“Kamo Binakal nin Sarong Halaga”
“Kamo Binakal nin Sarong Halaga”
“Kamo binakal nin sarong halaga. Pamurawaya nanggad nindo an Dios.”—1 CORINTO 6:20.
1, 2. (a) Oyon sa Ley ni Moises, paano tatrataron an mga oripon na Israelita? (b) Igwa nin anong pagpili an oripon na namomotan an saiyang kagurangnan?
“LAKOP asin inaako nin dakol an pan-ooripon sa suanoy na kinaban,” an sabi kan Holman Illustrated Bible Dictionary. Sinabi pa kaiyan: “An ekonomiya kan Egipto, Grecia, asin Roma nakadepende sa trabaho nin mga oripon. Kan enot na siglong Kristiano, saro sa tolo katawo sa Italia asin saro sa lima sa iba pang nasyon an oripon.”
2 Maski ngani may pan-ooripon na man sa suanoy na Israel, sinegurado kan Ley ni Moises na makakaako nin proteksion an mga oripon na Hebreo. Halimbawa, hinagad kan Ley na an sarong Israelita makakapaglingkod bilang oripon na dai malampas sa anom na taon. Sa ikapitong taon, totogotan na sia na ‘humale bilang saro na pinatalingkas na dai nin bayad.’ Alagad an mga reglamento may labot sa pagtratar sa mga oripon rasonableng marhay asin maheherakon kaya ginibo kan Ley ni Moises an minasunod na probisyon: “Kun an oripon may pag-insistir na magsabi, ‘Talagang namomotan ko an sakong kagurangnan, an sakong agom asin an sakong mga aki; habo kong maghale bilang saro na pinatalingkas,’ kun siring irarani sia kan saiyang kagurangnan sa tunay na Dios asin isasandig sia sa pinto o harigi kan pinto; asin tutusokon kan saiyang kagurangnan an saiyang talinga paagi sa guwat, asin sia magigin saiyang oripon sagkod sa panahon na daing talaan.”—Exodo 21:2-6; Levitico 25:42, 43; Deuteronomio 15:12-18.
3. (a) Anong klase nin kaoripnan an inako kan enot na siglong mga Kristiano? (b) Ano an nagpapahiro sato na paglingkodan an Dios?
3 An probisyon nin boluntad na pagkaoripon nagtao nin patanaw sa ngapit kan klase nin kaoripnan na dian napapasairarom an tunay na mga Kristiano. Halimbawa, an mga kagsurat kan Biblia na si Pablo, Santiago, Pedro, asin Judas ipinamidbid an saindang sadiri bilang mga oripon nin Dios asin ni Cristo. (Tito 1:1; Santiago 1:1; 2 Pedro 1:1; Judas 1) Ipinagirumdom ni Pablo sa mga Kristiano sa Tesalonica na sinda “nagdolok sa Dios hale sa [saindang] mga idolo tanganing magpaoripon sa sarong nabubuhay asin tunay na Dios.” (1 Tesalonica 1:9) Ano an nagpahiro sa mga Kristianong idto na magin gikan sa boot na mga oripon nin Dios? Bueno, ano an nagmomotibar na puersa sa kamugtakan kan oripon na Israelita na tinalikdan an saiyang personal na katalingkasan? Bako daw na pagkamoot sa saiyang kagurangnan? Nakabasar sa pagkamoot sa Dios an Kristianong kaoripnan. Kun mamidbid asin mamotan niato an tunay asin nabubuhay na Dios, napapahiro kita na paglingkodan sia “sa bilog [niatong] puso asin bilog [niatong] kalag.” (Deuteronomio 10:12, 13) Pero, ano an kalabot sa pagigin mga oripon nin Dios asin ni Cristo? Paano kaini naaapektaran an satong pangaroaldaw na buhay?
