Ano an Impluwensia sa Saindo ni Jesu-Cristo?

HULI sa tinokar niato sa naenot na artikulo, igwa pa daw nin ano man na pagduda na an mga katokdoan ni Jesus nagkaigwa nin epekto sa bilog na kinaban? Pero, an importanteng hapot iyo an, “Ano an impluwensia kan mga katokdoan ni Jesus sa sako personalmente?”

Kaiba sa mga katokdoan ni Jesus an kadakoldakol na tema. An mahalagang mga leksion na ipinapahayag kaiyan makakaapektar sa lambang aspekto kan saindong buhay. Magkonsentrar kita sa itinokdo ni Jesus manongod sa paggibo nin mga prioridad sa buhay, pagkultibar nin pakikikatood sa Dios, pag-establisar nin marahay na relasyon sa iba, pagresolber sa mga problema, asin paglikay sa mga gibo nin kadahasan.

Maggibo nin mga Prioridad sa Buhay

An marikas an dalagan na kinaban ngonyan kadakol kan inuubos na panahon asin kosog niato kaya sa parate napapabayaan an espirituwal na mga bagay. Isipon nindo an kamugtakan nin sarong tawo na labi nang 20 anyos na aapodon niatong Jerry. Minsan ngani ikinakaogma ni Jerry an  pakikipag-olay manongod sa espirituwal na mga tema asin pinapahalagahan nia an nanonodan nia dian, sia nag-aagrangay: “Mayo nanggad ako nin panahon na makikabtang sa mga iyan nin dayaday. Nagtatrabaho ako nin anom na aldaw kada semana. Domingo an solamenteng aldaw na mayo ako nin trabaho. Asin pakatapos kong maasikaso an mga bagay na kaipuhan kong gibohon, pagal na akong marhay.” Kun kamo yaon sa kaparehong masakit na kamugtakan na iyan, puede kamong makinabang sa itinokdo ni Jesus sa Sermon sa Bukid.

Sinabi ni Jesus sa kadaklan na nagkatiripon tanganing magdangog saiya: “Dai na kamo magparahadit dapit sa saindong kalag kun ano an saindong kakakanon o kun ano an saindong iinomon, o dapit sa saindong hawak kun ano an saindong gugubingon. Bako daw na an kalag orog sa kakanon asin an hawak orog sa gubing? Masdan nindo nin odok an mga gamgam sa langit, huli ta sinda dai nagsasabwag nin banhi o nag-aani o nagtitipon sa mga tambobong; pero pinapakakan sinda kan saindong langitnon na Ama. Bako daw na kamo orog na mahalaga kisa sainda? . . . Kaya dai kamo noarin man maghadit asin magsabi, ‘Ano an samong kakakanon?’ o, ‘Ano an samong iinomon?’ o, ‘Ano an samong gugubingon?’ Huli ta an gabos na ini iyo an mga bagay na hinahanap na gayo kan mga nasyon. Huli ta an saindong langitnon na Ama nakakaaram na kaipuhan nindo an gabos na bagay na ini. Kun siring, padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.” (Mateo 6:25-33) Ano an manonodan niato digdi?

Dai man boot sabihon ni Jesus na maninigo niatong pabayaan an pag-asikaso sa pisikal na mga pangangaipo niato asin kan mga miembro kan satong pamilya. “Kun an siisay man dai nagsusustento sa mga sadiri nia, asin orog na sa kasararo nia sa harong,” an sabi kan Biblia, “sia nagpainda kan pagtubod asin orog pa karaot sa tawong dai nin pagtubod.” (1 Timoteo 5:8) Minsan siring, nangangako si Jesus na kun eenoton niato an pinakamahalaga asin tatawan nin prioridad an espirituwal na mga bagay, seseguradohon nin Dios na mapapanigoan an iba niatong pangangaipo. An leksion digdi iyo an manongod sa paggibo nin mga prioridad. An pagsunod sa sadol na ini mabunga nin kaogmahan, huli ta “maogma idtong mga nakakamate kan saindang espirituwal na pangangaipo.”​—Mateo 5:3.

