Pagkua nin Kaaraman—Ngonyan Asin Sagkod Lamang

AN Aleman na doktor na si Ulrich Strunz nagsurat nin serye nin mga libro na may titulong Forever Young. Sa mga ini nagtao sia nin argumento na an ehersisyo, pagkakan, asin nakakarahay na estilo nin pamumuhay puedeng magpaoswag nin mas marahay na salud asin posibleng magbunga nin mas halawig na buhay. Pero, dai sia nanunuga sa saiyang mga parabasa na aktuwal sindang mabubuhay sagkod lamang sa pagsunod sa saiyang hatol.

Minsan siring, igwa nin sarong klase nin kaaraman na talagang nanunuga nin buhay na daing katapusan. Sa kabaliktaran, kun kamo talagang nabubuhay sagkod lamang, puede kamong kumua nin kapakipakinabang na kaaraman sagkod lamang. Nagsabi si Jesus sa pamibi sa Dios: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) Tawan nguna niato nin kahulogan an terminong “buhay na daing katapusan” dangan determinaran niato kun ano an kalabot sa kaaraman na iyan asin kun paano nindo makukua iyan.

Oyon sa Biblia, dai na mahahaloy liliwaton kan Kaglalang an daga na magin sarong literal na paraiso, na matao nin tamang kamugtakan para sa halawig na buhay. An pagpangyari sa Paraisong iyan may kalabot na listong aksion, na kapareho kan nangyari kan Baha kan kaaldawan ni Noe. An Mateo kapitulo 24, bersikulo 37 sagkod 39, nagpapaheling na ikinomparar ni Jesus an satong kapanahonan sa “mga aldaw ni Noe,” kun saen an mga tawo ‘dai nagmangno’ kan saindang delikadong kamugtakan. Dai man ninda inintindi an mensahe na ihinulit ni Noe. Dangan uminabot an “aldaw na si Noe naglaog sa dahong” asin ginadan kan Baha an gabos na habong umako kan kaaraman  na ini. Si Noe asin an mga kaiba nia sa dahong an nagdanay na buhay.

Ipinaparisa ni Jesus na may kaparehong “aldaw” na maabot sa satong panahon. An mga naghihimate sa kaaraman na may koneksion sa pangyayaring ini magkakaigwa nin oportunidad na bako sanang makaligtas kundi mabuhay man sagkod lamang. Dugang pa, an mga gadan na nasa memorya nin Dios bubuhayon na may oportunidad na dai na noarin man magagadan liwat. (Juan 5:​28, 29) Mangnohon kun paano ipinahayag ni Jesus an duwang ideyang ini. Kan nakikipag-olay ki Marta manongod sa pagkabuhay liwat kan mga gadan, sia nagsabi: “An nagtutubod sa sako, minsan pa sia magadan, mabubuhay; asin an gabos na nabubuhay asin nagtutubod sa sako dai na noarin man magagadan.” An gabos na prueba nagpapaheling na an “aldaw” na ini haranihon na, na nangangahulogan na tibaad “dai na [kamo] noarin man magagadan.”​—Juan 11:25-27.

Dangan hinapot ni Jesus si Marta: “Minatubod ka kaini?” Sia suminimbag: “Iyo, Kagurangnan.” Kun hapoton kamo ni Jesus kan iyo man sanang hapot ngonyan, ano daw an magigin simbag nindo? Tibaad masakitan kamong magtubod sa posibilidad na dai na kamo noarin man magagadan. Alagad dawa arog kaiyan an saindong reaksion, daing duda na gusto nindo na makayang tubodon iyan. Imahinara kun gurano kadakol an puede nindong manodan kun “dai na [kamo] noarin man magagadan”! Imahinaron na nakakamtan nindo an gabos na bagay na minamawot nindong manodan asin magibo ngonyan alagad dai kamo noarin man nagkakaigwa nin panahon para dian. Asin isipon na sana na kaibanan giraray nindo an saindong mga namomotan na nagadan! Ano an kaaraman na puedeng magpagin posible kan siring na mga bagay, asin paano daw nindo makukua iyan?

Pagkua nin Nagtatao nin Buhay na Kaaraman​—May Kakayahan Kitang Magibo Iyan

Mayo daw kita nin kakayahan na magkaigwa kan kaaraman manongod sa Dios asin ki Cristo? Igwa. Totoo na daing katapusan an kaaraman manongod sa mga gibo kan Kaglalang. Pero, si Jesus dai nagtataram manongod sa astronomiya o saro kan iba pang siensia kan pagkonektaron nia an “kaaraman” asin “buhay na daing katapusan.” An Talinhaga kapitulo 2, bersikulo 1 asin 5, nagsasabi na an “mga tataramon” asin “mga togon” na yaon sa Biblia kaipuhan sa “mismong kaaraman nin Dios.” Asin may labot ki Jesus, an Juan 20:​30, 31 nagsasabi na an mga bagay na isinurat igo na tangani na ‘kita puedeng magkamit nin buhay.’