“Gibohon an Gabos na Bagay sa Ikakamuraway nin Dios”
4. Paano kita nagigin mga oripon nin Dios asin ni Cristo?
4 An oripon tinawan nin kahulogan bilang “sarong tawo na legal na pagsadiri nin ibang tawo o ibang mga tawo asin obligado na kumuyog nin absoluto.” Nagigin kitang legal na pagsadiri ni Jehova kun idinudusay niato an satong buhay sa saiya asin nagpapabautismo. “Bako nindong sadiri an saindo man sana, huli ta kamo binakal nin sarong halaga,” an paliwanag ni apostol Pablo. (1 Corinto 6:19, 20) Siempre, an halaga na iyan iyo an atang na pantubos ni Jesu-Cristo, huli ta basado dian inaako kita nin Dios bilang saiyang mga lingkod, baga man kita linahidan na mga Kristiano o kita mga kairiba ninda na may daganon na paglaom. (Efeso 1:7; 2:13; Kapahayagan 5:9) Sa siring, poon sa panahon kan satong bautismo, “sadiri kita ni Jehova.” (Roma 14:8) Huling binakal kita sa mahal na marhay na dugo ni Jesu-Cristo, nagigin man kitang mga oripon nia asin obligado na otobon an saiyang mga togon.—1 Pedro 1:18, 19.
5. Bilang mga oripon ni Jehova, ano an pangenot na obligasyon niato, asin paano niato maootob iyan?
5 An mga oripon dapat na magkuyog sa saindang kagurangnan. Boluntad an satong pagkaoripon asin minomotibar iyan kan pagkamoot niato sa Kagurangnan. “Ini iyo an boot sabihon kan pagkamoot sa Dios,” an sabi kan 1 Juan 5:3, “na kuyogon niato an saiyang mga togon; pero an saiyang mga togon dai nakakapagabat.” Kun siring, para sa sato, an satong pagkuyog prueba kan satong pagkamoot saka kan satong pagpasakop. Risang-risa iyan sa gabos tang ginigibo. “Kamo man nagkakakan o nag-iinom o ano pa man an ginigibo,” sabi ni Pablo, “gibohon an gabos na bagay sa ikakamuraway nin Dios.” (1 Corinto 10:31) Sa pangaroaldaw na buhay, dawa sa saradit na paagi, boot niatong ipaheling na ‘nagpapaoripon kita ki Jehova.’—Roma 12:11.
6. Paano an pagigin mga oripon nin Dios nakakaapektar sa ginigibo niatong mga desisyon sa buhay? Iilustrar ini paagi sa halimbawa.
6 Halimbawa, kun naggigibo nin mga desisyon, boot niatong maingat na konsideraron an kabotan kan satong langitnon na Kagurangnan, si Jehova. (Malaquias 1:6) An depisil na mga desisyon puedeng makabalo sa satong pagkuyog sa Dios. Hihimateon daw niato sa panahon na iyan an saiyang hatol imbes na sunodon an inklinasyon kan satong “madaya” asin “desesperadong” puso? (Jeremias 17:9) Si Melisa, sarong daing agom na Kristiana, dai pa sana nahahaloy na nabautismohan kan an sarong hoben na lalaki magkakursonada sa saiya. Garo toltol man an lalaki, asin nakikipag-adal na sia sa Biblia sa mga Saksi ni Jehova. Minsan siring, kinaolay si Melisa nin sarong magurang sa kongregasyon manongod sa kadonongan kan pagsunod sa pagboot ni Jehova na mag-agom ‘sana sa Kagurangnan.’ (1 Corinto 7:39; 2 Corinto 6:14) “Dai nagin pasil sa sako na sunodon an sadol na ini,” an pag-admitir ni Melisa. “Alagad nagdesisyon ako na huling nagdusay na ako sa Dios na gibohon an saiyang kabotan, kukuyogon ko an saiyang klarong mga instruksion.” Hinohorophorop an nangyari, sia nagsabi: “Naoogma akong marhay na sinunod ko an sadol. Dai nahaloy nagpondo an lalaki sa pag-adal. Kun ipinagpadagos ko an relasyon na iyan, naagom na kutana ako nin daing pagtubod.”
7, 8. (a) Taano ta dai niato maninigong pag-isipon nin labi-labi an pagpaogma sa mga tawo? (b) Iilustrar kun paano mapapangganahan an pagkatakot sa tawo.
