saindo, magprotehir sa saindo, asin magpahiro pa ngani sa nagkapira na maghapot manongod ki Jehova asin sa saiyang banwaan.
14. Maninigo daw kitang madesganar sa pag-olog-olog o pagtumang? Ipaliwanag.
14 Iyo, tibaad pag-olog-ologon o kontrahon kamo nin nagkapira. (Judas 18) Kun an iba dai naghihimate sa saindong mga paghihingoa na ipaliwanag sa sainda an saindong mga prinsipyo sa buhay, dai kamo madesganar. (Ezequiel 3:7, 8) Gurano man kamo kadeterminado, nungka nindong makokombensir an mga tawong habong makombensir. Girumdoma si Faraon. Mayo nin damat o milagro—dawa kagadanan kan saiya mismong panganay—na nakakombensir ki Faraon na si Moises nagtataram sa ngaran ni Jehova. Kun siring, dai togotan na papondohon kamo kan pagkatakot sa tawo. An pagtitiwala asin pagtubod sa Dios makakatabang sa sato na mapangganahan an takot.—Talinhaga 3:5, 6; 29:25.
Makanood sa Nakaagi, Magplano Para sa Ngapit
15, 16. (a) Ano an satong espirituwal na mana? (b) Paano kita makikinabang sa pagpensar sa satong espirituwal na mana sa liwanag kan Tataramon nin Dios?
15 Pakamahalon an saindong espirituwal na mana. Sa liwanag kan Tataramon nin Dios, makikinabang an mga Kristiano sa pagpensar sa saindang mayaman na espirituwal na mana. Kaiba sa pamanang ini an katotoohan kan Tataramon ni Jehova, an paglaom na buhay na daing katapusan, asin an onra na irepresentar an Dios bilang mga parabalangibog kan maogmang bareta. Naheheling daw nindo an saindong papel sa tahaw kan saiyang mga Saksi, sa pribilehiadong grupo nin mga tawo na isinugong gibohon an nagliligtas-buhay na paghuhulit kan Kahadean? Girumdomon, daing iba kundi si Jehova an nagpapatotoo: “Kamo an sakong mga saksi.”—Isaias 43:10.
16 Puede nindong hapoton an saindong sadiri: ‘Gurano kahalaga sa sako an espirituwal na manang ini? Pinapahalagahan ko daw iyan na marhay kaya ginigibo kong pinakapangenot na prioridad sa sakong buhay an paggibo kan kabotan nin Dios? Igo na daw an pag-apresyar ko kaiyan tanganing magpasarig sa sako na labanan an ano man na sugot na tibaad magin dahelan na mawara ko iyan?’ An satong espirituwal na mana puede man na magtao sa sato nin makosog na pakamate nin espirituwal na seguridad na makakamtan sana sa laog kan organisasyon ni Jehova. (Salmo 91:1, 2) An pagrepaso sa pambihirang mga pangyayari sa presenteng aldaw na kasaysayan kan organisasyon ni Jehova puede man na magtadom sa satong isip na mayong tawo o bagay na makakapoho sa banwaan ni Jehova sa ibabaw kan daga.—Isaias 54:17; Jeremias 1:19.
17. Ano pa an kaipuhan apuera sa pagsarig sana sa satong espirituwal na mana?
17 Siempre, dai kita puedeng magdepende sana sa satong espirituwal na mana. An balang saro sa sato kaipuhan na magpatalubo nin dayupot na relasyon sa Dios. Pagkatapos na magmaigot si Pablo na pakosogon an pagtubod kan mga Kristiano sa Filipos, sinuratan nia sinda: “Bilang resulta, mga namomotan ko, sa paagi na kamo danay na nagkuyog, bako sanang sa panahon kan sakong presensia, kundi orog pa sa panahon kan sakong pagkawara, padagos kamong maghingoa na makamtan an saindong kaligtasan na may takot asin pagtakig.” (Filipos 2:12) Dai niato puedeng isarig sa iba an satong kaligtasan.
18. Paano an Kristianong mga aktibidad puedeng lalong magpalinaw sa pakamansay niato sa satong midbidan bilang Kristiano?
