“Maimbod sa Irarom nin mga Pagbalo”

SA KAPINONAN kan Abril 1951, an poderosong gobyernong Sobyet biglang uminatake sa sarong daing salang grupo nin mga Kristiano sa solnopan na Unyon Sobyet​—an Mga Saksi ni Jehova. Rinibong pamilya​—kaiba an saradit na aki, bados na mga babae, asin mga may edad na​—an isinakay sa mga bagon para sa masakiton na 20 aldaw na halawig na biahe sa tren pasiring sa Siberia. Napaatubang sinda sa permanenteng pagkadistiero sa masakit, primitibong mga kamugtakan.

Kan Abril 2001, an ika-50 anibersaryo kan makasaysayan na pangyayaring ini tinawan nin pagmidbid sa Moscow paagi sa pagluwas nin sarong dokumentaryong video dapit sa pan-aapi sa mga Saksi ni Jehova sa laog nin dakol na dekada sa dating Unyon Sobyet. Sa dokumentaryong ini, isinaysay kan mga historyador asin nakaheling mismo kun paano nakaligtas asin uminoswag pa ngani an mga Saksi sa ibong nin grabeng kasakitan.

An dokumentaryong ini, na Faithful Under Trials​—Jehovah’s Witnesses in the Soviet Union, nadalan na ngonyan kan minilyon sa Rusya asin sa ibang lugar patin inomaw kan publiko sa pankagabsan asin kan mga historyador. An minasunod iyo an duwang komento kan mga iskolar na Ruso na nakaistar sa lugar na pinagdeportaran sa mayoriya kan mga pamilyang Saksi:

“Nagustohan kong marhay an pelikulang ini. Nasusunoan ko na kaidto pa an mga representante kan saindong relihion, alagad pagkatapos na madalan an pelikulang ini, an sakong paborableng impresyon saindo mas kuminosog pa ngani. Propesyonal na marhay an pelikulang ini! Partikularmenteng nasunoan ko an paagi kan pagkapresentar nindo sa lambang persona bilang indibiduwal. Maski ngani ako Ortodokso asin mayo nin intension na bagohon an sakong relihion, naoogma akong marhay sa mga Saksi. Gusto kong magkaigwa nin kopya kan pelikulang ini an samong mga maestra. Nagdesisyon kaming mga maestra na ipadalan iyan sa mga estudyante niamo asin iiba iyan sa samong kurikulum.”​—Propesor Sergei Nikolayevich Rubtsov, dekano kan mga maestra sa historya sa State Pedagogical University, Irkutsk, Rusya.

“Naoogma ako sa pag-abot kan pelikulang ini. Kun may naggigibo nin sarong pelikula manongod sa pan-aapi, pirmeng depisil na marhay na bilogon an estorya sa lohikong paagi. Alagad nahimo nindo iyan. Dai tabi kamo mag-alangan na darahan ako nin dugang pang pelikula nindo.”​—Propesor Sergei Ilyich Kuznetsov, dekano kan mga maestra sa historya sa Irkutsk State University, Rusya.

Inapresyar man na marhay kan mga Saksi ni Jehova na nakaistar sa Siberia an dokumentaryong ini. An minasunod iyo an sampol kan mga reaksion ninda:

“Durante kan panahon na nangyayari an ipinaheling na mga pangyayari sa pelikulang ini, dakol sa Rusya an naimpormaran nin sala manongod sa mga aktibidad kan Mga Saksi ni Jehova. Alagad pakatapos na madalan an pelikula, naheling ninda na an satong organisasyon bako sanang sarong sekta, arog kan dati nindang paghona. An iba na kasuarin pa sana nagin Saksi nagsasabi: ‘Dai mi lamang maimahinar  na namumuhay asin naglilingkod kami kaiba kan Kristianong mga tugang na nagtios nin grabe!’ Pakatapos dalanon an pelikula, ipinahayag kan sarong Saksi an saiyang pagmawot na magin bilog na panahon na ministrong payunir.”​—Anna Vovchuk, na nadistiero sa Siberia.

