Madonong na Giya Para sa mga Mag-agom

“Magpasakop an mga agom na babae sa saindang agom na lalaki nin siring sa Kagurangnan. Mga agom na lalaki, padagos nindong mamotan an saindong agom na babae.”​—EFESO 5:​22, 25.

1. Ano an tamang pagmansay sa pag-agom?

SINABI ni Jesus na an pag-agom iyo an pagsaro nin Dios sa lalaki asin babae na magin “sarong laman.” (Mateo 19:​5, 6) Kalabot dian an duwang tawo na may magkalaen na mga personalidad na nag-aadal na magkaigwa nin magkaparehong mga pinagkakainteresan asin nagtatabangan sa pag-abot sa parehong mga pasohan. An pag-agom sarong bilog na buhay na kapanugaan, bakong sarong temporaryong kasundoan na basta-basta sanang madudulagan. Sa dakol na nasyon, bakong depisil na makipagdiborsio, alagad sa pagmansay nin sarong Kristiano, an relasyon nin mag-agom sagrado. Natatapos sana iyan huli sa magabat na marhay na dahelan.​—Mateo 19:9.

2. (a) Anong tabang an makukua kan mga mag-agom? (b) Taano ta mahalagang pagmaigotan na magin mapanggana an pag-agoman?

² An sarong parakonseho sa mag-agom nagsabi: “An mapangganang pag-agoman sarong proseso nin dagos-dagos na pagbabago mantang nagpapaluwas iyan nin bagong mga isyu, inaatubang an mga problemang minalataw, asin ginagamit an mga paaging makukua sa kada kamugtakan nin buhay.” Para sa Kristianong mga agom, kaiba sa mga paaging iyan an madonong na hatol hale sa Biblia, pagsuportar kan kapwa mga Kristiano, asin sarong dayupot na relasyon ki Jehova paagi sa pamibi. An sarong mapangganang pag-agoman nagtatagal, asin sa pag-agi nin mga taon, nagtatao iyan nin kaogmahan asin pagkakontento sa mag-agom. Mas mahalaga,  nagtatao iyan nin onra ki Jehova Dios, an Kagtugdas nin pag-agom.​—Genesis 2:​18, 21-​24; 1 Corinto 10:31; Efeso 3:​15; 1 Tesalonica 5:17.

Arogon si Jesus Asin an Saiyang Kongregasyon

3. (a) Sumaryohon an hatol ni Pablo sa mga mag-agom. (b) Anong marahay na halimbawa an itinao ni Jesus?

³ Duwang ribong taon na an nakaagi, nagtao si apostol Pablo nin madonong na hatol sa Kristianong mga mag-agom kan sia magsurat: “Kun paanong an kongregasyon nagpapasakop ki Cristo, siring man an mga agom na babae sa saindang agom na lalaki sa gabos na bagay. Mga agom na lalaki, padagos nindong mamotan an saindong agom na babae, kun paanong an Cristo namoot man sa kongregasyon asin iinatang an saiya man sana dahel kaiyan.” (Efeso 5:​24, 25) Kanigoan karahay na pagkokomparar an ipinahayag digdi! An Kristianang mga agom na padagos na mapakumbabang nagpapasakop sa saindang agom inaarog an kongregasyon sa pagrekonoser asin pagsunod sa prinsipyo nin pagkapayo. An may pagtubod na mga agom na lalaki na padagos na namomotan an saindang agom, baga man sa marahay o sa masakit na mga panahon, pinapatunayan na maingat nindang sinusunod an halimbawa ni Cristo sa pagkamoot sa kongregasyon asin pag-asikaso kaiyan.

