Mga Hapot Hale sa mga Parabasa

Bako daw na ikinompromiso ni apostol Pablo an saiyang Kristianong pagtubod kan sabihon nia sa atubangan kan Sanhedrin: “Ako sarong Fariseo”?

Tanganing masabotan an tataramon ni Pablo, na yaon sa Gibo 23:​6, kaipuhan na konsideraron niato an konteksto kaiyan.

Pagkatapos na pinagsururogan kan mga Judio sa Jerusalem, kinaolay ni Pablo an kadaklan. Sinambit nia na sia “inedukar sa [Jerusalem] sa pamitisan ni Gamaliel, tinokdoan sono sa pagigin estrikto kan Ley nin mga apoon.” Maski ngani nagdangog an kadaklan sa saiyang depensa sa kadikit na oras, kan sinda sa kahurihurihi naanggot nin grabe, an naghahatod na komandante militar dinara si Pablo sa kuartel kan mga soldados. Kan sia hahampakon na, si Pablo nagsabi: “Sono daw sa ley na latigohon nindo an sarong tawo na Romano asin dai pa hinokoman?”​—Gibo 21:27–​22:29.

Kan sumunod na aldaw, dinara si Pablo kan komandante sa atubangan kan korte suprema kan mga Judio, an Sanhedrin. Hineling sindang marhay ni Pablo asin naheling nia na an Sanhedrin kompuesto nin mga Saduceo asin Fariseo. Dangan sinabi nia: “Mga lalaki, mga tugang, Ako sarong Fariseo, sarong aki nin mga Fariseo. Manongod sa paglaom na pagkabuhay liwat nin mga gadan na hinohokoman ako.” Bilang resulta, nagkaigwa nin dai pagkaoroyon sa pag-oltanan kan mga Fariseo asin Saduceo, “huli ta an mga Saduceo nagsasabi na mayo nin pagkabuhay liwat ni anghel ni espiritu, alagad an gabos na iyan ihinahayag sa publiko kan mga Fariseo.” An nagkapira na kabilang sa grupo kan mga Fariseo maisog na nakidiskutir: “Mayo kaming nakukuang sala sa tawong ini.”​—Gibo 23:6-10.

Huling midbid na maigot na marhay na Kristiano, dai puedeng makombensir ni Pablo an Sanhedrin na sia aktibong Fariseo. An mga Fariseo na yaon duman dai maako nin pakipagkompromiso o pagmisrepresentar. Kaya an deklarasyon ni Pablo na sia sarong Fariseo siertong igwa nin limitasyon, asin sierto na base sa kontekstong iyan an nagin pakasabot sa mga tataramon ni Pablo kan mga Fariseo na yaon duman.

Sa pagsabi na sia hinohokoman huli sa paglaom sa pagkabuhay liwat kan mga gadan, malinaw na an gustong sabihon ni Pablo iyo na sa bagay na ini sia kapareho kan mga Fariseo. Sa arin man na kontrobersia dapit sa topikong ini, si Pablo mamimidbid na kapareho kan mga Fariseo imbes na kan mga Saduceo, na dai naniniwala sa pagkabuhay liwat.

An tinutubod ni Pablo bilang sarong Kristiano bakong kakontra kan mga tinutubod kan mga Fariseo sa mga bagay na arog kan pagkabuhay liwat, mga anghel, asin nagkapirang punto sa Ley. (Filipos 3:5) Kaya sono sa limitasyon na ini, puedeng iasosyar ni Pablo an saiyang sadiri sa mga Fariseo, asin sono sa limitadong kahulogan na ini an nagin pakasabot sa saiyang mga tataramon kan mga yaon sa Sanhedrin. Sa siring ginagamit nia an saiyang pinaghalean sa pag-atubang sa may kinakampihan na Judiong korte suprema.

Minsan siring, an pinakadakulang prueba na dai ikinompromiso ni Pablo an saiyang pagtubod maheheling sa padagos na pagkamit nia kan pag-oyon ni Jehova. Kan banggi pagkatapos na sabihon ni Pablo an mga tataramon niang iyan, si Jesus nagsabi: “Magmapuso ka! Huli ta kun paanong ika nagtao nin lubos na patotoo sa mga bagay manongod sa sako sa Jerusalem, ika kaipuhan man na magpatotoo sa Roma.” Huling yaon ki Pablo an pag-oyon nin Dios, dapat kitang magkonklusyon na dai ikinompromiso ni Pablo an saiyang Kristianong pagtubod.​—Gibo 23:11.