Kultibaron an Pakikikatood sa Dios

Naheheling kan mga nakakamate kan saindang espirituwal na pangangaipo na kaipuhan an pagkultibar nin marahay na relasyon sa Dios. Paano niato ineestablisar an marahay na relasyon sa siisay man? Bako daw na nagmamaigot kitang mamidbid na marhay an tawong iyan? Kaipuhan na magtao kita nin panahon tanganing maaraman an saiyang mga punto de vista, aktitud, abilidad, nagibo, gusto, asin dai gusto. Totoo man iyan pag-abot sa pagpatalubo nin pakikikatood sa Dios. Kaipuhan an tamang kaaraman manongod sa saiya. Kan namimibi sa Dios manongod sa saiyang mga disipulo, si Jesus nagsabi: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) Iyo, an pagkultibar nin kadayupotan sa Dios nangangaipo na mamidbid niato sia. An solamenteng gikanan kan kaaraman na iyan iyo an ipinasabong na Tataramon nin Dios, an Biblia. (2 Timoteo 3:16) Kaipuhan na magtagama kita nin panahon tanganing pag-adalan an Kasuratan.

Minsan siring, an kaaraman sana bakong igo. Sa pamibi man sanang iyan, si Jesus nagsabi: “Kinuyog ninda [an saiyang mga disipulo] an saimong tataramon.” (Juan 17:6) Kaipuhan na bako sanang kumua kita nin kaaraman manongod sa Dios kundi humiro man kita kaoyon kan kaaraman na iyan. Sa paano pang paagi kita puedeng magin katood nin Dios? Puede daw niatong laoman na matalubo  an satong pakikikatood sa siisay man kun tutuyohon niatong maghiro sa paagi na kontra sa mga ideya asin prinsipyo kan sarong iyan? Kun siring, an mga punto de vista asin prinsipyo nin Dios an kaipuhan na gumiya sa gabos niatong lakdang sa buhay. Isipon nindo kun paanong an duwa sa saiyang mga prinsipyo minaaplikar sa satong relasyon sa ibang tawo.

Mag-establisar nin Marahay na Relasyon sa Iba

Sa sarong okasyon, nagsaysay si Jesus nin sarong halipot na estorya tanganing magtokdo nin mahalagang leksion dapit sa mga relasyon nin tawo. Sia nagtaram manongod sa sarong hade na gustong makipagkuenta sa saiyang mga surugoon. Pero, an saro sa sainda igwa nin dakulaon na utang asin mayo nin paagi na mabayadan iyan. Ipinagboot kan kagurangnan na an tawong iyan, an saiyang agom, asin an saiyang mga aki ipabakal tanganing makabayad. An may utang nagluhod asin nakimaherak: “Halathalaton mo ako asin babayadan ko an gabos sa saimo.” Huling naherak, kinanselar kan kagurangnan an saiyang utang. Alagad an oripon na iyan huminale, nanompongan an kapareho nia oripon na may utang sa saiya nin kadikit na kuarta, asin hinagad an kabayadan. Minsan ngani an kapareho nia oripon nakimaherak, an enot na oripon ipinabilanggo sia sagkod na makabayad sia kan gabos na utang nia. Kan maaraman ini kan hade, sia naanggot. “Bako daw na . . . maninigo ka man na maherak sa saimong kapwa oripon, kun paanong ako naherak man sa saimo?” an sabi nia. Asin ipinabilanggo nia an habong magpatawad na oripon sagkod na mabayadan nia gabos an utang nia. Ipinapaheling an leksion sa estoryang iyan, si Jesus nagsabi: “Siring man an gigibohon sa saindo kan sakong langitnon na Ama kun dai kamo magpatinawadtawadan gikan sa saindong puso, an balang saro sa saiyang tugang.”​—Mateo 18:23-35.

Bilang bakong sangkap na mga tawo, dakol kitang sala. Nungka niatong mababayadan sa Dios an dakulaon na utang na natipon niato huli sa mga paglapas sa saiya. An magigibo sana niato iyo an maghagad kan saiyang kapatawadan. Asin si Jehova Dios andam na magpatawad kan gabos niatong pagkukulang, sa kondisyon na magpatawad kita kan mga kasalan na nakomiter kan satong mga tugang tumang sa sato. Kanigoan kamapuersang leksion iyan! Tinokdoan ni Jesus an saiyang mga parasunod na mamibi: “Ipatawad mo samo an samong mga utang, siring na kami man nagpatawad sa mga may utang sa samo.”​—Mateo 6:12.

Resolberan an Pinakagamot kan mga Problema

Si Jesus eksperto kun dapit sa pagsabot sa naturalesa nin tawo. An saiyang hatol iyo an pagresolber sa pinakagamot kan mga problema. Isipon nindo an minasunod na duwang halimbawa.

