Pagpanigo sa Sarong Pangangaipo sa Macedonia
Pagpanigo sa Sarong Pangangaipo sa Macedonia
“BUMALYO ka pasiring sa Macedonia asin tabangi kami.” (Gibo 16:9) An mga tataramon na ini nin sarong tawo na nagpaheling ki apostol Pablo sa bisyon naghahayag kan pangangaipo na ipahayag an maogmang bareta kan Kahadean nin Dios sa bagong teritoryo, sa mga siudad na ngonyan yaon na sa Grecia.
Sa presenteng nasyon nin Macedonia, igwa nin 1 sanang Saksi ni Jehova sa kada 1,840 habitante. Dakol na tawo an nungka pang nakadangog manongod ki Jehova Dios. Iyo, igwa nin apretadong pangangaipo na madangog kan mga tawo sa nasyon na ini an mensahe nin katoninongan.—Mateo 24:14.
Binuksan nin Dios an dalan tanganing tabangan na mapanigoan an pangangaipong iyan. Sarong aldaw kan Nobyembre 2003, nakaresibi an opisina kan Mga Saksi ni Jehova sa Macedonia sa Skopje nin sarong dai linalaoman na apod sa telepono. Hale iyan sa Sentro Para sa Internasyonal na Kooperasyon sa Macedonia, na iniimbitaran an mga Saksi na maglaag nin sarong puesto tanganing ipaliwanag an saindang mga tinutubod sa tolong aldaw na eksibit na mapoon sa Nobyembre 20. Marahayon nanggad na oportunidad na mahulitan an rinibong tawo na nungka pang nakadangog kan maogmang bareta kan Kahadean!
An mga boluntaryo mahigos na nag-andam asin nag-areglo nin ipapaheling na manlaenlaen na publikasyon kan Mga Saksi ni Jehova sa lenguaheng Macedonio. An mga sampol kan mga babasahon na ini nakalatag tanganing an mga bisita magkua nin mga kopya kun gusto ninda. An nakalatag na mga babasahon nagtao sa dakol nin oportunidad na makakua nin nakakarepreskong espirituwal na tubig na daing bayad.—Kapahayagan 22:17.
An mga bisita partikularmenteng naghahanap nin mga publikasyon na may mga topiko na nakakaapektar sa saindang buhay, siring kan Questions Young People Ask—Answers That Work asin An Sekreto sa Kaogmahan nin Pamilya. * Nobenta y otso katawo an nagtao kan saindang adres, na naghahagad na dalawon sinda kan mga Saksi ni Jehova. Dakol an may paborableng komento sa marahay na ginigibo kan Mga Saksi ni Jehova asin sa kalidad kan saindang mga babasahon.
Duminolok an sarong lalaki sa puesto na kapot an kamot kan sadit niang aking lalaki. An ama naghapot kun baga igwa nin babasahon para sa mga aki. Ipinaheling sa saiya kan mga Saksi an publikasyon na My Book of Bible Stories. * Binuklat nia iyan asin ogmahon na naghapot kun gurano iyan. Kan madangog nia na an gibong pagtotokdo kan Mga Saksi ni Jehova biyong sinusuportaran nin boluntaryong mga donasyon, lalo pa siang naogma. (Mateo 10:8) Ipinaheling nia an libro sa saiyang aki asin nagsabi: “Marahayon nanggad na libro ini! Babasahan ka ni Tatay nin sarong estorya kada aldaw!”
Duminolok sa puesto an sarong propesor sa pilosopiya. Interesado siang marhay sa relihion sa pankagabsan alagad partikularmente sa mga tinutubod kan Mga Saksi ni Jehova. Binubuklat an librong Mankind’s Search for God, * an propesor nagsabi: “Lohiko nanggad an pagkapresentar kan librong ini! Arog mismo kaini an iniisip ko na maninigong paagi nin pagpresentar kan mga bagay-bagay.” Paghaloyhaloy, an nagkapirang estudyante sa saiyang eskuelahan nagpasiring sa puesto asin naghagad nin sadiri nindang kopya kan libro na kinua kan propesor. Gusto nindang pag-adalan an iyo man sanang libro. Iniisip ninda na gagamiton nia an librong iyan sa saiyang mga leksion.