7 Bilang mga oripon nin Dios, dai kita dapat magin oripon nin mga tawo. (1 Corinto 7:23) Totoo, mayo sa sato an gusto na magin bakong popular, alagad dapat na girumdomon niato na napapalaen an mga pamantayan nin mga Kristiano sa mga nasa kinaban. Si Pablo naghapot: “Naghihingoa daw akong makapaogma sa mga tawo?” Ini an saiyang konklusyon: “Kun sagkod ngonyan ako nagpapaogma sa mga tawo, ako bakong oripon ni Cristo.” (Galacia 1:10) Dai talaga kita puedeng magpadara sa impluwensia nin kairiba asin magin mga nagpapaogma sa mga tawo. Kun siring, ano an puede niatong gibohon kun napapaatubang sa pan-iimpluwensia na umarog?
8 Estudyare an halimbawa ni Elena, sarong hoben na Kristiana sa España. May nagkapira siang kaklase na nagdodonar nin dugo. Aram ninda na si Elena, saro sa Mga Saksi ni Jehova, dai madonar nin dugo o mapaineksion nin dugo. Kan magkaigwa nin oportunidad na ipaliwanag an saiyang paninindogan sa bilog na klase, nagboluntaryo si Elena na magtao nin presentasyon. “An totoo, ninerbios akong marhay sa paggibo kaini,” an paliwanag ni Elena. “Alagad nag-andam akong marhay, asin nakakabigla an mga resulta. Nakua ko an paggalang kan dakol sa sakong mga kapwa estudyante, asin sinabihan ako kan sakong maestro na naghahanga sia sa sakong ginigibo. Orog sa gabos, nakamate ako nin satispaksion na ikinadepensa ko an ngaran ni Jehova asin malinaw na ikinapaliwanag an mga dahelan kan sakong sono sa Kasuratan na paninindogan.” (Genesis 9:3, 4; Gibo 15:28, 29) Iyo, bilang mga oripon nin Dios asin ni Cristo, lataw an satong kalaenan. Minsan siring, posibleng marhay na makua niato an paggalang kan mga tawo kun preparado kita na idepensa na may paggalang an satong mga paniniwala.—1 Pedro 3:15.
9. Ano an manonodan niato sa anghel na nagpaheling ki apostol Juan?
9 An paggirumdom na kita mga oripon nin Dios makakatabang man na papagdanayon kitang mapakumbaba. Sa sarong okasyon, napahangang marhay si apostol Juan sa makangangalas na bisyon kan langitnon na Jerusalem kaya naglaob sia sa pagsamba sa pamitisan kan anghel na nagserbi bilang parataram nin Dios. “Mag-ingat ka!” an sabi kan anghel sa saiya. “Dai mo iyan paggibohon! Ako kapwa mo sana oripon asin kan saimong mga tugang na propeta asin kan mga nag-ootob kan tataramon kan balumbon na ini. Sambahon mo an Dios.” (Kapahayagan 22:8, 9) Kanigoan karahay na halimbawa an itinao kan anghel para sa gabos na oripon nin Dios! An nagkapirang Kristiano tibaad nasa mga katongdan nin espesyal na responsibilidad sa kongregasyon. Minsan siring, si Jesus nagsabi: “An siisay man na boot na magin dakula sa saindo dapat na iyo an mani paralingkod sa saindo, asin an siisay man na gustong magin enot sa saindo dapat na iyo an mani oripon nindo.” (Mateo 20:26, 27) Bilang mga parasunod ni Jesus, gabos kita oripon.
“An Ginibo Niamo Iyo an Dapat Niamong Gibohon”
10. Tumao nin mga halimbawa sa Kasuratan na magpapaheling na dai nagin pirmeng pasil para sa maimbod na mga lingkod nin Dios an paggibo kan saiyang kabotan.
