Pagtukad Pasiring sa The Bottom sa Saba

AN Holandes na isla nin Saba dating nagseserbing kuta kan mga pirata na naglalayag sa katubigan kan Dagat Caribe sa paghanap nin masasamsam. Ngonyan, an sadit na islang ini, na nasa 240 kilometros sa sirangan nin Puerto Rico, igwa nang mga 1,600 na habitante, na an 5 sa sainda Saksi ni Jehova. Minsan siring, an pusoan na mga ministrong ini may hinahanap na mas mahalaga kisa masasamsam. Maigot nindang hinahanap an mga tawong “may tamang tendensia sa buhay na daing katapusan.”​—Gibo 13:48.

An maogmang bareta kan Kahadean nin Dios enot na nakaabot sa isla kan Hunyo 22, 1952, kan an 18 metros na barkong Sibia, na minamanehar kan mga Saksi ni Jehova, nagduong sa may baybayon nin Saba. (Mateo 24:14) Tuminukad an mga misyonerong si Gust Maki asin Stanley Carter sa The Ladder, sarong dalan na may labing 500 na tanggang gapo pasakat sa The Bottom, an kabisera nin Saba. * Sa laog nin dakol na siglo, an hayakpit na dalan na ini iyo an solamenteng agihan tanganing makaabot sa mga habitante kan isla.

An enot na ipinublikar na report manongod sa Kristianong paghuhulit sa Saba nagluwas sa 1966 Yearbook of Jehovah’s Witnesses. Oyon sa report na iyan, igwa nin saro sanang aktibong Saksi sa isla. Paghaloyhaloy, sarong pamilya hale sa Canada an nagpirang taon duman sa paghuhulit kan maogmang bareta. Kasuarin pa sana, si Russel asin Kathy, na retiradong mag-agom hale sa Estados Unidos, nagduman sa Saba asin nakikabtang sa paghuhulit duman. Estudyare an saindang estorya.

 Pagbisita sa Saba

Nag-abot kaming mag-agom sakay nin eroplano bilang mga bisita ni Ronald, na iyo sana an Saksi sa isla durante kan kadaklan na mga taon kan dekada nin 1990. An kag-imbitar sa samo naghahalat samo sa aeropuerto. Naogma siang marhay sa dara ming regalo na sadit na kahon nin mga gulay, huling mayo nin komersial na pag-oma sa isla. Sakay sa sadit na trak, luway-luway kaming nagpasikosiko patukad sa gilid kan Mount Scenery sagkod sa alitoktok kan gadan nang bulkan na ini.

Nagpondo kami sa baryo nin Hell’s Gate mantang hineheling ni Ronald an pampublikong paskilan nin mga paisi kun nakapaskil pa man giraray an sarong imbitasyon para sa pampublikong pahayag sa Domingo. Naogma kaming maheling na nakapaskil pa iyan. Suminakay liwat sia sa trak, asin nagpadagos kaming tumukad pasiring sa pinakadakulang baryo sa isla, an Windwardside. Siring kan isinusuherir kan ngaran kaiyan, an magayon na baryong ini nasa tampi kan isla na hinuhuyopan kan doros, na mga 400 metros na mas halangkaw sa kapatagan kan dagat. Kan palaog kami sa agihan nin sasakyan kan sadit na harong ni Ronald, naheling mi an magayon na karatula sa atubangan na beranda na nagpapamidbid kaiyan bilang Kingdom Hall kan Mga Saksi ni Jehova.

Durante kan pangudtohan ihinapot ko an bagay na iyong dahelan kan samong pagbisita, “Paano ka nagin parabalangibog kan Kahadean sa Saba?”

“Kan matapos an pagtogdok kan sangang opisina kan Mga Saksi ni Jehova sa Puerto Rico kan 1993,” an sabi ni Ron, “interesado kaming mag-agom na magdanay sa sarong asignasyon sa ibang nasyon. Bago kaidto, nakadalaw na kami sa Saba kaiba an saro pang mag-agom na payunir asin naaraman mi na igwa iyan nin 1,400 na habitante alagad mayo nin mga Saksi. Kaya nakipag-olay kami sa Komite kan Sangang Opisina sa Puerto Rico manongod sa samong pagbalyo digdi.

“Magayon an nagsurunod na pangyayari, asin sa katapustapusi nakaresibi kami nin pag-aprobar na bumalyo. Makamomondo, pakalihis nin duwang taon nagkahelang nin grabe an sakong agom, asin nagbuelta kami sa California. Pagkagadan nia, nagbalik ako sa Saba. Aram mo, habo kong ponan an sarong bagay na dai ko tataposon.”

Paghuhulit sa Harong-Harong sa Saba

An sala kan sanggatos anyos na harong ni Ron ginagamit man bilang Kingdom Hall. * Mantang kami namamahaw asin nag-aandam na lumuwas sa ministeryo, binasa kan oran hale sa nag-aaging panganoron an kusina sa luwas. Pagkatapos magpamahaw, naghale kami na may wararak na panganoron para sa pan-agang paghuhulit sa harong-harong sa The Bottom. Sa kada harong, tinataratara ni Ron paagi sa ngaran an kagharong. An samong pag-oolay nakasentro sa sarong bago pa sanang lokal na bareta. Pamilyar an kadaklan na mga tawo ki Ron asin sa saiyang ministeryo, asin dakol an tolos na nag-aako nin mga babasahon sa Biblia.

An pagsurat nin rekord kan mga interesado sa mensahe kan Kahadean puedeng magin depisil kun dai kamo pamilyar sa mga taga baryo. Taano man? Huli ta “kahagadan kan ley na an gabos na harong pintahan nin pararehong kolor,” an sabi ni Ron. Talaga man nanggad, hineling ko an palibot asin narisa ko na an gabos na harong sa Saba puti na may pulang atop.

Pagkatapos kan samong pag-oolay sa Biblia, iniimbitaran mi an kagharong na mag-atender sa pampublikong pahayag sa Biblia na gigibohon sa Domingo sa Kingdom Hall. Kun yaon si Ron sa harong nia sa isla, nagtatao sia nin pampublikong pahayag kada semana. Sa presente, may 17 pag-adal sa Biblia na ginigibo sa Saba. Beinte katawo an nag-atender sa Memorial kan kagadanan ni Cristo kan 2004. Asin minsan ngani an kabilangan na iyan garo baga medyo kakadikit, 1 porsiento iyan kan enterong populasyon sa Saba!

Tunay nanggad, an Mga Saksi ni Jehova naghingoang marhay na mapaabotan an pinakadakol na tawong mapupuede kan mensahe nin Dios dapit sa kaligtasan. Baga man iyan sarong sadit na isla arog kan Saba o sarong bilog na kontinente, an Mga Saksi ni Jehova maimbod na ginigibo an sugo na “gumibo . . . nin mga disipulo sa mga tawo kan gabos na nasyon.”​—Mateo 28:19.

Makamomondo, an samong pagbisita natapos na. Sa pagsakay mi sa samong eroplano, nagbabay kami. Pirme ming magigirumdoman an samong pagbisita sa Saba asin an samong pagtukad sa The Bottom!

[Mga Nota sa Ibaba]

[Mga Mapa sa pahina 10]

(Para sa aktuwal na format, hilingon an publikasyon)

PUERTO RICO

[Picture Credit Line sa pahina 10]

Retrato sa likod: www.sabatourism.com