Huli kaini, an kaaraman manongod ki Jehova asin ki Jesu-Cristo na yaon sa Biblia igo na tanganing ipaheling saindo kun paano magkamit nin buhay na daing katapusan. An Biblia sarong daing kaagid na libro. May kabootan na ipinasabong iyan kan Kaglalang sa paagi na dawa an mga tawong daing inadalan na limitado an mga oportunidad puedeng kumua nin igong kaaraman tanganing magkamit nin buhay na daing katapusan. Siring man, an tawong may marikas na isip asin dakol na panahon patin kabuhayan na magagamit pirmeng makakanood nin bagong bagay sa ipinasabong na Kasuratan. An bagay na nababasa nindo an artikulong ini prueba na may kakayahan kamong makanood, alagad paano nindo maninigong gamiton an kakayahan na iyan?

Sa bilog na globo, ipinapaheling kan mga eksperyensia na an pinakaepisienteng paagi na makua an kaaraman na ini iyo an personal na pag-adal sa Biblia sa paggiya nin saro na may pakasabot na sa pinag-aadalan. Kun paanong si Noe naghingoang magtao nin kaaraman sa saiyang mga katemporanyo, an Mga Saksi ni Jehova andam na magpasiring sa saindong harong tanganing ipakipag-olay saindo an Biblia. Puedeng gamiton ninda an brosyur na Ano an Kahagadan sa Sato nin Dios? o an librong tamang-tama an titulo na Kaaraman na Minagiya Pasiring sa Buhay na Daing Katapusan. * Dawa kun  nadedepisilan kamong tumubod sa ideya na sa Paraiso digdi sa daga, an mga maimbod “dai na noarin man magagadan,” makakanood kamong magtiwala sa panugang ini paagi sa mga pag-orolay na ini sa Biblia. Kaya kun gusto nindong mabuhay sagkod lamang o gusto sana nindong maheling kun baga rasonableng maniwala na puede kamong mabuhay sagkod lamang, ano an maninigo nindong gibohon? Akoon nindo an oportunidad na ini na mag-adal sa Biblia.

Gurano kalawig iyan? An 32 na pahinang brosyur na nasambitan pa sana, na makukua sa ginatos na lenguahe, igwa sana nin 16 na haralipot na leksion. O kun makakatagama kamo nin mga sarong oras kada semana, kaipuhan nindo nin pira sanang bulan tanganing pag-adalan an importanteng mga tema sa Biblia, na ginagamit an librong Kaaraman na Minagiya Pasiring sa Buhay na Daing Katapusan. An mga publikasyon na ini nakatabang sa dakol na magkaigwa nin dakol na kaaraman asin makapatalubo nin hararom na pagkamoot sa Dios. Babalosan kan Kaglalang an mga totoong namomoot sa saiya, na nagpapangyaring magkaigwa sinda nin buhay na daing katapusan.

Makakakua nanggad kita nin kaaraman na nagtatao nin buhay, asin pasil man na makua iyan. An Biblia itrinadusir, kisuerra sa sarong kabtang, sa labing 2,000 na lenguahe. An Mga Saksi ni Jehova sa 235 kadagaan naoogmang magtao nin personal na tabang asin nin mga publikasyon na basado sa Biblia tanganing orog pang madagdagan an saindong kaaraman.

Personal na Pag-adal

An saindong relasyon sa Dios sarong personal na bagay sa pag-oltanan nindo asin kan Kaglalang. Kamo sana an makakapagpadanay asin makakapakosog kaiyan, asin sia sana an makakatao saindo nin buhay na daing katapusan. Kun siring, maninigo nindong ipadagos an saindong personal na pag-adal sa saiyang nasusurat na Tataramon. Paagi sa pagtogot na may magdalaw sa saindong harong nin regular, magigin mas pasil para sa saindo na magtagama nin panahon para sa pag-adal.

Huling yaon sa Biblia asin sa mga pantabang sa pag-adal sa Biblia an “mismong kaaraman nin Dios,” angay sana nanggad na ingatan nindo an mga iyan. (Talinhaga 2:5) Sa paaging iyan magdadanay iyan saindo sa dakol na taon. Kun nakaistar kamo sa nagpoprogreso pa sanang nasyon, tibaad dai kamo nakagamit nin dakol na inaadalan na libro sa eskuelahan, na sa pangenot nag-adal kamo paagi sa pagdangog asin pag-obserbar. Halimbawa sa Benin, labing 50 lenguahe an itinataram. Bako nang pambihira para sa mga indibiduwal na sayod na magtaram nin apat o limang lenguahe, maski nungka sindang nagkaigwa nin inaadalan na libro sa mga lenguaheng ini. Sarong bendisyon an saindong kakayahan na makanood paagi sa pagdangog, pag-obserbar, asin pagkonsentrar. Pero, manonompongan nindo na an mga libro makakatabang na marhay sa saindong pag-adal.

