“An Tabang sa Sako Gikan ki Jehova”

An mga Hoben na Nag-oomaw ki Jehova Pinaparahay an Kualidad kan Buhay Ninda

“GUSTO kong magkaigwa kan pinakamarahay na mga bagay sa buhay!” Arog kaiyan an pagkaladawan nin sarong solterito sa saiyang mga linalaoman. Alagad paano makukua nin sarong hoben an pinakamarahay na mga bagay sa buhay? An Biblia nagtatao nin prangkang simbag: “Girumdoma an saimong Kaglalang mantang ika hoben pa!”​—Eclesiastes 12:​1, Contemporary English Version.

An pag-omaw asin paglilingkod ki Jehova bako sanang para sa mga nasa edad na. Si Samuel, na aking lalaki ni Elcana asin Ana, aki pang marhay kan maglingkod sia ki Jehova sa tabernakulo. (1 Samuel 1:​19, 20, 24; 2:11) An sarong Hebreong daragita nagpaheling nin lubos na pagtubod ki Jehova kan isuherir nia na an hepe kan hukbo nin Siria na si Naaman magpasiring ki propeta Eliseo tanganing maomayan sa daot. (2 Hade 5:​2, 3) Sa Salmo 148:​7, 12, pinagbotan an mga aking lalaki sagkod mga aking babae na omawon si Jehova. * Kan sia 12 anyos pa sana, si Jesus nagkainteres na marhay sa paglilingkod sa saiyang Ama. (Lucas 2:41-49) Huli sa pagpatuod sa sainda sa Kasuratan, an nagkapirang aking lalaki na nakaheling ki Jesus sa templo nagkururahaw: “Ligtasan, ipinapamibi niamo, an Aki ni David!”​—Mateo 21:​15, 16.

Pag-omaw ki Jehova Ngonyan

Ngonyan, dakol na hoben sa tahaw kan Mga Saksi ni Jehova an ipinag-oorgolyo an saindang mga tinutubod asin makosog an boot na ipinapakipag-olay iyan sa iba sa eskuelahan asin sa iba pang lugar. Isipon nindo an duwang halimbawa.

Sa Britania, pinag-oolayan sa klase kan 18 anyos na si Stephanie an manongod sa aborsion asin iba pang isyu sa etiko. Positibong sinabi kan maestro na inaako na ngonyan kan kadaklan an aborsion asin mayo nin siisay man na hoben na babae an may dahelan na humabo sa gibong ini. Kan umoyon sa punto de vistang ini an gabos sa klase, napiritan si Stephanie na idepensa an saiyang paninindogan na basado sa Biblia. Nag-abot an oportunidad na gibohon iyan kan hinapot kan maestro si Stephanie kun ano an saiyang opinyon. Maski ngani ninenerbios sia kan enot, ginamit ni Stephanie an okasyon na iyan tanganing ipresentar an punto de vista na sono sa Kasuratan. Sinambit nia an Exodo 21:22-24 asin ipinaliwanag na kun salang danyaran an omboy na nasa matris pa, kun siring an aborsion malinaw na kontra sa kabotan nin Dios.

An maestro, na miembro kan klero, dai pa noarin man nabasa an mga bersikulong ini. An pusoan na pagpatotoo ni Stephanie nagbunga nin dakol na interesanteng pakikipag-olay sa mga kaklase nia dapit sa manlaenlaen na tema. An sarong daragita regular na ngonyan na nag-aako kan pinakabagong mga kopya nin An Torrengbantayan asin Awake!, asin an duwa pa nag-atender sa pandistritong kombension kan Mga Saksi ni Jehova tanganing maheling si Stephanie na nagpabautismo bilang simbolo kan saiyang pagdusay sa Dios.

Inaprobetsaran kan sais anyos na si Vareta, na nakaistar sa Suriname, Amerika del Sur, an oportunidad na omawon an Dios kan an saiyang maestra mangaipo nin karangahan hale sa Kasuratan. Kan makabalik pakalihis na mawara nin tolong aldaw, hinapot kan maestra an saiyang mga estudyante kun aram ninda kun taano ta nawara sia. Sinda suminimbag, “Nagkahelang po kamo, bakong iyo?” “Dai,” an simbag kan maestra. “Nagadan an tugang kong babae, asin namomondo akong marhay. Kaya dapat na toninong sana kamo.”

 Kan hapon na iyan mantang an saiyang ina nagtotorog nin kadikit, si Vareta sibot na nagbubuklat sa haloy nang mga magasin, na binabasa an mga titulo. Nakua nia an An Torrengbantayan na Hulyo 15, 2001, na may titulong “Igwa daw nin Buhay Pagkagadan?” Huling grabe an entusiasmo, pinukaw nia an saiyang ina asin nagsabi, “Nanay, Nanay, helingon mo po ini! Nakakua ako para sa maestra ko nin magasin na manongod sa kagadanan!” Ipinadara an magasin sa maestra na may kaibang surat hale ki Vareta. Isinurat nia: “Espesyalmente pong para saindo ini. Maheheling giraray nindo sa Paraiso an saindong tugang na babae huli ta si Jehova dai noarin man nagpuputik. Nanuga sia na may ipapaabot siang sarong paraiso, bakong sa langit, kundi digdi sa daga.” Ipinahayag kan maestra an saiyang hararom na pag-apresyar sa karangahan na basado sa Biblia na itinao kan mga artikulong ini.

Pagplano Para sa Ngapit

Si Jehova an “maogmang Dios,” asin gusto nia na magin maogma an mga hoben. (1 Timoteo 1:11) An saiya mismong Tataramon nagsasabi: “Mag-ogma ka sa saimong pagkahoben. Mag-ogma ka mantang ika hoben pa.” (Eclesiastes 11:​9, Today’s English Version) Bako sanang sa presente nagheheling si Jehova asin naaaraman nia an panhaloyan na mga epekto kan marahay sagkod maraot na gawe-gawe. Iyan an dahelan kaya sinasadol kan saiyang Tataramon an mga hoben: “Girumdoma, ngonyan, an saimong Kaharohalangkaweng Kaglalang sa mga aldaw kan saimong pagkahoben na lalaki, bago umabot an kapahapahamak na mga aldaw, o dumatong an mga taon na ika masabi: ‘Mayo ako nin kawilihan sa sainda.’”​—Eclesiastes 12:1.

Iyo, mawot ni Jehova na lubos na ikaogma kan mga hoben an mahalagang marhay na balaog na buhay. Paagi sa paggirumdom asin pag-omaw sa Dios, an mga hoben puedeng magkaigwa nin makahulogan, kapakipakinabang na buhay. Dawa kun napapaatubang sa mga kadepisilan, masasabi ninda na may kompiansa: “An tabang sa sako gikan ki Jehova.”​—Salmo 121:2.

[Nota sa Ibaba]

[Blurb sa pahina 9]

“Omawa nindo si Jehova hale sa daga, . . . kamong hoben na mga lalaki asin kamo man na mga daraga.”​—SALMO 148:​7, 12

[Kahon sa pahina 8]

SINUSUPORTARAN NI JEHOVA AN MGA HOBEN

“Ika an sakong paglaom, O Soberanong Kagurangnan na Jehova, an sakong kompiansa poon sa sakong pagkaniaki.”​—Salmo 71:5.

“[An Dios] nagpapabasog sa saimong pagkabuhay nin karahayan; an saimong pagkahoben padagos na nababago arog kan sa agila.”​—Salmo 103:5.