4. Paano masusunod kan mga agom na lalaki an halimbawa ni Jesus?

⁴ An Kristianong mga agom na lalaki iyo an payo kan saindang pamilya, alagad sinda igwa man nin payo, si Jesus. (1 Corinto 11:3) Huli kaini, kun paanong inaasikaso ni Jesus an saiyang kongregasyon, an mga agom na lalaki man mamomoton na inaasikaso an saindang pamilya sa espirituwal asin pisikal na paagi, dawa kun mangaipo iyan nin personal na pagsasakripisyo. Mas ineenot ninda an ikakarahay kan saindang pamilya kisa sadiri nindang mga kamawotan asin gusto. Si Jesus nagsabi: “Kun siring, an gabos na boot nindong gibohon sa saindo nin mga tawo, gibohon man nindo sa sainda.” (Mateo 7:12) Nangorognang aplikado an prinsipyong iyan sa pag-agoman. Ipinaheling ini ni Pablo kan sia magsabi: “An mga agom na lalaki kaipuhan na mamoot sa saindang agom na babae siring sa saindang sadiring hawak. . . . Noarin man mayong tawo na naongis sa saiyang sadiring laman; kundi pinapakakan nia asin minamahal iyan.” (Efeso 5:​28, 29) An lalaki maninigong pakakanon asin mahalon an saiyang agom kun paanong mahigos niang pinapakakan asin minamahal an saiyang sadiri.

5. Paano maaarog kan mga agom na babae an Kristianong kongregasyon?

⁵ An diosnon na mga agom na babae hineheling an Kristianong kongregasyon bilang modelo. Kan si Jesus yaon sa daga, an saiyang mga parasunod maogmang binayaan an dati nindang okupasyon asin nagsunod sa saiya. Pagkagadan nia, padagos sindang nagpasakop sa saiya, asin sa nakaaging haros 2,000 na taon, an tunay na Kristianong kongregasyon nagdanay na nagpapasakop ki Jesus asin sinunod an saiyang pangengenot sa gabos na bagay. An Kristianang mga agom dai man minemenos an saindang agom o hinihingoang pasaditon an halaga kan sono sa Kasuratan na areglo nin pagkapayo sa pag-agoman. Imbes, sinda nagsusuportar asin nagpapasakop sa saindang agom na lalaki, nakikikooperar sa sainda, asin sa siring pinaparigon an saindang boot. Kun parehong magawe an mag-agom sa siring na mamomoton na paagi, an saindang pag-agom magigin mapanggana asin pareho ninda mamamatean an kagayagayahan sa saindang relasyon.

Padagos na Makiiba sa Sainda

6. Anong hatol an itinao ni Pedro sa mga agom na lalaki, asin taano ta mahalaga iyan?

⁶ Si apostol Pedro igwa man nin hatol para sa mga  mag-agom, asin an saiyang mga tataramon sa mga agom na lalaki mapuersang marhay. Sia nagsabi: “Padagos na makiiba sa siring na paagi sa [saindong agom na babae] segun sa kaaraman, na tinatawan sinda nin onra siring sa lalagan na mas maluya, an babae, mantang kamo man mga paramana sa kaibanan ninda kan dai na kutana maninigong biyaya nin buhay, tanganing an saindong mga pamibi dai maolang.” (1 Pedro 3:7) Maheheling an pagigin seryoso kan hatol ni Pedro sa huring mga tataramon kan bersikulong iyan. Kun dai matatawan nin onra kan agom na lalaki an saiyang agom, maaapektaran an saiyang relasyon ki Jehova. An saiyang mga pamibi maoolang.

7. Paano maninigong tawan nin onra kan agom na lalaki an saiyang agom?

⁷ Paano, kun siring, matatawan nin onra kan mga agom na lalaki an saindang agom? An pagtao nin onra sa agom na babae nin saro nangangahulogan nin pagtratar sa saiya na may pagkamoot, may paggalang asin dignidad. An siring na may kabootan na pagtratar sa agom na babae garo pambihira para sa dakol. Sarong Griegong iskolar an nagsurat: “Sa ley nin Roma an babae mayo nin mga deretso. Segun sa ley an saiyang legal na mga deretso kapareho kan sa aki. . . . Biyo siang sakop kan saiyang agom na lalaki, asin lubos na nasa kapangyarihan kaini.” Kanigoan na kalaenan sa Kristianong mga katokdoan! Tinatawan nin onra kan agom na lalaki an saiyang agom. An saiyang mga pagtratar sa saiya ginigiyahan kan Kristianong mga prinsipyo, bakong kan personal na kapritso. Dugang pa, makonsiderasyon sia sa saiya “segun sa kaaraman,” na kinokonsiderar na sia lalagan na mas maluya.