18 Lubos nindong pakikabtangan an Kristianong mga aktibidad. Sinasabi na “an trabaho may epekto sa personal na midbidan.” An mga Kristiano ngonyan isinugo na gibohon an mahalagang marhay na trabahong paghuhulit kan maogmang bareta kan naestablisar nang Kahadean nin Dios. Si Pablo nagsabi: “Mantang ako, sa katunayan, apostol sa mga nasyon, pinapamuraway ko an sakong ministeryo.” (Roma 11:13) An satong paghuhulit nagpapamidbid kan kalaenan niato sa kinaban, asin an pagpartisipar niato dian lalong nagpapamidbid sa sato bilang Kristiano. An lubos na pakikikabtang niato sa iba pang teokratikong aktibidad, siring kan Kristianong mga pagtiripon, mga programa sa pagtogdok nin mga lugar nin pagsamba, paghihingoa na tabangan an mga nangangaipo, asin an mga kaagid kaiyan, puedeng lalong magpalinaw sa pakamansay niato sa satong midbidan bilang mga Kristiano.—Galacia 6:9, 10; Hebreo 10:23, 24.
Malinaw na Midbidan, Tunay na mga Bendisyon
19, 20. (a) Anong mga pakinabang an personal nindong nakakamtan sa pagigin sarong Kristiano? (b) Ano an nagtatao sa sato kan basehan para sa tunay na midbidan niato?
19 Horophoropa nguna an dakol na pakinabang asin bentaha na nakakamtan niato huli ta kita tunay na mga Kristiano. Igwa kita kan pribilehio na midbidon nin personal ni Jehova. Si propeta Malaquias nagsabi: “Idtong mga nagkakatarakot ki Jehova nag-oorolay-olay, an lambang saro sa saiyang kaibanan, asin si Jehova padagos na nagtao nin atension asin naghinanyog. Asin an sarong libro nin girumdoman pinonan na isurat sa atubangan nia para sa mga natatakot ki Jehova asin para sa mga naghohorophorop sa saiyang ngaran.” (Malaquias 3:16) Puede kitang mansayon nin Dios bilang saiyang mga katood. (Santiago 2:23) An satong buhay nagkakaigwa nin malinaw na pakamate nin katuyohan, nin hararom na kahulogan, asin nin kapakipakinabang saka mabungang mga pasohan. Asin tinawan kita kan paglaom na daing sagkod na ngapit.—Salmo 37:9.
20 Girumdomon na an saindong tunay na midbidan asin halaga nakadepende sa pagheling nin Dios sa saindong halaga, bako sa kun ano an tibaad isipon nin ibang tawo sa saindo. Tibaad husgaran kita kan iba segun sa bakong tamang mga pamantayan nin tawo. Alagad an pagkamoot asin personal na interes nin Dios nagtatao sa sato kan tunay na basehan para sa halaga niato—sadiri nia kita. (Mateo 10:29-31) Dangan, an sato mismong pagkamoot sa Dios puede man na magtao sa sato kan pinakamalinaw na pakamansay sa satong midbidan asin kan pinakaklarong direksion sa satong buhay. “Kun an siisay man namomoot sa Dios, an sarong ini midbid nia.”—1 Corinto 8:3.
[Nota sa Ibaba]
^ par. 4 An mga tataramon na ini tibaad indirektamenteng nagpapanongod sa mga trabaho kan opisyal kan patongtongan kan templo sa Jerusalem. Durante kan mga pagbantay sa banggi, linilibot nia an templo tanganing helingon kun baga mata o torog an mga bantay na Levita sa saindang mga puesto. An siisay man na bantay na manompongan na natotorog pinapakol nin badas, asin an saiyang pan-ibabaw na mga gubing tibaad soloon bilang makasusupog na padusa.
Nagigirumdoman daw Nindo?
• Taano ta mahalagang marhay para sa mga Kristiano na ingatan an saindang espirituwal na midbidan?
• Paano niato marigon na mapapatunayan sa satong sadiri an satong midbidan bilang Kristiano?
• Kun napapaatubang sa pagduda kun siisay an papaogmahon, anong mga bagay an makakatabang sa sato na makagibo kan tamang desisyon?
• Paano an malinaw na pakamansay sa satong midbidan puedeng makaapekto sa satong ngapit bilang mga Kristiano?
[Mga Hapot Para sa Pag-adal]
[Mga Ritrato sa pahina 21]
An lubos na pakikikabtang niato sa Kristianong mga aktibidad puedeng lalong magpalinaw sa satong midbidan bilang Kristiano