Sobra Nang Kaaraman Para sa Sato?

An sarong mag-agom na misyonero na nakatukaw sa baybayon sa Solnopan na Aprika pinagmamasdan an garo pirak na liwanag kan bulan sa itaas. “Gurano daw kadakol an aram nin tawo manongod sa bulan, asin gurano pa daw kadakol an manonodan dapit dian?” an sabi kan agom na lalaki.

An saiyang agom suminimbag: “Imahinara na puede niatong masdan an daga na nag-aagi arog kan pagmasid niato sa bulan​—gurano na daw kadakol an aram kan mga tawo, asin gurano pa daw kadakol an manonodan? Asin isip-isipa nanggad! Bako sanang naglilibot an daga sa saldang kundi an satong bilog na sistema solar naghihiro man. Nangangahulogan ini na nungka na gayod na yaon giraray kita sa eksaktong lokasyon na ini sa uniberso. Sa katunayan, naaaraman sana niato an presenteng lokasyon niato sa espasyo huli sa pamilyar na mga bagay sa kalangitan. Kadakoldakol kan kaaraman niato manongod sa nagkapirang bagay alagad masasabi niato na dai ngani niato aram kun haen kita!”

AN MGA ideyang iyan nagsasabi nin pundamental na mga katotoohan. Garo baga kadakol kan manonodan. Siempre, an lambang saro sa sato nakakanood nin bagong mga bagay aroaldaw. Minsan siring, gurano man kadakol an talagang nanonodan niato, garo baga dai niato nakakayang manodan an gabos na gusto niatong maaraman.

Totoo, apuera sa abilidad na kumua nin bagong impormasyon, nadugangan man na marhay an kapasidad na magtipon nin kaaraman. An pinag-iribang memorya nin katawohan duminakulang marhay paagi sa teknolohiya. An hard disk kan komputer ngonyan igwa nin dakulaon na kapasidad kaya kinaipuhan na mag-imbento nin bagong matematikong mga termino na marepresentar kaiyan. An sarong simpleng CD-ROM puedeng magsaray nin dakolon na impormasyon; an kapasidad kaiyan irinepresentar bilang 680 megabytes o labi pa. An sarong ordinaryong DVD puedeng magsaray nin haros pitong doble kaiyan, asin nagkakaigwa na nin mas dakula pa ngani an kapasidad.

An paagi nin pagpaabot nin impormasyon kan tawo sa presenteng mga panahon haros dai niato masabotan. An mga imprentahan nagdadalagan sa masakit paniwalaan na rikas, na nag-iimprenta nin mga peryodiko, magasin, asin libro. Para sa saro na naggagamit nin Internet, daing katapusan na impormasyon an makukua sa saro sanang click. Sa mga ini asin sa dakol na iba pang paagi, an pagpalakop nin impormasyon parikas nang parikas kisa kayang manodan nin siisay man. An kadakolan na ini nin impormasyon kun beses iinaagid sa sarong dagat, na dakulaon kaya kaipuhan na makanood kitang lumangoy dian, sabi ngani, alagad dai pagmaigotan na inomon iyan gabos.  Dahel sa grabeng kadakolan kaiyan, napipiritan kitang magin mapamili.

An saro pang dahelan na magin mapamili iyo na an kadakol na makukuang impormasyon bako nanggad na kapakipakinabang. Sa katunayan, an nagkapira kaiyan bako nganing marahay, mayong pakinabang na maaraman. Girumdomon na an kaaraman nanonongod sa impormasyon​—baga man marahay o maraot, kapakipakinabang o daing pakinabang. An orog pang nakakaribaraw ta may mga bagay na ibinibilang kan dakol na totoo alagad bako nganing tama. Parate nanggad na an mga deklarasyon kan dawa estimadong marhay na mga autoridad napapatunayan sa huri na sala, o bakong totoo! Halimbawa, isipon nindo an rehistrador kan siudad sa suanoy na Efeso, na ibinibilang nanggad duman na sarong opisyal na may kaaraman. Sia nagsabi: “Siisay nanggad sa katawohan an dai nakakaaram na an siudad kan mga taga Efeso iyo an bantay sa templo kan dakulang Artemis asin sa imahen na naholog hale sa langit?” (Gibo 19:​35, 36) Maski ngani garo baga ini an aram kan gabos​—asin dakol an masabi na dai ngani iyan madidiskutir​—bakong totoo na an imahen naholog hale sa langit. May marahay na dahelan na nagpapatanid an Banal na Biblia sa mga Kristiano na magmaan tumang sa “falsong inaapod na ‘kaaraman.’”​—1 Timoteo 6:20.

An mapuersang dahelan na magin mapamili manongod sa kaaraman iyo na an presenteng buhay niato halipot na marhay. Ano man an tibaad edad nindo, daing duda na dakol na klase nin kaaraman an gusto nindong siyasaton, alagad narerealisar nindo na bako man sanang igo an lawig kan saindong buhay tanganing magibo iyan.

Mababago pa daw an pundamental na problemang ini? May makukua daw na klase nin kaaraman na mapalawig na gayo sa buhay, nin sagkod lamang pa ngani? Igwa na daw kan siring na kaaraman? Kun igwa, puede daw na makua iyan kan gabos? Maabot daw an aldaw na an gabos na kaaraman na itinatao totoo? An mag-agom na misyonero na nasambitan sa enotan nakakua nin nakakakontentong mga simbag sa mga hapot na iyan, asin puede man nindong makua iyan. Basahon tabi an masunod na artikulo, na matao sa saindo nin oportunidad na magkua nin kaaraman sagkod lamang.