Sa Anong Paagi Sarong “Lalagan na Mas Maluya”?

8, 9. Sa anong mga paagi na kapantay kan mga babae an mga lalaki?

⁸ Sa pagsabi na an babae sarong “lalagan na mas maluya,” dai boot sabihon ni Pedro na an mga babae mas maluya sa intelektuwal o espirituwal kisa mga lalaki. Totoo, dakol na Kristianong lalaki an may mga pribilehio sa kongregasyon na dai linalaoman kan mga babae na mapapasainda, asin sa pamilya an mga babae sakop kan saindang agom. (1 Corinto 14:35; 1 Timoteo 2:12) Minsan siring, parehong pagtubod, pakatagal, asin halangkaw na mga pamantayan sa moral an hinahagad sa gabos, mga lalaki asin babae. Asin siring kan sinabi ni Pedro, an agom na lalaki asin an agom na babae pareho “mga paramana  . . . kan dai na kutana maninigong biyaya nin buhay.” Kun mapadapit sa kaligtasan, pantay-pantay an saindang kamugtakan sa atubangan ni Jehova Dios. (Galacia 3:28) An linahidan na mga Kristiano kan enot na siglo an sinuratan ni Pedro. Huli kaini, an saiyang mga tataramon nagpagirumdom sa Kristianong mga agom na lalaki na bilang “kaibang mga paramana ni Cristo,” sinda asin an saindang agom na babae igwa nin magkaparehong langitnon na paglaom. (Roma 8:17) Maabot an aldaw, sinda parehong maglilingkod bilang mga saserdote asin hade sa langitnon na Kahadean nin Dios!​—Kapahayagan 5:10.

⁹ An linahidan na Kristianang mga agom bako nanggad na mas hababa kisa saindang linahidan na Kristianong agom na lalaki. Asin sa pundamental, totoo man iyan sa mga may daganon na paglaom. An mga lalaki asin babae na kabilang sa “dakulang kadaklan” pareho linalabahan an saindang mga gubing asin pinapaputi iyan sa dugo kan Kordero. An mga lalaki asin babae pareho nakikikabtang “aldaw asin banggi” sa pambilog na kinaban na kurahaw nin pag-omaw ki Jehova. (Kapahayagan 7:​9, 10, 14, 15) An mga lalaki asin babae pareho nag-aantisipar na magkamit “kan mamuraway na katalingkasan kan mga aki nin Dios,” sa panahon na mag-oogma sindang marhay sa “tunay na buhay.” (Roma 8:​21; 1 Timoteo 6:19) Baga man kabilang sa linahidan o sa ibang karnero, an gabos na Kristiano iribang naglilingkod ki Jehova bilang “sarong aripompon” sa irarom nin “sarong pastor.” (Juan 10:16) Abaa kamapuersang dahelan para sa Kristianong agom na lalaki asin babae na ipaheling an maninigong onra sa kada saro!

10. Sa anong sentido na ‘mga lalagan na mas maluya’ an mga babae?

¹⁰ Kun siring, sa anong paagi na an mga babae ‘mga lalagan na mas maluya’? Tibaad an boot sabihon ni Pedro iyo an katotoohan na, sa pankagabsan, an mga babae mas sadit asin mas maluya an pisikal na kosog kisa mga lalaki. Dugang pa, sa satong bakong sangkap na kamugtakan, an makangangalas na pribilehio nin pangangaki nagtatao nin grabeng sakit sa pisikal. An mga babae na nasa edad na nin pangangaki puedeng regular na nag-aagi nin pisikal na mga kapawotan. Kaipuhan nanggad ninda an espesyal na pag-asikaso asin konsiderasyon kun nakakamate kan siring na mga kapawotan o tinitios an biyong nakakapagal na kasakitan nin pagbabados asin pangangaki. An agom na lalaki na nagtatao nin onra sa saiyang agom, na rinerekonoser an emosyonal na suporta na kinakaipuhan kaini, makakakontribwir na marhay sa kapangganahan kan pag-agoman.