An eksibit nagtao sa nagkapirang tawo kan pinakaprimero nindang pakadangog asin pakabasa kan mga katotoohan sa Kasuratan. Sarong grupo nin bungog na mga tinedyer an nag-abot tanganing maghelingheling sa palibot. Nakipag-olay sainda nin halipot an saro sa mga Saksi, sa tabang nin sarong daragita na nag-interpretar kaiyan sa pagtaram sa senyas. Ginagamit an mga ilustrasyon hale sa librong The Greatest Man Who Ever Lived, * ipinaliwanag nia na pinaomayan ni Jesus an mga may helang, kaiba an mga bungog. Naogma sindang “madangog” an panuga kan Biblia na dai na mahahaloy gigibohon man iyan ni Jesus sa mga tawo na nabubuhay sa daga sa satong kaaldawan. Dakol sa sainda an maogmang inako an mga babasahon na basado sa Biblia, asin iinareglong dalawon sinda nin sarong Saksi na tatao nin pagtaram sa senyas.
Apuera sa Macedonio, an mga babasahon makukua man sa Albaniano, Ingles, asin Turko. An sarong lalaki na dai tataong magtaram nin Macedonio naghagad nin nagkapirang babasahon sa Ingles. Kan maresibi an mga isyu kan magasin na Torrengbantayan asin Awake!, nasambitan nia na sia nagtataram nin Turko. Kan ipinaheling sa saiya an mga babasahon sa sadiri niang lenguahe, nasorpresa siang marhay! Naheling nia na gusto kan Mga Saksi ni Jehova na tabangan an gabos.
Marahayon nanggad na patotoo an ikinatao sa okasyon na iyan, asin nakakaparigon nanggad sa boot na maheling an kadakol na tawo na nagpapaheling nin interes sa katotoohan sa Biblia! Iyo, binuksan ni Jehova an dalan tanganing ipalakop nin orog pa an maogmang bareta kan Kahadean sa Macedonia.
[Mga Nota sa Ibaba]
^ par. 6 Gabos ipinublikar kan Mga Saksi ni Jehova.
^ par. 7 Gabos ipinublikar kan Mga Saksi ni Jehova.
^ par. 8 Gabos ipinublikar kan Mga Saksi ni Jehova.
^ par. 9 Gabos ipinublikar kan Mga Saksi ni Jehova.
[Kahon/Mga Ritrato sa pahina 9]
SARONG MAKAHULOGAN NA PANGYAYARI!
Sarong dakulang lakdang sa paghihingoang ipalakop an maogmang bareta kan Kahadean nin Dios an ginibo kan Mayo 17, 2003. Sarong opisina kan Mga Saksi ni Jehova an idinedikar sa Skopje. Ginibo an pagtogdok sa laog nin duwang taon, na pinahiwas an dating mga pasilidad nin apat na beses.
Nasa tolong suruway na edipisyo an mga opisina para sa pag-administrar asin pagtradusir siring man an istaran na mga kuarto, kusina, asin labahan. Yaon si Guy Pierce, na miembro kan Namamahalang Grupo kan Mga Saksi ni Jehova, tanganing magtao kan pahayag sa dedikasyon. May mga bisita hale sa sampulong laen-laen na nasyon na nag-atender sa programa kan dedikasyon. Ogmahon na marhay an gabos na maheling an magagayon na bagong edipisyo.
[Mapa sa pahina 8, 9]
(Para sa aktuwal na format, hilingon an publikasyon)
BULGARIA
MACEDONIA
Skopje
ALBANIA
GRECIA
[Ritrato sa pahina 8]
Skopje, Macedonia