“Nadangog nindo na sinabi sa mga tawo kan suanoy na mga panahon, ‘Dai ka maggadan; alagad an siisay man na mangadan maninimbag sa korte nin hustisya,’” an sabi ni Jesus. “Minsan siring, sinasabi ko sa saindo na an lambang tawo na nagpapadagos na anggot nin grabe sa saiyang tugang maninimbag sa korte nin hustisya.” (Mateo 5:​21, 22) Ipinaheling digdi ni Jesus na an dahelan kan problema nin paggadan mas hararom pa kisa mismong madahas na akto. Iyan an aktitud na minatalubo sa puso kan paragadan. Kun dai tinogotan kan mga tawo na magkaigwa sinda nin paghinanakit o kaanggotan, an plinanong kadahasan dai mangyayari. Kanigoan kadakol na pagpabolos nin dugo an nalikayan kutana kun iinaplikar an katokdoan na ini!

Mangnohon kun paanong tinawan nin atension ni Jesus an pinakadahelan nin saro pang problema na nagbubunga nin grabeng kamondoan. Sinabihan nia an kadaklan: “Nadangog nindo na sinabi, ‘Dai ka magsambay.’ Alagad ako nagsasabi sa saindo na an lambang saro na magparaheling sa sarong babae tanganing magkaigwa nin horot sa saiya nagsasambay na sa saiya sa saiyang puso. Ngonyan, kun an toong mata mong iyan nagpapasingkog sa saimo, hulwata iyan asin tapokan iyan.” (Mateo 5:27-29) Itinokdo ni Jesus na an problema mas hararom an dahelan kisa mismong inmoral na gawe-gawe. An dahelan mas naeenot dian​—an inmoral na mga pagmawot. Kun an saro nagsasayumang pagparaisipon an salang mga pagmawot asin ‘hinuhulwat iyan’ sa saiyang isip, sa siring madadaog nia an potensial na problema nin inmoral na gawe-gawe.

“Sarungan an Saimong Espada”

Kan banggi na pinasaloiban asin inarestar si Jesus, hinulbot kan saro sa saiyang mga disipulo an espada kaini tanganing idepensa sia. Pinagbotan  sia ni Jesus: “Sarungan an saimong espada, huli ta an gabos na minabingat nin espada sa espada man magagadan.” (Mateo 26:52) Kan sumunod na aga, sinabihan ni Jesus si Poncio Pilato: “An sakong kahadean bakong kabtang kan kinaban na ini. Kun an sakong kahadean kabtang kan kinaban na ini, nakipaglaban kutana an sakuyang mga lingkod tanganing dai ako ikatao sa mga Judio. Kundi, sa katotoohan, an sakong kahadean bakong gikan digdi.” (Juan 18:36) An katokdoan daw na ini bakong praktikal?

Ano an aktitud kan enot na mga Kristiano sa itinokdo ni Jesus manongod sa dai paggamit nin kadahasan? An librong The Early Christian Attitude to War nagsasabi: “Mantang ipinapaheling kan mga iyan [mga katokdoan ni Jesus] na sala an gabos na paggamit nin kadahasan asin pagdanyar sa iba, an malinaw na ipinaparisa iyo an pagigin ilegal kan pakikikabtang sa guerra . . . Sinunod nanggad kan enot na mga Kristiano an sinabi ni Jesus, asin sinabot nin literal an saiyang mga itinokdo na pagigin kalmado asin dai paglaban. Iinasosyar nindang marhay sa katoninongan an saindang relihion; marigon na kinondenar ninda an guerra huli sa kalabot dian na pagpabolos nin dugo.” Laen kutanang marhay an dalagan nin kasaysayan kun talagang sinunod kan gabos na naghihingakong Kristiano an katokdoan na ini!

Puede Kamong Makinabang sa Gabos na Katokdoan ni Jesus

An mga katokdoan ni Jesus na inestudyaran niato magayon, simple, asin mapuersa. An katawohan puedeng makinabang sa pagigin pamilyar sa saiyang mga katokdoan asin pag-aplikar kaiyan. *

An mga Saksi ni Jehova sa saindong lugar maoogmang tabangan kamo na maheling kun paano kamo makikinabang sa pinakamadonong na mga katokdoan na isinabi kasuarin man nin siisay man na tawo. Maogma niamo kamong iniimbitaran na kontakon sinda o sumurat sa adres na nasa pahina 2 kan magasin na ini.

[Nota sa Ibaba]

[Ritrato sa pahina 5]

“Pinapakakan sinda kan saindong langitnon na Ama”

[Ritrato sa pahina 7]

An mga katokdoan ni Jesus puedeng magkaigwa nin marahay na impluwensia sa buhay nindo