Sa Pamilyang Nababanga Huli sa Relihion

11. Sa anong sentido puedeng magin mapanggana an pag-agoman dawa magkalaen an relihion kan mag-agom?

¹¹ Pero, paano kun an mag-agom magkalaen an relihiosong mga pagmansay huli ta an saro sa sainda inako an Kristianong katotoohan pakalihis nin pirang panahon pagkakasal ninda alagad an saro dai? Puede daw na magin mapanggana an siring na pag-agoman? An eksperyensia nin dakol nagpapatunay na iyo. An mag-agom na magkalaen an relihiosong mga pagmansay puede pa man giraray na magkaigwa nin mapangganang pag-agoman sa sentido na puede iyan na magtagal asin magtao nin kaogmahan sa saindang duwa. Apuera kaiyan, an pag-agoman balido pa man giraray sa pagheling ni Jehova; “sarong laman” pa man  giraray sinda. Kun siring, hinahatolan an Kristianong mga agom na magdanay sa kaibahan kan daing pagtubod na agom kun an agom na iyan minaoyon na makiiba. Kun igwa nin mga aki, makikinabang sinda sa kaimbodan kan Kristianong magurang.​—1 Corinto 7:​12-​14.

12, 13. Sa pagsunod sa hatol ni Pedro, paano matatabangan nin Kristianang mga agom an daing pagtubod na agom na lalaki?

¹² Si Pedro may itinataong maboot na hatol sa mga Kristianang yaon sa pamilyang nababanga huli sa relihion. Sa pundamental, an saiyang mga tataramon puede man na iaplikar kan Kristianong mga agom na lalaki na nasa kaparehong situwasyon. Si Pedro nagsurat: “Kamong mga agom na babae, magpasakop kamo sa saindong agom na lalaki, tangani na, kun an siisay man dai nagkukuyog sa tataramon, sinda madara minsan daing tataramon paagi sa gawe-gawe kan saindang agom na babae, huli sa pakaheling mismo sa saindong mabining gawe-gawe na may hararom na paggalang.”​—1 Pedro 3:​1, 2.

¹³ Kun mataktikang ikakapaliwanag kan agom na babae an saiyang pagtubod sa saiyang agom, marahay iyan. Pero, paano kun habo siang maghinanyog? Desisyon iyan kan lalaki. Sa ibong kaiyan, dai nangangahulogan na mayo nang paglaom, huli ta an Kristianong paggawe nagtatao man nin mapuersang patotoo. Dakol na agom na lalaki na sa primero bakong interesado o kontra pa ngani sa pagtubod kan saindang agom an nagkaigwa nin “tamang tendensia sa buhay na daing katapusan” pagkatapos na maheling an marahay na paggawe kan saindang agom. (Gibo 13:48) Dawa kun dai akoon kan agom na lalaki an Kristianong katotoohan, puede pa man giraray siang mapahanga sa paggawe kan saiyang agom, na may marahay na mga resulta sa relasyon nin mag-agom. An sarong agom na lalaki na an agom saro sa Mga Saksi ni Jehova nag-admitir na nungka niang maootob an halangkaw nindang mga pamantayan. Sa ibong kaiyan, inapod nia an saiyang sadiri na “maogmang agom na lalaki nin sarong kawiliwiling agom na babae” asin sinserong inomaw an saiyang agom na babae asin an mga kapwa kaini Saksi sa sarong surat sa peryodiko.

