Mga Hapot Hale sa mga Parabasa

An pagkakan daw ni David asin kan saiyang mga tawohan kan mga tinapay na idodolot nagpaparisa na kun nasa masakit na mga kamugtakan puedeng lapason an ley nin Dios na dai mapapadusahan?​—1 Samuel 21:1-6.

Oyon sa Levitico 24:5-9, an mga tinapay na idodolot na sinasalidahan kada Sabbath para sana sa mga saserdote tanganing kakanon ninda. An prinsipyo sa paggamit kaini iyo na an mga tinapay banal asin ini dapat na kakanon kan mga lalaking naggigibo nin paglilingkod sa Dios​—an mga saserdote. An pagtao kaiyan sa ordinaryong trabahador o pagkakan kaiyan para sana sa kaalingan magigin sala nanggad. Minsan siring, an saserdoteng si Ahimelec mayong ginibong kasalan kan ihiras nia an dolot na tinapay ki David asin sa mga tawohan kaini.

Si David minalataw na naggigibo nin sarong espesyal na asignasyon hale ki Hadeng Saul. Nagugutom si David asin an saiyang mga tawohan. Dineterminaran ni Ahimelec na sinda malinig sa seremonyal na paagi. Minsan ngani an pagkakan ninda kan mga tinapay na idodolot bakong tama sa teknikal na paagi, kaoyon iyan kan pundamental na isinabing paggamit kan dolot na tinapay. An konsiderasyon na ini an nagtogot ki Ahimelec na gumibo nin eksepsion sa susundon na iyan. Ginamit mismo ni Jesu-Cristo an insidenteng ini tanganing iilustrar an pagigin sala kan labi-labi kaestriktong pag-aplikar kan ley nin Sabbath na hinahagad kan sa Fariseong interpretasyon kaiyan.​—Mateo 12:1-8.

Minsan siring, an nasambitan sa enotan dai nangangahulogan na an ley nin Dios puedeng lapason kun magin masakit an mga kamugtakan. Halimbawa, nagkaigwa nin garo baga kritikal na situwasyon kan nakikipaglaban an mga parapakilaban na Israelita sa mga Filisteo. Si Hadeng Saul nagsabi: “Sumpaon an tawo na nagkakakan nin tinapay bago an banggi asin sagkod na ako makabalos sa sakong mga kaiwal!” An Biblia nagsasabi: “Sa aldaw na iyan padagos nindang pinabaragsak an mga Filisteo.” An mga soldados pagal sa pakikipaglaban asin gutom, ‘asin an banwaan nagpoon na magbuno nin mga hayop sa ibabaw kan daga asin nagkarakan kaiba an dugo.’ (1 Samuel 14:​24, 31-33) Nagkasala sinda tumang ki Jehova paagi sa paglapas kan saiyang ley dapit sa dugo. An saindang iginawe bakong kaoyon kan solamenteng itinalaga nin Dios na paggamit nin dugo, iyo na ngani an “magin pantubos” para sa mga kasalan. (Levitico 17:10-12; Genesis 9:​3, 4) Marahay sana ta inako ni Jehova an espesyal na mga atang para sa mga nagkasalang idto.​—1 Samuel 14:​34, 35.

Iyo, inaasahan ni Jehova na makuyog kita sa saiyang mga ley sa irarom kan gabos na kamugtakan. “Ini iyo an boot sabihon kan pagkamoot sa Dios,” an sabi ni apostol Juan, “na kuyogon niato an saiyang mga togon.”​—1 Juan 5:3.

[Ritrato sa pahina 30]

Bagong mga tinapay na idodolot an ilinalaag sa laog kan tabernakulo kada Sabbath