10 An paggibo kan kabotan nin Dios bakong pirmeng pasil para sa bakong sangkap na mga tawo. Si propeta Moises nagduwaduwang sumunod kan padumanon sia ni Jehova tanganing iluwas an mga aki ni Israel sa pagkaoripon sa Egipto. (Exodo 3:10, 11; 4:1, 10) Pakaresibi kan asignasyon na ibalangibog an mensahe nin paghokom sa mga taga Ninive, “nagbuhat asin nagdulag [si Jonas] hale sa atubangan ni Jehova pasiring sa Tarsis.” (Jonas 1:2, 3) Si Baruc, an parasurat na sekretaryo ni propeta Jeremias, nagreklamo na sia napapagal na. (Jeremias 45:2, 3) Ano an maninigong magin reaksion niato kun an satong personal na kamawotan o gusto kontra sa paggibo kan kabotan nin Dios? An sarong ilustrasyon na itinao ni Jesus nagtatao kan simbag.
11, 12. (a) Isaysay sa halipot an ilustrasyon ni Jesus na nakarekord sa Lucas 17:7-10. (b) Anong leksion an manonodan niato sa ilustrasyon ni Jesus?
11 Si Jesus nagtaram manongod sa sarong oripon na bilog na aldaw na inaataman sa oma an aripompon kan saiyang kagurangnan. Kan magpuli an oripon, na pagal-pagal huli sa mga 12 oras na magabat na trabaho, dai sia inimbitaran kan saiyang kagurangnan na tumukaw asin magkakan nin masiram na pamanggihan. Imbes, an kagurangnan nagsabi: “Maggarogaro ka na para sa sakong pamanggihan, asin magtapi ka na patin paglingkodan mo ako sagkod na ako makakakan asin makainom, dangan puede ka nang magkakan asin uminom.” Maaasikaso sana kan oripon an sadiri niang pangangaipo pakatapos na mapaglingkodan nia an saiyang kagurangnan. Tinapos ni Jesus an ilustrasyon sa pagsabing: “Kaya kamo man, kun nahaman na nindo an gabos na ipinapagibo sa saindo, magsabi kamo, ‘Kami mga oripon na daing kamanungdanan. An ginibo niamo iyo an dapat niamong gibohon.’”—Lucas 17:7-10.
12 Dai itinao ni Jesus an ilustrasyon na ini tanganing ipaheling na dai inaapresyar ni Jehova an ginigibo niato na paglilingkod sa saiya. An Biblia malinaw na nagsasabi: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran.” (Hebreo 6:10) Imbes, an punto kan parabola ni Jesus iyo na an sarong oripon dai mapapanigoan an saiyang sadiri o makakakonsentrar sa sadiri niang kaginhawahan. Kan idusay niato an satong sadiri sa Dios asin pilion niato na magin saiyang mga oripon, nag-oyon kita na enoton an saiyang kabotan kisa kan sa sato. Kaipuhan na ipasakop niato an satong sadiring kabotan sa kabotan nin Dios.
13, 14. (a) Sa anong mga kamugtakan tibaad kaipuhan niatong pangganahan an mga gusto niato? (b) Taano ta maninigo niatong togotan na an kabotan nin Dios an mangibabaw?
13 An regular na pag-adal sa Tataramon nin Dios asin sa mga publikasyon kan “maimbod asin mapagmansay na oripon” tibaad mangaipo nin dakulang paghihingoa sa parte niato. (Mateo 24:45) Tibaad arog kaini an kamugtakan nangorogna kun depisil para sa sato an pagbasa poon pa kaidto o kun “hararom na mga bagay nin Dios” an tinotokar nin sarong publikasyon. (1 Corinto 2:10) Pero, bako daw na maninigong mag-iskedyul kita nin panahon para sa personal na pag-adal? Tibaad kaipuhan niato na disiplinahon an satong sadiri na tumukaw asin tagamahan nin panahon an pag-aadalan. Pero, kun dai niato iyan gigibohon, paano niato magugustohan an “matagas na kakanon [na] para sa mga maygurang”?—Hebreo 5:14.
14 Kumusta man an mga panahon na minapuli kita sa harong na pagal na pakatapos nin maghapon na trabaho? Tibaad kaipuhan niatong piriton an satong sadiri na umatender sa Kristianong mga pagtiripon. O tibaad dai niato gusto an paghuhulit sa mga estranghero. Rinekonoser mismo ni Pablo na may mga panahon na ipinapahayag niato an maogmang bareta na ‘tumang sa boot niato.’ (1 Corinto 9:17) Minsan siring, ginigibo niato an mga bagay na ini huling si Jehova—an satong langitnon na Kagurangnan, na satong namomotan—sinasabihan kita na maninigo niatong gibohon iyan. Asin bako daw na pirme kitang nakakamate nin satispaksion asin kaginhawahan pakatapos kan satong paghihingoa na mag-adal, mag-atender sa mga pagtiripon, asin maghulit?—Salmo 1:1, 2; 122:1; 145:10-13.