14. Paano matatabangan nin mga agom na lalaki an daing pagtubod na agom na babae?

¹⁴ An Kristianong mga agom na lalaki na inaplikar an mga prinsipyo kan mga tataramon ni Pedro nadara man an saindang agom paagi sa saindang paggawe. Nariparo kan daing pagtubod na mga agom na babae an pagigin responsable kan saindang agom, na dai nagsasayang nin kuarta sa pagsigarilyo, pag-inom, asin pagsugal asin dai na naggagamit nin mapanlibak na pananaram. Nakamidbid kan nagkapira sa daing pagtubod na mga agom na iyan an ibang miembro kan Kristianong kongregasyon. Naghanga sinda sa mamomoton na Kristianong kasararoan nin magturugang, asin an naobserbaran ninda sa mga tugang nagparani sa sainda ki Jehova.​—Juan 13:34, 35.

“An Natatagong Persona kan Puso”

15, 16. Anong klaseng paggawe nin Kristianang agom an tibaad makadara sa daing pagtubod na agom na lalaki?

¹⁵ Anong klaseng paggawe an puedeng makadara sa agom na lalaki? An totoo, iyan an paggawe na natural na kinukultibar nin mga Kristiana. Si Pedro nagsabi: “An saindong samno dai magin an panluwas na pagsalapid kan buhok asin an pagsulot nin mga alahas na bulawan o an pagsolog nin pan-ibabaw na mga gubing, kundi magin an natatagong persona kan puso sa dai nalalapang gubing kan toninong asin mahoyong espiritu, na may dakulang halaga sa mga mata nin Dios. Huli ta sa siring man na paagi an banal na mga babae na naglalaom sa Dios nagsamno kaidto sa sainda man sana, na nagpasakop sa saindang agom na lalaki, arog kan pagkuyog ni Sara ki Abraham, na inaapod siang ‘kagurangnan.’ Asin kamo nagin saiyang mga aki, basta kamo padagos na maggibo nin marahay asin dai natatakot sa ano man na ikakahandal.”​—1 Pedro 3:​3-6.

¹⁶ Hinahatolan ni Pedro an sarong Kristiana na dai magsarig sa panluwas na itsura. Imbes, maninigo niang iparisa sa saiyang agom an epekto sa saiyang panlaog na pagkatawo kan mga katokdoan sa Biblia. Ipaheling nia sa saiyang agom an epekto kan saiyang bagong personalidad. Tibaad ikokomparar iyan kan lalaki sa daan na personalidad na dati niang naheheling sa saiyang agom. (Efeso 4:​22-​24) Sierto nanggad na maheheling nia na nakakaginhawa asin nakakaakit an “toninong asin mahoyong espiritu” kan agom na babae. Bako sanang nakakapaogma sa agom na lalaki an siring na espiritu kundi “may dakulang halaga [man iyan] sa mga mata nin Dios.”​—Colosas 3:12.

17. Paanong si Sara sarong marahay na halimbawa para sa Kristianang mga agom?

¹⁷ Nasasambitan si Sara bilang sarong modelo, asin angay siang halimbawa para sa Kristianang mga agom baga man an saindang agom may pagtubod  o dai. Daing duda na minansay ni Sara si Abraham bilang saiyang payo. Dawa sa saiyang puso, inapod nia sia na saiyang “kagurangnan.” (Genesis 18:12) Pero, dai iyan nagpaluya sa dignidad ni Sara. Malinaw nanggad na saro siang babae na makosog sa espirituwal huli kan saiya mismong marigon na pagtubod ki Jehova. Sa katunayan, kabtang sia kan “dakulaon na panganoron nin mga saksi” na an halimbawa nin pagtubod maninigong magpahiro sato na ‘dumalagan na may pakatagal sa paorumbasan na ibinugtak sa atubangan ta.’ (Hebreo 11:11; 12:1) Dai nakakapamenos para sa Kristianang agom na magin arog ni Sara.

