Sarong Okasyon na Dapat Girumdomon

ANONG okasyon ini? Iyan an kagadanan nin sarong tawo na nagadan haros 2,000 na taon na an nakaagi. “Itinatao ko an sakong kalag, tanganing iyan akoon ko giraray,” an sabi nia. “Mayo nin siisay man na uminagaw kaiyan sa sako, kundi itinatao ko iyan sa sadiri kong boot.” (Juan 10:​17, 18) An tawong iyan iyo si Jesu-Cristo.

Pinagbotan ni Jesus an saiyang mga parasunod na iselebrar an Memorial kan saiyang kagadanan bilang atang. An okasyon na ini inaapod man na “an pamanggihan nin Kagurangnan.” (1 Corinto 11:20) An Memorial na inestablisar ni Jesus tanganing girumdomon an saiyang kagadanan iseselebrar kan Mga Saksi ni Jehova asin kan mga katood ninda sa Huebes, Marso 24, 2005, pagkasolnop nin saldang.

Ipapaliwanag sa sarong pahayag na basado sa Biblia an kahulogan kan tinapay na daing lebadura asin kan pulang arak na ginagamit para sa okasyon na iyan. (Mateo 26:26-28) Sisimbagon man sa diskurso an mga hapot na siring kaini: Gurano kaparate maninigong iselebrar kan mga Kristiano an okasyon na ini? Siisay an angay na makikabtang sa mga emblema nin tinapay asin arak? Siisay an nakikinabang sa kagadanan ni Jesus? An mahalagang selebrasyon na ini matabang sa gabos na masabotan an katuyohan kan buhay asin kagadanan ni Jesus.

Maogma kamong aakoon sa Memorial kan kagadanan ni Jesus. Ihapot tabi sa Mga Saksi ni Jehova sa lokal an eksaktong lugar na pagtitiriponan asin oras.