Dai Magsalingoy sa “mga Bagay na Nasa Hudian”
15. Paano si Jesus nagtao nin halimbawa sa pagpapasakop sa Dios?
15 Ipinaheling ni Jesu-Cristo sa daing kabaing na paagi an saiyang pagpasakop sa saiyang langitnon na Ama. “Ako naghilig hale sa langit, bakong sa paggibo kan sadiri kong boot, kundi kan boot kaidtong nagsugo sa sako,” an sabi ni Jesus sa saiyang mga disipulo. (Juan 6:38) Kan nasa labi-labing kamondoan sa hardin nin Getsemani, sia namibi: “Ama ko, kun mapupuede, togoti na an kopang ini lumihis sa sako. Minsan siring, bakong an boot ko, kundi an boot mo.”—Mateo 26:39.
16, 17. (a) Paano niato maninigong mansayon an mga bagay na satong binayaan? (b) Ipaheling kun gurano karealistiko si Pablo sa pagtantsar kan saiyang kinabanon na mga oportunidad bilang “tapok.”
16 Gusto ni Jesu-Cristo na magdanay kitang maimbod sa satong desisyon na magin mga oripon nin Dios. Sia nagsabi: “Mayo nin tawo na nagkapot sa arado asin nagsalingoy sa mga bagay na nasa hudian na magkakanigo sa kahadean nin Dios.” (Lucas 9:62) An pagparaisip sa tinalikdan na niato bako nanggad na tamang gibohon kun nagpapaoripon kita sa Dios. Imbes, maninigo niatong pakamahalon an nakamtan niato kan satong pilion na kita magin mga oripon nin Dios. Sa mga taga Filipos, si Pablo nagsurat: “Tunay na ibinibilang ko man an gabos na bagay na kapierdihan huli sa daing kaagid na halaga kan kaaraman manongod ki Cristo Jesus na sakong Kagurangnan. Huli saiya tinios ko an pagkawara kan gabos na bagay asin ibinibilang ko an mga iyan na tapok, tanganing makamtan ko si Cristo.”—Filipos 3:8.
17 Isip-isipa an gabos na bagay na ibinilang ni Pablo na tapok asin binayaan karibay kan espirituwal na mga balos bilang oripon nin Dios. Bako sanang mga kaginhawahan kan kinaban an binayaan nia kundi pati an posibilidad na magin namomoon kan Judaismo. Kun ipinagpadagos ni Pablo an pag-otob sa Judaismo, puede nanggad na luminangkaw an posisyon nia na kapareho kan ki Simeon, an aki kan edukador ni Pablo, na si Gamaliel. (Gibo 22:3; Galacia 1:14) Si Simeon nagin namomoon kan mga Fariseo asin nagkapot nin prominenteng kabtang—sa ibong nin nagkapirang pagduda—sa pagrebelde nin mga Judio tumang sa Roma kan 66-70 C.E. Nagadan sia sa ralaban na iyan, magsalang sa kamot kan mga Judiong radikal o sa hukbong Romano.