18. Anong mga prinsipyo an maninigong iaplikar sa sarong nababangang pamilya?

¹⁸ Sa pamilyang nababanga huli sa relihion, an agom na lalaki pa man giraray an payo. Kun an lalaki an may pagtubod, magigin siang makonsiderasyon sa paniniwala kan saiyang agom baga man dai ikinokompromiso an saiyang sadiring pagtubod. Kun an agom na babae an may pagtubod, dai man nia ikokompromiso an saiyang pagtubod. (Gibo 5:29) Pero, dai nia kokontrahon an pagkapayo kan saiyang agom. Tatawan nia nin onra an saiyang katongdan asin magdadanay na sakop kan “ley kan saiyang agom na lalaki.”​—Roma 7:2.

An Madonong na Giya kan Biblia

19. Ano an nagkapirang impluwensia na nagpapagabat sa mga bogkos nin pag-agoman, alagad paano malalabanan an siring na mga impluwensia?

¹⁹ Ngonyan, dakol na bagay an puedeng magpagabat sa bogkos nin pag-agoman. May mga lalaki na dai ginigibo an saindang mga paninimbagan. May mga babae na habong akoon an pagkapayo kan saindang agom. Sa nagkapirang pag-agoman, minamaltrato nin agom an sadiri niang agom. Para sa mga Kristiano, puedeng makabalo sa kaimbodan an mga sakit sa pagbuhay, pagkabakong sangkap nin tawo, asin an espiritu kan kinaban pati na an inmoralidad asin an biribid na mga pamantayan kaiyan sa buhay. Pero, an Kristianong mga lalaki asin babae na sinusunod an mga prinsipyo sa Biblia, ano man an saindang kamugtakan, nag-aako kan bendisyon ni Jehova. Dawa kun saro sana sa mag-agom an nag-aaplikar kan mga prinsipyo sa Biblia, mas marahay an situwasyon kisa kun mayo ni sarong nag-aaplikar. Dugang pa, namomotan asin tinatabangan ni Jehova an saiyang mga lingkod na nagdadanay na maimbod sa saindang mga kapanugaan sa pag-agom dawa sa masakit na mga kamugtakan. Dai nia linilingawan an saindang kaimbodan.​—Salmo 18:25; Hebreo 6:​10; 1 Pedro 3:12.

20. Ano an hatol ni Pedro para sa gabos na Kristiano?

²⁰ Pagkatapos na hatolan an may agom na mga lalaki asin babae, si apostol Pedro nagkonklusyon paagi sa mamomoton na mga tataramon nin pagparigon sa boot. Sia nagsabi: “Sa katapustapusi, kamo gabos magin parareho an isip, nagpapaheling nin pakikipagkapwa, may kapadangatan na sa magturugang, mapagmalasakit sa mapagpadangat na paagi, mapakumbaba sa isip, na dai nagbabalos nin maraot sa maraot o nin pagmuda sa pagmuda, kundi, al kontraryo, nagbebendisyon, huli ta kamo inapod sa dalan na ini, tanganing kamo magmana nin bendisyon.” (1 Pedro 3:​8, 9) Madonong na hatol nanggad para sa gabos, nangorogna sa mga mag-agom!

Nagigirumdoman daw Nindo?

• Paano inaarog kan Kristianong mga agom na lalaki si Jesus?

• Paano inaarog kan Kristianang mga agom an kongregasyon?

• Sa anong paagi matatawan nin onra kan mga agom na lalaki an saindang agom?

• Ano an pinakamarahay na dapat gibohon nin Kristianang agom na an agom mayo nin pagtubod?

[Mga Hapot Para sa Pag-adal]

[Ritrato sa pahina 16]

An Kristianong agom na lalaki namomoot asin nagmamakolog sa saiyang agom

An Kristianang agom naggagalang asin nagtatao nin onra sa saiyang agom

[Ritrato sa pahina 17]

Bakong arog kan ley sa Roma, an Kristianong mga katokdoan naghahagad sa agom na lalaki na tawan nin onra an saiyang agom

[Ritrato sa pahina 18]

An mga lalaki asin babae na kabilang sa “dakulang kadaklan” pareho nag-aantisipar sa buhay na daing sagkod sa Paraiso

[Ritrato sa pahina 20]

Minansay ni Sara si Abraham bilang saiyang kagurangnan