An Impluwensia ni Jesus sa Bilog na Kinaban

“AN GABOS na report sa ebanghelyo dapit sa sinabi ni Jesus, sa pribado asin sa publiko, puede kutana niang sabihon sa laog nin duwang oras,” an isinurat kan paratradusir sa Biblia na si Edgar Goodspeed. “Alagad ta an kadikit na katokdoan na iyan nakakapukaw na marhay sa boot, nakakapahirong marhay asin nakakatudok na marhay sa boot kaya angay na sabihon na mayo nang iba na nakaimpluwensiang marhay sa kinaban.”

Kan matapos ni Jesu-Cristo an saiyang ministeryo digdi sa daga kan taon 33 C.E., an saiyang mga parasunod may kabilangan na kisuerra mga 120 lalaki asin babae. (Gibo 1:15) Ngonyan, labing duwang bilyon katawo an naghihingakong mga Kristiano. Ginatos na milyon pa an minimidbid si Jesus bilang sarong propeta. An saiyang mga katokdoan tunay nanggad na igwa nin ekstraordinaryong impluwensia sa katawohan.

An impluwensia ni Jesus sa bilog na kinaban rinerekonoser dawa kan mga namomoon na bakong Kristiano. Halimbawa, an Judiong rabi na si Hyman Enelow nagsurat: “Si Jesus nagin an pinakapopular, pinag-adalan na marhay, pinakamaimpluwensiang persona sa kasaysayan nin relihion kan katawohan.” Si Enelow nagsabi man: “Siisay an makakatantsar kan gabos na nagin impluwensia ni Jesus sa katawohan? An pagkamoot na minotibar nia, an karangahan na itinao nia, an karahayan na napatalubo nia, an paglaom asin kagayagayahan na napukaw nia​—gabos iyan dai mapapantayan sa kasaysayan nin tawo. Sa bantog asin marahay na mga tawo na nabuhay kasuarin man, mayo ngani nin makapareho sa pagigin  lakop kan pan-akit asin impluwensia ni Jesus. Sia an nagin pinakainteresanteng persona sa kasaysayan.” Asin an namomoon sa Hindu na si Mohandas K. Gandhi nagsabi: “Mayo akong namidbid na siisay man na nakagibo nin mas dakol para sa katawohan kisa ki Jesus. Sa katunayan, mayo nin diperensia sa Kristianismo.” Minsan siring, idinugang nia: “An problema yaon sa saindo na mga Kristiano. Dai nindo sinusunod an mga itinotokdo nindo.”

An Kakristianohan igwa nin halawig na rekord nin pagkasudya na sunodon an mga katokdoan ni Jesus. Si Cecil John Cadoux, sarong historyador nin Kristianismo, nagkomento na “an gradwal asin dagos-dagos na pag-orog kan pagigin haluag sa moral sa bilog na Iglesia” nakua an “atension kan Kristianong mga namomoon kaidto pang . . . 140 A.D.” Sia nagkomento: “An pagluyang ini kan pagigin mahigpit kan kagurangguranging kaugalean sa moral naturalmenteng magbubunga nin pag-arog sa mga gibo-gibo kan kinaban.”

An dalagan na ini nin mga bagay nagkosog kan ikaapat na siglo, kan inako kan Romanong Emperador na si Constantino an Kristianismo. “Narisa ini kan mga historyador, asin sa nagkapirang kamugtakan ipinagmondo ninda,” an isinurat ni Cadoux, “an grabeng pakikompromiso na ginibo kan Iglesia huli sa saiyang pakialyansa ki Constantino.” Durante kan mga siglo poon kaidto, an naghihingakong mga Kristiano nagkomiter nin dakol na makasusupog na gibo na naglalapastangan sa ngaran ni Cristo.

An mga hapot na interesado kita, kun siring, iyo an: Ano talaga an itinokdo ni Jesus? Asin ano an maninigong magin impluwensia sa sato kan mga katokdoan nia?

[Ritrato sa pahina 3]

“Mayo akong namidbid na siisay man na nakagibo nin mas dakol para sa katawohan kisa ki Jesus.”—Mohandas K. Gandhi

[Ritrato sa pahina 3]

“Mayo nang iba na nakaimpluwensiang marhay sa kinaban.”​—Edgar Goodspeed

[Credit Line]

Culver Pictures