Siisay an Mapakakan sa Kinaban?

OYON sa mga kalkulasyon kan World Food Programme, sarong ahensia kan Naciones Unidas sa paglaban sa pagkagutom, 800 milyones katawo​—na dakol kaiyan mga aki​—an haros nasa makuring gutom. Kasuarin pa sana, nagsabi an ahensiang iyan na an mga rekurso asin atension na puede kutanang itinao kan dakol na nagprogreso nang nasyon sa problemang ini an minomonopolisar kan ibang mga problema, siring kan terorismo. Nakadagdag pa sa problema an paglakop nin nakakaolakit na mga helang. An Global School Feeding Report kan ahensiang ini nagsabi manongod sa mga nasyon sa Aprika na lakop an AIDS: “An enterong henerasyon nin mga magurang nagkakagaradan. An mga aki na nabayaan ninda sa parate kaipuhan na sustentohan an sadiri ninda, na an kadaklan sa sainda mayo nin pundamental na kaaraman sa pag-oma asin kaaraman sa pan-aroaldaw na pamumuhay na sa tipikong mga kamugtakan ipinapasa hale sa sarong henerasyon pasiring sa masunod.”

Sinusuportaran kan World Food Programme an sarong ginibong aksion na an obheto iyo an magpakakan nin kisuerra sarong beses sa kada aldaw sa mga eskuelahan. An ideya iyo na bako sanang mainaan an pagkagutom kundi patin gamiton paagi sa regular na pagtotokdo an iba pang programa na dinisenyo tanganing maebitaran an HIV/AIDS sa mga aki.

Sa mga lugar na inimplementar ini, an mga aki nag-ako nin kakanon, pagtotokdo dapit sa personal na pangangataman sa salud, asin iba pang tabang. Naobserbaran man na kun binabago an gawe-gawe, naiinaan an mga naoolakitan nin HIV/AIDS.

Makamomondo, an resulta kan mga paghihingoa nin tawo parate sanang parsial asin bakong desidido. Alagad an Biblia nagtatao nin nakakarangang panuga may labot sa permanenteng solusyon sa problema nin pagkagutom. “Magkakaigwa nin abundang tipasi sa ibabaw kan daga,” an sabi kan Salmo 72:16. Sa irarom kan Kahadean nin Dios, an mga tawo makakasabi manongod ki Jehova Dios: “Itinao mo an saimong atension sa daga, tanganing papagsopayon mo iyan . . . Inaandam mo an tipasi kaiyan, huli ta arog kaiyan an pag-andam mo sa daga.”​—Salmo 65:9.

[Picture Credit Line sa pahina 32]

WFP/Y. Yuge