18. Tumao nin halimbawa tanganing ipaheling kun paano nagtatao nin balos an espirituwal na mga nagibo.
18 Dakol sa mga Saksi ni Jehova an nagsunod sa halimbawa ni Pablo. “Sa laog nin pirang taon pakatapos na pumondo sa pag-eskuela, nakakua ako nin trabaho bilang sarong sekretarya de ehekutibo nin sarong prominenteng abogado sa Londres,” an sabi ni Jean. “Nagustohan ko an sakong trabaho asin naggaganar ako nin dakol na kuarta, alagad sa sakong puso aram ko na makakagibo pa ako nin orog tanganing paglingkodan si Jehova. Sa katapustapusi, nagdemitir ako sa trabaho asin nagpoon na magpayunir. Nagpapasalamat akong marhay na ginibo ko an lakdang na iyan haros 20 taon na an nakaagi! An sakong bilog na panahon na paglilingkod an nagparahay sa kualidad kan sakong buhay na labi kisa ano man na trabahong pagigin sekretarya. Mayong makakatao nin mas dakulang satispaksion kisa pakaheling kun paano binabago kan Tataramon ni Jehova an buhay nin sarong tawo. Marahayon an pagkaigwa nin kabtang sa pagbabagong iyan. An itinatao niato ki Jehova dai nanggad ikakakomparar sa inaako niato.”
19. Ano an maninigo na desididong gibohon niato, asin taano?
19 An satong mga kamugtakan puedeng magbago huli sa panahon. Minsan siring, an satong pagdusay sa Dios dai nagbabago. Mga oripon pa man giraray kita ni Jehova, asin ipinapabaya nia sa sato an pagdesisyon kun paano niato gagamiton sa pinakamarahay na paagi an satong panahon, kosog, talento, asin iba pang kapakipakinabang na bagay. Huli kaini, an mga desisyon na ginigibo niato sa bagay na ini puedeng magpabanaag kan satong pagkamoot sa Dios. Ipinapaheling man kaiyan kun sagkod saen an pagigin andam niato na gumibo nin personal na mga pagsasakripisyo. (Mateo 6:33) Ano man an satong kamugtakan, bako daw na maninigong determinado kita na itao ki Jehova an satong pinakamakakaya? Si Pablo nagsurat: “Kun an pagigin andam yaon na, iyan orog nang inaako sono sa kun ano an nasa tawo, bakong sono sa kun ano an mayo sa tawo.”—2 Corinto 8:12.
“Nagbubunga Na Kamo”
20, 21. (a) Nagbubunga nin ano an mga oripon nin Dios? (b) Paano binabalosan ni Jehova an mga nagtatao sa saiya kan saindang pinakamakakaya?
20 An pagigin mga oripon nin Dios bakong sobra kanakakapagabat. Al kontraryo, pinapalibre kita kaiyan sa nakakaraot na gayong klase nin kaoripnan na naghahale kan satong kaogmahan. “Mantang kamo nakabutas na sa kasalan kundi nagin nang mga oripon nin Dios,” an surat ni Pablo, “nagbubunga na kamo sa porma nin kabanalan, asin an katapusan buhay na daing katapusan.” (Roma 6:22) An pagpaoripon niato sa Dios nagbubunga sa porma nin kabanalan huli ta inaani niato an mga pakinabang nin banal, o malinig sa moral, na paggawe. Apuera dian, naggigiya iyan sa buhay na daing katapusan sa ngapit.
21 Buka an palad ni Jehova sa saiyang mga oripon. Kun ginigibo niato an satong pinakamakakaya sa paglilingkod sa saiya, binubukasan nia sa sato “an mga gaha kan kalangitan” asin iinuula sa sato an “bendisyon sagkod na mayo na nin kulang.” (Malaquias 3:10) Magigin dakulang kaogmahan nanggad na padagos na maglingkod bilang mga oripon ni Jehova sa bilog na panahon na daing sagkod!
Nagigirumdoman daw Nindo?
• Taano ta nagigin mga oripon kita nin Dios?
• Paano niato ipinapaheling an satong pagpapasakop sa kabotan nin Dios?
• Taano ta maninigo kitang preparado na enoton an kabotan ni Jehova kisa kan sa sato?
• Taano ta dai kita maninigong ‘magsalingoy sa mga bagay na nasa hudian’?
[Mga Hapot Para sa Pag-adal]
[Ritrato sa pahina 16, 17]
An probisyon nin boluntad na kaoripnan sa Israel sarong patanaw sa ngapit kan Kristianong pagkaoripon
[Ritrato sa pahina 17]
Nagigin kitang mga oripon nin Dios kun kita nagpapabautismo
[Mga Ritrato sa pahina 17]
Ineenot kan mga Kristiano an kabotan nin Dios
[Ritrato sa pahina 18]
Nagduwaduwa si Moises na akoon an asignasyon sa saiya