“Kan ipaheling sa pelikula an pulisiya sekreta na nagtutuktok sa pinto kan harong nin sarong Saksi, tinakigan ako. Kapareho iyan kan tuktok kaidto sa samong pinto, asin nagigirumdoman ko an sakong ina na nagsabi: ‘Tibaad may kasolo sa sarong lugar.’ Alagad an pelikulang iyan nagpagirumdom man sa sako na dakol na Saksi an mas nagdusa kisa sako. An gabos na impormasyon na ini nagtatao sa sato nin orog na kosog asin entusiasmo na padagos na maglingkod ki Jehova.”​—Stepan Vovchuk, na nadistiero sa Siberia.

“Aki ako nin mga Saksing nadistiero. Naghohona ako, kun siring, na dakol na akong nadangog manongod sa mga nangyari kan panahon na idto. Alagad pakatapos kong madalan an pelikulang ini, narealisar ko na haros mayo akong aram. Mantang dinadangog ko an mga interbio, napaluha ako. Ngonyan an mga eksperyensiang iyan bako na sanang mga estorya para sa sako kundi aktuwal na nangyari. An pelikulang ini nagpakosog sa sakong relasyon sa Dios asin nagtabang na andamon ako na tagalan an gabos na kadepisilan sa ngapit.”​—Vladimir Kovash, Irkutsk.

“Para sako, an pelikulang ini mas mapuersa kisa isinurat na kasaysayan. Kan madalan asin madangog ko an mga interbio sa mga tugang, an pagmate ko garo man sana inagihan ko man an gabos na naeksperyensiahan ninda. An halimbawa kan tugang na lalaki na nagdrowing nin mga postkard para sa saradit niang aking babae mantang sia nakabilanggo nagmotibar sako na pagmaigotan na pataroson sa puso kan sadiri kong mga aki an mga katotoohan sa Biblia. Salamat! Pinangyari kan pelikulang ini na mamatean nin orog kisa kasuarin man kan mga Saksi ni Jehova sa Rusya na kabtang sinda kan pambilog na kinaban na organisasyon ni Jehova.”​—Tatyana Kalina, Irkutsk.

“An kasabihan na, ‘An pakaheling nin sarong beses mas marahay kisa pakadangog nin sanggatos na beses’ tunay nanggad na minaaplikar sa pelikulang ini. Iyan buhay na marhay, totoong marhay, konektadong marhay sa samo! Pakatapos na madalan iyan, kinaipuhan ko nin dakol na panahon tanganing mag-isip. Pinangyari kan pelikulang ini na magin biyo akong interesado sa buhay kan nadistierong mga Saksing idto. Ngonyan kun ikinokomparar ko an sakong kamugtakan sa sainda, natatabangan ako na mansayon sa laen na paagi an samong mga problema sa presente.”​—Lidia Beda, Irkutsk.

An Faithful Under Trials sagkod ngonyan ilinuwas na sa 25 lenguahe asin maogmang inaako sa bilog na kinaban. * An bilog na dokumentaryong ini ibrinodkast sa mga estasyon nin telebisyon sa St. Petersburg, Omsk, asin sa ibang siudad sa Rusya, siring man sa mga siudad sa Ucrainia na Vynnytsya, Kerch, Melitopol asin sa rehion nin Lviv. Nag-ako man iyan nin mga premyo hale sa internasyonal na mga junta nin mga kritiko sa pelikula.

An puersa kan mensahe sa dokumentaryong ini maheheling sa mga halimbawa kan rinibong ordinaryong tawo na nagpaheling nin ekstraordinaryong kosog nin boot asin espirituwal na kosog sa laog nin halawig na mga taon nin paglamag. Talagang pinatunayan kan mga Saksi ni Jehova sa Unyon Sobyet na sinda maimbod sa irarom nin mga pagbalo. Kun gusto nindong madalan an dokumentaryong ini, maoogma an mga Saksi ni Jehova na tawan kamo kaiyan. Kontakon tabi an saro sa sainda sa komunidad nindo.

[Nota sa Ibaba]

[Picture Credit Line sa pahina 8]

Stalin: Retrato kan U.S. Army

[Picture Credit Line sa pahina 9]

Stalin: Retrato kan U.S. Army