Dawa kun an saindong istaran piot, pagmaigotan na magkaigwa nin sarong angay na lugar para sa saindong Biblia asin mga publikasyon na basado sa Biblia. Ibugtak an mga iyan sa lugar na pasil sanang makua asin sa lugar na dai iyan mararaot.

Pampamilyang Pag-adal

Kun kamo sarong magurang, maninigo na magin interesado kamong tabangan an saindong mga aki na magkamit kan iyo man sanang kaaraman na nakukua nindo. Sa nagpoprogreso pa sanang mga nasyon, parateng kinatodan na nin mga magurang na tokdoan an saindang mga aki nin dakol na kinakaipuhan na mga abilidad sa buhay. Tibaad kaiba digdi an pagluto, pagkua nin songo, pagsakdo nin tubig, pag-oma, paninira, asin pakipagribay sa saod. Ini totoo nanggad na edukasyon tanganing mabuhay. Minsan siring, dai iiniiba kan dakol na magurang sa edukasyon na ini an kaaraman na puedeng maggiya pasiring sa buhay na daing katapusan.

Ano man an tibaad magin kamugtakan nindo, nagsasaboot gayod kamo na mayo kamong gayo nin ekstrang panahon. Aram man ini kan Kaglalang. Mapadapit sa kun paano totokdoan an mga aki kan saiyang mga dalan, mangnohon an sinabi nia kaidtong haloy nang panahon: “Dapat na itadom mo an mga iyan sa saimong aki asin magtaram ka manongod dian kun ika nagtutukaw sa saimong harong asin kun ika naglalakaw sa dalan asin kun ika naghihigda asin kun ika minabangon.” (Deuteronomio 6:7) Basado sa mga ideyang ini, taano ta dai nindo pagmaigotan na gumibo nin sadiri nindong programa sa pagtotokdo, arog kan minasunod:

1. “Kun ika nagtutukaw sa saimong harong”: Hingoahon na magkaigwa nin regular na pag-oolay, tibaad semanal, kaiba an saindong mga aki  sa harong, kun paanong may saro na tibaad naggibo man kaiyan saindo. An Mga Saksi ni Jehova nagtatao nin mga publikasyon na basado sa Biblia na angay para sa pagtotokdo sa mga aki na laen-laen an edad.

2. “Kun ika naglalakaw sa dalan”: Kaolayon an saindong mga aki sa impormal na paagi manongod ki Jehova, kun paanong tinotokdoan nindo sinda manongod sa mga pangangaipo sa buhay o tinatawan sinda nin mga giya sa impormal na paagi.

3. “Kun ika naghihigda”: Mamibi kaiba kan saindong mga aki kada banggi.

4. “Kun ika minabangon”: Dakol na pamilya an nagkaigwa nin kapakipakinabang na mga resulta sa pagkonsiderar sa sarong teksto sa Biblia kada aga. Ginagamit kan Mga Saksi ni Jehova an pulyetong Pagsiyasat sa Kasuratan Aroaldaw * bilang basehan kaini.

Sa nagpoprogreso pa sanang mga nasyon, ginigibo kan dakol na magurang an gabos na medyos tanganing masierto na an saro sa saindang mga aki makakua nin marahay na sekular na edukasyon. Sa paaging iyan makakaya kan aki na atamanon an mga magurang kun gurang na sinda. Minsan siring, kun kamo mag-adal sa Biblia asin tabangan an gabos nindong aki na gibohon man iyan, makakamit nindo an kaaraman na mapangyari sa saindo asin sa bilog nindong pamilya na mabuhay sagkod lamang.

Maabot daw an panahon na aram na niato an gabos na bagay? Dai. Mantang an satong daga padagos na nagbibiahe sa daing katapusan na uniberso, padagos kitang makua nin kaaraman. Tunay nanggad, an Eclesiastes 3:11 nagsasabi: ‘An gabos ginibong magayon nin Dios sa kapanahonan kaiyan. Minsan an panahon na daing talaan ibinugtak nia sa saindang puso, tanganing an katawohan dai noarin man makarorop sa ginibo kan tunay na Dios poon sa kapinonan sagkod sa katapusan.’ An pagkua nin kaaraman nakakawiling bagay na nungkang matatapos.

[Mga Nota sa Ibaba]

[Blurb sa pahina 5]

“Ini nangangahulogan nin buhay na daing katapusan, an saindang paglaog sa isip nin kaaraman . . .”

[Mga Ritrato sa pahina 7]

Tabangan an saindong pamilya na magkua nin kaaraman ngonyan asin sagkod lamang