Bareta kan mga Parabalangibog kan Kahadean

Paghanap sa mga Maninigo sa Puerang mga Lugar nin Australia

AN NAGKAPIRANG harayong parte kan mahiwason na interior kan Australia dai napatotoohan sa laog nin 12 taon. Kaya an mga Saksi ni Jehova sa Darwin, an kabiserang siudad kan Amihanan na Teritoryo, nag-organisar nin siyam na aldaw nin sigidong kampanya sa paghuhulit tanganing hanapon an mga maninigo.​—Mateo 10:11.

Nagpoon an maingat na pagpaplano 12 bulan bago an kampanya, kaiba an paggibo nin mga mapa para sa labing 800,000 kilometro kuadrado​—sarong lugar na tolong doble an kadakulaan sa Nueva Zelandia. Tanganing magkaigwa nin ideya kun gurano kanapapasuway an mahiwason na teritoryong ini, imahinaron nindo na an ordinaryong agihan nin sasakyan sa sarong bakahan (rantso) may laba na labing 30 kilometros hale sa trangka sa delantera sagkod sa harong! Apuera dian, an nagkapirang bakahan 300 kilometros o labi pa an distansia sa kada saro.

May total na 145 Saksi an nagboluntaryong makikabtang sa kampanya. May mga hale pa sa Tasmania. May mga nag-abot na nakasakay sa duwa an kambiong mga lunadan na may darang mga kasangkapan sa pagkamping, mga piesa, asin gasolina. An iba guyod an saindang mga kasangkapan sa mga harong na de rueda. Dugang pa, duwang auto na igo an 22 na pasahero an inarkila tanganing malunadan kan mga mayo nin angay na mga lunadan na duwa an kambio. An mga lunad sa auto nagkonsentrar sa paghuhulit sa mga nag-iistar sa saradit na banwaan sa piling teritoryo.

Bago magpoon an pagbiahe, an mga tugang na lalaki nag-areglo nin mga pahayag asin demonstrasyon tanganing magtao nin giya kun paano iaatubang an maogmang bareta sa pambihirang teritoryong ini. Halimbawa, tanganing makapaghulit nin epektibo sa mga komunidad nin mga Aborigen sa parate kaipuhan an pagsunod sa nagkapirang protokol asin pakaaram sa mga kostumbre kan mga Aborigen. Tinokar man an may labot sa palibot tanganing makatabang na protehiran an mga hayop na layas.

Nagkaigwa nin dakol na marahayon na eksperyensia. Halimbawa, sa sarong sadit na baryo nin mga Aborigen, inareglo kan mga tugang na magtao  nin pampublikong pahayag na basado sa Biblia. An babaeng namamayo sa komunidad personal na inimpormaran an mga tawo manongod dian. Pagkatapos, 5 libro asin 41 brosyur an ikinapasakamot sa mga nag-atender. Nakaolay sa saro pang sadit na baryo an sarong Aborigen. Sia igwa ngani nin sadiri niang Biblia, sarong King James Version, alagad iyan luma asin parakit na. Kan hinapot kun aram nia an ngaran nin Dios, nagsabi sia na iyo asin ilinuwas sa saiyang diaket an sarong lumang isyu nin An Torrengbantayan. Binasa nia sa magasin, na kinokotar an Marcos 12:​30, na nagsasabi: “Kamotan mo si Jehova na saimong Dios sa bilog mong puso.” An sabi nia, “Talagang gusto ko an tekstong iyan.” Pagkatapos nin detalyadong pag-oolay sa Biblia, inako nia an sarong bagong Biblia asin iba pang babasahon na basado sa Biblia.

Harani sa Golpo nin Carpentaria, an lalaking namamayo sa 400,000 na ektaryang bakahan nagpaheling nin interes sa mensahe kan Kahadean. Kan ipaheling saiya an mga publikasyon na My Book of Bible Stories asin Kaaraman na Minagiya Pasiring sa Buhay na Daing Katapusan, * naghapot sia kun igwa nin ano man na babasahon na makukua sa lenguaheng Kriol. Pambihira ini huli ta dawa dakol na Aborigen an nagtataram nin Kriol, pira sana an nakakabasa kaiyan. An gabos na 50 trabahador sa bakahan na iyan nakakabasa palan nin Kriol. An lalaking namamayo naogmang marhay na makakua nin mga babasahon sa Biblia sa Kriol, asin naoogmang itinao nia an numero kan saiyang telepono tanganing makontak sia.

Durante kan siyam na aldaw na sigidong paghuhulit, may total na 120 Biblia, 770 libro, 705 magasin, asin 1,965 brosyur an ikinapasakamot. Saro pa, 720 pagdalaw liwat an nagibo, asin 215 pag-adal sa Biblia an naponan.

Tunay nanggad, napapanigoan na sa katapustapusi an espirituwal na pagkagutom kan dakol na maninigo na suruwaysuway sa mahiwason na lugar na ini.​—Mateo 5:6.

[Nota sa Ibaba]

[Mapa sa pahina 30]

(Para sa aktuwal na format, hilingon an publikasyon)

AUSTRALIA

AMIHANAN NA TERITORYO

Darwin

Golpo nin Carpentaria

Sydney

TASMANIA